1. Yika mutuhasa kutesa kulinga ku ufulielo?

 YETU akwa-Kristu amwenemwene, twakuzanga chinji Yehova. Kashika, tunazange kumulingila ni mbunge yetu yeswe. Alioze nyi tunazange kulingila Yehova ni mbunge yetu yeswe, ndo tutese kulinga yimwe ku ufulielo ngwe, kupwa ni yitanga ya Ukristu, kulilongesa utotombo waha ni kufupa majila akukwashilamo akwetu. b

2. Mumu liaka twatamba kutesa yimwe ku ufulielo, ni kusa tachi hanga tuyimanunune?

² Mumu liaka twatamba kununga ni kukola ku ufulielo? Mumu tunazange kuvwisa Tata yetu wa mu malilu kuwaha. Yehova kakuwahilila muze akumona chize tunazachisa utotombo wetu hanga tumulingile ni mbunge yeswe. Chikwo nawa, tunazange kukola ku ufulielo mumu nyi twachilinga mutuhasa kukwasa mandumbu jetu. (1 Tesa. 4:9, 10) Kashika, chipwe ngwe tuli ni miaka yinji hanji yikehe mu umwenemwene, nihindu twatamba kununga ni kukola ku ufulielo. Tutalenu chize mutuhasa kuyuka nyi twachilinga.

3. Kulita ni 1 Timoteu 4:12-16, yika postolo Paulu akolwezele Timoteu kulinga?

³ Muze postolo Paulu asonekene mukanda wenyi utangu kuli Timoteu, mukweze yono te hapwa mukulwana wa mu chikungulwila wajama. Chipwe chocho, Paulu yamukolweza hanga anunge ni kukola ku ufulielo. (Tanga 1 Timoteu 4:12-16.) Muze mutanga maliji waze Paulu asonekenene Timoteu,  mumona ngwe kamukolwezele akole ku ufulielo mu majila aali: ha kupwa ni yitanga ya Ukristu ngwe zango, ufulielo, kulinanga, kulikolweza kutanga, kushinjila maliji ni kulongesa. Chilweza cha Timoteu chinasolola ngwo, kutesa kulinga yimwe ku ufulielo muchitukwasa hanga tulingile kanawa Yehova. Mutumona nawa chize mutuhasa kulihana chinji mu mulimo wa kwambujola.

4. Kulita ni A-Fwilipu 2:19-22, yika yakwashile Timoteu mba Yehova amuzachise chinji?

⁴ Yika yakwashile Timoteu mba Yehova amuzachise chinji? Chuma chamukwashile chili yitanga ya Ukristu yize apwile nayo. (Tanga A-Fwilipu 2:19-22.) Yuma yize Paulu ambile hali Timoteu yinasolola ngwo, kapwile ni kulikehesa, kushishika, chikilikita nawa te kakumujikijila. Iye kapwile ni kuzanga mandumbu jenyi ni mbunge yeswe, kashika azangile chinji kwakwasa. Hachino, Paulu yazanga Timoteu ni kumwaha yiteli chakuhona kwivwa woma. (1 Kori. 4:17) Chizechene nawa, nyi twapwa ni yitanga ya Ukristu, matuzachisa chinji mu chikungulwila nawa Yehova manunga ni kutuzanga.—Samu 25:9; 138:6.

5. (a) Kuchi muhasa kunyingika chitanga cha Ukristu chize mululieka? (b) Kulita ni chizulie, yika umwe pangi analingi hanga asolole keke kuli akwo?

⁵ Sakula chitanga cha Ukristu chize unazange kupwa nacho. Eta ukwaso kuli Yehova hanga umone yize unafupiwa kululieka ku mwono we. Hanyima, sakula chitanga chize muhasa kululieka. Chakutalilaho, muhasa kumona ngwe unafupiwa kupwa mukwa-keke hanji kupwa ni zango lia kukwasa chinji mandumbu je a ku ufulielo. Hanji mufupa kupwa mukwa-sambukila ni kukonekena akwenu. Chuma muchihasa kukukwasa chili kuhula ndumbu yoze wakujikijila hanga akulweze yuma yize watamba kululieka.—Yishi. 27:6.

6. Yika muhasa kulinga mba usolole chimwe chitanga cha Ukristu?

⁶ Sako tachi hanga umanunune yize watesa ku ufulielo. Kuchi muhasa kuchilinga? Jila yimwe yili kulilongesa chitanga chize unazange kululieka. Tunyongenu ngwe unazange kupwa ni kukonekena akwenu. Muhasa kuputuka kutanga ni kupukuna ha yilweza ya mu Mbimbiliya ya atu waze apwile ni kukonekena akwo ni waze te keshi kukonekena akwo. Chakutalilaho, tunyongenu ha chilweza cha Yesu. Iye te keshi kupinda ha kukonekena akwo. (Luka  7:47, 48) Yesu kakapwile ni kulihulikila ha uhenge wa akwo, kapwile ni kulihulikila ha yitanga yo yipema. Te kalisa ni A-Fwariseu waze te ‘akupwisa akwo amokomoko.’ (Luka 18:9) Hanyima lia kupukuna ha yilweza yino, lihule ngwe: ‘Yika nakumona kuli akwetu? Shina nakulihulikila ha yitanga yo yipema?’ Nyi chakukukalila kukonekena umwe mutu, eseka kulinga umwe katalilo wa yitanga yipema yize mutu wacho ali nayo. Kusulaho, lihule ngwe: ‘Kuchi Yesu akumona mutu wacho? Shina Yesu te mamukonekena?’ Chino muchitukwasa kululieka mutapu wetu wa kunyonga. Ku uputukilo muchihasa kupwa chikalu kusa tachi hanga ukonekene mutu yoze wakulemeka ku mbunge. Alioze nyi wasa tachi hanga uchilinge, muchipwa chashi kumukonekena.

7. Kulita ni Yishima 22:29, majila aka Yehova akuzachishilamo mandumbu waze ali yikilikita musono?

⁷ Chuma chikwo chize muhasa kutesa kulinga ku ufulielo, chili kulilongesa utotombo uze mutuzachisa mu mulimo wa Yehova. Achinyonga ha unji wa mandumbu waze akufupiwa hanga atunge ma Mbetele, mazuwo a kukunguluka chinene ni Mazuwo a Wanangana. Anji a kuli ayo, kalilongesa kutunga ha kukalakala hamuwika ni mandumbu waze ananyingika mulimo wacho. Ngwe chize tunamono ha chizulie, mandumbu ni mapangi kanalilongesa utotombo uze mahasa kuzachisa ku mulimo wa kululieka mazuwo a kukunguluka chinene ni Mazuwo a Wanangana. Hachino, Yehova Zambi, “Mwanangana wa miakulwila” ni Yesu Kristu “Mwanangana . . . wa mianangana,” kanalingi yuma yakukomwesa kupalikila muli mandumbu jacho. (1 Timo. 1:17; 6:15; tanga Yishima 22:29.) Tunazange kupwa yikilikita ni kuzachisa utotombo wetu hanga tuhalise Yehova hi yetu ene ko.—Yoa. 8:54.

8. Kuchi muhasa kunyingika yize mulilongesa?

⁸ Sakula yize unazange kulilongesa. Yika muhasa kulilongesa? Hula makulwana a mu chikungulwila hanji kalayi wa mbonge hanga akulweze yize muhasa kululieka. Chakutalilaho, ayo mahasa kukulweza ngwo unafupiwa kululieka utotombo we wakulongesa. Nyi chenacho, ete hanga akukwase kumona haze unafupiwa kululieka. Hanyima, likolweze hanga ukaule yiyulo yize akulweza. Kuchi muhasa kuchilinga?

9. Yika watamba kulinga mba ululieke utotombo we wa kulongesa?

⁹ Sako tachi hanga umanunune yize watesa ku ufulielo. Tunyongenu ngwe unazange kululieka utotombo we wa kulongesa. Muhasa kulilongesa ni kusa tachi hanga ukaule yikuma ya mukanda Likolweze Kutanga ni Kulongesa. Muze mutambula chihanda ha kukunguluka cha hakachi ka poso, eta umwe ndumbu wajama apanjike chize walulieka pande je ni kumwita hanga akulweze haze muhasa kululieka. Pwako ni kululieka kanawa hita chihanda makwaha hanga mandumbu amone tachi jize wakusa ni kukujikijila.—Yishi. 21:5; 2 Kori. 8:22.

10. Hana chilweza cha yize twatamba kulinga mba tukolese utotombo wetu.

¹⁰ Yika mulinga nyi chuma chize watesa ku ufulielo chili chikalu kuchimanununa? Kanda uhonga! Ndumbu avuluka ngwo Garry te kanyingikine kutanga kanawa. Kapwile ni kwivwa sonyi ja kutanga ha kukunguluka. Alioze kasele tachi jinji hanga ahase kutanga kanawa. Yamba ngwenyi, fumbo lize anguhele kuli mandumbu ajama liangukwashile kulinga kanawa pande mu chikungulwila, ha kukunguluka cha mbonge ni cha mambonge!

11. Yika muyitukwasa kulinga yuma yinji mu ululikiso wa Yehova ngwe Timoteu?

 ¹¹ Yika yakwashile Timoteu mba apwe ni kulongesa kanawa? Mbimbiliya kuyishi kuhanjika chikuma chino. Alioze kwamba umwenemwene, Timoteu kahashile kulinga kanawa milimo yenyi mumu lia kukaula chiyulo cha Paulu. (2 Timo. 3:10) Chizechene nawa, nyi twalulieka utotombo wetu, mutuhasa kulinga yuma yinji mu ululikiso wa Yehova.

12. Ukwaso uka akwenu akuhele?

¹² Twakuyuka chinji ha yize akwetu akulinga. Chakutalilaho, nyi tunayiji, twakuwahilila muze makulwana a mu chikungulwila waze akulinga chihanda mu Komite ya Akwa-kutala Yuma ya Shipitali, ni Chizavu cha Akwa-kumeneka Mieji akwiza ni kutumeneka. Muze tunapalika mu umwe kapinda ku mwono, twakuwahilila muze makulwana a mu chikungulwila akwiza ni kutupanjika ni kututakamisa. Muze tunafupiwa ukwaso wa kusongwela longeso lia Mbimbiliya, twakuwahilila muze umwe pionelu wajama akuya ni yetu ku longeso liacho ni kutwaha yimwe yiyulo. Mandumbu wano eswe kakuwahilila ha kutukwasa. Ni yetu nawa mutuhasa kuwahilila nyi mutulihana hanga tukwase mandumbu jetu. Yesu kambile ngwenyi: “Chinawaha kutambula alioze shinaho kuhana.” (Yili. 20:35) Nyi unazange kulihana chinji hanga ulingile Yehova mu majila wano hanji eka, yika muyikukwasa mba uchilinge?

13. Yika watamba kwiwuluka muze unatesa kulinga yimwe ku ufulielo?

¹³ Tesa yimwe yize muhasa kulinga ku ufulielo. Chakutalilaho, muhasa kunyonga ngwe: ‘Ngunazange kukwasa chinji chikungulwila chetu.’ Alioze, chino muchihasa kukaliwa mumu kuwatesele yize mulinga mba ukwase chinji chikungulwila chenu. Hachino, watamba kusakula yize unazange kulinga mba uhase kukwasa. Muhasa kusoneka yize unazange kulinga ni chize muhasa kuyimanununa.

14. Mumu liaka twatamba kupwa atu ashi nyi twatesa yimwe ku ufulielo?

¹⁴ Chikwo nawa, twatamba kupwa atu ashi muze mutusakula kulinga yize twatesa ku ufulielo. Mumu liaka? Mumu kutwanyingikine yize muyilingiwa ku mwono wetu. Tutalenu chilweza cha postolo Paulu: Iye kakwashile kuputuka chikungulwila chaha mu mbonge ya  Tesalonika. Kota kazangile kutwamako hanga akwase mandumbu jacho aha. Alioze mumu lia yihungumiona, Paulu yakatuka mu mbonge yacho. (Yili. 17:1-5, 10) Nyi kanungine mu mbonge yacho, kachi kasele mwono wa mandumbu jenyi mu ponde. Alioze iye kakahongele. Shimbu ahonge, yejilila ni yuma yize te yinalingiwa ku mwono wenyi. Kulutwe, yatuma Timoteu mu Tesalonika hanga akwase mandumbu jacho aha ku ufulielo. (1 Tesa. 3:1-3) Mandumbu a mu Tesalonika kota kanakawahilila chinji ha kumona Timoteu malihana hanga alinge mulimo weswawo mamwaha!

15. Kuchi yuma yize muyilingiwa ku mwono wetu muyihasa kukwata ha yize twatesa ku ufulielo? Hana chilweza.

¹⁵ Mutuhasa kulilongesa ha yuma yize yalingiwile kuli Paulu mu Tesalonika. Mutuhasa kutesa kulinga yimwe ku ufulielo, alioze mukuhasa kulingiwa yimwe ku mwono wetu yize muyitukwika kuyilinga. (Chilu. 9:11) Nyi yino hinalingiwa kuli yena, linga yize muhasa kulita ni uhashi we. Yino ye alingile Ted ni mukwo-pwo Hiedi. Mandumbu wano, kechele kukalakala ku Mbetele, mumu lia musongo. Alioze zango lio kuli Yehova liakwashile kufupa majila akwo akulihana chinji mu mulimo wenyi. Chitangu, yapwa mapionelu a shimbu lieswe. Kulutwe, yaatongola ngwe mapionelu alipwila, nawa Ted yatambula fumbo hanga apwe kalayi wa mbonge yoze wakusalakana. Hachino, ululikiso yiutesa miaka yize tulayi a mbonge atamba kupwa nayo. Mumu lia chino, Ted ni Hiedi te kechi kuhasa kulinga mulimo wacho. Chipwe ngwe kanakanenganyana, nihindu kanyingikine ngwo mahasa kulingila Yehova mu majila eka. Ted yamba ngwenyi: “Twalilongesa ngwetu, kuli majila anji akulingilamo mulimo wa Yehova.”

16. Yika mutuhasa kulilongesa ha A-Ngalashia 6:4?

¹⁶ Kutushi kuhasa kunyingika yuma yeswe yize muyilingiwa ku mwono wetu. Kashika, kutwatambile kunyonga ngwetu tuli ni ulemu kumeso ja Yehova mumu lia yiteli yize tuli nayo, nawa kutwatambile kulitesa ni akwetu waze ali ni yiteli yize kutushi nayo. Hiedi yamba ngwenyi: “Nyi mutesa mwono we ni wa akwenu kuuchi kupwa ni uwahililo.” (Tanga A-Ngalashia 6:4.) Chuma chilemu chili kufupa majila akukwashilamo akwetu ni kulingila Yehova. c

17. Yika muhasa kulinga mba utambule yiteli yikwo mu chikungulwila?

¹⁷ Muchipwa chashi kulingila chinji Yehova nyi mupwa ni mwono washi ni kwecha kutambula mikuli chamutambwila. Watamba kutesa kulinga yuma yikehe-yikehe yize muyikukwasa kulinga yuma yinene-yinene kulutwe.  Chakutalilaho, nyi unazange kupwa pionelu wa shimbu lieswe, shina muhasa kukalakala ha tukweji eswe ngwe pionelu wa shimbu likehe? Nyi unazange kupwa kavumbi, shina muhasa kulihana chinji mu mulimo wa kwambujola, kumeneka waze anayiji ni kukwasa tushinakaji mu chikungulwila chenu? Yuma yeswe yize mulilongesa musono, muyikukwasa kulinga kanawa yiteli yize mupwa nayo kulutwe. Kashika, sako tachi hanga ulinge kanawa chiteli cheswacho makwaha.—Roma 12:11.

18. Kulita ni chizulie, yika walilongesa ha chilweza cha pangi Beverley?

¹⁸ Kutwatambile kunyonga ngwetu, kutushi kuhasa kutesa kulinga yimwe ku ufulielo mumu ngwo hitwapwa tushinakaji. Tutalenu chilweza cha pangi Beverley yoze uli ni miaka 75. Iye te keshi kuhasa kwenda mumu lia musongo uze apwile nawo. Alioze kazangile chinji kukwasa kwambujola chalipwila ha mashimbu a Chiwanyino cha Kwiwuluka Kufwa cha Yesu. Hachino, yatesa kulinga yimwe. Muze Beverley alingile yize atesele ha kusanyika atu ha Chiwanyino cha Yesu, kanakawahilila chinji. Tachi jize asele jakwashile akwo no hanga alihane chinji mu mulimo wa kwambujola. Yehova kakulemesa mulimo uze mandumbu jetu tushinakaji akulinga, chipwe ngwe keshi ni uhashi wa kulinga yeswe yize anazange.—Samu 71:17, 18.

19. Yuma yika mutuhasa kutesa ku ufulielo?

¹⁹ Tesa yuma yize muhasa kulinga ku ufulielo. Sako tachi hanga upwe ni yitanga yize yakuvwisa Yehova kuwaha. Lilongese yuma yize muyikukwasa kulingila kanawa Zambi ni kukuzachisa mu ululikiso wenyi. Chikwo nawa, fupa majila waze muhasa kukwashilamo chinji mandumbu je mu chikungulwila. d Chizechene ngwe Timoteu, ni ukwaso wa Yehova ‘kusenya che kulutwe muchisoloka kuli eswe.’—1 Timo. 4:15.