1. Kuchi mutuhasa kusanyika Yehova?

YEHOVA kali ni umwe usoko wa waze akumuwayila. Mu usoko wacho muli Yesu, “swana wa yuma yeswe atangile” ni tununu a tununu twa angelo. (Kolo. 1:15; Samu 103:20) Chikwo nawa, muze Yesu apwile hano hashi kasolwele ngwenyi, atu waze ashishika mahasa kusanyika Yehova ngwo, Tata. Muze ahanjikile ni tumbaji twenyi, Yesu kasanyikine Yehova ngwenyi, “Tata kanda Tatenu.” (Yoa. 20:17) Muze twakulihana kuli Yehova ni kutupapachisa, twakupwa mu usoko wa mandumbu jetu waze akutuzanga.—Marku 10:29, 30.

2. Yika mutulilongesa ha mutwe uno?

² Atu amwe chakwakalila kumona Yehova ngwe umwe Tata wa zango. Akwo kota kanyingikine chize mahasa kusolola zango kuli mandumbu jo a ku ufulielo. Mutwe uno, muusolola chize Yesu akutukwasa tumone ngwo, Yehova kali Tata wa zango yoze mutuhasa kukundama. Nawa mutulilongesa chize mutuhasa kwimbulula Yehova ha chize twakutwama ni mandumbu jetu a ku ufulielo.

3. Kuchi kulemba cha mwene chakutukundamisa kuli Yehova?

³ Yehova kali Tata wa zango. Yesu kanazange hanga tumone Yehova ngwe chize iye akumumona: Tata wa zango yoze mutuhasa kukundama, hi ngwe mutu ko yoze keshi zango nawa mukalu. Chino chinasoloka zwalala ha kulemba chize Yesu alongesele tumbaji twenyi. Iye kaputukile kulemba cha mwene ni maliji wano anambe ngwo: “Tata.” (Mateu 6:9) Yesu kachi katulongesele kusanyika Yehova ngwo, “Mukwa-Ndundo-Jeswe,” “Tangi” hanji “Mwanangana wa Miakulwila.” Yisanyiko yino yeswe, yinalite nawa yili mu Mbimbiliya. (Uputu. 49:25; Iza. 40:28; 1 Timo. 1:17) Alioze, Yesu katulongesele kusanyika Yehova  ngwo “Tata,” chisanyiko chize chakutukwasa kukundama kuli iye.

4. Kuchi tunanyingika ngwetu, Yehova kanazange kukundama kuli yetu?

⁴ Shina chakukukalila kumona Yehova ngwe Tata wa zango? Amwe che akunyonga. Mumu nyi yisemi jo kakapwile ni kwasolwela zango, muchihasa kupwa chikalu kuli ayo kunyonga ngwo, kuli umwe yoze wakwazanga. Alioze, chili utakamiso kunyingika ngwo, Yehova kananyingika kanawa chize twakwivwa! Iye kanazange kukundama kuli yetu. Kashika Liji lienyi liakutukolweza ngwo: “Kundamenu kuli Zambi, mba iye kumakakundama kuli yenu.” (Tia. 4:8) Yehova kakutuzanga nawa kali Tata mupema yoze unahiane atata eswe.

5. Kulita ni Luka 10:22, kuchi Yesu akutukwasa kukundama kuli Yehova?

⁵ Yesu mahasa kutukwasa hanga tukundame kuli Yehova. Kukushi niumwe yoze unanyingika kanawa Yehova kuhiana Yesu. Iye kembulwile yitanga ya Tato ni ungunu weswe, kashika ambile ngwenyi: “Yoze wangumona, hamona mwe Tata.” (Yoa. 14:9) Yesu kali ngwe yaya yoze wakutulongesa chize mutuvumbika ni kwononokena Tata yetu, kumuvwisa kuwaha ni chize mutuzuka utayizo Wenyi. Alioze chahiana ulemu, Yesu kakutukwasa kunyingika yitanga ya Yehova, ngwe zango ni umbovu wenyi. (Tanga Luka 10:22.) Tutalenu yimwe yilweza yize yinasolola ngwo, Yehova kali Tata wa zango.

6. Kuchi tunanyingika ngwetu, Yehova kapwile ni kwivwa yilemba ya Yesu?

⁶ Yehova kakupanjika ana jenyi. Tutalenu yimwe yuma yize yinasolola ngwo, Yehova kapanjikile Mwanenyi mutangu. Muze apwile hano hashi, Yesu kalembele yisuho yinji nawa Yehova kamupanjikile. (Luka 5:16) Yehova kevwile Mwanenyi malemba hakutwala ku yiyulo yilemu yize te atamba kukwata. Chakutalilaho, ngwe muze asakwile apostolo 12. (Luka 6:12, 13) Iye nawa kevwile Yesu malemba muze te anasakalala chinji. Muze kwasalile hakehe hanga amukunjike, Yesu yalemba kuli Tato ni mbunge yeswe hakutwala ku cheseko chize te mapalika. Ha chisuho chacho, Yehova kakamupanjikile wika, alioze yatuma nawa  mungelo hanga atakamise Mwanenyi yoze azanga chinji.—Luka 22:41-44.

7. Kuchi wakwivwa ha kunyingika ngwo, Yehova kakupanjika yilemba yetu?

⁷ Musono, Yehova kananungu ni kupanjika yilemba ya tuvumbi twenyi ni kuyikumbulula ha shimbu lialita nawa mu jila yalita. (Samu 116:1, 2) Umwe pangi ku Índia, kamwene chize yino yalingiwile ku mwono wenyi. Kapwile ni kusakalala chinji. Chocho, yalemba kuli Yehova ni mbunge yeswe ni kumulweza chize te anevu. Mwene yasoneka ngwenyi: “Programa ya JW Broadcasting^® ya Maio 2019 yize yahanjikile ha kulihulumba ni kusakalala, ye te ngunafupiwa ha mashimbu jacho. Yehova kakumbulwile yilemba yami kupalikila mu programa yacho.”

8. Kuchi Yehova asolwele ngwo kakuzanga Yesu?

⁸ Yehova kakutuzanga ni kutufunga ngwe chize alingile kuli Yesu muze apwile hano hashi. (Yoa. 5:20) Yehova kafungile Yesu ha yize te anafupiwa ku spiritu, ku manyonga ni ku musunya. Nawa kasolwele zwalala kuli Mwanenyi ngwo, kakumuzanga ni kumutayiza. (Mateu 3:16, 17) Chikwo nawa, Yesu te keshi kulivwa ukawenyi mumu kanyingikine ngwenyi, Tato wa mu malilu mahasa kumukwasa ha shimbu lieswalio.—Yoa. 8:16.

9. Yuma yika yinasolola ngwo Yehova kakutuzanga?

⁹ Chizechene ngwe Yesu, tulieswe hitunamono ngwetu Yehova kakutuzanga mu majila eka ni eka. Achinyonga hachino: Yehova kakutwita hanga tupwe masepa jenyi, nawa kakutufunga ku manyonga kupalikila muli mandumbu jetu a ku ufulielo waze akutukwasa muze tuli ni yipikalo. (Yoa. 6:44) Yehova nawa kakutufunga ku spiritu ha kutwaha yeswe yize tunafupiwa hanga tukolese ufulielo wetu. Iye nawa kakutukwasa ku musunya, ha kutwaha yeswe yize tunafupiwa hanga tulikwase nayo. (Mateu 6:31, 32) Muze twakunyonga chize Yehova akutuzanga, zango lietu hali iye liakwoka.

10. Kuchi mutuhasa kwimbulula Yehova ha kuzanga mandumbu jetu?

¹⁰ Yehova kakuzanga mandumbu jetu eswe a ku ufulielo. Alioze, muchihasa kupwa chikalu kuli yetu kuzanga mandumbu jetu. Ha mashimbu amwe, chakupwa chikalu mumu tuli aku minyachi yalisa nawa twakolele ku yihela yalisa. Chikwo nawa, tulieswe twakulinga yuma yize yakuvwisa akwetu kupiha hanji chinyengo. Chipwe chocho, hita umwe wa kuli yetu mahasa kukwasa hanga zango lize tukwete hali umwe ni mukwo likole. Kuchi mutuhasa kuchilinga? Mutuhasa kuchilinga ha kwimbulula Yehova ni kusolola zango kuli mandumbu jetu. (Efwe. 5:1, 2; 1 Yoa. 4:19) Tutalenu yize mutuhasa kulilongesa ha chilweza cha Yehova.

11. Kuchi Yesu embulwile “mbunge ya keke” ya Yehova?

¹¹ Yehova kakwete “mbunge ya keke.” (Luka 1:78) Mukwa-mbunge ya keke, kakulihulumba hali mutu yoze unamono lamba nawa kakufupa majila akumukwashilamo ni kumutakamisa. Chizechene ngwe Yehova, Yesu neye kasolwele ngwo kakwete mbunge ya keke ha chize te akutwama ni akwo. (Yoa. 5:19) Muze Yesu amwene ‘mbunga, yaavwila keke, mumu te kanalikatalisa ni kulimbilambila, ngwe mapanga waze keshi kafunga.’ (Mateu 9:36) Alioze Yesu kakevwile wika keke, kalingile nawa yimwe hanga akwase atu jacho. Iye kawukile mieji ni kutakamisa waze ‘eswe akukilikita ni kulemewa.’—Mateu 11:28-30; 14:14.

12. Hana yilweza ya chize mutuhasa kusolola keke?

¹² Mba twivwile mandumbu jetu keke, chitangu twatamba kunyingika yipikalo yize anapalika. Chakutalilaho, tunyongenu ngwetu umwe pangi hanji kali ni musongo upi. Iye keshi kulinyenga-nyenga ha musongo wacho, alioze hanji mafupiwa umwe ukwaso. Shina iye  kanahase kufunga kanawa asoko jenyi? Kutala mawahilila nyi umwe ndumbu mamukwasa kuteleka ni kululieka mu zuwo? Hanji muchihasa kupwa ngwo, umwe ndumbu mulimo wamufwa. Shina mutuhasa kumukwasa shimbu kanda achiwana mulimo? Hanji mutumwaha kama mbongo chakuhona kunyingika ngwo yetu twamwahajo.

13-14. Kuchi mutuhasa kupwa yihanyi ngwe Yehova?

¹³ Yehova kali chihanyi. (Mateu 5:45) Yetu kutwatambile kushimbwila mandumbu atwite ukwaso, mba twasolwele keke. Chizechene ngwe Yehova, twatamba kulianga kwakwasa, shimbu ayo kanda achitwita ukwaso wacho. Yehova kakuvumbula tangwa hali yetu matangwa eswe chakuhona kumwita! Nawa kusasaminya cha tangwa chakukwasa atu eswe hano hashi, hi wika ko waze akusakwilila Yehova. Amu akutwaha yeswe yize tunafupiwa, Yehova kakusolola ngwo kakutuzanga. Ni yetu twakumuzanga chinji hakupwa Tata mupema nawa chihanyi.

¹⁴ Mandumbu ni mapangi jetu anji kakwimbulula Yehova hakupwa yihanyi, chino chakwatwala hanga akwase akwo. Chakutalilaho, ha mwaka 2013, kakundukundu avuluka ngwo Haiyan, kapihishile yuma yinji mu Filipinas. Mandumbu anji katokesele mazuwo ni yikumba yo. Alioze kawashi-washi, asoko jetu a ku spiritu a hashi heswe, yaya ni kwakwasa ha yize te anafupiwa. Mandumbu anji kahanyine milambu, ni kulihana hanga alulieke ni kutungulula mazuwo 750 ha amwe tukweji! Ha mashimbu a musongo wa COVID-19, Yela ja Yehova kasele tachi hanga akwase mandumbu jo ha yize te anafupiwa. Muze twakulihana kawashi-washi hanga tukwase asoko jetu a ku spiritu, twakusolola ngwetu twakwazanga.

15-16. Kulita ni Samu 86:5, kuchi mutuhasa kwimbulula Tata yetu wa mu malilu?

¹⁵ Yehova kakutukonekena. (Tanga Samu 86:5.) Hita tangwa, Tata yetu wa mu malilu kakutukonekena. (Samu 103:10-14) Nawa Yesu kembulwile kanawa Tato. Chipwe ngwe tumbaji twenyi kapwile yihenge, nihindu iye katwamine no kanawa ha kwasolwela keke ni kwakonekena. Chikwo nawa, Yesu kahanyine mwono wenyi hanga Zambi akonekene shili  yetu. (1 Yoa. 2:1, 2) Kunyingika ngwo, Yehova ni Yesu kakutukonekena chakwokesa zango lietu hali ayo.

¹⁶ Zango lize liakununga usoko wetu wa ku spiritu, liakukola chinji muze ‘twakulikonekena ni mbunge yeswe.’ (Efwe. 4:32) Chipwe ngwe ha mashimbu amwe hi chashi ko kukonekena akwetu, nihindu twatamba kusa tachi hanga tupwe ni kwakonekena. Chikuma chimwe chize chakwashile umwe pangi, chili ha Kaposhi wa Kutalila, chinambe ngwo: “Likonekenenu Umwe ni Mukwo ni Mbunge Yeswe.” * Iye yasoneka ngwenyi: “Kulilongesa chikuma chacho, changukwashile kumona ulemu wa kukonekena akwetu. Chikuma chacho chasolwele ngwo, kukonekena akwetu kuchalumbunukine kutayiza yuma yipi yize ayo alinga hanji kulelesa upi uze atulinga. Alioze chinalumbunuka kwecha kutulika toto ha upi uze atulinga ni kufunga sambukila yetu.” Muze twakukonekena mandumbu jetu ni mbunge yeswe, twakusolola ngwetu twakwazanga ni kwimbulula Tata yetu, Yehova.

17. Kulita ni Mateu 5:16, kuchi mutuhasa kuhalisa Yehova?

¹⁷ Chili chiwape chinene kupwa mu usoko wa mandumbu jetu a hashi heswe waze akulizanga umwe ni mukwo. Tunazange hanga atu anji alichinge ni yetu tuwayile no Zambi hamuwika. Kashika, twatamba kukeya hanga tuchine kulinga chuma chize muchipihisa lufuma wa Yehova ni wa atu jenyi. Twakusa tachi mashimbu eswe hanga tusolole yitanga yize muyikwasa atu atayize sango lipema.—Tanga Mateu 5:16.

18. Yika muyihasa kutukwasa tuhone kwivwa woma wa kwambujola?

¹⁸ Ha mashimbu amwe, atu kakutwamba yuma yipi hanji kutuhungumiona mumu lia kwononokena Yehova. Shina chino chakukuvwisa woma wa kuhanjika ni akwenu hakutwala ku yize wafuliela? Nyi chocho, pwako ni shindakenyo ngwe, Yehova ni Mwanenyi makukwasa. Yesu kalwezele tumbaji twenyi ngwenyi, katambile kulipikala ha yize mahanjika ni chize mahanjika. Mumu liaka? Yesu yalumbununa  ngwenyi: “Kanda nukalipikala ha chize munukahanjika: mumu ola yizeyene Zambi kumakanwaha chize munwamba. Mumu hi yenu ko nwakuhanjika, alioze mwe spiritu wa Tatenu iye wakuhanjika muli yenu.”—Mateu 10:19, 20.

19. Hana chilweza cha umwe yoze wambulwile sango lipema ni hamu?

¹⁹ Tutalenu chilweza cha Robert. Muze aputukile kulilongesa umwenemwene, kakapwile ni yinyingi yinji ya Mbimbiliya. Tangwa limwe, yamusanyika ku chota cha usopelo mu África do Sul hanga alumbunune mumu liaka analituna kupwa swalale. Ni hamu lieswe, yalumbunwina ngaji ngwenyi, kazangile kupwa swalale mumu kakuzanga mandumbu jenyi a ku ufulielo. Iye te kakusakwilila ha kupwa mu usoko wa Yehova! Hazehene, ngaji yamuhula ngwenyi: “Mandumbu jacho aya?” Robert kakapwile ni kushimbwila chihula chino. Alioze hazehene, yewuluka chisoneko cha ha tangwa cha Mateu 12:50, chinambe ngwo: “Mweswawo malinga upale wa Tata yoze uli mu malilu, iye mapwa mwanakwetu ni pangiami ni mama.” Chipwe ngwe Robert te machiputuka kulilongesa Mbimbiliya, nihindu Yehova yamwaha spiritu yisandu hanga akumbulule chihula chacho ni yihula yikwo yize te keshi ni kushimbwila. Yehova kanakawahilila chinji hali Robert! Iye nawa kakuwahilila chinji hali yetu muze twakumujikijila ni kupwa ni hamu lia kwambujola ha mashimbu akalu.

20. Yika watamba kununga ni kulinga? (Yoano 17:11, 15)

²⁰ Twakusakwilila chinji ha kupwa mu usoko wa mandumbu waze akulizanga umwe ni mukwo. Tuli ni Tata mupema yoze unahiane a tata eswe, nawa tuli ni mandumbu anji waze ashishika. Kanda unyonga ngwe amu uli mu usoko uno kuuchi kuhasa kutuhukamo. Satana ni atu jenyi kakutuvwila kole ni kututwala tunyonge ngwo, Yehova keshi kutuzanga. Chikwo nawa, ayo kakufupa kupihisa kulinunga chetu. Alioze, Yesu ketele kuli Tato hanga atukwase tununge ni kufunga kulinunga chetu. (Tanga Yoano 17:11, 15.) Nawa Yehova kakukumbulula kulemba chacho. Chizechene ngwe Yesu, pwako ni shindakenyo ngwo, Yehova kakukuzanga nawa makukwasa. Kashika nunga ni kupwa mu usoko wetu wa ku spiritu.