1-2. (a) Mumu liaka tuli ni shindakenyo ngwetu, Yesu katulongesele jila yashi ya kwiwulukilamo kufwa chenyi? (b) Yitanga yika ya Yesu yize mutushimutwina?

SHINA muhasa kulumbununa yize yakulingiwa ha tangwa lia Kwiwuluka Kufwa cha Kristu? Anji akuli yetu mahasa kwiwuluka mu yimako-yimako yikuma yilemu ya Chiwanyino cha Mwene cha Ufuku. Mumu liaka? Mumu chiwanyino chacho hi chikalu ko. Nawa, chiwanyino chacho chili chilemu chinji. Kashika mutuhasa kulihula ngwetu, ‘Mumu liaka chiwanyino chacho chapwa chashi?

² Muze apwile ni kulongesa hano hashi, Yesu te kamunyingika ngwe mutu yoze wakulongesa umwenemwene ulemu, mu jila yashi ni kuhanjika zwalala hanga atu anyingike yize te akulongesa. (Mateu 7:28, 29) Chizechene nawa, iye kanakatusolwela jila yashi, nawa yipema yakwiwulukilamo * kufwa chenyi. Kashika tushimutwinenenu kanawa Chiwanyino chino ni yuma yize alingile ni yize ambile. Yetu mutuwahilila chinji kumona ngwetu, Yesu kali mukwa kulikehesa, mukwa hamu, nawa mukwa zango, nawa mutulilongesa chize yetu mutuhasa kumwimbulula.

3. Ngwe chize Mateu 26:26-28 unambe, kuchi Chiwanyino chize Yesu aputukile chapwile chashi, nawa yika yuma yino yaali yize azachishile yinalumbunuka?

³ Yesu kapwile ni apostolo jenyi 11 ashishika muze aputukile Chiwanyino cha Kwiwuluka Kufwa Chenyi. Iye kakwachile yize yasalile ku moko ha kulia cha Chizomboka ni kulinga chiwanyino  chino chashi. (Tanga Mateu 26:26-28.) Iye kazachishile wika mbolo yize te yishi ni futunwiso ni vinyu yize apwile nayo ku moko jenyi. Yesu kalwezele apostolo jenyi ngwenyi yuma yino yaali yikehe-yikehe te yinalumbunuka mujimba wenyi ungunu ni manyinga jenyi waze te mamwanga hali ayo. Kota apostolo kakakomokene ha chize iye apwishile chashi chiwanyino chino chaha. Mumu liaka?

4. Kuchi chiyulo chize Yesu hanyine kuli Marta chinatukwasa kunyingika mumu liaka Yesu alingile Chiwanyino chino chashi?

⁴ Tala yize yalingiwile ha tukweji amwe kunyima, ha mwaka wa muchitatu muze te Yesu machambujola sango lipema hano hashi ni kuya ni kumeneka masepa jenyi Lazaru, Marta ni Maria. Ha chisuho chacho, Yesu yaputuka kulongesa. Marta kapwileho, alioze te kanazakalala ni kuteleka chimwe kulia chipema hanga azumbule sepa lienyi mulemu. Muze amwene Marta mazakalala, Yesu ni zango lieswe yamukwasa hanga amone ngwenyi kuteleka kulia chipema chinji te kuchishi ni ulemu unji. (Luka 10:40-42) Ha maola amwe kulutwe, shimbu te kanda achifwa, Yesu yakaula chiyulo chize te akulongesa kuli akwo. Yalinga Chiwanyino chino chashi. Yika yino yinatulongesa hakutwala kuli Yesu?

5. Yika chiwanyino chino chashi chinasolola hakutwala kuli Yesu, nawa kuchi chino chinalite ni A-Fwilipu 2:5-8?

⁵ Ha yuma yeswe yize Yesu ahanjikile ni kulinga, kapwile mukwa kulikehesa. Kashika, kutwatambile kukomoka ha chize iye asolwele kulikehesa ha ufuku wa kasula wa mwono wenyi hano hashi. (Mateu 11:29) Iye kanyingikine ngwenyi kwasala hakehe hanga alambule chitapo chilemu chahiana yitapo yeswe ya hashi nawa ngwo Yehova te mamuhindwisa hanga amunangamise ngwe mwanangana. Chipwe ngwe iye kanyingine yuma yacho, iye kakalipikalile mwene ni kufupa kulemesa kufwa chinyi. Hachino, yalweza tumbaji twenyi hanga apwe ni kwiwuluka chiwanyino chino chashi kamuwika ha mwaka. (Yoa. 13:15; 1 Kori. 11:23-25) Chiwanyino chino chashi alioze chilemu chize Yesu alingile chinasolola ngwo iye hi mukwa kulizata ko. Mutuhasa kuwahilila hakunyingika ngwetu kulikehesa chapwa chitanga chilemu cha Mwanangana wetu.—Tanga A-Fwilipu 2:5-8.

6. Kuchi yetu muhasa kwimbulula kulikehesa cha Yesu muze tunapalika mu yeseko?

⁶ Kuchi mutuhasa kwimbulula kulikehasa cha Yesu? Ha kusa yuma ya akwetu kulutwe kuhiana yize tunafupiwa ku mwono wetu. (Fwili. 2:3, 4) Achinyonga ha ufuku wakasula wa mwono wa  Yesu hano hashi. Yesu kanyingikine ngwenyi te kwasala hakehe hanga amone lamba ni kufwa; chipwe chocho, te kanalihulumba ni apostolo jenyi ashishika, waze te kwasala hakehe hanga anenganyane mumu lia kufwa chenyi. Kashika apalikishile no ufuku wenyi wakasula ni kwalongesa, kwatakamisa ni kwalembejeka. (Yoa. 14:25-31) Yesu ni kulikehesa cheswe yalihulumba hali akwo kuhiana hali iye mwene. Chino chili chilweza chipema chinji kuli yetu!

7. Kuchi Yesu asolwele hamu linji muze aputukile Chiwanyino cha Mwene cha Ufuku?

⁷ Muze Yesu aputukile Chiwanyino cha Mwene cha Ufuku, iye kasolwele hamu linji. Kuchi acho? Yesu katayijile kulinga upale wa Tato, chipwe ngwe kanyingikine ngwenyi te mamushiha hamukunda wa mulonga wa sonyi uze iye kakalingile. (Mat 26:65, 66; Luka 22:41, 42) Yesu yanunga ni ushishiko weswe hanga ahalise jina lia Yehova, kukalila wata wa Zambi ni kwazulula jila hanga atu waze malikonyeka akazuke mwono wa mutolo. Ha mashimbu jacho nawa, Yesu yafumba tumbaji twenyi hakutwala ku yeseko yize te muyiza kulutwe.

8. (a) Yika Yesu alwezele kuli apostolo jenyi ashishika? (b) Kuchi tumbaji twa Yesu embulwile chilweza chenyi cha hamu chipwe muze te iye hafwa?

⁸ Yesu nawa kasolwele hamu ha kuhona kulihulikila ha lamba lienyi, alioze yalihulumba chinji ha yize apostolo jenyi ashishika mafupiwa. Chiwanyino chino chashi chize aputukile muze Yundase akatukile, te muchiyukisa waze te makapwa tumbaji twenyi akuwayisa ni spiritu yiwape yize makazuka ha manyinga waze Yesu amwangine ni kulinga chihanda cha usendo waha. (1Ko 10:16, 17) Mba aakwase kununga ni kushishika nawa akatwame ni Yesu mu malilu, Yesu yalweza tumbaji twenyi ngwenyi iye ni Tato kakwatwaminyina. (Yo 15:12-15) Yesu nawa kalwezele apostolo jenyi hakutwala ku yeseko yize te mapwa  nayo. Kashika, aatakamishine ni kwalweza hanga akaule chilweza chenyi ngwenyi, “hamukenu chikolo!” (Yoa. 16:1-4, 33) Hakupalika cha miaka yinji, tumbaji twa Yesu yanunga ni kukaula chilweza chenyi cha hamu. Chipwe ngwe chino te muchilumbunuka kumona lamba, nihindu ayo te malikwasa umwe ni mukwo mu yeseko yeswayo mapalika.—Hep 10:33, 34.

9. Kuchi mutuhasa kwimbulula Yesu ha kusolola hamu?

⁹ Ni musono nawa, twakukaula chilweza cha Yesu ha kusolola hamu. Chakutalilaho, chakufupiwa hamu mba tukwase mandumbu jetu waze anapalika mu yihungumiona mumu lia ufulielo wo. Ha mashimbu amwe, mandumbu jetu kakwasa mu kamenga chakuhona chitela. Nyi yino yalingiwa, twatamba kulinga chuma cheswacho hanga twakwase hanji kwakalila. (Fwp 1:14; Hep 13:19) Jila yikwo yize twakusolwelamo hamu yili kununga ni kwambujola sango lipema “ni hamu.” (Yi 14:3) Ngwe Yesu, ni yetu mutununga ni kwambujola sango ja Wanangana, chipwe ngwe atu malimika ni yetu hanji kutuhungumiona. Ha mashimbu amwe, mutuhasa kuhona hamu. Mba yika mutuhasa kulinga?

10. Ha poso jimwe shimbu Chiwanyino cha Kwiwuluka Kufwa cha Yesu kanda chilingiwa, yika twatamba kulinga, nawa mumu liaka?

¹⁰ Mutuhasa kukolesa hamu lietu ha kupukuna hakutwala ku kutalatala ni uhashi uze chitapo cha ukuule cha Kristu unakalinga. (Yo 3:16; Efw 1:7) Ha poso jimwe shimbu Chiwanyino cha Kwiwuluka Kufwa cha Yesu kanda chilingiwa, twakupwa ni uhashi ulemu wakusolola usakwililo hakutwala ku ukuule. Ha mashimbu jacho, twatamba kutanga Mbimbiliya hakutwala ku chiwanyino chacho, kulemba ni kupukuna ha yize yalingiwile ha matangwa waze Yesu afwile. Kashika, muze twakuya ha Chiwanyino cha Mwene cha Ufuku, twakupwa nawa ni ulumbunwiso wa mbolo ni vinyu ya yize akuzachisa ha Chiwanyino chacho ni chize yuma yacho yinasolola ulemu wa  chitapo chacho. Nyi twalemesa yuma yize Yesu ni Yehova akulinga hali yetu ni kunyingika chize yino muyituyukisa hamwe ni asoko jetu waze hanafu, kutalatala chetu cha kulutwe lia matangwa muchikola nawa chino muchitutakamisa hanga tunyongonone ni hamu lieswe ndo ku songo.—Hep 12:3.

11-12. Yika twalilongesa ndo ni haliapwila?

¹¹ Ndo ni haliapwila, twalilongesa ngwetu Chiwanyino cha Mwene cha Ufuku chishi kutwiwula wika ulemu wa ukuule, alioze nawa ha yitanga yipema ya Yesu ngwe kulikehesa ni hamu. Twakusakwilila chinji hakunyingaka ngwetu, Yesu kananungu ni kusolola yitanga yipema ngwe Sasendote wa Lutwe yoze wakutuhakwila! (Hep 7:24, 25) Mba tusolole usakwililo wetu, twatamba kwiwuluka kufwa cha Yesu ngwe chize iye atumine kulinga. (Luka 22:19, 20) Twakuchilinga ha tangwa lize linalite ni tangwa lia 14 Nisane, lino lili tangwa lilemu chinji lia ha mwaka.

¹² Mutuhasa kunyonga ha yuma yashi ya Chiwanyino cha Mwene cha Ufuku chitanga chikwo chatwalile Yesu hanga atufwile. Muze apwile hano hashi, kamunyingikine hamukunda wa chitanga chacho. Chitanga chika chenacho?

13. Kuchi Yoano 15:9 ni 1 Yoano 4:8-10 yinashindakenya ha zango lize Yehova ni Yesu akusolola, nawa aya waze makayuka ha zango liacho?

¹³ Yesu kembulwile zango lia Yehova ni ungunu weswe hali yetu ha yuma yeswe yize alingile. (Tanga Yoano 15:9; 1 Yoano 4:8-10.) Chahiana ulemu, zango liakwashile Yesu hanga ahane mwono wenyi hali yetu. Nyi tuli akuwayisa ni spiritu hanji “mapanga akwo,” twakuyuka ha zango lia Yehova ni Mwanenyi lize asolwele ha chitapo chino. (Yoa. 10:16; 1 Yoa. 2:2) Achinyonga nawa ha yuma yize iye azachishile ha Chiwanyino cha Kwiwuluka Kufwa Chenyi; yino yakusolola zango ni vumbi lize Yesu apwile nalio hali tumbaji twenyi. Kuchi acho?

14. Jila yika yize Yesu asolwelemo zango hali tumbaji twenyi?

¹⁴ Yesu kasolwele zango lienyi hali tumbaji twenyi akuwayisa ni spiritu, hi hakuputuka ko ni mianda yikalu, alioze ha kulinga chiwanyino chashi chize o te mahasa kukaula. Ha kukupalika cha mashimbu, tumbaji waze akuwayisa ni spiritu te katamba kununga ni Kwiwuluka Chiwanyino cha Kufwa cha Yesu ha hita mwaka ni kuchilinga ha mashimbu apema hanji api ngwe mu kamenga. (Uso. 2:10) Shina o kahashile kwononokena Yesu? Ewa, kahashile kuchilinga!

15-16. Kuchi amwe ahashile kulinga Chiwanyino cha Kufwa cha Mwene chipwe muze apwile mu kapinda?

¹⁵ Putu ku sekulu yitangu ndo musono, akwa-Kristu amwenemwene kakusa tachi hanga ewuluke kufwa cha Yesu. Ayo kakufupa kulinga Chiwanyino cha Mwene cha Ufuku mu mulali walita kanji-kanji chipwe muze ali mu yipikalo. Tutalenu yimwe yilweza. Muze te ndumbu Harold King apwile ukawenyi mu zuwo lia ususu mu China, kasele tachi hanga ahase kwiwuluka Chiwanyino cha Kufwa cha Yesu. Ni mana eswe yalulieka yilayi apwile nayo ku moko yize akuzachisa ha Chiwanyino chacho. Iye kalwile kanawa mashimbu waze Chiwanyino cha Kwiwuluka Kufwa cha Yesu chakulingiwa ni kulihulikila ha tangwa liacho. Muze ola ya Chiwanyino chacho yakumbanyine, iye yemba mwaso, yalemba nawa yalinga pande ukawenyi mu zuwo lia ususu.

¹⁶ Tutalenu chilweza chikwo. Chimwe chizavu cha mapangi, waze te ali ku chilombo cha maswalale ha mashimbu a Jita yamuchiali ya Hashi Heswe, yasa mwono wo mu ponde mumu lia Chiwanyino cha Mwene cha Ufuku. Hachino, amu yilayi yize akuzachisa ha Chiwanyino chacho yili yashi, ayo yahasa kulinga Chiwanyino cha Kwiwuluka Kufwa cha Yesu. Yamba ngwo: “Twatwamine hamuwika ni kulikungulula, chocho yitwala hina litoma helu lia limwe shiki ni kusaho yilayi yacho. Nyi kachi twakwachishile kahia kazembwe  te muchihasa kutusolola yuma yize te tunalingi. . . . Twakusolola nawa usakwililo wetu kuli Tata yetu ha kuzachisa tachi jetu jeswe hanga tuhakwile jina Lienyi lisandu.” Uno uli ufulielo wangunda uze ayo asolwele! Nawa zango lize Yesu asolwele muze alingile Chiwanyino cha Kwiwuluka Kufwa Chenyi mulitukwasa kusolola hamu chipwe muze mutupwa mu kapinda!

17. Yihula yika twatamba kulihula?

¹⁷ Muze Chiwanyino cha Kwiwuluka Kufwa cha Yesu chinakundama, mutuhasa kulihula ngwetu: ‘Kuchi munguhasa kwimbulula Yesu ha kusolola zango? Shina nakulihukila ha yipikalo ya mandumbu jami nyi hali yami mwene wika? Kutala nakushimbwila chinji ha yize mandumbu jami mahasa kulinga hanji kuhana, nyi ngunanyingika ngwami kuli yimwe yize no kechi kuhasa kulinga?’ Mutuhasa kwimbulula Yesu ni kusolola zango ha kupwa eswe ni “kunyonga chimuwika.”—1 Petu. 3:8.

18-19. (a) Shindakenyo yika mutuhasa kupwa nayo? (b) Yika twatamba kununga ni kulinga?

¹⁸ Chiwanyino cha Kwiwuluka Kufwa cha Yesu kuchichi kununga ha mashimbu anji. Muze Yesu ‘makeza’ ha luyinda munene, iye makakunga waze “hanaatongola” hanga aye mu malilu, chocho kuchichi kalingiwa nawa Chiwanyino chacho.—1 Kori. 11:26; Mateu 24:31.

¹⁹ Chipwe ngwe Chiwanyino cha Kwiwuluka Kufwa cha Yesu kuchichi kalingiwa nawa, nihindu mutuhasa kupwa ni shindakenyo ngwetu, atu ja Yehova ni zango lieswe makewuluka Chiwanyino chino, ngwe chilayi chilemu cha kulikehesa, cha hamu ni zango lize Yehova ni Yesu asolwele hali atu eswe. Ha mashimbu jacho waze te akulinga Chiwanyino chino chipema, kwamba umwenemwene, makalweza kuli eswe makapwa ni mwono hakutwala ku yiwape yacho. Alioze mba tuyuke ni Chiwanyino chacho, twatamba kununga ni kwimbulula kulikehesa, hamu ni zango lia Yesu. Nyi twachilinga mutuhasa kupwa ni shindakenyo ngwetu, mutukatambula kwononona chetu kuli Yehova.—2 Petu. 1:10, 11.