1-2. Ukuule yika, nawa mumu liaka tunafupiwa ukuule?

MUZE Alama avulumwine, iye yatokesa uhashi wa kutwama ni mwono wa mutolo hi kuli iye wika ko, alioze ni kuli ana jenyi waze te masemuka kulutwe. Yize Alama alingile te kuyishi kaliongelo. Iye kasakwile kuvulumuna, kashika atelele kufwa. Mba ana jenyi? Ayo kakapwile ni mulonga ha shili ya Alama. (Roma 5:12, 14) Shina Yehova kafupile kulinga yimwe hanga akuule ana ja Alama kukufwa? Ewa! Ha amwe mashimbu muze Alama te havulumuna, Yehova yasolola hakehe-hakehe yize te malinga hanga akuule tununu twa ana ja Alama ku shili ni kufwa. (Uputu. 3:15) Ha shimbu yalita, Yehova te matuma Mwanenyi hanga “akahane mwono wenyi ndando ya ukuule hali anji.”—Marku 10:45; Yoa. 6:51.

² Ukuule yika? Kulita ni Yisoneko ya Ngregu ya akwa-Kristu, ukuule uli ndando yize Yesu afwetele hanga alande cheka yize Alama atokesele. (1 Kori. 15:22) Mumu liaka tunafupiwa ukuule? Tunafupiwa ukuule, mumu lia shimbi jingunu ja Yehova. Shimbi yize Yehova ahanyine kuli A-Izalele te yakwamba ngwo, katamba kufweta mwono ha mwono. (Kutuhu. 21:23, 24) Alama katokesele mwono ungunu. Kashika mba amanunune shimbi jingunu ja Zambi, Yesu yahana mwono wenyi ungunu. (Roma 5:17) Hachino, iye yapwa “Tata ya Miakulwila” kuli waze akufuliela ha ukuule.—Iza. 9:6; Roma 3:23, 24.

3. Kulita ni Yoano 14:31 ni 15:13, mumu liaka Yesu ahanyine mwono wenyi ungunu?

³ Yesu kakuzanga chinji Tato wa mu malilu, nawa kakuzanga chinji hita umwe wa kuli yetu, kashika ahanyine mwono wenyi ngwe ukuule. (Tanga Yoano 14:31; 15:13.) Mumu lia zango liacho, Yesu yashishika ndo ni kukufwa chenyi hanga alinge upale wa Tato. Chino te muchikwasa kumanununa upale wa  Yehova hali atu ni hano hashi. Ha mutwe uno, mutumonaho mumu liaka Zambi echele Yesu hanga amone lamba ndo ni kukufwa. Hanyima, mutulilongesa chilweza cha mukwa-kusoneka Mbimbiliya yoze walemesene chinji ukuule. Mutumona nawa chize mutuhasa kusolola usakwililo wetu ha ukuule. Kusulaho, mutulilongesa chize mutuhasa kwokesa usakwililo wetu ha ukuule uze Yehova ni Yesu ahanyine hali yetu.

4. Lumbununa chize Yesu afwile.

⁴ Achinyonga ha tangwa lia kasula lize Yesu apwile hano hashi. Iye kachi ketele tununu a tununu twa angelo hanga amufunge, alioze yecha maswalale A-Roma amukwate, amulambe chakuhona kumuvwila keke. (Mateu 26:52-54; Yoa. 18:3; 19:1) Maswalale yazachisa shikote yize yalemekene Yesu munyima. Hanyima, chipwe ngwe Yesu kapwile ni yilonda yinji munyima, nihindu maswalale yamushinjila hanga ambate mutondo ulemu. Yesu te makoka mutondo wacho ndo ni ku chihela kuze mamushihila, alioze ha limwe shimbu maswalale A-Roma yeta hanga lunga mukwo amumbachile mutondo wacho. (Mateu 27:32) Muze haheta ha chihela haze mamushihila, maswalale yamuhata moko ni molu ha mutondo. Kulema cha mujimba wa Yesu chatohwesele nawa yilonda. Masepa jenyi yanenganyana, naye yalila, alioze A-Yunda yamukekuna. (Luka 23:32-38; Yoa. 19:25) Hita shimbu te yinapalika, Yesu kanevu yikola yinji. Mbunge ni yihunguhungu yenyi yiyiputuka kulela, nawa kahashile kuhwima. Muze te anambe kusutuka, Yesu yalemba kulemba chakasula. Hanyima, yahetama yafwa. (Marku 15:37; Luka 23:46; Yoa. 10:17, 18; 19:30) Kwamba umwenemwene, Yesu kanakashimbula chinji ha kufwa, kufwa chipi nawa cha sonyi!

5. Kuli Yesu, chuma chika chamuhele yikola yinji ku mbunge kuhiana kufwa ha mutondo wa lamba?

⁵ Kuli Yesu, chuma chize chamuhele yikola yinji ku mbunge chakapwile mutapu uze afwile, alioze chitela chize anakamushihila. Kanakamuliongela ngwo kashililika Zambi, keshi kuvumbika Zambi ni jina lienyi. (Mateu 26:64-66) Kumulamikiza ngwo kapwile ni kushililika Zambi, chinakamunehena yikola yinji, kashika Yesu etele kuli Tato hanga amufunge ku kufwa chacho cha sonyi. (Mateu 26:38, 39, 42) Mumu liaka Yehova echele Mwanenyi yoze azanga kumona lamba ni kufwa? Tutalenu yikuma yitatu.

6. Mumu liaka Yesu atambile kumuzezeleka ha mutondo wa lamba?

⁶ Chitangu, Yesu katambile kufwila ha mutondo wa lamba hanga atusule A-Yunda ku limwe shingo. (Ngala. 3:10, 13) A-Yunda kapwile mushi lia shingo mumu katayijile kwononokena shimbi ya Zambi. Alioze ayo kakamanunwine chilakenyo chacho. Hachino, kuchizako kufwa mumu lia kupwa ana ja Alama, A-Yunda kapwile nawa mushi lia limwe shingo. (Roma 5:12) Shimbi ya Zambi kuli A-Izalele te yakwamba ngwo, nyi umwe lunga malinga shili kalinga mulonga uze atamba kumushihila. Hanyima, mujimba wenyi te katamba kuuzezeleka ha mutondo. * (Shimbi 21:22, 23; 27:26) Hachino ha kumuzezeleka ha mutondo, Yesu kapwishile chashi hanga vungu lize liamutunyine, nelio lihase kutambula yiwape ya ukuule wenyi.

7. Chikuma chika chamuchiali chize chatwalile Zambi kwecha Mwanenyi hanga amone lamba?

⁷ Tutalenu chikuma chamuchiali chize chatwalile Zambi kwecha Mwanenyi hanga amone lamba. Yehova te kanafumbu Yesu ha chiteli chize mapwa nacho kulutwe ngwe Sasendote  wa Lutwe. Yesu kamwene chize chapwa chikalu kwononokena Zambi, muze mwono wetu uli mu ponde. Yeseko yize Yesu apalikile yapwile yinji, kashika alembele ni kwita ukwaso kuli Zambi “ni kuteta cha ngolo ni masoji.” Chochene, amu Yesu amwene lamba linji kananyingika yize tunafupiwa, nawa “mahasa kutukwasa muze matweseka.” Chokuwaha Yehova kutwaha Sasendote wa Lutwe, yoze wakutuvwila ‘keke nawa unanyingika kukokoloka chetu’!—Hepre. 2:17, 18; 4:14-16; 5:7-10.

8. Chikuma chika chamuchitatu chize chatwalile Yehova hanga eche Yesu kupalika mu chimwe cheseko chikalu?

⁸ Chikuma chamuchitatu chize chatwalile Yehova kwecha Yesu amone lamba linji, chapwile hanga akumbulule chihula chino chilemu: Shina atu mahasa kushishika kuli Zambi nyi kanapalika mu yipikalo yinji? Satana kambile ngwenyi, chino kuchichi kulingiwa, nawa ngwenyi, atu kakuwayila Zambi mumu kakwalingila yuma yipema. Satana yamba nawa ngwenyi, atu keshi kuzanga Yehova ngwe chize apwile tato Alama. (Yombi 1:9-11; 2:4, 5) Alioze Yehova te kakufuliela ha ushishiko wa Mwanenyi, kashika echele Yesu hanga apalike mu cheseko chize mutu mahasa kukumba. Yesu kanungine ni kushishika, nawa yasolola ngwo Satana kali sakwonga.

9. Chilweza chika anakatusela kuli postolo Yoano?

⁹ Akwa-Kristu anji ufulielo wo wakolele mumu lia longeso lia ukuule. Ayo kanungine ni kwambujola chipwe muze te akwahungumiona, ni kupalika mu kapinda mweka ni mweka ni muze te hapwa kulu tushinakaji. Tutalenu chilweza cha postolo Yoano. Iye kanakambujola ni ushishiko mweswe umwenemwene hakutwala kuli Kristu ni ukuule, kota kachilingile ha miaka kuhiana 60. Muze te hikwasala hakehe hanga akumbanyise miaka 100, A-Roma yamumona ngwe te kanalimika no, chocho yamutuma mu zuwo lia ususu ha tungu lia Patemu. Mulonga uka alingile? Mbimbiliya yinambe ngwo, kamusele mu zuwo lia ususu “mumu ha liji lia Zambi ni mumu ha shindakenyo ya Yesu.” (Uso. 1:9) Yoano kanakatusela chilweza chipema cha ufulielo ni kunyongonona!

10. Kuchi mikanda yize Yoano asonekene yinasolola ngwo te kakulemesa ukuule?

¹⁰ Mikanda yize Yoano asonekene, yinasolola pundu chize iye te akuzanga Yesu ni chize te akusakwilila ha ukuule. Mikanda yenyi yinatongola ukuule hanji yuma yize ukuule wapwisa chashi ha yisuho kuhiana 100. Chakutalilaho, Yoano yasoneka ngwenyi: “Nyi kachi umwe mavulumuna, Hako tuli nenyi kumeso ja mwe Tata, iye Yesu Kristu, mwe mukwa ululi.” (1 Yoa. 2:1, 2) Mikanda yize Yoano asonekene, yinasolola nawa ulemu wakuhana “shindakenyo ya Yesu.” (Uso. 19:10) Chochene, Yoano te kakulemesa chinji ukuule. Kuchi mutuhasa kumwimbulula?

11. Yika muyihasa kutukwasa kwehuka kulinga shili?

¹¹ Ehuka manyonga akulinga shili. Nyi chamwenemwene twakusakwilila ha ukuule kutuchi kunyonga chuma ngwe: ‘Mumu liaka ngunase tachi jipwahaha hanga ngwehuke kulinga shili. Munguhasa kuvulumuna, hanyima mba mungwita ukonekeno.’ Shimbu tunyonge chocho, nyi matweseka hanga tulinge chuma chipi, twatamba kwamba ngwetu: ‘Ka! Kuchi munguhasa kulinga chuma chino, hanyima lia yeswe yize Yehova ni Yesu anakangulingila?’ Nyi mutupwa ni nyonga lino, mutuhasa kwita Yehova hanga atwehe tachi hanji kuliumba hanga tuchine kuholokela mu ‘cheseko chacho.’—Mateu 6:13

12. Kuchi mutuhasa kukaula chiyulo chili ha 1 Yoano 3:16-18?

 ¹² Zanga mandumbu je. Muze twakusolola zango, twakusolola nawa ngwetu, twakusakwilila ha ukuule. Mumu liaka? Mumu Yesu kahanyine mwono wenyi hi wika hali yetu, alioze ni hali mandumbu jetu nawa. Nyi iye kahanyine mwono wenyi hali ayo, chino chinasolola ngwo ayo kali alemu chinji kuli Yesu. (Tanga 1 Yoano 3:16-18.) Jila yimwe yize mutusolwelamo ngwetu twakuzanga mandumbu jetu, yili ha kutwama no kanawa. (Efwe. 4:29, 31–5:2) Chakutalilaho, mutuhasa kwakwasa muze anayiji hanji muze anapalika mu yipikalo ngwe muze mukulingiwa luyinda. Mba yika twatamba kulinga nyi umwe ndumbu mamba hanji matulinga yuma yize muyitulemeka ku mbunge?

13. Mumu liaka twatamba kukonekena akwetu?

¹³ Shina wakumona ngwo, chili chikalu kukonekena umwe ndumbu yoze wakulinga upi? (Levi 19:18) Nyi chenacho, kaula chiyulo chino: “Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo. Chizechene ngwe Kristu hananukonekena, chocho ni yenu nawa likonekenenu.” (Kolo. 3:13) Hita shimbu mutukonekena mandumbu jetu, mutusolola kuli Tata yetu wa mu malilu ngwetu, chamwenemwene twakusakwilila ha ukuule. Yika mutuhasa kulinga mba tununge ni kwokesa usakwililo wetu ha chawana chino cha Zambi?

14. Jila yika yize mutuhasa kwokeselamo usakwililo wetu ha ukuule?

¹⁴ Sakwilila Yehova mumu lia ukuule. Joanna, umwe ndumbu wa pwo wa miaka 83 yoze watwama ku Índia yamba ngwenyi: “Yami nakumona ngwami, chili chilemu kutongola ukuule matangwa eswe mu yilemba yami ni kusakwilila Yehova mumu lia ukuule.” Muze unalembe ukawe, nyonga ha yuma yipi yize walinganga ha tangwa liacho, hanyima eta kuli Yehova hanga akukonekene. Alioze nyi walinganga shili yinene, watamba kwita ukwaso kuli makulwana a mu chikungulwila. Ayo makupanjika, nawa makwaha yiyulo yipema yize yinakatuka mu Liji lia Zambi. Malemba hamwe ni yena nawa meta hanga Yehova akukonekene kupalikila mu ukuule wa Yesu. Hachino, makuwuka ku ufulielo ni kukukwasa kupwa nawa ni usepa upema ni Zambi.—Tia. 5:14-16.

15. Mumu liaka twatamba kusa mashimbu hanga tutange ni kupukuna ha ukuule?

¹⁵ Pukuna ha ukuule. Rajamani, umwe ndumbu wa pwo wa miaka 73 yamba ngwenyi:  “Muze nakutanga ha chize Yesu amwene lamba, meso jami kakuzala too ni masoji.” Ni yena muhasa kwivwa yikola ku mbunge ha kunyonga ha lamba lize Mwana wa Zambi amwene. Alioze, muze mununga ni kupukuna ha chitapo chize Yesu ahanyine, zango lie hali iye ni hali Yehova mulioka. Mba uhase kupukuna ha ukuule, mumu liaka kuwasele chikuma chino ha longeso lie lia wika?

16. Mumu liaka kulongesa akwetu hakutwala ku ukuule chakutuyukisa? (Tala chizulie ha chifukilo.)

¹⁶ Longesa akwenu hakutwala ku ukuule. Hita shimbu mutuhanjika ni akwetu hakutwala ku ukuule, usakwililo wetu ha ukuule muwoka. Yetu tuli ni yikwata yinji yipema yize yakutukwasa kulongesa akwetu anyingike, mumu liaka Yesu afwile hali yetu. Chakutalilaho, mutuhasa kuzachisa longeso 4 lia mukanda Sango Jipema ja Kuli Zambi! Longeso liacho lili ni mutwe unambe ngwo, “Yesu Kristu Iya?” Mutuhasa nawa kuzachisa kapitulu 5 wa mukanda, Yika Mbimbiliya Muyihasa Kutulongesa? Kapitulu wacho kali ni mutwe unambe ngwo, “Ukuule—Chawana Chinene cha Zambi.” Hita mwaka twakokesa usakwililo wetu ha ukuule ha kupwa ha Chiwanyino cha Kwiwuluka Kufwa cha Yesu, ni kusanyika akwetu hanga no eze ha chiwanyino chino chilemu. Twakusakwilila chinji ha chiwape chize Yehova atwehele, chakulongesa akwetu hakutwala kuli Mwanenyi.

17. Mumu liaka ukuule uli chawana chinene cha Zambi hali atu?

¹⁷ Kwamba pundu, tuli ni yikuma yinji yipema yize yakutukwasa kusakwilila ha ukuule ni kufunga usakwililo wacho. Ha mukunda wa ukuule, mutuhasa kupwa ni usepa upema ni Yehova, chipwe ngwe tuli yihenge. Kupalikila mu ukuule, yitanga ya Ndiapu kumakayonwona. (1 Yoa. 3:8) Kupalikila mu ukuule, upale wa Yehova hano hashi muukamanunuka. Hashi heswe muhakapwa paraisu. Atu eswe waze mukanyingika mu paraisu, makazanga Yehova ni kumulingila. Kashika hita tangwa, linga yize muuhasa hanga usolole usakwililo we ha ukuule—chawana chinene cha Zambi hali atu!