HA Mashimbu a Paulu, kukwakapwile ma ulungu anji waze te akumbata atu. Alioze atu mba alinge wenyi mu ulungu, kanji-kanji, ayo te kakuhula atu akwo hanga aalweze nyi kananyingika ulungu wakumbata yuma uze unayi ku chihela chalita nawa unazange kumbata atu. (Yili. 21:2, 3) Chipwe ngwe, mutu makwata ulungu uze kuushi kuya pundu ku chihela kuze anayi, nihindu muze ulungu mumana ha yimwe zuzu, iye mahasa kukwata ukwo uze mumutwala ku chihela kuze anayi.—Yili. 27:1-6.

Wenyi ha kalunga-lwiji te kakuulinga ha amwe tungonde mu mwaka, nawa maulungu kakapwile ni katalilo walita. Kuchizako mashimbu api, tahwili te mahasa kwecha kuvungulula livwela nyi mamona yuma yipi mu yipupu yo, ngwe kuteta cha chikwakwalo hanji kushimbama cha umwe ulungu ku ngenge. Tahwili te kakutwaminyina ha mashimbu waze fuji yili kanawa, muze fuji mu yipema, ayo te kakuvungulula livwela. Muze mutu uli mu wenyi mawana ulungu uze mumutwala ku chihela kuze anayi, iye te kakushimbwila umwe mutambi uze musolola ngwo kwasala hakehe ulungu mukatuka.

Lionel Casson, umwe mukwa-mana hakutwala ku sango ja ku shakulu yamba ngwenyi: “Mbonge ya Roma yapwile yimwe jila yashi atu kuwana ulungu uze mwatwala kuze anayi, chakuhona kuya ni kufupa-fupa ulungu. Zuzu yacho yapwile ku lwiji Tibre. Hakamwihi ni mbonge ya Óstia, kwapwile chimwe chitanda chinene kuze te kwatwama yipatulo ya kukalakalila. Yipatulo yacho, yinji te mwakukalakala miata a ku mazuzu eka ni eka, waze te akwete yiteli yakulongeza yuma mu ma ulungu: miata jacho umwe te wa ku Narbonne [haze hali França musono], akwo te a ku Cartago [haze hali Tunísia musono], . . . ni aku yihela yikwo nawa. Mweswawo unazange kulinga wenyi, te kakuya mu chipatulo cha mbonge kuze mukuya ulungu uze iye akwata.”

Kulinga wenyi mu kalunga-lwiji chakwashile chinji atu, alioze necho te chikwete ponde yacho. Ha yisuho anji, Paulu kalilamwinyine mu maulungu waze ashimbamine mu wenyi wa mishionaliu.—2 Kori. 11:25.