1-2. Mumu liaka Yesu alipikalile?

HA TANGWA lienyi liakasula hano hashi ngwe mutu wa musunya, Yesu kalipikalile. Mumu te kwasala hakehe amone lamba ni kumushiha kuli yivulumunyi. Alioze, Yesu kakalipikalile wika mumu lia kufwa chize te chinakundama. Iye te kakuzanga chinji Tato, kashika azangile kumuvwisa kuwaha. Yesu kanyingikine ngwenyi, nyi mafunga ushishiko wenyi ha yipikalo yize te mamona, acho makwasa kuwahisa jina lia Yehova. Yesu nawa te kakuzanga atu, chocho yanyingika ngwenyi, kutalatala chetu cha mwono wa mutolo, te chinatale ha ushishiko wenyi kuli Yehova ndo ku kufwa chenyi.

² Chipwe ngwe Yesu kapwile mu yipikalo yinji, nihindu kapwile ni sambukila. Kashika alwezele apostolo jenyi ngwenyi, “sambukila ya yami ngunanwehe.” (Yoa. 14:27) Iye kapwile ni “sambukila ya Zambi,” kulihumikiza chize chakwiza mumu lia usepa ukolo uze mutu akwete ni Yehova. Sambukila yacho ye yakwashile Yesu hanga ahone kulipikala chinji.—Fwili. 4:6, 7.

3. Yika mutuhengwola ha mutwe uno?

³ Niumwe wa kuli yetu makapalika mu yipikalo ngwe yize Yesu apalikile wakuhi, alioze waze eswe akumukaula makapwa ni yipikalo. (Mateu 16:24, 25; Yoa. 15:20) Ngwe Yesu, ha mashimbu amwe ni yetu mutuhasa kulipikala. Mba yika mutuhasa kulinga hanga yichine kutukumba ni kuhona kutokesa sambukila yetu ya ku mbunge? Tuhengwolenu yuma yitatu yize Yesu alingile mu mulimo wenyi wa kwambujola ni kumona chize mutuhasa kumwimbulula muze mutupalika mu yipikalo.

4. Kulita ni 1 A-Tesalonika 5:17, hana yilweza yize yinasolola ngwo, Yesu kalembele chinji ha tangwa lia kasula ku mwono wenyi hano hashi.

⁴ Tanga 1 A-Tesalonika 5:17. Ha tangwa lia kasula ku mwono wenyi hano hashi, Yesu kalembele chinji. Muze asolwele kuli tumbaji twenyi chize te malinga chiwanyino cha kufwa chenyi, iye yalembela mbolo ni vinyu. (1 Kori. 11:23-25) Shimbu te kanda akatuka ha chihela chize alingilile Chizomboka, iye yalemba hamwe ni tumbaji twenyi. (Yoa. 17:1-26) Muze iye ni tumbaji twenyi ahetele mu Ngetesemane, iye yalemba ha yisuho yinji. (Mateu 26:36-39, 42, 44) Nawa, maliji akasula waze Yesu ahanjikile shimbu te kanda afwa, kapwile yilemba. (Luka 23:46) Ha tangwa liacho, Yesu kalembele ha hita chuma chize chalingiwile ku mwono wenyi.

5. Mumu liaka apostolo ahonene kusolola hamu?

⁵ Chikuma chimwe chize chakwashile Yesu mba akumbe yipikalo yenyi, chapwile kujikijila muli Tato ni kusolola ujikijilo wacho ha kulemba chinji kuli iye. Alioze, apostolo kakahashile kununga ni kulemba ha ufuku wacho. Hachino, ayo yahona kusolola hamu muze apalikile mu yeseko. (Mateu 26:40, 41, 43, 45, 56) Muze mutupalika mu yipikalo, mutufunga ushishiko wetu nyi mutukaula chilweza cha Yesu ni ‘kulemba chakuhona kulitwamina.’ Mba yika twatamba kwita ha kulemba?

6. Kuchi ufulielo wakutukwasa kufunga sambukila yetu?

⁶ Mutuhasa kulemba kuli Yehova hanga atwehe “ufulielo” unji. (Luka 17:5; Yoa. 14:1) Tunafupiwa ufulielo, mumu Satana kakweseka waze eswe akukaula Yesu. (Luka 22:31) Mba kuchi ufulielo mutukwasa tufunge sambukila yetu, chipwe muze mutupalika mu yipikalo yeka ni yeka? Muze mutusa tachi hanga tukumbe yipikalo  yize tunapalika, kufuliela muli Yehova muchitukwasa tuchine kulihulumba. Mumu tunanyingika ngwetu, iye makalulieka yuma ha shimbu lialita. Amu twakufuliela muli iye ngwetu, mahasa kululieka yuma kuhiana yetu, acho twakupwa ni sambukila ya ku mbunge.—1 Petu. 5:6, 7.

7. Yika walilongesa ha maliji a ndumbu Robert?

⁷ Kulemba chakutukwasa kufunga sambukila yetu ya ku mbunge, chipwe ngwe mutupalika mu yipikalo yeswayo. Tutalenu chilweza cha ndumbu Robert, umwe mukulwana washishika wa mu chikungulwila yoze uli ni miaka kuhiana 80. Iye yamba ngwenyi: “Chiyulo chize chili ha A-Fwilipu 4:6, 7 changukwashile kukumba yipikalo yinji ku mwono wami. Kuchakapwile ni mbongo. Nawa ha mashimbu akehe yingutokesa chiteli cha kupwa mukulwana mu chikungulwila.” Yika yakukwasa Robert mba afunge sambukila yenyi ya ku mbunge? Mwene ngwenyi: “Muze nakulivwa ngwe ngunazakalala, hazehene nakuputuka kulemba. Hinanyingika ngwami, muze nakulemba chinji nakupwa ni sambukila ya ku mbunge.”

8. Kulita ni Yoano 8:29, yika yakwashile Yesu kupwa ni sambukila ya ku mbunge?

⁸ Tanga Yoano 8:29. Yesu kapwile ni sambukila ya ku mbunge, chipwe muze apwile ni kumuhungumiona, mumu kanyingikine ngwenyi chino muchivwisa Tato kuwaha. Yanunga ni kwononoka, chipwe muze chapwile chikalu kuchilinga. Iye kazangile Tato, kashika azachishile mwono wenyi weswe hanga amulingile. Shimbu te kanda eza hano hashi, iye kapwile “chilangaji” wa Zambi. (Yishi. 8:30) Alioze muze ejile hano hashi, iye yalongesa akwo ni  mbunge yeswe hakutwala kuli Tato. (Mateu 6:9; Yoa. 5:17) Yesu kawanyine uwahililo unji ha kulinga mulimo wacho.—Yoa. 4:34-36.

9. Mumu liaka twakupwa ni sambukila ya ku mbunge muze tunahondangana mu mulimo wa kwambujola?

⁹ Mutuhasa kwimbulula Yesu ha kwononokena Yehova ni ‘kulihana matangwa eswe mu milimo ya Mwene.’ (1 Kori. 15:58) Muze ‘mutuhondangana’ chinji mu mulimo wa kwambujola, mutuhasa kupwa ni nyonga lialita hakutwala ku yipikalo yetu. (Yili. 18:5) Chakutalilaho, waze twakuwana mu mulimo wa kwambujola kanji-kanji kakupalika mu yipikalo yinji kuhiana yetu. Alioze muze akulilongesa kuzanga Yehova ni kukaula yiyulo yenyi, miono yo yakuwaha ni kupwa ni uwahililo. Hita shimbu mutumona yuma yacho muyilingiwa, twakupwa ni shindakenyo ngwetu, Yehova kakutufunga. Nawa shindakenyo yacho yakutukwasa tufunge sambukila yetu ya ku mbunge. Umwe pangi yoze wakulivwa ngwe keshi ulemu nawa ukwete musongo wa kulema ku mbunge, kambile ngwenyi maliji wano kali amwenemwene. Hakwamba ngwenyi: “Muze ngunahondangana mu mulimo wa kwambujola, chino chakungukwasa kulivwa kanawa hamwe ni uwahililo. Ngunamono, chino chakulingiwa, mumu muze nguli mu munda nakulivwa ngwe nguli hakamwihi ni Yehova.”

10. Yika walilongesa ha maliji a pangi Brenda?

¹⁰ Tutalenu nawa chilweza cha pangi Brenda. Iye ni mwanenyi wa pwo, kakwete umwe musongo upi chinji (esclerose múltipla). Hachino, Brenda keshi kuhasa kwenda, mba ende iye kakuzachisa chitwamo cha yitonji. Ha mashimbu amwe, iye kakwambujola ku zuwo ni zuwo, alioze kakwambujola chinji kupalikila mu mikanda yize akusonekena atu. Mwene yamba ngwenyi: “Kunyingika ni kutayiza ngwami, musongo wami kuuchi kuhwa mu chifuchi chino, chakungukwasa kulihulikila mu mulimo wa kwambujola. Kwamba pundu, kwambujola chakungukwasa nguchine kunyonga chinji ha musongo wami. Chino chakungukolweza hanga ngukwase atu waze nakuliwana no mu munda. Nawa, kwambujola chakungukwasa ngunyonge ha kutalatala chetu cha kulutwe lia matangwa.”

11-13. (a) Yika apostolo ni atu akwo alingile mba asolole ngwo kali masepa apema a Yesu? (b) Kuchi Yesu evwile ha yize masepa jenyi amulingilile?

¹¹ Ha mashimbu eswe waze Yesu te akwambujola, apostolo ashishika kapwile masepa jenyi amwenemwene. Ayo kapwile yilweza yipema ya usepa uze Mbimbiliya yinambe ngwo: ‘Sepa umwe kakulalaminya kuhiana yoze wasemuka nenyi.’ (Yishi. 18:24) Yesu kalemesele chinji masepa jenyi. Muze apwile hano hashi, iye kakamufulielele kuli mwanakwo niumwe. (Yoa. 7:3-5) Ha chisuho chimwe, asoko jenyi yanyonga ngwo kanazaluka. (Marku 3:21) Alioze, shimbu te kanda afwa, Yesu yalweza apostolo jenyi ashishika ngwenyi: “Yenu nuli waze hananyongonona hamwe ni yami mu yeseko yami.”—Luka 22:28.

¹² Ha mashimbu amwe, apostolo ja Yesu te kakulinga yuma yize yakumuvwisa yinyengo, alioze iye te keshi kulihulikila ha tupalia two. Mumu te kanyingika ngwenyi, ayo kakumufuliela. (Mateu 26:40; Marku 10:13, 14; Yoa. 6:66-69) Ha ufuku wa kasula shimbu te kanda achimushiha, Yesu yalweza malunga wano ashishika ngwenyi: “Hingunanuvuluka ngwami, tusendo; mumu yuma yeswe nevwile kuli Tata, hingunanunyingikisayo.” (Yoa. 15:15) Kwamba pundu, masepa wano a Yesu kamutakamishine chinji. Ukwaso uze ayo amuhele mu mulimo wa kwambujola, wamukwashile kupwa ni uwahililo.—Luka 10:17, 21.

¹³ Kuchizako apostolo, Yesu kapwile nawa ni masepa akwo, a malunga ni a mapwo, waze te akumukwasa mu mulimo wa kwambujola ni yuma yikwo nawa. Amwe kamuzumbwile ku  mazuwo jo hanga alie nenyi hamuwika. (Luka 10:38-42; Yoa. 12:1, 2) Akwo kapwile ni kuya hamwe nenyi mu wenyi ni kulianyina nenyi yize te akwete. (Luka 8:3) Yesu kapwile ni masepa apema, mumu neye te kapwa sepa mupema kuli ayo. Iye kaalingilile yuma yipema, ni kupwa mutu mwashi ha yize te akushimbwila hali ayo. Yesu te mutu mungunu, chipwe chocho te kakuwahilila ha ukwaso uze apwile ni kumwaha kuli masepa jenyi waze te yihenge. Kwamba pundu, yize ayo alingile yakwashile Yesu kupwa ni sambukila ya ku mbunge.

14-15. Kuchi mutuhasa kupwa ni masepa apema, nawa kuchi ayo mahasa kutukwasa?

¹⁴ Masepa apema kakutukwasa hanga tununge ni kushishika kuli Yehova. Nawa, mba tupwe ni masepa apema, yetu twatamba kupwa sepa mupema. (Mateu 7:12) Chakutalilaho, Mbimbiliya yinatukolweza tuzachise mashimbu ni tachi jetu hanga tukwase akwetu, chipi-chipi waze ‘anahono.’ (Efwe. 4:28) Shina muhasa kukwasa umwe ndumbu mu chikungulwila chenu yoze unafupiwa ukwaso? Kutala muhasa kukwasa kulanda yuma ya ndumbu yoze keshi kuhasa kwenda mumu lia ushinakaji hanji musongo? Shina muhasa kama kuhana kulia kuli asoko waze keshi ni mbongo? Nyi unanyingika kuzachisa site jw.org^® ni apliacativo JW Library^®, kutala muhasa kukwasa akwenu mu chikungulwila hanga achize mikanda yize yilimo? Nyi mutusa tachi hanga tukwase akwetu, mutuwahilila chinji.—Yili. 20:35.

¹⁵ Masepa jetu matutakamisa muze mutupalika mu yipikalo ni kutukwasa hanga tufunge sambukila ya ku mbunge. Ngwe chizechene, Elihu apanjikile Yombi muze te anahanjika hakutwala ku yipikalo yenyi, masepa jetu no matukwasa ha kutupanjika kanawa muze mutwalweza yize tunevu  ku mbunge. (Yombi 32:4) Kutwatambile kushimbwila masepa jetu hanga atukwachile yiyulo, alioze mutupwa ni mana nyi mutupanjika kanawa yiyulo yo yize yinakatuka mu Mbimbiliya. (Yishi. 15:22) Nawa, ngwe chize Mwanangana Ndawichi alikehesele hakutayiza ukwaso wa masepa jenyi, ni yetu kutwatambile kulizata ha kulituna ukwaso uze masepa jetu matwaha ha shimbu lize tunaufupu. (2 Samue. 17:27-29) Kwamba pundu, masepa amutapu au kali yawana ya kuli Yehova.—Tia. 1:17.

16. Kulita ni A-Fwilipu 4:6, 7, kuchi mutuhasa kupwa ni sambukila? Lumbununa.

¹⁶ Tanga A-Fwilipu 4:6, 7. Mumu liaka Yehova anatulweze ngwenyi, mutuhasa kupwa ni sambukila yize iye akutwaha kupalikila “muli Kristu Yesu”? Mumu, mutuhasa wika kupwa ni sambukila ya ku mbunge ni kuyifunga, nyi mutunyingika ni kufuliela ha mulimo uze Yesu akulinga mu upale wa Yehova. Chakutalilaho, kupalikila mu ukuule wa chitapo cha Yesu, Yehova mahasa kukonekena shili yetu yeswe. (1 Yoa. 2:12) Muze twakunyonga hachino, twakuwana utakamiso unji! Chikwo nawa, amu ali Mwanangana mu Wanangana wa Zambi, Yesu makahwisa upi ni lamba lize Satana akuneha hali atu. (Iza. 65:17; 1 Yoa. 3:8; Uso. 21:3, 4) Yino yakutwaha kutalatala chipema cha kulutwe lia matangwa! Nawa, chipwe ngwe, Yesu katuhele mulimo ukalu chinji, nihindu iye kali hamwe ni yetu, ha matangwa wano akusula cha miaka. (Mateu 28:19, 20) Chino chakutukwasa kupwa ni hamu! Hachino, utakamiso, kutalatala ni hamu—yili yitanga yilemu yize tunafupiwa mba tupwe ni sambukila ya ku mbunge.

17. (a) Kuchi mukwa-Kristu mahasa kufunga sambukila ya ku mbunge? (b) Kulita ni Yoano 16:33, yika mutuhasa kulinga?

¹⁷ Mba, kuchi muhasa kufunga sambukila ye ya ku mbunge, muze mupalika mu yipikalo yeka ni yeka? Muhasa kuchilinga ha kulinga yuma yitatu yize Yesu alingile. Chitangu, kulemba, kashika pwako ni kulemba mashimbu eswe. Chamuchiali, ononokena Yehova ni kwambujola sango lipema ni mbunge yeswe, chipwe muze muchipwa chikalu kuchilinga. Chamuchitatu, kutayiza ukwaso wa masepa je muze mupalika mu yipikalo. Nyi walinga chocho, sambukila ya Zambi muyifunga mbunge ni manyonga je. Nawa ngwe Yesu, mukumba yipikalo yeswayo muyisoloka ku mwono we.—Tanga Yoano 16:33.