1-2. (a) Yika Satana akuzachisa hanga onge atu? (b) Yika mutulilongesa ha mutwe uno?

SATANA, “tato ya mahuza,” kaputukile kwonga atu chize ku uputukilo. (Yoa. 8:44) Mahuza jenyi amwe, kali malongeso asaki hakutwala ku kufwa ni hakutwala ku mwono hanyima lia kufwa. Nawa, mianda ni ndako ja atu anji yakukatuka ha malongeso jacho. Hachino, mandumbu jetu amwe kakusa tachi hanga akalile “ufulielo” wo, muze umwe mafwa mu usoko hanji ha chihunda cho.—Yunda. 3.

² Nyi unapalika mu yeseko ngwe yino, yika muhasa kulinga mba umane nguu, ni kukwasa yize Mbimbiliya yakulongesa hakutwala kuli afu? (Efwe. 6:11) Kuchi muhasa kutakamisa ni kuhuzulula ndumbwe mu chikungulwila yoze anashinjila hanga alinge mianda yize Zambi keshi kuzanga? Ha mutwe uno, mutulilongesaho usongwelo uze Yehova akutwaha. Alioze, chitangu tutalenu yize Mbimbiliya yakulongesa hakutwala kuli afu.

3. Upi uka wejile ha mahuza atangu a Satana?

³ Zambi kakatangile atu hanga afwe. Alioze, mba achine kufwa, Alama ni Eva te katamba kwononokena Yehova, yoze waehele shimbi yino yashi ngwo: “Ku mutondo wa chinyingi cha chipema ni chipi, kanda uliako, mumu tangwa muoliako kumukafwa lume.” (Uputu. 2:16, 17) Henaho, Satana yanyonga kulinga yimwe. Iye yazachisa kapela ni kulweza Eva ngwenyi: “Kufwa kunuchi kufwa.” Chaluyinda, Eva yatayiza mahuza jacho, chocho yalia ku muhuko. Kulutwe, mukwo-lunga neye yalia muhuko wacho. (Uputu. 3:4, 6) Chocho, shili ni kufwa yiyinjila mu mwono wa atu.—Roma 5:12.

4-5. Kuchi Satana ananungu ni kwonga atu?

 ⁴ Alama ni Eva kafwile, ngwe chize Zambi ambile. Chipwe chocho, Satana nihindu kakechele kuhanjika mahuza hakutwala ku kufwa. Kulutwe, iye yalumba nawa mahuza akwo. Mahuza jacho, amwe kakwamba ngwo, nyi mujimba wa mutu wafwa, mutu wacho kakununga ni mwono ku chimwe chihela, hanji kupwa spiritu. Mahuza jacho kali anji, nawa chipwe musono atu anji kakwatayiza.—1 Timo. 4:1.

⁵ Mba mumu liaka atu anji akutayiza mahuza jacho? Satana kananyingika chize atu akwivwa nyi mafwisa, kashika iye akuzachisa yuma yacho hanga aapiangule. Yetu kutushi kuzanga kufwa, mumu Zambi katutangile hanga tutwame ku miaka yeswe. (Chilu. 3:11) Kuli yetu kufwa chapwa mukwa-kole wetu.—1 Kori. 15:26.

6-7. (a) Shina Satana kahashile kukinda umwenemwene hakutwala kuli afu? Lumbununa. (b) Kuchi umwenemwene wa Mbimbiliya wakutukwasa hanga tuhone kwivwa woma wa afu?

⁶ Chipwe ngwe Satana kanase tachi, nihindu umwenemwene hakutwala ha chize afu apwa uli zwalala. Kwamba pundu, musono atu anji kananyingika umwenemwene wa yize Mbimbiliya yakulongesa ni chize afu apwa ni kutalatala chize akwete. (Chilu. 9:5, 10; Yili. 24:15) Umwenemwene uno wakututakamisa ni kutukwasa tuhone kwivwa woma ni kuyambashana muze umwe mafwa. Chakutalilaho, yetu kutushi kuvwila afu woma, chipwe kunyonga ngwetu, afu kanamono lamba ku chimwe chihela. Mumu tunanyingika ngwetu, afu keshi ni mwono, kashika kechi kuhasa kutulinga upi niumwe. Chili ngwe kali mu tulo anji. (Yoa. 11:11-14) Tunanyingika nawa ngwetu, afu keshi kumona chize mashimbu anapalika. Kashika ku uhindukilo, chipwe waze afwile ha miaka yinji kunyima, kechi kanyingika ngwo kashimbula chinji, muchikapwa ngwe kukamuna cha liso.

⁷ Kuwatayijile ngwo, umwenemwene hakutwala ku chize afu apwa uli zwalala, washi kuunyingika nawa walita? Umwenemwene uno unalise chinji ni mahuza a Satana waze akuyambanganyisa atu! Kuchizako kupiangula atu, mahuza jacho nawa kakupihisa lufuma wa Tangi yetu. Mba tunyingike kanawa upi uze Satana akuneha, mutushimutwina yihula yino: Kuchi mahuza a Satana akupihisa lufuma wa Yehova? Kuchi mahuza jacho akusolola ngwo, chitapo cha ukuule wa Kristu kuchishi ulemu? Kuchi mahuza jacho akuwezela yinyengo ni lamba hali atu?

8. Kulita ni Jeremia 19:5, kuchi mahuza a Satana hakutwala ku chize afu apwa akupihisa lufuma wa Yehova?

⁸ Mahuza a Satana hakutwala kuli afu kakupihisa lufuma wa Yehova. Mahuza jacho kanachingi longeso lia saki lize liakwamba ngwo, afu kakwamwesa lamba mu chitende cha kahia. Malongeso amutapu au kakupihisa lufuma wa Zambi! Mu mulali uka? Mahuza wano kakutwala atu atayize ngwo, Zambi ya zango kakwete utu ngwe wa Ndiapu yoze chingalwe. (1 Yoa. 4:8) Kuchi wakwivwa hamukunda wa malongeso wano? Chahiana ulemu, Yehova kuchi akwivwa? Iye keshi kuzanga ungalwe.—Tanga Jeremia 19:5.

9. Kulita ni yize analumbununa ha Yoano 3:16 ni 15:13, kuchi mahuza a Satana anakwate ha chitapo cha ukuule wa Kristu?

⁹ Mahuza a Satana hakutwala kuli afu kakusolola ngwo, chitapo cha ukuule wa Kristu kuchishi ulemu. (Mateu 20:28) Mahuza akwo a Satana kakwamba ngwo, atu kakwete mwono uze kuushi kufwa. Nyi chamwenemwene tukwete mwono uze kuushi kufwa, kachi twakutwama ku miaka yeswe. Nyi chenacho, kachi kuchakafupiwile Kristu kuhana mwono wenyi hali yetu ngwe chitapo hanga tuzuke mwono wa mutolo. Alioze, chitapo cha Kristu chinasolola zango lize Yehova ni Yesu akwete hali atu. (Tanga Yoano 3:16; 15:13.) Mahuza wano a Satana kakusolola ngwo, chawana chino cha zango kuchishi ulemu. Mba, kuchi Yehova ni Yesu akwivwa ha malongeso wano a mahuza?

10. Kuchi mahuza a Satana hakutwala ku kufwa anawezela yinyengo ni lamba hali atu?

¹⁰ Mahuza a Satana kakuwezela yinyengo ni lamba hali atu. Yisemi waze afwisa mwana, mahasa kwivwa maliji ngwe wano: Zambi katwala mwanenu mu malilu hanga apwe mungelo. Shina mahuza wano a Satana matepulula yinyengo ya yisemi nyi mayokesa? Longeso likwo lia mahuza lili lia chitende cha kahia, mangana te kakulizachisa hanga oche atu waze te akulimika ni malongeso a yingeleja. Umwe mukanda * wa mu Espanha uze wa kuhanjika hakutwala ku yingeleja unambe ngwo: “Amwe waze te akulinga ungalwe wacho te kakufuliela ngwo, atu jacho kanapalika mu lamba lize makamona ku miaka ya mutolo mu chitende cha kahia.” Hachino, shimbu kanda achifwa, ayo mahasa kulikonyeka, acho te kechi kuya nawa mu chitende cha kahia. Mu yifuchi yinji, atu kakulivwa ngwe katamba kuwayila tulamba two waze hanafu, kwahalisa ni kweeta hanga aawahise. Akwo kakufupa kupwa ni sambukila ni tulamba two waze hanafu, mumu kakwivwa woma wa kwalinga upi. Chaluyinda, kufuliela ha mahuza wano a Satana kuchishi kunehena atu utakamiso wamwenemwene, alioze kakwaevwisa wika woma ni kuzakalala.

11. Kuchi asoko ni masepa waze akutuzanga chinji mahasa kutushinjila hanga tulinge yuma yize kuyalitele ni Liji lia Zambi?

¹¹ Zango lietu hali Zambi ni ha Liji lienyi, liakutukwasa hanga tumwononokene chipwe muze asoko ni masepa jetu waze akutuzanga chinji, matushinjila hanga tulinge mianda ya malilo yize kuyalitele ni Mbimbiliya. Nyi kutwalingile yuma yacho, ayo mahasa kutuvwisa yinyengo ha kutwamba ngwo, te kutushi kuzanga mutu yoze wafwa. Ayo hanji mahasa kwamba ngwo, yitanga yize tunasolola muyitwala mufu hanga afune ni kumwesa lamba asoko waze asala ni mwono. Mba kuchi mutuhasa kukalila umwenemwene wa Mbimbiliya? Tutalenu jimwe shimbi ja Mbimbiliya jize mujihasa kutukwasa ni chize mutuhasa kujikaula.

12. Mianda yika hakutwala kuli afu yize yakulimika ni Mbimbiliya?

¹² Sako tachi hanga ‘ulihandunune’ ku malongeso ni mianda yize kuyishi kulita ni Mbimbiliya. (2 Kori. 6:17) Mu chifuchi chimwe cha A-Caribe,  atu anji kakufuliela ngwo, mutu nyi mafwa, “chizulie” chenyi muchihasa kununga mukachi ka atu waze ali ni mwono, ni kupinjisa waze te akumumwesa lamba. Mukanda umwe unambe ngwo, “chizulie” chacho muchihasa chipwe “kupinjisa atu mu chihunda chamuwundu.” Mu Africa, atu amwe kakulinga mianda yinji muze mafwisa mutu, ngwe kutewula kambu, kulikwita pemba ni mukundu ku meso, kuseluka mushi lia mushete uze uli ni mufu, hanji kutuhuka mu zuwo muze mwapwile mutu yoze wafwa. Mumu liaka akulinga chocho? Amwe kakwamba ngwo, yino yakukwasa hanga spiritu ya mufu yihone kwalinga upi! Amu tuli tuvumbi twa Yehova, kutwatambile kulinga yuma yacho hanji yitanga yeswayo yize ya kukukwasa mahuza wano a Satana!—1 Kori. 10:21, 22.

13. Ngwe chize twevwa ha Tiangu 1:5, nyi kuushi shindakenyo ha chize Yehova akumona mianda yimwe, yika watamba kulinga?

¹³ Nyi kuushi ni shindakenyo ha chize Yehova akumona mianda yimwe, lemba kuli iye hanga akwehe mana. (Tanga Tiangu 1:5.) Kusulaho, hengwola mu mikanda yetu hanga unyingike chize analumbununa chikuma chacho. Nyi muchilita, hanjika ni makulwana amu chikungulwila chenu. Ayo kechi kukukwachila chiyulo, alioze mahasa kukukwasa kuwana shimbi ja Mbimbiliya, ngwe jize twashimutwina hano. Nyi wachilinga, muhasa kufumba “kulijilila” che, nawa chino muchikukwasa kusa “chinyingi hakachi ka chipema ni chipi.”—Hepre. 5:14.

14. Kuchi mutuhasa kwehuka kupwa chitalingiso kuli akwetu?

¹⁴ “Lingenu yuma yeswe ha uhenya wa Zambi. Kanda nukapwa chitalingiso.” (1 Kori. 10:31, 32) Muze mutukwata chiyulo cha kulinga yimwe mianda, twatamba nawa kunyonga ha chize chiyulo chetu muchikwata ha shimbi ya mbunge ya akwetu, chipi-chipi mandumbu jetu amu ufulielo. Kwamba pundu, kutwazangile kutalingisa mutu niumwe! (Marku 9:42) Chikwo nawa, twatamba kwehuka kulinga yuma yize muyivwisa kupiha atu waze hi Yela ja Yehova ko. Zango mulitukwasa kuhanjika no ni vumbi, hanga tuvwise Yehova kuwaha. Kutwazangile kuzwela ni atu chipwe kwakekuna hanji kuhanjika yuma yipi hakutwala ku mianda yo. Tunyingikenu ngwetu, zango tachi likwete! Nyi twasolola zango ni vumbi, mutuhasa kukwasa asoko ni masepa jetu waze akulimika ni yetu hanga alumune mbunge jo.

15-16. (a) Mumu liaka chili mana kulianga kulweza akwenu yize wafuliela? Hana chilweza. (b) Kuchi maliji a Paulu waze ali ha A-Roma 1:16 anatale hali yetu?

¹⁵ Solola kuli waze watunga no ngwo uli Chela  cha Yehova. (Iza. 43:10) Asoko ni enyembo je mahasa kwivwa kupiha mumu kuwalichingile no ha yimwe mianda. Alioze nyi ayo hananyingika ngwo, uli Chela cha Yehova, muchipwa chashi kukumba yipikalo yacho. Francisco yoze watwama mu Moçambique yasoneka ngwenyi: “Muze yami ni mukwetu-pwo Carolina twalilongesele umwenemwene, chocho yitulweza asoko jetu ngwo, kutuchi kupwa nawa ni kuwayila afu. Chiyulo chetu chapwile mu cheseko muze yayo ya Carolina afwile. Mianda ya mu chihunda chetu yakwamba ngwo, mufu katamba kumusanyisa meya kulita ni ndako ja yingeleja. Hachino, asoko ja mufu katamba kupomba matangwa atatu ha chihela haze amusanyishinanga meya. Atu kakutayiza ngwo, chino chakukwasa kuhumikiza spiritu ya mufu. Amu yoze wafwile te yayo ya Carolina mu jimo limuwika, asoko jenyi yazanga hanga neye alinge mianda yacho.”

¹⁶ Yika Francisco ni Carolina alingile? Francisco yamba ngwenyi: “Amu twakuzanga Yehova, ni kuzanga kumuvwisa kuwaha, yitwehuka kulinga mianda yacho. Asoko ja Carolina kevwile uli unji. Ayo yamba ngwo, chino chili kuhona vumbi mutu yoze wafwa nawa ngwo, kechi kupwa ni kuliendela ni yetu chipwe kutukwasa. Amu hitunalweze hakutwala ku ufulielo wetu, yitwecha kwakumbulula ha shimbu lize ayo te anatenuka. Asoko amwe yatukalila, ha kwamba ngwo, ayo hanatulweze yize afuliela. Kulutwe, asoko ja Carolina uli yiwaahwa, chocho yitulivwashana no. Amwe yeza ku zuwo lietu, ni kutwita mikanda yize yalumbununa Mbimbiliya.” Ha mashimbu amutapu au, kuwatambile kwivwa sonyi jakukalila umwenemwene wa Mbimbiliya hakutwala kuli afu.—Tanga A-Roma 1:16.

17. Yika muyihasa kutukwasa mba tupwe sepa mupema kuli ndumbwetu yoze wafwisa?

¹⁷ Muze umwe ndumbwetu mu ufulielo mafwisa mutu yoze azanga chinji, twatamba kupwa ‘sepa mupema, umwe yaya yoze wakusemukina ha tangwa lia lamba.’ (Yishi. 17:17) Kuchi mutuhasa kupwa ‘sepa mupema,’ chipi-chipi nyi ndumbwetu yoze wafwisa, kanamushinjila hanga alinge yuma yize kuyalitele ni Mbimbiliya? Tutalenu shimbi jaali ja Mbimbiliya jize mujihasa kutukwasa hanga tutakamise atu waze afwisa.

18. Mumu liaka Yesu alilile, nawa yika mutuhasa kulilongesa ha chilweza chenyi?

¹⁸ “Lilenu hamwe ni waze analili.” (Roma 12:15)  Kanji-kanji, muchihasa kupwa chikalu kunyingika yize mutwamba hali yoze wafwisa mutu azanga chinji. Chipwe muze kutushi ni yize mutwamba, nyi ayo matumona tunalila, manyingika ngwo tunalihulumba hali ayo. Muze Lazaru sepa lia Yesu afwile, Maria, Marta ni atu akwo nawa kalilile ndumbwo kanda sepa lio. Hakupalika cha matangwa awana muze Yesu aheteleko, iye ‘yalila’ chipwe ngwe te kananyingika ngwo mahindwisa Lazaru. (Yoa. 11:17, 33-35) Kulila cha Yesu chasolwele chize Yehova evwile ha kufwa cha Lazaru. Chasolwele nawa ngwo, Yesu te kakuzanga chinji usoko wa Lazaru. Kwamba pundu, chino chatakamishine Maria ni Marta. Chizechene nawa, muze mandumbu jetu mamona zango ni kulihulumba chetu hali ayo, manyingika ngwo keshi ukawo, alioze kali hamwe ni atu waze akwazanga chinji.

19. Muze tunakolweza ndumbwetu yoze wafwisa, kuchi mutuhasa kukaula maliji ali ha Chilumbununyi 3:7?

¹⁹ “Tangwa lia kuhola, ni tangwa lia kuhanjika.” (Chilu. 3:7) Mutapu ukwo wakutakamishinamo ndumbwetu yoze wafwisa, uli wika kuhola ni kumupanjika kanawa. Mweche hanga ahanjike yeswe yize ali nayo ku mbunge, nawa kanda wivwa kupiha ha “maliji” waze mahanjika chakuhona kunyonga. (Yombi 6:2, 3) Hanji ndumbwetu machipinda hamukunda wa yize anapalika kuli asoko jenyi waze hi Yela ja Yehova ko. Kashika lemba hamwe nenyi. Liumbe kuli Yehova yoze “wakwivwa kulemba” hanga atakamise ndumbwetu ni kumukwasa hanga anyonge kanawa. (Samu 65:2) Nyi muchilita, muhasa kutanga nenyi Mbimbiliya. Hanji kumutangila sango ja ku mwono jize jili mu mikanda yetu, sango jacho mujihasa kumutakamisa.

20. Yika mutushimutwina ha mutwe uze muusulaho?

²⁰ Chili chiwape chinene kunyingika umwenemwene hakutwala kuli afu ni kutalatala chipema cha uhindukilo wa afu! (Yoa. 5:28, 29) Hachino, kupalikila mu maliji ni yitanga yetu, tukalilenu umwenemwene wa Mbimbiliya ni hamu lieswe, ni kuulweza kuli akwetu, muze mutupwa ni uhashi wakuchilinga. Mutwe uze muusulaho, muulumbununa jila yikwo yize Satana akuzachisa hanga apupuchise atu—yipanda-panda. Mutwe wacho muutukwasa tumone chize mutuhasa kwehuka yitanga ni yiheho yize yinakatuka ha muheto uno wa Satana.