MUTWE WAKULILONGESA 14
Shina Unalingi Kanawa Mulimo wa Zambi?
“Linga milimo ya mukwa kwambujola, manununa uvumbiko we.”—2 TIMO. 4:5.
MWASO 57 Kwambulwila Atu Eswe
CHIKUMA CHILEMU *
Muze hamuhindwisa, Yesu yaliwana ni tumbaji twenyi ni kwalweza ngenyi, “yeenu nukatayise tumbaji” (Tala paragrafu 1)
1. Yika tuvumbi eswe a Zambi anazange kulinga, nawa mumu liaka? (Tala chizulie ha chifukilo.)
YESU KRISTU katumine tumbaji twenyi hanga aye ni ‘kutayisa tumbaji a ku mavungu eswe.’ (Mateu 28:19) Tuvumbi eswe a Zambi waze ashishika kanazange kunyingika chize mahasa ‘kumanununa uvumbiko wo,’ chekwamba kulinga mulimo wa kwambujola uze aehele. (2 Timo. 4:5) Chikwo nawa, mulimo uno uli ulemu kuhiana, upema nawa uze watela kuulinga ni kawashi kuhiana mulimo weswawo ku mwono wetu. Alioze, muchihasa kupwa chikalu kupalikisa mashimbu anji mu mulimo wa kwambujola ngwe chize twakuzanga.
2. Yipikalo yika yakutukwika ha kulinga kanawa mulimo wa Zambi?
2 Kuli yuma yikwo yilemu yize yakufupiwa mashimbu ni tachi jetu. Hanji twakulinga maola anji ku milimo yetu ya ku musunya hanga tuhase kulisa asoko jetu. Mutuhasa kupinda ni yiteli yikwo ya mu usoko, musongo, kulema ku mbunge, hanji misongo yize yakwiza mumu lia ushinakaji. Kuchi mutuhasa kulinga kanawa mulimo wa Zambi chipwe ngwe tunapalika mu yipikalo yacho?
3. Yika mutuhasa kwamba ha maliji a Yesu ali ha Mateu 13:23?
3 Nyi yuma yimwe yakutukinda kupalikisa mashimbu anji mu mulimo wa Yehova, kutwatambile kuhonga. Yesu kanyingikine ngwenyi, hi eswe ko akuli yetu te mutuhasa kwima mihuko yimuwika ya Wanangana. (Tanga Mateu 13:23.) Yehova kakulemesa chinji yuma yeswe yize twakulinga mu mulimo wenyi ni mbunge yeswe. (Hepre. 6:10-12) Chikwo nawa, mutuhasa kulivwa ngwetu kulita ni uhashi wetu mutuhasa kukalakala chinji. Ha mutwe uno, mutushimutwinaho chize mutuhasa kusa kulutwe mulimo wa kwambujola, kwashiwisa mwono wetu, ni chize mutululieka uhashi wetu wa kwambujola ni kulongesa. Chitangu, mutunyingika yize yinalumbunuka kulinga kanawa mulimo wa Zambi.
4. Kulinga kanawa mulimo wa Zambi yika chinalumbunuka?
4 Mu maliji ashi, mba tulinge kanawa mulimo wa Zambi, nyi muchilita twatamba kulinga chinji mulimo wa kwambujola ni kulongesa. Alioze kulinga kanawa mulimo wacho kuchafupiwile wika kupalikisa maola anji mu mulimo wa kwambujola. Chikuma twakwambulwila sango lipema chikwete nawa ulemu kuli Yehova. Hachino, nyi twazanga Yehova ni enyembo jetu, mutulinga mulimo wa Zambi * ni mbunge yeswe. (Marku 12:30, 31; Kolo. 3:23) Kulingila Zambi ni mbunge yeswe, chinalumbunuka kuzachisa tachi ni utotombo wetu hanga tulinge mulimo wenyi. Nyi twanyingika ngwetu, kwambujola chili chiwape chinene, chino muchitukwasa kwambujola sango lipema kuli atu anji.
5-6. Hana chilweza chize chinasolola ngwo mutu yoze uli ni shimbu likehe mahasa kusa mulimo wa kwambujola kulutwe.
5 Achinyonga ha chilweza cha umwe mukweze yoze wakuzanga chinji kwimba viyola. Iye kakuwahilila ha kwimba viyola ha shimbu lieswalio mazanga. Hachino, limwe tangwa, mwenya chihela chize akwimbila, malitesa nenyi hanga apwe ni kwimba ku songo lia hita poso. Alioze mbongo jize akumufwetako kujishi kumukwasa kulanda yuma yeswe yize akufupa. Chocho, maputuka kukalakala ku kasha mu limwe loja linene kukatuka Liakasoka ndo Liamatano. Chipwe ngwe, kakupalikisa mashimbu anji ku mulimo wa loja, nihindu kakuzanga chinji kwimba viyola. Hachino, iye mazanga chinji kululieka uhashi wenyi wa kwimba viyola hanga apwe ni kwimba matangwa eswe. Chipwe chocho, iye nihindu kakusa tachi hanga embe viyola ha shimbu lieswalio mapwa ni uhashi.
6 Chizechene nawa, yena hanji kuushi kuhasa kupalikisa mashimbu anji mu mulimo wa kwambujola ngwe chize wakuzanga. Chipwe chocho, yino ye wakuzanga kulinga chinji. Wakusa tachi hanga ululieke uhashi we wakukwata atu ku mbunge muze unaalongesa sango lipema. Hamukunda wa yuma yinji yize wakulinga, yena hanji mufupa kunyingika yize mulinga mba use mulimo wa kwambujola kulutwe.
KUCHI MUHASA KUSA MULIMO WA KWAMBUJOLA KULUTWE?
7-8. Kuchi mutuhasa kwimbulula chilweza cha Kristu hakutwala ku mulimo wa kwambujola?
7 Yesu kahichikile chilweza chipema hakutwala ku mulimo wa kwambujola. Kuhanjika hakutwala ku Wanangana wa Zambi chapwile chikuma chilemu ku mwono wenyi. (Yoa. 4:34, 35) Iye kendele tando jinji hanga ahase kwambujola sango lipema kuli atu anji. Iye te kakuzachisa uhashi weswawo hanga ahanjike ni atu ha mbunga ni ku zuwo ni zuwo. Mwono wenyi wapwile wika wa kwambujola.
8 Mutuhasa kwimbulula Kristu ha kufupa majila akuhanjikilamo ni atu hakutwala ku sango lipema ha shimbu lieswalio ni ku yihela yeswayo mutwawana. Twakutayiza kuhichika mwono wetu upema ha kulihana mu mulimo wa kwambujola. (Marku 6:31-34; 1 Petu. 2:21) Amwe mu chikungulwila, kakuhasa kukalakala ngwe pionelu a shimbu likehe, pionelu a shimbu lieswe, hanji pionelu alipwila. Akwo kakulilongesa limi lieka hanji kwaluka ni kuya kuze kunafupiwa chinji ukwaso wa akwa-kwambujola. Chipwe chocho, mulimo unene wa kwambujola kakuulinga kuli akwa-kwambujola waze keshi kuhasa kulinga yize twamba helu, alioze kakusa tachi hanga alinge yize mahasa. Chipwe ngwe, mutuhasa kukalakala chinji hanji ka, nihindu Yehova keshi kutwita hanga tulinge yize kutuchi kuhasa. Iye kanazange hanga yetweswe tuwahilile mu mulimo wa kwambujola “sango jipema jakutwala kuli Zambi ya uhenya ni yakuwaha.”—1 Timo. 1:11, MW; Shimbi 30:11.
9. (a) Kuchi Paulu asele mulimo wa kwambujola kulutwe chipwe muze te akulinga mulimo wa ku musunya? (b) Yika mukanda wa Yilinga 28:16, 30, 31, unasolola nyonga lia Paulu hakutwala ku mulimo wa kwambujola?
9 Postolo Paulu kahichikile chilweza chipema ha kusa mulimo wa kwambujola kulutwe ku mwono wenyi. Muze alingile wenyi wamuchiali wa mishionaliu mu Korindu, iye kahonene mbongo, chocho yaputuka kulinga mulimo wakutunga mambalaka. Alioze, kutunga mbalaka kuchakapwile ni ulemu unji ku mwono wa Paulu. Iye kalingile mulimo wacho hanga alikwase mwene muze te akwambujola sango lipema kuli A-Korindu chakuhona kutambula fweto nilimwe, chekwamba “chawana.” (2 Kori. 11:7) Chipwe ngwe, Paulu kapwile ni kulinga mulimo wa musunya, nihindu kanungine ni kusa kulutwe mulimo wa kwambujola, nawa te kakwambujola hita Sambata. Muze te akupwa ni uhashi, Paulu te kakulihulikila chinji mu mulimo wa kwambujola. Iye “wahianyine kuhondangana ni liji lia Zambi nikushindakenya chikolo ni mbunge yeswe kuli A-Yunda ngwenyi, Yesu iye mwe Kristu.” (Yili. 18:3-5; 2 Kori. 11:9) Kulutwe, muze apwile mu zuwo lia ususu mu Roma ha miaka yiali, Paulu yanunga ni kwambujola kuli waze te akumumeneka ni kusoneka mikanda. (Tanga Yilinga 28:16, 30, 31.) Paulu kakechele chuma nichimwe hanga chipihise mulimo wenyi wa kwambujola. Yasoneka ngwenyi: “Uvumbiko uno tuli nawo . . . , kutushi kulezumioka.” (2 Kori. 4:1) Ngwe Paulu, hanji twakupalikisa mashimbu anji ku mulimo wetu wa ku musunya, chipwe chocho, mutuhasa kusa mulimo wa Wanangana ku kulutwe ku mwono wetu.
Kuli mitapu yinji yize mutuhasa kulingilamo kanawa mulimo wa Zambi (Tala maparagrafu 10-11)
10-11. Kuchi mutuhasa kulinga kanawa mulimo wa kwambujola muze tuli ni umwe musongo?
10 Nyi kutushi kuhasa nawa kwambujola ku zuwo ni zuwo, mumu lia ushinakaji hanji musongo, nihindu mutuhasa kulinga mutapu ukwo wa kwambujola. Akwa-Kristu ku sekulu yitangu, te kakuya ni kufupa atu kweswako maawana hanga aambulwile sango lipema. Ayo te kakwambujola sango lipema ha shimbu lieswalio ni ku yihela yeswayo te akuwana atu, ngwe ku zuwo ni zuwo ni ha mbunga. (Yili. 17:17; 20:20) Nyi kutushi kuhasa nawa kwenda, mutuhasa kutwama ha chihela haze hakupalika atu anji hanga twambulwile sango lipema. Mutuhasa kwambujola susumuku, kusoneka mikanda, hanji kwambujola ha telefone. Mandumbu anji waze keshi kuhasa kwambujola ku zuwo ni zuwo, mumu lia misongo hanji yipikalo yikwo nawa, mahasa kuwahilila hakulinga milali yino yikwo ya kwambulwilamo sango lipema.
11 Chipwe ngwe ukwete musongo, nihindu muhasa kulinga kanawa mulimo wa kwambujola. Tuhengwolenu nawa chilweza cha postolo Paulu. Iye kambile ngwenyi: “Kunahasa kulinga yuma yeswe muli yoze wakunguhashisa.” (Fwili. 4:13) Paulu kafupiwile ukwaso wacho muze ayijile mu umwe wenyi wa mishionaliu. Yalweza A-Ngalashia ngwenyi: “Nunanyingika chapwile mumu ha kuyiza mu musunya nambujolele kuli yena sango lipema hatangu.” (Ngala. 4:13) Chizechene nawa, mumu lia musongo we, muhasa kupwa ni uhashi wa kwambujola sango lipema kuli akwenu, ngwe mandotolo ni waze akukufunga ni atu akwo nawa. Anji a kuli atu jacho, kakuya ku milimo muze mandumbu jetu maya ni kwambujola ku mazuwo jo.
CHIZE MUHASA KWASHIWISA MWONO WE
12. Yika Yesu ambile kwamba muze ambile ngwenyi, tupwe ni liso “lingunu”?
12 Yesu kambile ngwenyi: “Liso liapwa ndeya ya mujimba; kashika nyi kachi liso lie mulipwa lingunu, kachi mujimba we weswe muuzala too ni pangu.” (Mateu 6:22) Yika iye ambile kwamba? Iye te kanazange kusolola ngwenyi, twatamba kwashiwisa mwono wetu hanji kulihulikila ku yuma ya ku spiritu, chakuhona kulihulikila ku yuma yize ya kulalwisa. Yesu mwene kahichikile chilweza ha kuhulikila mwono wenyi mu mulimo wa kwambujola, ni kulongesa tumbaji twenyi hanga alihulikile mu mulimo wa Yehova ni Wanangana Wenyi. Twakwimbulula Yesu ha kulinga kanawa mulimo wa kwambujola, ni kulianga “kufupa Wanangana [wa Zambi] ni ululi wenyi.”—Mateu 6:33.
13. Yika muyihasa kutukwasa mba tulihulikile mu mulimo wa kwambujola?
13 Jila yimwe yize mutuhasa kulihulikilamo mu mulimo wa kwambujola yili kwashiwisa mwono wetu. Mumu nyi twachilinga, mutuhasa kupwa ni mashimbu hanga tukwase akwetu anyingike Yehova ni kumuzanga. * Chakutalilaho, shina mutuhasa kutepulula maola waze twakulinga ku milimo yetu ya ku musunya hanga tuhase kupwa ni mashimbu anji akwambujola hakachi ka poso? Kutala mutuhasa kutepululako mashimbu waze twakuya ni kuheha hanga tupwe ni mashimbu anji?
14. Yika alunga ni pwo amwe alingile mba alihulikile chinji mu mulimo wa kwambujola?
14 Yino ye alingile umwe mukulwana wa mu chikungulwila avuluka ngwo, Elias ni mukwo-pwo. Iye yamba ngwenyi: “Ha mashimbu jacho, kutwakahashile kulinga upionelu, alioze yitulinga yimwe hanga tupwe ni mashimbu. Hachino, yitwalumuna yimwe ku mwono wetu hanga tupwe ni mashimbu anji akwambujola. Chakutalilaho, yitutepulula kulanda yuma, mashimbu waze te twakupalikisa ku yiheho nawa yitwita miata jetu a milimo hanga alumune maola a milimo yetu tupwe ni mashimbu anji akwambujola. Hachino, yituputuka kwambujola chinji ha chingoloshi, ni kusongwela malongeso anji a Mbimbiliya ni kwambujola kaali ha kakweji mukachi ka poso. Chino chakutuvwisa kuwaha chinji!”
CHIZE MULULIEKA UHASHI WE WA KWAMBUJOLA NI KULONGESA
Kukaula yize twakulilongesa ha kukunguluka cha hakachi ka poso, muyitukwasa kululieka uhashi wetu wa kwambujola (Tala maparagrafu 15-16) *
15-16. Kulita ni 1 Timoteu 4:13, 15 kuchi mutuhasa kununga ni kululieka uhashi wetu wa kwambujola? (Tala nawa mushete, “ Yuma Yize Muyingukwasa Kwambujola Kanawa Sango Lipema.”)
15 Jila yikwo yize mutuhasa kulingilamo kanawa mulimo wa Zambi yili kululieka uhashi wetu wa kwambujola. Chakutalilaho, atu waze akulinga yimwe milimo, kakufupiwa kwafumba ni kwalongesa hanga apwe ni chinyingi hamwe ni utotombo. Chino nawa chinatale hali akwa-kwambujola Wanangana. Twatamba kununga ni kulilongesa chize mutululieka uhashi wetu wa kwambujola.—Yishi. 1:5; tanga 1 Timoteu 4:13, 15.
16 Mba kuchi mutuhasa kununga ni kulinga kanawa mulimo wetu wa kwambujola? Mutuchilinga ha kukaula kanawa usongwelo uze twakutambula ha Kukunguluka cha Mwono ni Mulimo Wetu. Kukunguluka chino, chakutwaha fumbo lipema ni kutukwasa hanga tununge ni kululieka uhashi wetu mu mulimo wa kwambujola. Chakutalilaho, muze kasongo wa kukunguluka mahana chiyulo kuli waze eswe alinga yihanda ya alongi, mutuhasa kupanjika kanawa yiyulo yacho hanga tuyizachise mu mulimo wa kwambujola. Mutuhasa kukaula yiyulo yacho muze mutwambulwila umwe mutu sango lipema. Mutuhasa nawa kwita ukwaso kuli kasongo wa chizavu chetu cha mulimo wa kwambujola hanji kukalakala nenyi mu munda chipwe kuli ndumbu yoze wajama, pionelu hanji kalayi wa mbonge. Muze mutujama chinji ha kuzachisa hita chikwata cha mu Mushete wa Yikwata ya Kulongesa Nayo, mutuzanga chinji kwambujola ni kulongesa.
17. Yika muyuka ha kulinga kanawa mulimo wa Zambi?
17 Chili chiwape chinene kututayiza kuli Yehova hanga tupwe “akwa milimo-ni-akwo!” (1 Kori. 3:9) Nyi ‘musela shindakenyo ha yuma yahiana ulemu’ ni kulihulikila mu mulimo wa kwambujola, yena ‘mulingila Yehova ni uwahililo.’ (Fwili. 1:10; Samu 100:2) Amu uli kavumbi ka Zambi, muhasa kufuliela ngwo, iye makwaha ndundo jize unafupiwa hanga ulinge kanawa mulimo wenyi, chipwe ngwe uli ni yipikalo yeswayo. (2 Kori. 4:1, 7; 6:4) Chipwe ngwe, mwambujola chikehe hanji chinji, yena muhasa kupwa ni uwahililo nyi muchilinga ni mbunge yeswe. (Ngala. 6:4) Muze mulinga kanawa mulimo wa Zambi, musolola zango hali Zambi ni hali enyembo je. “Ha kulinga chino, mukalilamwina yena mwene ni waze akukwivwa.”—1 Timo. 4:16.
MWASO 58 Kufupa Masepa a Sambukila
^ kax. 5 Yesu hanatutumu hanga twambujole sango lipema lia Wanangana ni kutayisa tumbaji. Mutwe uno muusolola chize mutuhasa kulinga kanawa mulimo wetu wa kwambujola, chipwe ngwe tunapalika mu yipikalo yeka ni yeka. Mutulilongesa nawa chize mutuhasa kupwa akwa-kwambujola apema ni kuwahilila ni mulimo wa kwambujola.
^ kax. 4 ULUMBUNWISO WA AMWE MALIJI: Mulimo wa Zambi unachingi yuma yeka ni yeka ngwe, kwambujola ni kulongesa, kutunga ni kululieka mazuwo jetu a Wanangana ni akwo nawa, ni kukwasa kuze kwalingiwa kakundukundu.—2 Kori. 5:18, 19; 8:4.
^ kax. 13 Tala yikuma shimbiali yize yili ha mushete unambe ngwo, “Chize Mutepulula Yimwe ku Mwono we” mu Kaposhi wa Kutalila wa Julho 2016, lifwo 12.
^ kax. 62 ULUMBUNWISO WA YIZULIE: Umwe pangi kanalingi chihanda cha kufuna ni kumeneka ha kukunguluka cha hakachi ka poso. Kusulaho, kasongo wa kukunguluka kanamwehe chiyulo, aye kanasoneka ha mukanda wenyi Kulongesa. Hi kusongo lia poso, kanazachisa mu munda yize alilongesanga ha kukunguluka.
