MUTWE WAKULILONGESA 17
Tayiza Ukwaso wa Yehova Mba Uhase Kulimika ni Maspiritu Api
“Twakulimika . . . ni maspiritu a ungulungulu muma mwa malilu.”—EFWE. 6:12.
MWASO 55 Kanda Nwivwa Atu Woma!
CHIKUMA CHILEMU *
1. Kulita ni A-Efwesu 6:10-13, kuchi Yehova akusolola ngwo kakulihulumba hali yetu? Lumbununa.
YEHOVA kali Zambi ya zango nawa kakulihulumba chinji hali tuvumbi twenyi. Kashika akutukwasa hanga tuhase kulimika ni akwa-kole jetu. Akwa-kole jetu atangu kali Satana ni andemoniu. Yehova kakututoweza hakutwala kuli akwa-kole jacho ni kutukwasa hanga tuhase kulimika no. (Tanga A-Efwesu 6:10-13.) Nyi twatayiza ukwaso wa Yehova ni kufuliela muli iye ni mbunge yeswe, mutuhasa kulimika ni Ndiapu. Mutuhasa kupwa ni ujikijilo ngwe uze apwile nawo postolo Paulu. Iye yasoneka ngwenyi: “Nyi Zambi mapwa hamwe ni yetu, iya mahasa kulimika ni yetu?”—Roma 8:31.
2. Yika mutushimutwina ha mutwe uno?
2 Yetu akwa-Kristu amwenemwene, kutushi kulihulikila hali Satana ni andemoniu jenyi. Alioze twakulihulikila chinji ha kunyingika Yehova ni kumulingila. (Samu 25:5) Chipwe chocho, twatamba kunyingika yitaka ya Satana. Mumu liaka? Mumu, chino muchitukwasa hanga Satana ahone kutupiangula. (2 Kori. 2:11) Ha mutwe uno, mutushimutwinaho yuma yize Satana ni andemoniu akuzachisa chinji hanga apiangule atu. Mutushimutwinaho nawa chize mutuhasa kulimika no.
KUCHI MASPIRITU API AKUPIANGULA ATU?
3-4. (a) Yipanda-panda yika yinalumbunuka? (b) Kuchi kuhengwola chize alingile chinasolola unji wa atu waze akufuliela ha ndundo ja yipanda-panda?
3 Jila yimwe yize Satana ni andemoniu akuzachisa chinji hanga apiangule atu, yili yipanda-panda. Waze akupanda-wanga hanji tufutafuta kakwamba ngwo, ayo kakunyingika ni kumona yuma yize atu akwo kechi kuhasa kunyingika hanji kumona. Chakutalilaho, amwe kakwamba ngwo, kali ni uhashi wa kunyingika yuma yize muyikalingiwa kulutwe lia matangwa kupalikila mu ngombo hanji munanyi. Akwo mahasa kusolola ngwe te kanahanjika ni afu. Waze akupanda-wanga hanji akulinga tufutafuta mahasa chipwe kulowa mutu. *
4 Atu anji musono, kakufuliela ha ndundo ja yipanda-panda. Chimwe kuhengwola chize alingile mu yifuchi 18 mu América Latina ni mu Caribe chasolwele ngwo, mutu umuwika hakachi ka atu atatu waze ahanjikile no kakufuliela ha tufutafuta, wanga hanji yipanda-panda, nawa anji akuli ayo kakufuliela ngwo mahasa kuhanjika ni maspiritu. Kuhengwola chikwo kachilingile mu yifuchi 18 ya Africa. Momo, atu eswe waze ahanjikile no kambile ngwo, kakufuliela ha wanga. Kashika, kweswako tuli twatamba kukanyama hanga twehuke yuma ya wanga. Mumu, Satana kanafupu kupiangula atu mu “yifuchi yeswe ya hashi.”—Uso. 12:9.
5. Kuchi Yehova akunyonga hakutwala ku yipanda-panda?
5 Yehova kali “Zambi ya umwenemwene.” (Samu 31:5) Mba kuchi iye akunyonga hakutwala ku yipanda-panda? Iye keshi kuyizanga! Yehova kalwezele A-Izalele ngwenyi: “Kanda awana kuli yenu niumwe yoze masa mu kahia mwanenyi wa lunga hanji mwanenyi wa pwo, chipwe tahi, chipwe mukwa munanyi, chipwe mukwa kupanda, chipwe nganga, chipwe mukwa kujilika, chipwe mukwa mahamba, chipwe mukwa tufutafuta, chipwe mukwa kuhula afu. Mweswawo malinga yino yuma iye chizelwokeso kuli Yehova.” (Shimbi 18:10-12) Akwa-Kristu keshi mushi lia Shimbi yize Yehova ahanyine kuli A-Izalele. Alioze, tunanyingika ngwetu, nyonga lia Yehova hakutwala ku yipanda-panda, nihindu kulialumukine.—Mala. 3:6.
6. (a) Kuchi Satana akuzachisa yipanda-panda hanga amwese atu lamba? (b) Kulita ni Chilumbununyi 9:5, kuchi afu apwa?
6 Yehova kakututoweza hakutwala ku yipanda-panda, mumu kananyingika ngwenyi, Satana kakuyizachisa hanga amwese atu lamba. Kupalikila mu yipanda-panda, Satana kakumwanga mahuza jenyi, kuchingako ni waze akwamba ngwo, afu kakununga ni mwono ku chimwe chihela. (Tanga Chilumbununyi 9:5.) Satana nawa kakuzachisa yipanda-panda hanga evwise atu woma ni kwapiangula kuli Yehova. Chuma chize iye akuzanga chili ngwo, atu waze akupanda-panda afuliele hali maspiritu api, chakuhona kufuliela kuli Yehova.
KUCHI MUTUHASA KULIMIKA NI MASPIRITU API?
7. Yika Yehova anatulweze?
7 Ngwe chize twamona ku uputukilo, Yehova kanatulweze yuma yize twatamba kunyingika hanga Satana ni andemoniu jenyi ahone kutupiangula. Tutalenu yimwe yuma yize mutulinga mba tuhase kulimika ni Satana hamwe ni andemoniu jenyi.
8. (a) Mutapu uka ulemu uze wakutukwasa kwehuka mahuza a maspiritu api? (b) Kuchi Samu 146:4 wakusola zwalala mahuza a Satana hakutwala kuli afu?
8 Tanga Mbimbiliya nawa pukuna ha yize unatange. Uno uli mutapu ulemu uze wakutukwasa kwehuka mahuza a maspiritu api. Mbimbiliya yili ngwe katana wambuka, yoze mahasa kuteta mahuza eswe a Satana. (Efwe. 6:17) Chakutalilaho, Mbimbiliya yakusolola pundu ngwo, afu kechi kuhasa kuhanjika ni akwa-mwono. (Tanga Samu 146:4.) Yakutulweza nawa ngwo, Yehova wika mwe mahasa kulumbununa ni shindakenyo yuma yize muyikalingiwa kulutwe lia matangwa. (Iza. 45:21; 46:10) Kashika, twatamba kusa tachi hanga tutange Mbimbiliya hita tangwa ni kupukuna ha yize tunatange. Nyi twachilinga, mutwehuka mahuza a maspiritu api ni kwaevwila lwaji.
9. Mianda yika ya yipanda-panda yize twatamba kwehuka?
9 Kanda ulinga nichimwe chuma cha yipanda-panda. Akwa-Kristu amwenemwene keshi kulinga yuma yize yili ni yitanga ya yipanda-panda. Chakutalilaho, kutushi kuya ni kutaha chipwe kufupa majila akuhanjikilamo ni afu. Ngwe chize twamona ha mutwe uze wapalika, twakwehuka mianda ya malilo yize yakwamba ngwo, afu kakununga ni mwono ku chimwe chihela. Nawa, kutushi kulinga tufutafuta, chipwe kuya ni kutaha hanga tunyingike yuma ya kulutwe lia matangwa. (Iza. 8:19) Kulinga yuma yino, chili ponde yinene mumu muchihasa kututwala kulikata ni Satana hamwe ni andemoniu jenyi.
Imbulula chilweza cha akwa-Kristu atangu ha kumbila yuma yeswe yize yinalingi usendo ni yipanda-panda nawa kanda ulinga yiheho yize yinasolola yuma ya tufutafuta (Tala maparagrafu 10-12)
10-11. (a) Yika atu amwe ku sekulu yitangu alingile muze alilongesele umwenemwene? (b) Kulita ni 1 A-Korindu 10:21, mumu liaka twatamba kwimbulula chilweza cha akwa-Kristu atangu, nawa kuchi mutuhasa kuchilinga?
10 Mbila hita chuma chize unanyingika ngwo cha yipanda-panda. Ku sekulu yitangu, atu amwe mu mbonge ya Efwesu te kakulinga yuma ya yipanda-panda hanji tufutafuta. Alioze muze alilongesele umwenemwene, ayo yakwata chiyulo cha kuyimbila. Mbimbiliya yinambe ngwo: “Waze te alinga tufutafuta, yaneha mikanda yo, yayocha kumeso ja eswe.” (Yili. 19:19) Atu jacho kasele tachi jinji hanga ehuke maspiritu api. Mikanda yo ya tufutafuta yapwile ni kufwika mbongo jinji. Alioze, shimbu te ayihane kuli atu hanji kuyilanjisa, o ya yocha. Kuli ayo, kuvwisa Yehova kuwaha chapwile chuma chilemu kuhiana ndando ya mikanda yacho.
11 Kuchi mutuhasa kwimbulula chilweza cha akwa-Kristu wano a ku sekulu yitangu? Nyi ukwete chimwe chuma cha yipanda-panda, ngwe mukosa wa munanyi hanji chuma cheswacho wakuzachisa hanga ulifunge ku maspiritu api, watamba kuchimbila.—Tanga 1 A-Korindu 10:21.
12. Yihula yika twatamba kulihula hakutwala ku yiheho yize twakutala hanji kulinga?
12 Hengwola kanawa yiheho ye, hanji yuma yize wakuheha nayo. Lihule ngwe: ‘Shina nakutanga mikanda, hanji yikuma yikwo ha internet yize yakuhanjika hakutwala ku tufutafuta? Mba yika mungwamba hakutwala ku miaso, yinema, yuma yize nakutala ha TV ni yiheho yikwo? Shina yakusolola yuma ya tufutafuta? Kutala yakuhanjika hakutwala ku yikishi-kishi, shamuhangi (vampiros, zumbis) hanji yipupu? Shina yakusolola tufutafuta, wanga ni yipanda-panda ngwe yuma yipema?’ Chipwe ngwe, yiheho yeswe yize yikwete sango jakuvwisa woma kuyishi kukatuka ha tufutafuta, alioze, muze unasakula yiheho yize mupwa ni kutala hanji kulinga, kanda usakula yize Yehova keshi kuzanga. Tulieswe, twatamba kusa tachi hanga tupwe ni “mbunge yitoma,” kumeso ja Zambi yetu.—Yili. 24:16. *
13. Yuma yika yize kutwatambile kuhanjika?
13 Ehuka kuhanjika chinji yuma ya andemoniu. Ha chikuma chino, twatamba kwimbulula chilweza cha Yesu. (1 Petu. 2:21) Yesu, shimbu te kanda eza hano hashi, iye kapwile mu malilu, nawa te kanyingika yuma yinji hakutwala kuli Satana ni andemoniu jenyi. Alioze kakapwile ni kuhanjika hakutwala ku yuma yize te akulinga maspiritu jacho api. Yesu kazangile kulweza atu hakutwala kuli Yehova, hi kutwatwa ko mitambi hakutwala ku yuma yize Satana te akulinga. Ni yetu nawa, mutuhasa kwimbulula Yesu ha kwehuka kumwanga sango hakutwala kuli andemoniu. Alioze, twatamba kusolola ngwetu, ‘mbunge yetu yinavwelwoka ni yikuma yipema,’ chekwamba umwenemwene wa Mbimbiliya.—Samu 45:1.
Kutwatambile kuvwila woma maspiritu api, mumu Yehova, Yesu ni angelo ashishika kali ni ndundo jinji kwahiana (Tala maparagrafu 14-15) *
14-15. (a) Mumu liaka kutwatambile kuvwila woma maspiritu api? (b) Yika yinasolola ngwo Yehova kakufunga atu jenyi musono?
14 Kanda uvwila woma maspiritu api. Hashi hano twatwama, yuma yipi muyihasa kulingiwa kuli yetu susumuku, ngwe ponde, misongo chipwe kufwa. Alioze kutwatambile kunyonga ngwetu, maspiritu api e atulinga yuma yacho. Mbimbiliya yakwamba ngwo, yuma yize ‘yakulingiwa susumuku’ muyihasa kulingiwa kuli hita umwe wa kuli yetu. (Chilu. 9:11) Hakutwala kuli andemoniu, Yehova hanasolola ngwo, kakwete ndundo jinji kuhiana ayo. Chakutalilaho, Yehova kakechele Satana hanga ashihe Yombi. (Yombi 2:6) Ha matangwa ja Mose, Yehova kasolwele ngwenyi, kali ni ndundo jinji kuhiana yimbanda amu Engitu. (Kutuhu. 8:18; 9:11) Yehova nawa kahanyine ndundo kuli Yesu hanga ahume Satana ni andemoniu jenyi mu malilu ni kwanyasa hano hashi. Nawa hikwasala hakehe, ayo eswe maasa mu jondo, hi kechi kalinga nawa upi hali atu.—Uso. 12:9; 20:2, 3.
15 Musono, tuli ni yilweza yinji yize yinasolola pundu ngwo, Yehova kakufunga atu jenyi. Achinyonga hachino: Yetu twakwambujola ni kulongesa atu umwenemwene hashi heswe. (Mateu 28:19, 20) Mulimo wacho, wakusolola zwalala yitanga yeswe yipi ya Ndiapu. Kwamba pundu, nyi Satana kakwete ndundo jinji kuhiana Yehova kachi hanakwika mulimo wetu. Alioze iye keshi kuhasa kuchilinga. Kashika, kutwatambile kuvwila woma maspiritu api. Mumu tunanyingika ngwetu, ‘meso a Yehova kakumona ndusu hashi heswe hanga alisolole mukwa tachi ha kukwasa yoze uli ni mbunge yingunu kuli iye.’ (2 Sango 16:9) Nyi mutushishika kuli Yehova, andemoniu kechi kutulinga upi niumwe.
YEHOVA KAKUWAHISA WAZE AKUTAYIZA UKWASO WENYI
16-17. Hana chilweza chize chinasolola ngwo kulimika ni maspiritu api chakufupiwa hamu.
16 Kwehuka maspiritu api chakufupiwa hamu, chipi-chipi nyi masepa ni asoko jetu malimika ni yetu, mumu ngwo maspiritu jacho mahasa kutulinga upi nyi kutwalichingile no ha yimwe mianda. Alioze, Yehova kakukwasa waze eswe akusolola hamu. Tutalenu chilweza cha pangi Erica yoze watwama mu Gana. Erica kaputukile kulilongesa Mbimbiliya muze te uchili ni miaka 21. Alioze iye kapwile mwana wa umwe ngana yoze te wakutaha ngombo. Hachino, asoko jenyi te kakuzanga hanga neye alinge mianda ya kulia yifwo yize tato te akulambula kuli tuzambi twenyi hanji ngwetu mahamba. Muze Erica alitunyine kuchilinga, asoko jenyi yachimona ngwe kuhona vumbi tuzambi two. Asoko jenyi te kakufuliela ngwo, tuzambi twacho mutumulinga upi hakumwasa yimwe yikola.
17 Asoko yashinjila Erica hanga alinge mianda yacho, alioze aye yalituna yo ni mbunge yeswe. Hamukunda wa chino, yamuhanga ku zuwo. Alioze Yela ja Yehova amwe yamutambula ku mazuwo jo. Hachino, Yehova yawahisa Erica hakumwaha asoko aha—atu waze akwete ufulielo umuwika, yapwa mandumbu ni mapangi jenyi. (Marku 10:29, 30) Chipwe ngwe, yisemi jenyi kamuhangile ku zuwo, ni kumwocha yuma yeswe, nihindu Erica yanunga ni kushishika kuli Yehova. Yamupapachisa, haliapwila kali pionelu wa shimbu lieswe. Aye keshi kuvwila woma andemoniu. Hakutwala kuli asoko jenyi, Erica yamba ngwenyi: “Nakulemba hita tangwa hanga asoko jami, anyingike Yehova ni kupwa ni utuswilo uze wakwiza wika ha kuwayila Yehova, Zambi ya zango.”
18. Yiwape yika twakuzuka ha kujikijila muli Yehova?
18 Tulieswe hanji kutuchi kupalika mu cheseko chino chikalu hamukunda wa ufulielo wetu. Alioze, twatamba kwehuka maspiritu api ni kujikijila hali Yehova. Nyi twachilinga, Yehova matuwahisa nawa Satana kechi kuhasa kutupiangula ni mahuza jenyi. Nawa kutuchi kuvwila andemoniu woma. Chahiana ulemu, mutupwa ni usepa upema ni Yehova Zambi. Kashika, tusenu tachi hanga tukaule chiyulo chize kambaji Tiangu ahanyine ngwenyi: “Zeyelenu kuli Zambi; alioze limikenu ni Ndiapu mba kumakanuchina. Kundamenu kuli Zambi, mba iye kumakakundama kuli yenu.”—Tia. 4:7, 8.
MWASO 150 Fupenu Zambi Akanulamwine
^ kax. 5 Yehova kakutuzanga chinji, kashika akututoweza hakutwala ku maspiritu api ni upi uze ayo mahasa kuneha. Mba kuchi maspiritu api akupiangula atu? Yika mutuhasa kulinga mba tulimike ni maspiritu api? Ha mutwe uno mutumonaho chize Yehova akutukwasa hanga twehuke yitanga ya maspiritu api.
^ kax. 3 ULUMBUNWISO WA AMWE MALIJI: Liji yipanda-panda linatale ha malongeso ni ha mianda yize yinakatuka kuli andemoniu. Malongeso jacho limwe liakwamba ngwo, nyi mutu mafwa, spiritu yenyi yakununga ni mwono nawa ngwo mahasa kuhanjika ni akwa-mwono, kupalikila muli umwe tahi. Yipanda-panda yinachingi nawa wanga ni kutaha. Ha mutwe uno, liji tufutafuta ni munanyi kanakatuka ha yitanga ya wanga hanji ya yipupu. Chakutalilaho, kushinga mutu hanji kumulowa chipwe kutambula mutu wanga. Kutushi kwamba waze akuhehesa wika moko washi-washi ngwe chize akulinga amwe akwa-kuheha mu yiheho yo.
^ kax. 12 Makulwana amu chikungulwila keshi ni wata wa kutesela mandumbu jo yiheho hanji yuma yize ayo atamba kutala ni kulinga. Hita mukwa-Kristu katamba kuzachisa shimbi yenyi ya mbunge yize hanafumba ni shimbi ja Mbimbiliya hanga asakule yize matanga, matala hanji yize maheha nayo. Miata amu usoko katamba kupwa ni shindakenyo ngwo, yiheho ya asoko jo yinalite ni shimbi ja mu Mbimbiliya—Yako ha jw.org® hanga utale chikuma chakwamba ngwo, “Shina Yela ja Yehova kakukanjisa yimwe yinema, miaso hanji mikanda?” yako ha SANGO JA YETU > YIHULA YIZE AKUHULA CHNJI.
^ kax. 54 ULUMBUNWISO WA YIZULIE: Chizulie cha Mwanangana wetu Yesu mu malilu, kanasongwela chilombo cha angelo.
