MUTWE WAKULILONGESA 39
Muze Mutu Yoze Twazanga Mecha Kuwayila Yehova
‘Yisuho yipwa haha . . . amuvwishile kupiha.’—SAMU 78:40.
MWASO 102 “Kukwasa Waze Keshi Tachi”
CHIKUMA CHILEMU *
1. Kuchi atu amwe akwivwa muze mutu yoze azanga akwecha kuwayila Yehova?
SHINA uli ni umwe usoko hanji sepa yoze hanasosolola mu chikungulwila? Chino kota chakukuvwisa yinyengo yinji! Pangi Hilda * yamba ngwenyi: “Muze mukwetu-lunga afwile hanyima lia kukumbanyisa miaka 41 ya umbachiso wetu, namwene ngwe, chino chili chuma chikalu chinji chize chalingiwa ku mwono wami. Alioze, muze mwanami echele kuwayila Yehova, ni kuhichika mukwo-pwo ni ana jenyi, nevwile yikola yinji kuhiana.”
Yehova kananyingika kanawa yikola yize twakwivwa muze mutu yoze twazanga akuhichika umwenemwene (Tala paragrafu 2-3) *
2-3. Kulita ni Samu 78:40, 41, kuchi Yehova akwivwa muze tuvumbi twenyi akwecha kumuwayila?
2 Achinyonga yikola yize Yehova evwile muze angelo waze apwile mu usoko wenyi amuhichikile. (Yunda. 6) Nyonga nawa yikola yize evwile muze amwene A-Izalele, atu jenyi waze te azanga chinji mamwehuka ha yisuho yinji. (Tanga Samu 78:40, 41.) Pwako ni shindakenyo ngwe, nyi umwe usoko hanji sepa lie mahichika umwenemwene, Yehova neye kakwivwa yikola yinji. Tata yetu wa mu malilu kananyingika kanawa yikola yize unevu. Ni zango lieswe, iye makutakamisa ni kukwaha ukwaso uze mufupiwa.
3 Ha mutwe uno, mutulilongesaho yize mutuhasa kulinga mba tuzuke ukwaso wa Yehova muze mutu yoze twazanga mecha kumuwayila. Mutulilongesa nawa chize mandumbu akwo mu chikungulwila mahasa kukwasa waze anapalika mu ukalu wacho. Alioze, chitangu mutumona nyonga lipi lize twatamba kwehuka.
KANDA ULILAMIKIZA
4. Kuchi yisemi anji akwivwa nyi umwe mwana mahichika umwenemwene?
4 Nyi umwe mwana mecha kuwayila Yehova, kanji-kanji yisemi kakunyonga ngwe kakasele tachi hanga amukwase kununga mu umwenemwene. Hanyima lia kusosolola mwanenyi, ndumbu Luka, yamba ngwenyi: “Napwile ni kulilamikiza chinji. Ni e tulo te chishi kwamona. Ha mashimbu amwe, te nakulila ni kwivwa yikola ku mbunge.” Pangi Elizabete, yoze neye mwanenyi wahichikile umwenemwene, te kakulilamikiza hakwamba ngwenyi: “Hanji yami mwe chakamukwashile, kashika amusosolwele. Chinasoloka ngwe chakasele tachi hanga ngumulongese kanawa umwenemwene.”
5. Nyi umwe mutu mahichika Yehova, mulonga wakupwa waya?
5 Twatamba kwiwuluka ngwetu, Yehova kahanyine kuli hita umwe wa kuli yetu, nyonga lia kusakula chipi ni chipema. Chino chinalumbunuka ngwo, hita mutu mahasa kusakula kwononokena Yehova hanji ka. Chakutalilaho, akweze amwe yisemi jo kakapwile chilweza chipema, chipwe chocho, ayo hanasakula kuwayila Yehova. Akweze akwo kaalelele kuli yisemi waze asele tachi hanga aalongese shimbi ja Zambi. Alioze muze akolele, ene yasakula kwecha kuwayila Yehova. Yika chino chinasolola? Chinasolola ngwo, hita mutu kali ni ulite wa kusakula nyi mawayila Yehova nyi ka. (Yoshu. 24:15) Kashika yisemi, nyi nunevu yinyengo mumu mwanenu hanahichika Yehova, iwulukenu ngwenu: mulonga hi wa yenu ko.
6. Kuchi umwe mukweze mahasa kwivwa nyi chisemi mahichika umwenemwene?
6 Ha mashimbu amwe, umwe chisemi mahasa kuhichika umwenemwene hanji chipwe lume kuhichika usoko wenyi. (Samu 27:10) Chino muchihasa kupwa chikalu kuli ana, mumu kanji-kanji ayo kakumona yisemi jo ngwe yilweza yipema yize atamba kwimbulula. Ester, yoze tato wahichikile umwenemwene, yamba ngwenyi: “Kanji-kanji te nakulila, mumu tata mwene mwe wasakwile kuhichika umwenemwene. Nakuzanga chinji tata, kashika muze amusosolwele te nakulihulumba chinji hali iye. Nawa napwile ni kwivwa-vwa mwongo unji.”
7. Kuchi Yehova akwivwa hali mukweze yoze umwe wa kuli yisemi jenyi hanamusosolola?
7 Akweze, nyi umwe wa kuli yisemi jenu hanamusosolola, ni yetu tunevu yikola yinji ku mbunge! Muhasa kupwa ni shindakenyo ngwo, Yehova kananyingika kanawa yikola yize unevu. Iye hamwe ni yetu mandumbu je a mu ufulielo, twakukuzanga nawa twakulemesa ushishiko we. Chikwo nawa, iwuluka ngwe yena kuushi ni mulonga ha yiyulo yize yisemi je makwata. Ngwe chize hitwevwa, Yehova hanahane kuli hita mutu ulite wa kusakula yize malinga. Nawa, hita mutu yoze hanalihane kuli Yehova ni kumupapachisa, “kumambata chiteli chenyi mwene.”—Ngala. 6:5.
8. Muze amwe anashimbwila hanga usoko wo ahiluke kuli Yehova, yika atamba kulinga? (Tala mushete, “ Volte para Jeová.”)
8 Muze mutu yoze wazanga mecha kuwayila Yehova, hi chipi ko kushimbwila ngwo tangwa limwe mahiluka kuli Iye. Yika muhasa kulinga ha shimbu lize iye kanda ahiluka? Ha shimbu liacho, chili chilemu kufunga ufulielo we. Nyi wachilinga, muupwa chilweza chipema kuli asoko je, chipwe kuli yoze hanasosolola. Muupwa nawa ni tachi jize unafupiwa hanga ukumbe manyonga api. Tutalenu yuma yimwe yize muhasa kulinga.
YIZE MUHASA KULINGA HANGA UNUNGE NI KUKOLESA UFULIELO WE
9. Yika muhasa kulinga mba Yehova akwehe tachi? (Tala mushete, “ Yisoneko Yize Muyikutakamisa Nyi Umwe Usoko we Mahichika Yehova.”)
9 Pwako ni katalilo wa yuma yize mulinga ku ufulielo. Chili chilemu chinji kununga ni kukolesa ufulielo we ni wa asoko je akwo. Kuchi muhasa kuchilinga? Nunga ni kutanga Mbimbiliya matangwa eswe, kupukuna ha yize unatange ni kukunguluka ha poso jeswe. Nyi wachilinga, Yehova makwaha tachi jize mufupiwa. Joana yoze tato ni ndumbwenyi wa pwo ahichikile Yehova, yamba ngwenyi: “Nakuwana utakamiso hanyima lia kutanga yilweza ya mu Mbimbiliya ngwe, ya Abigale, Estere, Yosefwe ni Yesu. Yilweza yo yakungukwasa ngupwe ni manyonga apema ni kutepulula yikola yize nakwivwa ku mbunge. Chikwo nawa, miaso yetu ya JW Broadcasting, neyo yakungutakamisa chinji.”
10. Kuchi Samu 32:6-8, muuhasa kukukwasa muze unevu yikola ku mbunge?
10 Lweza Yehova chize unevu. Muze unanenganyana, kanda ulitwamina kulemba kuli Iye. Mwite hanga akukwase kumona chikuma chacho kulita ni nyonga lienyi. Mwite nawa hanga ‘akufumbe, ni kukulongesa jila yize chakutamba kwenda.’ (Tanga Samu 32:6-8.) Kwamba pundu, hi chashi ko mashimbu eswe kulweza Yehova chize unevu. Alioze iye kananyingika kanawa chize wakwivwa. Kakukuzanga chinji nawa kanakukolweza hanga umulweze yeswe yize yili mu mbunge ye.—Kutuhu. 34:6; Samu 62:7, 8.
11. Kulita ni A-Hepreu 12:11, mumu liaka twatamba kujikijila ha fumbo lia Yehova? (Tala mushete, “ Kusosolola Mutu Chakusolola Zango lia Yehova.”)
11 Kwasa chiyulo cha makulwana a mu chikungulwila. Yehova mwe wasele shimbi ya kusosolola mutu mu chikungulwila. Yino yili jila yipema yize Iye akukwashilamo mutu yoze walinga shili ni kufunga chikungulwila. (Tanga A-Hepreu 12:11.) Hanji hiunevu umwe mahanjika yuma yipi hali makulwana muze asosolwele umwe ndumbu mu chikungulwila. Alioze kota mutu wacho keshi kuzanga kutongola yuma yipi yize alingile ndumbu yoze asosolwele. Umwenemwene uli ngwo, yetu kutushi kunyingika sango jeswe. Pwako ni shindakenyo ngwe, makulwana waze alinganga chihanda mu komite ya kusopesa, kasanga tachi hanga akaule shimbi ja Mbimbiliya ni kupatwila ndumbu wacho “hali Yehova.”—2 Sango 19:6.
12. Yuma yika yipema amwe ayukile ha kukwasa fumbo lia Yehova?
12 Nyi mukwasa chiyulo cha makulwana, muhasa kukwasa mutu yoze asosolola hanga ahiluke kuli Yehova. Elizabete yoze hitwatongola, yamba ngwenyi: “Kwecha kuhanjika ni mwanetu yoze te hakola, chapwile chikalu chinji. Alioze muze ahilukile kuli Yehova, mwene yamba ngwenyi kalingile kanawa ha kumusosolola. Kulutwe yamba nawa ngwenyi, kalilongesele yuma yinji mumu lia kumusosolola. Chino changukwashile kumona ngwami, fumbo lia Yehova nihindu liapwa lipema.” Mukwo-lunga Marku, neye yamba ngwenyi: “Hakupalika cha amwe mashimbu, mwanetu yangulweza ngwenyi, kuhona kuhanjika nenyi chamukwashile kuhiluka kuli Yehova. Ngunasakwila chinji Yehova ha kutukwasa hanga tumwononokene ha chikuma chino.”
13. Yika muyihasa kukukwasa kuhwisa yikola yize unevu ku mbunge?
13 Hanjika ni masepa waze ananyingika yize unapalika. Likate ni akwa-Kristu ajama waze mahasa kukukwasa kupwa ni nyonga lialita. (Yishi. 12:25; 17:17) Joana yoze hitwatongola, yamba ngwenyi: “Yami te nakulivwa chinji ukawami. Alioze muze napwile ni kuhanjika ni masepa jami waze nakujikijila, te nakulivwa kanawa.” Mba yika mulinga, nyi mandumbu amwe mu chikungulwila mamba yuma yize muyikuvwisa yikola ku mbunge?
14. Mumu liaka twatamba ‘kulihumikiza umwe ni mukwo, nikulikonekena umwe ni mukwo’?
14 Lihumikize hali mandumbu je a mu ufulielo. Kwamba pundu, kutuchi kuhasa kushimbwila ngwetu mandumbu eswe mamba yuma yipema hali yetu. (Tia. 3:2) Yetweswe tuli yihenge. Kashika, kanda ukomoka nyi amwe mahona kukulweza yimwe, hanji makwamba yimwe chakuhona kunyonga yize muyikulemeka ku mbunge. Iwuluka chiyulo chino cha Paulu, chinambe ngwo: “Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo.” (Kolo. 3:13) Umwe pangi yoze asosolwele usoko wenyi, yamba ngwenyi: “Mandumbu amwe kafupile kungukolweza, alioze yangulemeka ku mbunge. Chipwe chocho, Yehova kangukwashile hanga ngwakonekene.” Yika mandumbu mu chikungulwila mahasa kulinga hanga akwase mandumbu waze asoko jo hanaasosolola?
MANDUMBU ESWE MU CHIKUNGULWILA MAHASA KUKWASA
15. Yika mutuhasa kulinga mba tukwase mandumbu waze ali ni umwe usoko yoze hanasosolola?
15 Pwako sepa lia mandumbu waze ali ni umwe usoko yoze hanasosolola. Pangi Miria, yatayiza ngwenyi, muze ndumbwenyi amusosolwele, kuya ku kukunguluka te chakumukalila. Mwene yamba ngwenyi: “Napwile ni kwivwa woma wa yuma yize te mandumbu mangwamba. Alioze, mandumbu kangukwashile chinji nawa kapwile ni kulisa mu chihela chami. Ayo nawa kakapwile ni kwamba yuma yipi ha yize yalingiwile kuli ndumbwami. Mumu lia ukwaso wa mandumbu, chakavwile ukawami.” Pangi mukwo yamba ngwenyi: “Muze mwanetu amusosolwele, mandumbu anji kejile ni kututakamisa. Amwe yamba ngwo, kakapwile ni yize mangulweza, akwo yalila hamwe ni yami. Eka, yangusonekena mikanda ya utakamiso. Yuma yize ayo alingile, yangukwashile chinji!”
Mandumbu mu chikungulwila mahasa kusolola zango ni kukwasa asoko waze ali ni umwe yoze hanasosolola (Tala paragrafu 17) *
16. Kuchi mandumbu mu chikungulwila mahasa kununga ni kukwasa mandumbu ali ni asoko waze hanasosolola?
16 Nunga ni kukwasa mandumbu ali ni asoko waze hanasosolola. Ayo kanafupiwa zango lie ni utakamiso ha mashimbu wano akalu. (Hepre. 10:24, 25) Ha mashimbu amwe, mandumbu amwe kakwecha kuhanjika ni asoko waze ali ni umwe yoze hanasosolola. Hachino, asoko jacho no kakulivwa ngwe hanaasosolola. Kutwazangile hanga mandumbu jetu alivwe chocho! Chipi-chipi akweze waze ali ni chisemi yoze hanasosolola, kakufupiwa chinji kwachichimieka ni kwatakamisa. Pangi Maria yoze mukwo-lunga amusosolwele ni kuhichika usoko wenyi, yamba ngwenyi: “Masepa jami amwe kejile ku zuwo, yateleka ni kutukwasa kulinga uwayilo wa mu usoko. Ayo yalisa mu chihela chami ni kulila hamwe ni yami. Muze amwe apwile ni kwamba yuma ya mahuza hakutwala kuli yami, o yangukalila. Kwamba pundu, ayo kangutakamishine chinji!”—Roma 12:13, 15.
17. Yika makulwana mahasa kulinga hanga atakamise mandumbu waze ali ni usoko yoze hanasosolola?
17 Makulwana a mu chikungulwila, zachisenu uhashi weswawo nuli nawo hanga nutakamise ufulielo wa waze ali ni umwe yoze hanasosolola. Mumu yenu nuli ni chiteli chinene cha kutakamisa mandumbu jacho. (1 Tesa. 5:14) Liangenu kwakolweza muze kukunguluka kanda chichiputuka ni muze muchihwa. Pwenu ni kumeneka mandumbu jacho ku mazuwo jo ni kulemba no hamuwika. Kalakalenu no mu munda, nawa nyi muchilita asanyikenu ha uwahilo wenu wa mu usoko. Tufunga a ku spiritu kananyingika ngwo, katamba kusolola zango ni kulihulumba hali mapanga ja Yehova waze anapalika mu yipikalo.—1 Tesa. 2:7, 8.
KANDA UHONGA, NUNGA NI KUJIJIKILA MULI YEHOVA
18. Kulita ni 2 Petulu 3:9, yika Yehova anazange hali eswe waze hanamuhichika?
18 Yehova “kazangile niumwe kutoka, alioze eswe alikonyeke.” (Tanga 2 Petulu 3:9.) Chipwe ngwe ndumbu umwe malinga shili yinene, nihindu mwono wenyi uchili ni ulemu kuli Zambi. Nyingika ngwe, tulieswe Yehova katulanjile ni ndando yinene ha kuhana mwono wa Mwanenyi. Ni zango lieswe, Yehova kakukwasa atu waze hanamuhichika hanga ahiluke kuli iye. Nawa iye kanashimbwila hanga ayo atayize ukwaso wacho, ngwe chize anasolola ha chishima cha Yesu cha mwana-chimwangi. (Luka 15:11-32) Atu anji waze ahichikile Yehova, hanahiluka kuli iye. Nawa chikungulwila chaatambwile kanawa. Elizabete yoze hitwatongola, kanakawahilila chinji muze mwanenyi afunyine kuli Yehova. Ha kwiwuluka kunyima, yamba ngwenyi: “Nakusakwilila chinji mandumbu eswe waze angukolwezele hanga ngununge ni kushimbwila chakuhona kuhonga.”
19. Mumu liaka twatamba kujikijila muli Yehova mashimbu eswe?
19 Mutuhasa kujikijila muli Yehova mashimbu eswe. Usongwelo weswe uze iye akutwaha, uli mumu lia upeme wetu. Iye kali chihanyi, nawa kakuzanga waze eswe akumuzanga ni kumuwayila. Pwako ni shindakenyo ngwe, muze mupalika mu yuma yikalu ku mwono we, Yehova kechi kukuhichika ukawe. (Hepre. 13:5, 6) Marku yoze hitwatongola, yamba ngwenyi: “Yehova kanda achituhichika ukawetu. Mashimbu eswe twakupalika mu yipikalo, iye kakupwa hamwe ni yetu.” Yehova manunga ni kukwaha ‘tachi jahiana.’ (2 Kori. 4:7) Kashika, chipwe ngwe mutu yoze wazanga mahichika Yehova, pwako ni shindakenyo ngwo, muhasa kununga ni kushishika ni kushimbwila ngwo, tangwa limwe mafuna.
MWASO 44 Kulemba cha Yoze Unafupiwa Ukwaso
^ kax. 5 Twakwivwa chinyengo muze mutu yoze twazanga akwecha kuwayila Yehova! Ha mutwe uno, mutulilongesaho chize Zambi akwivwa muze chino chakulingiwa. Mutumona yuma yize asoko ja mutu wacho atamba kulinga hanga akumbe yinyengo, ni kununga kukolesa ufulielo wo. Mutulilongesa nawa chize mandumbu eswe mu chikungulwila mahasa kutakamisa, ni kukwasa asoko ja mutu yoze wecha kuwayila Yehova.
^ kax. 1 Majina amwe ha mutwe uno kapwa kwalumuna.
