Chaluyinda, muze napwile ni miaka 13, zango liami kuli Yehova yiliputuka kukekema. Chapwile ni kusoloka ngwe akwetu ku shikola kali ni utuswilo unji, yami te ngunahono yimwe. Napwile ni kunyonga ngwami, shimbi ja yisemi jami ni shimbi ja Yehova jinangukinda kulinga yimwe, nawa yuma ya ku spiritu te yakuhana mulimo unji. Kanda nguchihamika hakutwala kuli Yehova, alioze te nakulivwa ngwe chishi nawa sepa lienyi.

Chipwe chocho, yingununga ni kwambujola. Alioze te nakwambujola wika hanga nguchine kusoloka ngwe ngunazeye ku ufulielo. Muze napwile ni kuya mu munda te kuchishi kulilulieka, kashika chapwile chikalu kuputuka lusango ni kununga kuhanjika ni atu jacho. Amu te chishi kuzuka yiwape mu mulimo wa kwambujola, hachino zango liami mu mulimo wacho yilitepuluka. Te nakulihula ngwami, ‘Kuchi mutu mahasa kulinga mulimo uno, poso ha poso, kakweji ha kakweji?’

Muze napwile ni miaka 17, yinguzanga kulihwangila. Chocho, yingukatuka ku zuwo lia yisemi jami, yinguya ni kutwama ku Austrália. Chino chevwishile yisemi jami yikola yinji. Ayo yalihulumba  chinji hali yami, alioze yanyonga ngwe te mungununga ni kulingila Yehova.

Ku Austrália, yinguzeya chinji ku ufulielo. Te chishi kuya ku kukunguluka cheswe. Napwile ni kuzanga kwenda ni masepa jami, tangwa limwe ngukunguluka, tangwa likwo ngupwa ni masepa jami hanga tunwe ni kukina. Nyi natala kunyima, ngunamono ngwami, napwile kulu mu umwenemwene kulu mu chifuchi cha Satana, chipwe chocho te chishi kuwahilila sali lieswe liaali.

Hakupalika cha miaka yaali, yingunyingika umwe pangi yoze wangukwashile hanga ngunyonge kanawa ha mwono wami. Te natwama ku zuwo ni mapangi atano twamishi, chocho yitusanyika kalayi wa mbonge ni mukwo-pwo Tamara, hanga atwame ku zuwo lietu ha poso yimuwika. Muze kalayi te akutala ha yuma ya mu chikungulwila, Tamara te kakushikama ni yetu. Nazangile chinji mashimbu jacho. Tamara kapwile kanawa, nawa te mwashi kuhanjika nenyi. Nakomokene ha kunyingika mutu yoze uli ni milimo yinji mu ululikiso aku nawa kali ni mashimbu akuheha ni akwo.

Tamara te kakuzanga chinji kulingila Yehova. Zango lienyi ku umwenemwene ni mu mulimo wa kwambujola te yakusambuluka kuli akwo. Iye te kakuwahilila kulingila Yehova ni mbunge yeswe, alioze ami te chishi kuwahilila, mumu te chishi kumulingila ni mbunge yeswe. Nyonga lienyi lialita ni uwahililo uze apwile nawo, yakwachile chinji ku mwono wami. Chilweza chenyi changwiwulwile umwe umwenemwene ulemu, unambe ngwo: Yehova kanazange hanga eswe tumuwayile ni “kuwahilila” chinji.—Samu 100:2.

Nazangile kuwahilila ngwe Tamara, alioze mba ngupwe ni uwahililo wacho te natamba kwalumuna chinji mwono wami. Chambachile mashimbu, chipwe chocho yinguputuka kwalumuka hakehe-hakehe. Yinguputuka kulilulieka ha kuya mu munda, nawa ha mashimbu amwe yinguputuka kulinga upionelu wa shimbu likehe. Yino yiyingukwasa nguhone kwivwa woma muze nguli mu  munda. Amu te nakuzachisa chinji Mbimbiliya mu munda, chocho yinguputuka kuwahilila. Hachino, yinguputuka kukalakala ngwe pionelu wa shimbu likehe ha hita kakweji.

Yinguputuka kulikata ni mandumbu a miaka yalisa, waze te akuzanga kulingila Yehova ni mbunge yeswe. Yilweza ya masepa wano, yangukwashile kumona yize natamba kusa kulutwe ku mwono wami, ni kululieka ufulielo wami. Hakupalika cha miaka yino yeswe, chino chapwile chisuho chitangu kuwahilila ni kulivwa kanawa mu chikungulwila.

Hakupalika cha mwaka, yingunyingika Alex, umwe lunga mupema yoze te wakuzanga chinji Yehova ni mulimo wa kwambujola. Iye kapwile kavumbi nawa te pionelu ha miaka yisambano. Alex nawa te hanakalakala ku Malauí, mu njiza yize mwapwile ni kufupiwa chinji ukwaso. Koko, yalinyingika ni amwe mamishionaliu waze apwile chilweza chipema kuli iye, ni kumukolweza hanga anunge ni kusa Wanangana wa Zambi kulutwe.

Ha mwaka 2003, yami ni Alex yitulimbata, nawa yitununga ni kulingila Yehova mu mulimo wa shimbu lieswe. Twalilongesa yuma yinji yilemu, nawa Yehova katuwahisa mu majila eka ni eka.

Ha mwaka 2009, yatutuma ngwe mamishionaliu ku Timor-Leste, chimwe chifuchi chikehe hakamwihi ni Indonésia. Twakomokene ni kuwahilila nawa ha shimbu lizeliene te tunalipikala. Hakupalika cha tukweji atano, yituheta mu mbonge yinene ya Timor-Leste.

Mba tuye ni kukalakala mu chifuchi chacho, twalumwine yuma yinji ku mwono wetu. Mu chifuchi chacho yuma yeswe te yalisa, kukatuka ku chako, limi, kulia ni mwono wa atu. Twafupiwile kwijilila ni yuma yacho. Mu munda, te twakuwana atu yiswale, waze kakalilongesele chinji ni waze  akuhonga ku mbunge. Anji a kuli ayo te kakwete mbandu ku mijimba ni ku mbunge mumu lia jita ni vunda. *

Mulimo wa kwambujola wapwa upema chinji! Chakutalilaho, tangwa limwe yingunyingika umwe mukweze avuluka ngwo Maria. * Iye te kakumona lamba linji. Naye kaliangile kufwa, nawa te kanyingikine tato. Chizechene ngwe akweze a miaka yenyi, Maria kakapwile ni yize malinga ku mwono wenyi. Ngunewuluka tangwa limwe alilile muze te anangulweze chize anevu. Alioze yami chakakwachile nyonga lia yize te anambe, mumu te kanda nguchinyingika kuhanjika kanawa limi lio. Yingulemba kuli Yehova ni kumwita hanga angukwase kumusangulwisa, chocho yinguputuka kumutangila yimwe yisoneko ya utakamiso. Ha yimwe miaka, yingumona chize umwenemwene walumwine manyonga, chifwa ni mwono wa Maria. Yamupapachisa, haliapwila mwene kakusongwela malongeso jenyi a Mbimbiliya. Musono, Maria kali ni usoko unene wa ku ufulielo nawa hawanemo chihela chenyi.

Yehova kanawahisa chinji mulimo ku Timor-Leste. Akwa-kwambujola anji mu chifuchi chacho, kanyingika umwenemwene hakupalika cha miaka kumi. Chipwe chocho, anji a kuli ayo kali mapionelu, tuvumbi ni makulwana a mu chikungulwila. Akwo kanakalakala ku chipatulo cha kulumbunwina mikanda, ha kukwasa kululieka kulia cha ku ufulielo mu malimi a mu chifuchi chacho. Ngunawahilila chinji ha kweevwa memba ha kukunguluka, mawahilila ni kumona chize anakolo ku ufulielo.

Mwono uze twapwile nawo mu Timor-Leste te walisa chinji ni uze twapwile nawo ku Austrália, chipwe chocho te twakuwahilila chinji. Ha mashimbu amwe, te twakulinga wenyi wakulipalakenya mu kalela, hamwe ni yishi ni mafwo. Matangwa amwe, te twakusongwela malongeso mu limwe zuwo liasasaminya ni kututuminha nawa tusumbi matuseluka-seluka mu molu. Chipwe chocho, yami te nakwamba ngwami: ‘Cho kuwaha!’

Nyi natala kunyima, nakusakwilila ha chize yisemi jami asele tachi hanga angulongese hakutwala kuli Yehova ni kungukwasa, chipwe ha mashimbu akalu a ukweze wami. Maliji a Yishima 22:6 kali amwenemwene kuli yami. Tata ni mama, kakuwahilila chinji hali yami ni Alex. Ayo kakwivwa kuwaha hakumona chize Yehova anatuzachisa. Kukatuka ha mwaka 2016, tuli mu mulimo wa kumeneka yikungulwila mu njiza ya mu mutango wa mu Australásia.

Chinasoloka ngwe chikalu kutayiza ngwo, ha amwe mashimbu kunyima te chishi kuzanga kwambujola. Haliapwila nakuzanga chinji kwambujola. Namona ngwami, chipwe ngwe mukulingiwa yuma yeswayo ku mwono wetu, mutupwa wika ni uwahililo wamwenemwene nyi mutulingila Yehova ni mbunge yeswe. Chochene, miaka 18 yize ngunalingila Yehova hamwe ni Alex, yinapu miaka ya uwahililo unji ku mwono wami. Haliapwila mba hinamona umwenemwene wa maliji a Ndawichi waze ambile kuli Yehova ngwenyi: “Waze eswe akuswama muli yena akawahilile, ku miaka yeswe akalikwize. . . . Waze eswe akuzanga jina lie awahilile muli yena.”—Samu 5:11.