1-2. Yika yalingiwileko shimbu Yesu te kanda achihanjika maliji jenyi akasula?

HA CHIMENE tangwa 14 ya Nisane ya mwaka 33 M.J. Yesu kanamusuma mulonga ni kumuhisa ha chikuma chize kalingile. Hanyima, yamulenya, yamumwesa lamba linji ni kumuhata ha mutondo wa lamba. Yamuhata mbambo ku moko ni ku molu. Kuli iye chinapu chikalu chinji kuhwima ni kuhanjika. Alioze katamba kuhanjika, mumu kali ni yuma yilemu yize anambe kwamba.

² Tushimutwinenu maliji akasula a Yesu muze ali ha mutondo wa lamba, ni kumona yize mutuhasa kulilongesa ha maliji jacho. Mu maliji akwo, ‘tumwivwenu’.—Mateu 17:5.

3. Hali aya Yesu te anahanjikila muze ambile ngwenyi: “Tata, uakonekene kama”?

³ Yika Yesu ambile? Muze Yesu apwile ha mutondo wa lamba, kalembele ngwenyi: “Tata uakonekene kama.” Alioze aya waze Yesu azangile hanga Tato aakonekene? Maliji anasulilika a Yesu kanatwehe limwe nyonga, iye yamba ngwenyi: “Ayo kanyingikine chize analingi.” (Luka 23:33, 34) Kota Yesu te kanahanjika hali maswalale A-Roma waze amuhachile ha mutondo wa lamba. Ayo te kanyingikine kanawa Yesu. Hanji kapwile ni kunyonga hali mbunga yize yafupile hanga amushihe, alioze kulutwe te mamufuliela. (Yili. 2:36-38) Yesu kakechele hanga yuma yipi yize amulingile, yimupwise mutu mukalu ni kuhona kukonekena atu waze amulingile upi wacho. (1 Petu. 2:23) Shimbu alinge chocho, iye yeta kuli Yehova hanga akonekene atu waze amushihile.

4. Yika mutuhasa kulilongesa ha chize Yesu apwile ni mbunge ya kukonekena akwa-kole jenyi?

⁴ Yika mutuhasa kulilongesa ha maliji a Yesu? Chizechene ngwe Yesu, ni yetu twatamba kupwa ni mbunge ya kukonekena akwetu. (Kolo. 3:13) Atu amwe kuchingako asoko jetu, mahasa kulimika  ni yetu, mumu keshi kunyingika yize twakufuliela ni chize twakumbata mwono wetu. Ayo hanji mahasa kutuliongela yuma, kutuvwisa sonyi kumeso ja atu, kusuwa mikanda yetu hanji kufupa kutulinga yuma yipi. Shimbu twatulikile toto, mutuhasa kwita kuli Yehova hanga akwase atu jacho kunyingika umwenemwene. (Mateu 5:44, 45) Kanji-kanji kukonekena mutu hi chashi ko, chipi-chipi nyi mutu wacho katulinga yuma yipi. Alioze nyi twecha mbuto ya upi ni toto hanga yisoke mu mbunge yetu, mutuhasa kulimwesa lamba yetwene. Umwe ndumbu wa pwo yamba ngwenyi: “Kukonekena akwetu kuchalumbunukine ngwo ngunatayiza ngwami, yize alinga yinalite hanji ngwami ngweeche hanga angumwese lamba, ka. Alioze chinalumbunuka wika kusakula kulinga yimwe, che kwamba, kwecha kweevwila toto.” (Samu 37:8) Muze twakukonekena akwetu, twakusakula hanga yuma yipi yize ayo atulinga yichine kutupwisa atu akalu.—Efwe. 4:31, 32.

5. Yika Yesu alakenyene kuli umwe chingalwe yoze te unafwila sali lienyi, nawa yika mutuhasa kulilongesa ha chilakenyo chacho?

⁵ Yika Yesu ambile? Yingalwe aali kapwile ha mutondo wa lamba hamwe ni Yesu umwe sali, mukwo sali likwo. Ku uputukilo, ayo eswe aali kapwile ni kuchoka Yesu. (Mateu 27:44) Alioze hakupalika cha mashimbu, umwe wa kuli ayo yalumuna manyonga jenyi. Iye yamba ngwenyi, Yesu kalingile upi niumwe. (Luka 23:40, 41) Chikwo nawa, iye kasolwele ngwenyi kanafuliela ngwo Yesu te mamuhindwisa, nawa te mapwa mwanangana limwe tangwa. Yamba kuli Yesu ngwenyi: “Ngwiwuluke kama muze muwiza mu Wanangana we.” (Luka 23:42) Lunga wacho kasolwele ngwenyi, kali ni ufulielo ukolo! Yesu yamukumbulula ngwenyi: “Pundu, ngwami, musono uno kumukapwa hamwe ni yami [hi mu Wanangana ko, alioze] mu Paraisu.” (Luka 23:43) Twiwulukenu ngwetu, chilakenyo chino cha Yesu te chinatale hali iye ni hali lunga wacho. Kashika azachishile maliji ngwe, “kumukapwa” ni liji “yami.” Yesu kahanyine kutalatala kuli chingalwe yono hakamwihi ni kufwa. Mumu kanyingikene ngwenyi, Tato kali mukwa-keke.—Samu 103:8.

6. Yika mutuhasa kulilongesa ha maliji a Yesu kuli umwe chingalwe?

⁶ Yika mutuhasa kulilongesa ha maliji a Yesu? Yesu kakwimbulula Tato ni ungunu weswe. (Hepre. 1:3) Yehova kanazange kutukonekena ni kutuvwila keke. Alioze iye machilinga wika nyi mutulikonyeka ni mbunge yeswe ha yuma yipi yize twalingile ku mashimbu akunyima, ni kusolola ufulielo ha chitapo cha ukuule wa Yesu Kristu. (1 Yoa. 1:7) Atu amwe muchihasa kwakalila kutayiza ngwo, Yehova mahasa kwakonekena ha shili yize alingile ku mashimbu akunyima. Nyi che wakulivwa ha amwe mashimbu, nyonga ha chino: Muze te kwasala amwe mashimbu akehe hanga afwe, Yesu yasolwela umwe chingalwe keke yoze te unaputuka kufuliela muli iye. Kashika mutuhasa kupwa ni shindakenyo ngwetu, Yehova masolwela keke tuvumbi twenyi ashishika waze akusa tachi hanga ononokene shimbi jenyi!—Samu 51:1; 1 Yoa. 2:1, 2.

7. Ngwe chize twamona ha Yoano 19:26, 27, yika Yesu ambile kuli Maria ni kuli Yoano, nawa mumu liaka ambile maliji jacho?

⁷ Yika Yesu ambile? (Tanga Yoano 19:26, 27.) Yesu te kanalihulumba hali naye, yoze kota ha mashimbu jacho te tuliwa. Mandumbu ja Yesu te mahasa kufunga naye ku yize mafupiwa ku musunya. Mba iya te mamufunga ku spiritu? Kukushi niyimwe yize yinasolola ngwo, ha mashimbu jacho mandumbu ja Yesu te hanapu tumbaji twenyi. Alioze, Yoano kapwile umwe wa kuli apostolo ashishika a Yesu, nawa umwe wa kuli masepa jenyi apema. Kuli Yesu, waze apwile  ni kuwayila yenyi Yehova hamuwika, kapwile asoko jenyi a ku spiritu. (Mateu 12:46-50) Yesu te kakuzanga Maria nawa kazangile kupwa ni shindakenyo hali yoze te mamufunga. Kashika etele kuli Yoano hanga amufunge. Yesu kanyingikine ngwenyi, Yoano te makwasa Maria hanga anunge ni kulingila Yehova. Chocho yamba kuli naye ngwenyi: “Talenu mwane!” Kuli Yoano yamba ngwenyi: “Tala noko!” Kukatuka ha tangwa liacho, Yoano te mapwa ngwe mwana wa Maria ni kumukwasa ngwe naye. Maria kafungile kanawa Yesu chize ku kusemuka chenyi, nawa kapwile hamwe nenyi muze afwile. Kashika, Yesu kapwile ni yuma yinji yize yamutwalile kuzanga naye ni kumulemesa!

8. Yika mutuhasa kulilongesa ha yize Yesu ambile kuli Maria ni Yoano?

⁸ Yika mutuhasa kulilongesa ha maliji a Yesu?  Usepa uze tukwete ni mandumbu jetu a ku ufulielo, muuhasa kupwa ukolo chinji kuhiana uze tukwete ni asoko jetu. Asoko jetu mahasa kulimika ni yetu hanji kutumbila, alioze Yesu kalakenyene ngwenyi, nyi mutulikwachilila kuli Yehova ni ha ululikiso Wenyi, mutukatambula “kulakaji a yisuho” kuhiana yize mututokesa. Mandumbu jetu anji kakupwa ngwe ana jetu a malunga ni a mapwo, atata hanji amama. (Marku 10:29, 30) Tunalingi chihanda cha umwe usoko wa ku spiritu uze unalinungu ku ufulielo ni mu zango​—zango hali Yehova ni hali mandumbu jetu. Kuchi wakwivwa ha kupwa mu usoko uno?—Kolo. 3:14; 1 Petu. 2:17.

9. Yika mutuhasa kulilongesa ha maliji a Yesu waze ali ha Mateu 27:46?

⁹ Yika Yesu ambile? Muze te kwasala hakehe hanga afwe, Yesu yamba ngwenyi: “Zambi yami, Zambi yami, kuchi te hiwangwehuka?” (Mateu 27:46) Mbimbiliya kuyishi kulumbununa mumu liaka Yesu ambile chocho. Alioze, mutuhasa kulilongesa yuma yinji ha maliji jacho. Chakutalilaho, muze Yesu ambile maliji wano, iye te kanamanununa uprofeto uli ha Samu 22:1. * Chikwo nawa, chino chinasolola pundu ngwo, Yehova kakasele “chipanga” hanga afunge Mwanenyi. (Yombi 1:10) Shimbu alinge chocho, Yehova kechele hanga Mwanenyi amweseke kuli akwa-kole jenyi, nawa Yesu te kananyingika kanawa chikuma chino. Cheseko chacho chapwile chinene chinji, niumwe mutu te kanda achipalika kama mu cheseko cha mutapu au. Chikwo nawa, maliji wano a Yesu kasolwele pundu ngwo, iye kapwile ni shindakenyo ngwenyi, kakalingile upi niumwe nawa ngwenyi te katelele kufwa.

10. Yika mutuhasa kulilongesa ha yize Yesu alwezele Tato?

¹⁰ Yika mutuhasa kulilongesa ha maliji a Yesu? Chuma chimwe mutuhasa kulilongesa chili ngwo, kutwatambile kushimbwila ngwetu, Yehova atufunge ku yuma yize yakweseka ufulielo wetu. Ngwe chizechene esekele Yesu ndo ni kukufwa, ni yetu twatamba kulilulieka hanga tusolole ngwetu, twashishika ndo kukufwa, nyi muchilita. (Mateu 16:24, 25) Chipwe chocho, Zambi kanatwehe shindakenyo ngwenyi, keshi kutweseka kuhiana chize mutuhasa. (1 Kori. 10:13) Chuma chikwo twalilongesa chili ngwo, chizechene ngwe Yesu, ni yetu mutuhasa kupalika mu yuma yipi, chipwe ngwe kutwalingile upi niumwe. (1 Petu. 2:19, 20) Waze akulimika ni yetu keshi kuchilinga mumu ngwo twalinga chimwe chuma chipi, alioze kakuchilinga mumu yetu kutushi kulinga chihanda cha hano hashi, nawa twakukalila umwenemwene. (Yoa. 17:14; 1 Petu. 4:15, 16) Yesu kanyingikine mumu liaka Yehova amwechele hanga amone lamba. Alioze mandumbu amwe ashishika muze akupalika mu yipikalo, kanji-kanji kakulihula ngwo, mumu liaka Yehova aneche hanga ayo apalike mu yuma yacho. (Haba. 1:3) Zambi yetu kakusolola keke ni kulihumikiza hali mandumbu wano. Yehova kananyingika ngwenyi, nyonga lino hi kuhona ufulielo ko, alioze ngwo, ayo kanafupiwa utakamiso uze iye wika mahasa kwahawo.—2 Kori. 1:3, 4.

11. Mumu liaka Yesu ambile maliji waze ali ha Yoano 19:28?

¹¹ Yika Yesu ambile? (Tanga Yoano 19:28.) Mumu liaka Yesu ambile ngwenyi: “Pwila ngunevu”? Iye kambile maliji wano hanga “chisoneko chimanunuke” hanji ngwetu, kambile maliji waze ali ha Samu 22:15 ngwo: “Tachi jami jinomu ngwe chipalupalu cha ndeho; limi liami linalamata ku mbangachi jami.” Mutuhasa  kunyingika mumu liaka Yesu te anevu pwila yinji. Iye te kanevu yikola yinji mumu kapwile ha mutondo wa lamba. Chikwo nawa homa haze apwile, iye te kanafupiwa ukwaso wa akwo mba anwe meya.

12. Yika mutuhasa kulilongesa ha maliji a Yesu anambe ngwo, “Pwila ngunevu”?

¹² Yika mutuhasa kulilongesa ha maliji a Yesu? Yesu kakanyongene ngwenyi, kwamba chize anevu te muchimusolola ngwe kali mulelu. Ni yetu kutwatambile kunyonga chocho. Ha mashimbu amwe, kwakulingiwa yuma ku mwono wetu yize kutuchi kuzanga kulweza akwetu. Alioze nyi mutumona ngwetu, kutuchi kuhasa kuhwisa kapinda wacho ukawetu, kutwatambile kwivwa woma wa kwita ukwaso kuli akwetu. Chakutalilaho, nyi hitwapwa tushinakaji hanji tunayiji, mutuhasa kwita ukwaso kuli umwe sepa hanga atutwale ni kulanda yuma hanji kuya ku shipitali. Nyi tunanenganyana hanji kuhonga ku mbunge, mutuhasa kwita kuli umwe mukulwana wa mu chikungulwila hanji umwe ndumbu wajama, hanga atupanjike hanji kututakamisa. (Yishi. 12:25) Twiwulukenu ngwetu, mandumbu jetu a mapwo ni a malunga kakutuzanga chinji, nawa kanazange kutukwasa ha “tangwa lia lamba.” (Yishi. 17:17) Alioze, ayo keshi kunyingika manyonga jetu ni chize tunevu. Kashika nyi kutwalwezele yize tunafupiwa, ayo keshi kuyinyingika.

13. Yuma yika yize Yesu alingile ha kushishika ndo ni kukufwa?

¹³ Yika Yesu ambile? Muze te hikwapwa chingoloshi ha tangwa 14 Nisane, Yesu yakololoka ngwenyi: “Chinamanunuka.” (Yoa. 19:30) Maliji wano a Yesu kanatulongesa ngwetu, muze te kwasala hakehe hanga afwe, iye yanyingika ngwenyi, kamanunwine yeswe yize Yehova amutumine kulinga. Amu ahashile kushishika ndo ni kukufwa, Yesu kalingile yuma yinji. Chitangu, kasolwele ngwenyi, Satana kali mukwa-mahuza. Kasolwele nawa ngwenyi, chipwe mutu chihenge mahasa kununga ni kushishika chipwe ngwe Satana mamulinga yuma yeswayo. Chamuchiali, Yesu kahanyine mwono wenyi ngwe ukuule. Hakuhana mwono wenyi ngwe ukuule, Yesu yapwisa chashi hanga atu yihenge apwe masepa ja Zambi, ni kupwa ni kutalatala cha mwono wa mutolo. Chamuchitatu, Yesu yasolola ngwenyi, Yehova kali umwe mwanangana wa ululi nawa yakalila jina lienyi.

14. Kuchi twatamba kutwama hita tangwa? Lumbununa.

¹⁴ Yika mutuhasa kulilongesa ha maliji a Yesu? Twatamba kusa tachi hanga tununge ni kushishika hita tangwa. Tala yize ambile Ndumbu Maxwell Friend, yoze wakalakalile ngwe Longeshi wa Shikola ya Ngiliate. Ha chimwe kukunguluka cha mambonge, Ndumbu Friend ha pande jenyi yamba hakutwala ku kushishika ngwenyi: “Kanda utulika chuma chize muhasa kulinga hanji kwamba musono. Shina uli ni shindakenyo ngwe, hamene muuhinduka ni mwono? Hita tangwa mutwama solola ngwe, unatela kuzuka mwono wa mutolo.” Hita tangwa mutuhinduka ni mwono, twatamba kulimona ngwe uhashi wetu wakasula wakusolola ushishiko wetu kuli Yehova. Nyi twalinga chino, chipwe ngwe mutupwa ha mashimbu akufwa mutuhasa kwamba ngwetu: “Yehova, nalinga yeswe yize munguhasa hanga ngushishike kuli yena, nasolola ngwami Satana kali mukwa-mahuza, nakalila jina lie ni kukwasa wata we!”

15. Kulita ni Luka 23:46, shindakenyo yika Yesu apwile nayo?

¹⁵ Yika Yesu ambile? (Tanga Luka 23:46.) Ni ufulielo weswe, Yesu yamba ngwenyi: “Tata, mu moko je ngunakunjika spiritu yami.” Yesu kanyingikine ngwenyi, kutalatala chenyi chapwile  mu moko ja Yehova, nawa kapwile ni shindakenyo ngwenyi, Tato te mamwiwuluka.

16. Yika walilongesa ha chilweza cha mukweze wa miaka 15?

¹⁶ Yika mutuhasa kulilongesa ha maliji a Yesu? Nunga ni kushishika kuli Yehova, chipwe ngwe mwono we muupwa mu ponde. Mba uhase kuchilinga, watamba “fuliela Yehova ni mbunge ye yeswe.” (Yishi. 3:5) Tala chilweza cha Joshua umwe Chela cha Yehova wa miaka 15, yoze wapwile ni musongo uze kuushi kuhwa. Iye kalitunyine kutambula uwukiso weswawo uze muulimika ni shimbi ja Zambi. Muze te hi kwasala hakehe hanga afwe, iye yalweza naye ngwenyi: “Mama, nguli mu moko ja Yehova. . . . Ngunakulweza ni shindakenyo yeswe ngwami, Yehova kumakanguhindwisa. Iye kananyingika manyonga jami nawa nakumuzanga chinji.” * Hita umwe wa kuli yetu katamba kulihula ngwenyi: ‘Nyi mungupalika mu cheseko cha ufulielo chize muchifwika mwono wami, shina mungusa mwono wami mu moko ja Yehova ni kufuliela ngwami iye makangwiwuluka?’

17-18. Yikuma yika yize twalilongesa? ( Tala mushete, “Yize Twalilongesa ha Maliji Akasula a Yesu.”)

¹⁷ Ngwe chize twamona, maliji akasula a Yesu, kanatulongesa yikuma yinji yilemu! Twiwulukenu ngwetu, tunafupiwa kukonekena akwetu ni kufuliela ngwetu, Yehova neye matukonekena. Tuli ni chiwape chinene cha kupwa ni mandumbu jetu a malunga ni a mapwo a ku ufulielo waze akulihana hanga atukwase. Alioze mba chino chilingiwe, twatamba kwita ukwaso wo nyi muchifupiwa. Tunanyingika ngwetu, Yehova matukwasa kukumba kapinda mweswawo masolokako. Twamona nawa ngwetu, chili chilemu, kumona hita tangwa ngwe chisuho chakasula chakusolwelamo ushishiko wetu. Chikwo nawa, twatamba kufuliela ngwetu, nyi twasa mwono wetu mu moko ja Yehova, iye matufunga.

¹⁸ Kwamba umwenemwene, mutuhasa kulilongesa yuma yinji ha yize Yesu ambile, muze te ali ha mutondo wa lamba! Hakutwala kuli Mwanenyi Yehova yamba ngwenyi: “Mwivwenu Iye.” Nyi mutusa mu yitanga yikuma yeswe yize twalilongesa ha mutwe uno, mutulinga pundu yeswe yize Yehova anatutumu.—Mateu 17:5.