MUTWE WAKULILONGESA 17
Yehova Kakukuzanga Chinji!
“Yehova kakuwahilila ni atu jenyi.”—SAMU 149:4.
MWASO 108 Zango lia Zambi
CHIKUMA CHILEMU *
Tata yetu wa mu malilu “kakuwahilila” ni hita umwe wa kuli yetu (Tala paragrafu 1)
1. Yika Yehova akumona muli atu jenyi?
YEHOVA ZAMBI “kakuwahilila ni atu jenyi.” (Samu 149:4) Kunyingika chino chakutuvwisa kuwaha! Yehova kananyingika uhashi wetu, kakumona tachi jetu, nawa kakutukwasa hanga tupwe masepa jenyi. Kashika, nyi twanunga ni kushishika kuli iye, iye mapwa sepa lietu ndo ku miaka yeswe!—Yoa. 6:44.
2. Mumu liaka amwe chakwapwila chikalu kutayiza ngwo Yehova kakwazanga?
2 Amwe mahasa kwamba ngwo, ‘Yami ngunanyingika ngwami Yehova kakuzanga atu jenyi eswe, alioze kuchi munguhasa kupwa ni shindakenyo ngwami iye kakunguzanga?’ Mumu liaka amwe akulihula chocho? Oksana * yoze wamwene lamba ku wanuke yamba ngwenyi: “Muze angupapachishile ngunakawahilila chinji, chocho yinguputuka kukalakala ngwe pionelu. Hakupalika cha miaka 15, manyonga api a ku wanuke wami yaputuka kungupinjisa. Chocho yingunyonga ngwami te kuchishi utayizo wa Yehova, nawa kuchatelele zango lienyi.” Yua, umwe pionelu yoze neye wamwene lamba linji ku wanuke wenyi yamba ngwenyi: “Yami nalihanyine kuli Yehova mumu nazangile kumuvwisa kuwaha. Alioze napwile ni shindakenyo ngwami, Yehova te keshi kunguzanga.”
3. Yihula yika mutukumbulula ha mutwe uno?
3 Ngwe chize chalingiwile kuli mapangi wano aali waze twatongola, yena hanji wakuzanga chinji Yehova, alioze muhasa kuyambashana nyi iye kakukuzanga lume. Ha mutwe uno, mutukumbululaho yihula yino yaali: Mumu liaka watamba kupwa ni shindakenyo ngwo Yehova kakukuzanga? Nawa yika muyihasa kukukwasa muze munyonga ngwo Yehova keshi kukuzanga?
KUNYONGA NGWO YEHOVA KESHI KUTUZANGA CHILI PONDE
4. Mumu liaka kunyonga ngwetu, Yehova keshi kutuzanga chili ponde?
4 Zango likwete tachi jize jakututwala kulinga yimwe. Kupwa ni shindakenyo ngwetu, Yehova kakutuzanga ni kutukwasa, chakututwala hanga tumulingile ni mbunge yeswe chipwe ngwe tunapalika mu kapinda ku mwono wetu. Alioze nyi twanyonga ngwetu, Yehova keshi kutuzanga “tachi jetu mujipwa jikepe.” (Yishi. 24:10) Kashika nyi twahonga ni kuhona kutayiza ngwetu, Zambi kakutuzanga muchipwa chashi Satana kutwoza.—Efwe. 6:16.
5. Yika yalingiwile kuli amwe mandumbu waze apwile ni kunyonga ngwo Zambi keshi kwazanga?
5 Kunyonga ngwetu Yehova keshi kutuzanga, chakokolwele ufulielo wa amwe mandumbu. James, umwe mukulwana wa mu chikungulwila yamba ngwenyi: “Chipwe ngwe te nakukalakala ku Mbetele ni kukwasa chikungulwila cha limi lieka, nihindu te nakukakajana nyi Yehova kakutayiza mulimo uze nakumulingila. Nalihulile ngwami, shina Yehova kakupanjika lume yilemba yami?” Eva neye yoze uli mu mulimo wa shimbu lieswe yamba ngwenyi: “Kunyonga ngwo Yehova keshi kutuzanga chili ponde yinene, mumu chino muchihasa kututwala kulivwa ngwe kutushi ulemu. Chino muchihasa kutepulula zango lietu ku yuma ya ku spiritu ni uwahililo wetu mu mulimo wa Yehova.” Michael, umwe pionelu nawa mukulwana wa mu chikungulwila yamba ngwenyi: “Nyi kuushi kutayiza ngwo Zambi kakulihulumba hali yena, muhasa kusosoloka kuli iye.”
6. Nyi twaputuka kunyonga ngwetu, Zambi keshi kutuzanga, yika twatamba kulinga?
6 Yize yalingiwile kuli mandumbu wano, yinasolola chize manyonga api mahasa kupihisa ufulielo wetu. Mba yika mutulinga nyi mutuputuka kunyonga ngwetu, Zambi keshi kutuzanga? Twatamba kwehuka manyonga jacho kawashi-washi! Lemba kuli Yehova hanga akukwase kuchiza “manyonga wano api” ni kusalakanyisa sambukila ya Zambi yize muyikukwasa kufunga mbunge ni manyonga je. (Samu 139:23; Fwili. 4:6, 7) Nawa nyingika ngwe hi yena wika ko unapinji ni manyonga wano. Mandumbu akwo ashishika no kanapinji ni manyonga wano api. Chipwe tuvumbi twa Yehova ku mashimbu a kunyima, no kapalikile mu kapinda wacho. Tutalenu yize mutuhasa kulilongesa ha chilweza cha postolo Paulu.
YIZE MUTULILONGESA HA CHILWEZA CHA PAULU
7. Kapinda muka Paulu apwile nenyi?
7 Shina ha mashimbu amwe wakulivwa ngwe uli ni milimo yinji, nawa chakukukalila kulinga yeswe? Nyi chocho, muhasa kunyingika kanawa yize Paulu apalikile. Iye kapwile ni kulipikala hi wika ko ha chikungulwila chimuwika, alioze “ha yikungulwila yeswe.” (2 Kori. 11:23-28) Shina uli ni umwe musongo kuushi kuhwa uze wa kukuchiza uwahililo? Paulu kapwile ni umwe “lumbambo mu mujimba,” hanji ngwetu umwe musongo uze te wakumunehena lamba linji. Iye kazangile chinji kuhwisa musongo wacho. (2 Kori. 12:7-10) Shina uhenge we wakukuhongesa? Ha mashimbu amwe Paulu neye che te akulivwa. Iye kambile ngwenyi kali “mutu wa kulungajala” mumu mashimbu eswe te kakupinda ni uhenge wenyi.—Roma 7:21-24.
8. Yika yakwashile Paulu kukumba kapinda wenyi?
8 Paulu kapalikile mu yuma yize yesekele ufulielo wenyi ni kumuhongesa, chipwe chocho kanungine ni kulingila Yehova. Kulihi awanyine tachi ja kuchilinga? Chipwe ngwe Paulu te kananyingika uhenge wenyi, nihindu kapwile ni ufulielo ukolo ha ukuule. Iye nawa te kanayingika chilakenyo cha Yesu chinambe ngwo, “mweswawo mamufuliela makapwa ni mwono wa mutolo.” (Yoa. 3:16; Roma 6:23) Paulu kapwile ni kufuliela ha ukuule. Iye kapwile ni shindakenyo ngwenyi, Yehova kanazange kukonekena waze hanalikonyeka chipwe ngwe kalingile shili yinene.—Samu 86:5.
9. Yika twalilongesa ha maliji a Paulu ali ha A-Ngalashia 2:20?
9 Paulu nawa te kakufuliela ngwenyi, Zambi kakumuzanga mumu kanyingikine ngwo Zambi katumine Yesu hanga amufwile. (Tanga A-Ngalashia 2:20.) Tala maliji a utakamiso a Paulu ali kusongo lia versu yino. “Mwana Zambi, yoze wanguzangile, yoze waliechele hali yami.” Paulu kakanyongene ngwenyi, Zambi kakuzanga atu amwe, akwo ka, hanji ngwenyi, ‘Ngunahase kumona mumu liaka Yehova akuzanga mandumbu amwe, alioze yami keshi kunguzanga.’ Iye kewulwile mandumbu mu Roma ngwenyi: “Shimbu te tuchili yivulumunyi, Kristu watufwilile.” (Roma 5:8) Kukushi nichimwe chize muchikinda zango lize Zambi akwete hali yetu!
10. Yika mukanda wa A-Roma 8:38, 39, unatulongesa?
10 Tanga A-Roma 8:38, 39. Paulu kapwile ni shindakenyo ha zango linji lize Zambi apwile nalio hali iye. Iye kasonekene ngwenyi, kukushi “nichimwe chuma muchihasa kutuhandununa ku zango lia Zambi.” Paulu kanyingikine chize Yehova asolwele uhomboloji kuli A-Izalele, nawa te kakwiwuluka chize Yehova anakamusolwela keke. Mu maliji akwo Paulu te kanambe ngwenyi, nyi Yehova katumine Mwanenyi hanga angufwile, kuchatambile kwamba ngwo iye keshi kunguzanga.—Roma 8:32.
Yehova kakulihulikila ha yize tunalingi haliapwila ni yize mutukalinga kulutwe hi ha yize ko twalingile ku mashimbu akunyima (Tala paragrafu 11) *
11. Chipwe muze alingile uhenge uze uli ha 1 Timoteu 1:12-15, mumu liaka Paulu apwile ni shindakenyo ngwenyi Yehova kakumuzanga?
11 Tanga 1 Timoteu 1:12-15. Paulu kota kapwile ni kupinda chinji muze te akunyonga ha yuma yipi yize alingile, shimbu te kanda achipwa mukwa-Kristu. Kashika ambile ngwenyi, kapwile “chihenge wa lutwe”! Muze te kanda achinyingika umwenemwene, Paulu kapwile ni kuhungumiona akwa-Kristu mu mbonge ni mbonge, kusa anji mu mazuwo a ususu ni kupatwila amwe hanga aashihe. (Yili. 26:10, 11) Muhasa kunyonga chize Paulu te mevwa muze maliwana ni umwe mukwa-Kristu yoze tato wafwile mumu lia iye? Kwamba umwenemwene, Paulu kachi kakalivwile kanawa. Paulu kalikonyekene ha uhenge uze alingile, alioze te kechi kuhasa kwalumuna yuma yize yalingiwile ku mwono wenyi. Iye te kakutayiza wika ngwo, Kristu kafwile hali iye. Kashika asonekene ngwenyi: “Ku vumbi lia Zambi nguli chize nguli.” (1 Kori. 15:3, 10) Yika twalilongesa ha chilweza cha Paulu? Twalilongesa ngwetu, watamba kutayiza ngwo Kristu kafwile hali yena, ni kupwisa chashi hanga upwe ni usepa upema ni Yehova. (Yili. 3:19) Hanji wakulihisa mumu lia uhenge uze walingile kunyima, chipwe uze walinga hanyima lia kupwa Chela cha Yehova. Nyi chocho, iwuluka ngwe Yehova kakulihulikila ha yize tunalingi haliapwila ni yize mutukalinga kulutwe hi ha yize ko twalingile ku mashimbu akunyima.—Iza. 1:18.
12. Nyi twalivwa ngwe kutushi ulemu nawa kutwatelele zango lia Zambi, kuchi 1 Yoano 3:19,20, muuhasa kutukwasa?
12 Muze munyonga ngwo Yesu kafwile hanga afuke shili ye, muhasa kwamba ngwe, ‘Yami kuchatelele chawana chino chilemu.’ Mumu liaka muhasa kulivwa chocho? Mbunge yetu ya uhenge muyihasa kutwonga ni kutushinjila tunyonge ngwetu, kutushi ni ulemu nawa ngwetu kutwatelele zango lia Zambi. (Tanga 1 Yoano 3:19, 20.) Nyi mutuputuka kunyonga chocho, twatamba kunyingika ngwetu, “Zambi iye munene wahiana mbunge jetu.” Zango ni ukonekeno wa Tata yetu wa mu malilu, yili ni ndundo jinji kuhiana manyonga eswawo api mutupwa no. Twatamba kupwa ni shindakenyo ngwetu, Yehova kakutuzanga. Mba tuchilinge, twatamba kulilongesa Liji lienyi hita tangwa, kulemba kuli iye matangwa eswe ni kuyuka ha ukwaso wa mandumbu jetu. Mumu liaka kulinga yuma yino chili ni ulemu?
CHIZE LONGESO LIA MBIMBILIYA, KULEMBA NI MANDUMBU JETU MAHASA KUTUKWASA
13. Kuchi kulilongesa Mbimbiliya muchihasa kutukwasa? (Tala nawa mushete, “ Chize Liji lia Zambi lia Kwakwasa.”)
13 Lilongese Liji lia Zambi hita tangwa. Nyi wachilinga, mulilongesa yitanga yinji yipema ya Yehova. Munyingika ngwo, iye kakukuzanga chinji. Kupukuna ha chisoneko cha Mbimbiliya hita tangwa, muchihasa kukukwasa “kululamisa manyonga ni mbunge ye.” (2 Timo. 3:16) Kevin, umwe mukulwana wa mu chikungulwila yoze te wakupinda ni manyonga akulivwa ngwe keshi ni ulemu, yamba ngwenyi: “Kutanga Samu 103 ni kuyipukuna, chakungukwasa kululamisa yuma ni kunyingika ngwami, Yehova kakulihulumba hali yami.” Eva, yoze hitwatongola kulu yamba ngwenyi: “Kusongo lia hita tangwa, nakusa mashimbu hanga ngupukune ha yize yapwa yilemu kuli Yehova. Nawa chino chakungwaha sambukila ya ku mbunge ni kwokesa ufulielo wami.”
14. Kuchi kulemba muchihasa kutukwasa?
14 Lemba matangwa eswe. (1 Tesa. 5:17) Nyi tunazange kupwa ni usepa ukolo ni umwe mutu, twatamba kuhanjika nenyi matangwa eswe ni kumulweza chize tunevu. Chino che chakulingiwa ha usepa wetu ni Yehova. Muze twakulemba kuli Yehova ni kumulweza manyonga jetu, chize tunevu ni yize tunapalika, twakusolola ngwetu tunajikijila hali iye, nawa ngwo tunanyingika ngwetu kakutuzanga. (Samu 94:17-19; 1 Yoa. 5:14, 15) Yua, yoze hitwatongola yamba ngwenyi: “Muze nakulemba, yami nakwamba yuma yinji hi wika ko yize napalika ha tangwa. Nakwazulula mbunge yami kuli Yehova ni kumulweza chize ngunevu. Hakehe-hakehe, ngunalilongesa kumona Yehova ngwe Tata yoze wakuzanga ana jenyi, hi ko ngwe umwe mwenya-mulimo.”—Tala mushete, “ Shina Hiunatange Kama Mukanda Uno?”
15. Kuchi Yehova akusolola ngwenyi kakulihulumba hali hita umwe wa kuli yetu?
15 Yuka ha ukwaso wa mandumbu. Ayo kali chawana cha kuli Yehova. (Tia. 1:17) Tata yetu wa mu malilu kakusolola ngwenyi, kakulihulumba hali hita umwe wa kuli yetu hakutwaha umwe usoko wa ku spiritu wa mandumbu waze akutusolwela “zango matangwa eswe.” (Yishi. 17:17) Ha mukanda wenyi kuli A-Kolosu, Paulu kahanjikile hali akwa-Kristu waze amukwashile, ha kwamba ngwenyi, ayo “kapwile akwa-kumutakamisa.” (Kolo. 4:10, 11) Chipwe Yesu neye kafupiwile ukwaso wa masepa, angelo ni wa atu akwo, nawa kanakawahilila chinji ha ukwaso wacho.—Luka 22:28, 43.
16. Kuchi mandumbu mahasa kutukwasa kupwa ni usepa upema ni Yehova?
16 Shina wakufupa ni kutayiza ukwaso wa mandumbu je mu chikungulwila? Kulweza umwe ndumbu wajama chize tunevu kuchalumbunukine ngwo, tunazeye ku ufulielo, alioze muchihasa kutukwasa. Tutalenu yize James yoze hitwatongola ambile: “Kulikata ni mandumbu waze ajama ku ufulielo chakungukwasa chinji. Muze nakupinda ni manyonga api, masepa wano alemu kakungupanjika ni uhomboloji weswe ni kungulweza chize ayo akunguzanga. Kupalikila muli ayo, nakuhasa kumona chize Yehova akulihulumba hali yami ni kunguzanga.” Chochene, chili chilemu kupwa ni usepa upema ni mandumbu mu chikungulwila ni kuufunga!
NUNGA MU ZANGO LIA YEHOVA
17-18. Iya twatamba kupanjika, nawa mumu liaka?
17 Satana kanazange hanga tweche kulinga yuma yize yalita. Iye kanazange hanga unyonge ngwo, Yehova keshi kukuzanga nawa ngwo kuushi ni ulemu. Alioze ngwe chize twamona, yino yeswe yili mahuza.
18 Yehova kakukuzanga chinji. Yena uli mulemu kuli iye. Nyi wamwononokena, “mununga mu zango lienyi” ngwe Yesu. (Yoa. 15:10) Kashika, kanda upanjika Satana chipwe mbunge ye muze muyikuhisa. Shimbu ulinge chocho, panjika Yehova yoze wakumona yuma yipema yize hita umwe wa kuli yetu akulinga. Pwako ni shindakenyo ngwe, Yehova “kakuwahilila ni atu jenyi,” kuchingako yena!
MWASO 141 Chikomokeso cha Mwono
^ kax. 5 Mandumbu amwe chakwakalila kutayiza ngwo, Yehova kakwazanga. Mutwe uno, muutukwasa tupwe ni shindakenyo ngwetu, Yehova kakuzanga hita umwe wa kuli yetu. Nawa mutushimutwina yize mutuhasa kulinga nyi mutunyonga ngwetu, chili chikalu Zambi kutuzanga.
^ kax. 2 Majina amwe kapwa kwalumuna.
^ kax. 67 ULUMBUNWISO WA CHIZULIE: Muze te kanda achipwa mukwa-Kristu, Paulu kapwile ni kuhungumiona akwa-Kristu ni kusa anji mu mazuwo a ususu. Muze atayijile yize Kristu alingile hali iye, Paulu yalumuna kunyonga chenyi. Paulu kakolwezele mandumbu jenyi ku ufulielo, amwe a kuli ayo kota kapwile asoko ja mandumbu waze iye ahungumionene.
