MUTWE WAKULILONGESA 16
Wahilila ha Kulingila Yehova ni Mbunge Yeswe
“Mutu ni mutu akeseke chitanga chenyi mwene.”—NGALA. 6:4.
MWASO 37 Kuwayila Yehova ni Mbunge Yeswe
CHIKUMA CHILEMU a
1. Yika yakutwaha uwahililo wamwenemwene?
YEHOVA kanazange hanga tuwahilile. Tunachinyingika mumu uwahililo unalingi chihanda cha mihuko ya spiritu yisandu. (Ngala. 5:22) Tunanyingika ngwetu, chinawaha kutambula, alioze shinaho kuhana. Kashika twakuwahilila muze twakulihana chinji mu mulimo wa kwambujola, ni kukwasa mandumbu jetu mu majila eka ni eka.—Yili. 20:35.
2-3. (a) Kulita ni A-Ngalashia 6:4, yuma yika yaali yize muyihasa kutukwasa kuwahilila mu mulimo wa Yehova? (b) Yika mutumona ha mutwe uno?
2 Ha A-Ngalashia 6:4, postolo Paulu yatongola yuma yaali yize muyitukwasa hanga tununge ni kuwahilila. (Tanga.) Chitangu, twatamba kulingila Yehova ni mbunge yetu yeswe. Nyi tunalingila Yehova ni mbunge yetu yeswe, mutuwahilila. (Mateu 22:36-38) Chamuchiali, kutwatambile kulitesa ni akwetu. Chipwe ngwe tuli kanawa ku mujimba, tukwete utotombo hanji twakulinga kanawa yuma yimwe, nihindu twatamba kusakwilila Yehova. Mumu yuma yeswe yize tuli nayo yinakatuka kuli iye. Chikwo nawa, nyi akwetu kanatuhiane ha yimwe mu mulimo wa Yehova, twatamba kuwahilila ha chize anazachisa utotombo wo hanga amuhalise hi ko ngwo akwo aamone hanji alivwise kuwaha. Nyi twanyonga chocho, kutuchi kulitesa no alioze mutulilongesa yimwe ha yilweza yo.
3 Ha mutwe uno, mutumonaho yize mutuhasa kulinga muze mutuhonga mumu lia kuhona kulinga yize tunazange mu mulimo wa Yehova. Mutumona nawa chize mutuhasa kuzachisa utotombo weswawo tuli nawo mu mulimo wa Yehova ni chize yilweza ya akwetu muyihasa kutukwasa.
MUZE KUWAHASHILE KULINGA YIZE UNAZANGE
Nyi mutulinga yize mutuhasa mu mulimo wa Yehova ku mwono wetu weswe, mutumuvwisa kuwaha (Tala maparagrafu 4-6) b
4. Yika muyihasa kuhongesa amwe a kuli yetu? Hana chilweza.
4 Amwe a kuli yetu kutushi kuhasa kulinga yize tunazange mu mulimo wa Yehova mumu lia ushinakaji hanji misongo, chino chakutuhongesa. Yino ye yalingiwile kuli pangi Carol. Ha mashimbu amwe, kayile ni kukalakala kuze te kunafupiwa ukwaso. Ha mashimbu jacho, kapwile ni kusongwela malongeso a Mbimbiliya 35 nawa yakwasa alongi anji kulihana kuli Yehova ni kwapapachisa. Iye kalihanyine chinji mu mulimo wa Yehova! Kulutwe yayiza chinji, chocho hikahashile nawa kukatuka ku zuwo. Yamba ngwenyi: “Ngunanyingika ngwami mumu lia musongo wami, kuchichi kuhasa kulinga yize akwetu akulinga, chipwe chocho nakulivwa ngwe akwetu kanguhiana. Amu chishi kuhasa kulinga yuma yeswe yize nakuzanga, chino chakunguhongesa.” Iye kakuzanga kulinga yize mahasa mu mulimo wa Yehova. Kwamba pundu, chino chili chipema chinji! Mutuhasa kupwa ni shindakenyo ngwetu, Yehova kakulemesa yuma yize pangi Carol akuhasa kulinga.
5. (a) Nyi mutunenganyana mumu lia yize kutushi kuhasa kulinga, yika twatamba kwiwuluka? (b) Kulita ni yizulie, kuchi umwe ndumbu akulihana chinji mu mulimo wa Yehova?
5 Nyi wakunenganyana mumu kuushi kuhasa kulinga yize unazange, lihule ngwe: ‘Yika Yehova anazange hanga ngulinge?’ Yehova kanazange hanga ulinge yize muhasa. Tuchinyongenu ha chino: Umwe pangi yoze uli ni miaka 80 maputuka kunenganyana mumu keshi kuhasa nawa kukalakala chinji mu munda ngwe chize apwile ni kulinga muze te ali ni miaka 40. Chipwe ngwe kakulinga yize mahasa, nihindu kakulivwa ngwe Yehova keshi kuwahilila ni yize analingi. Shina au uli umwenemwene? Tunyongenu nawa ha chino: Nyi pangi yono kalingile yize mahasa muze te ali ni miaka 40 nawa machinunga ni kuyilinga ku miaka 80, chinalumbunuka ngwo nihindu machilingila Yehova ni mbunge yeswe. Nyi twaputuka kulivwa ngwe yize twakulingila Yehova kuyishi kumuvwisa kuwaha, twatamba kwiwuluka ngwetu Yehova mwe wakutesa yuma yize yakumuvwisa kuwaha. Nyi mutulinga yeswe yize mutuhasa, Yehova mawahilila chinji hali yetu!—Tala nawa Mateu 25:20-23.
6. Yika twalilongesa ha chilweza cha pangi Maria?
6 Chili chashi kuwahilila nyi mutulihulikila ha yize mutuhasa kulinga, shimbu tulihulikile ha yize kutuchi kuhasa kulinga. Tuchinyongenu ha mwono wa pangi Maria, iye kakwete musongo uze wakumukinda kulihana chinji mu mulimo wa kwambujola. Ku uputukilo, te kakunenganyana chinji ni kulivwa ngwe keshi ulemu. Alioze yewuluka umwe pangi wa mu chikungulwila cho yoze te keshi kuhasa kukatuka ha muhela, chocho yafupa majila akumukwasa. Maria yamba ngwenyi: “Naluliekele yimwe hanga twambujole hamuwika kupalikila mu kusoneka mikanda ni ku telefone. Hita shimbu lize twapwile ni kukalakala hamuwika te nakufuna ku zuwo ni uwahililo mumu lia kukwasa ndumbwami.” Ni yetu mutuwahilila chinji nyi mutulihulikila ha yize mutuhasa kulinga, shimbu tulihulikile ha yize kutuchi kuhasa kulinga. Mba yika mutulinga nyi tuli ni uhashi wa kukalakala chinji hanji kulinga yimwe mu mulimo wa Yehova?
ZACHISA UTOTOMBO UZE ULI NAWO!
7. Chiyulo chika chipema chize Petulu ahanyine kuli akwa-Kristu?
7 Ha mukanda wenyi utangu, postolo Petulu kakolwezele akwa-Kristu azachise utotombo weswawo ali nawo hanga alitakamise umwe ni mukwo. Petulu yamba ngwenyi: “Mweswe hanatambula chawana cha vumbi, alinge nacho nikulita umwe kuli mukwo ni mukwo, ngwe tuselo apema a vumbi liakulumbama lia Zambi.” (1 Petu. 4:10) Yetu kutwatambile kwecha kuzachisa utotombo uze tuli nawo mumu lia kwivwa woma ngwo, akwetu manenganyana hanji matuvwila chipululu. Nyi twachilinga, acho kutushi kulingila Yehova ni mbunge yeswe.
8. Kulita ni 1 A-Korindu 4:6, 7, mumu liaka kutwatambile kulisuta ha utotombo uze tuli nawo?
8 Tunanyingika ngwetu, twatamba kuzachisa utotombo wetu hanga tulingile Yehova ni mbunge yeswe, alioze kutwatambile kufupa kusoloka. (Tanga 1 A-Korindu 4:6, 7.) Chakutalilaho, hanji uli ni utotombo wa kuputuka malongeso a Mbimbiliya. Kwamba pundu, watamba kuzachisa utotombo wacho! Alioze chili chilemu kunyingika ngwo, kuwatambile kulisuta mumu lia utotombo wacho. Tunyonge ngwe, waputuka longeso lia Mbimbiliya, mba muzanga kulweza lusango wacho kuli mandumbu a mu chizavu chenu. Alioze muze muhetako, muwana pangi umwe kanaalweza ni uwahililo weswe ngwenyi, kahana kaposhi kuli umwe mutu. Iye kahana wika kaposhi; yena waputuka longeso lia Mbimbiliya. Mba yika mulinga? Unanyingika ngwe mandumbu mawana utakamiso ha chilweza che, alioze hanji muchilita kwalwezacho tangwa lieka, mumu nyi ka, muhasa kupihisa uwahililo wa pangi yoze wahananga wika kaposhi. Nyi wachilinga musolola umbovu. Alioze yino kuyatambile kukukwika kuputuka malongeso a Mbimbiliya. Uli ni utotombo, kashika uzachise!
9. Kuchi twatamba kuzachisa utotombo wetu?
9 Twiwulukenu ngwetu, utotombo uze tuli nawo uli chawaha cha kuli Zambi. Kashika, twatamba kuuzachisa hanga tutakamise mandumbu jetu, hi kufupa kusoloka ko. (Fwili. 2:3) Nyi twazachisa tachi ni utotombo wetu hanga tulingile Yehova, mutuwahilila hi mumu lia kulinga ko yuma kuhiana akwetu hanji kulimona ngwe tuli alemu, alioze mumu lia kuzachisa utotombo wetu hanga tuhalise Yehova.
10. Mumu liaka hi chipema ko kulitesa ni akwetu?
10 Nyi kutwakeyele, mutuhasa kufwa mu muheto wa kutesa yuma yize twakulinga kanawa ni yize akwetu keshi kuhasa kulinga. Chakutalilaho, ndumbu umwe hanji kakulinga kanawa pande ja mbunga. Au uli utotombo wenyi. Alioze mu mbunge yenyi, ndumbu yono mamba yuma yipi hali ndumbu yoze keshi kulinga kanawa pande. Chipwe ngwe ndumbu wacho keshi kulinga kanawa pande, nihindu kali chihanyi, kakufumba kanawa ana jenyi ni kulihana chinji mu mulimo wa kwambujola. Twakusakwilila chinji ha kupwa ni mandumbu ni mapangi waze ali ni utotombo walisa uze akuzachisa hanga alingile Yehova ni kukwasa akwo!
LILONGESE HA YILWEZA YA AKWENU
11. Mumu liaka twatamba kwimbulula chilweza cha Yesu?
11 Chipwe ngwe kutwatambile kulitesa ni akwetu, nihindu mutuhasa kulilongesa yuma yinji ha yilweza yo ya ushishiko. Chilweza chipema chize mutuhasa kwimbulula chili cha Yesu. Yetu kutushi angunu ngwe Yesu, alioze mutuhasa kulilongesa yuma yinji ha yitanga yenyi yipema ni ha yuma yize alingile. (1 Petu. 2:21) Muze twakusa tachi hanga twimbulule chilweza cha Yesu, twakupwa akwa-Kristu ajama ni kulinga kanawa mulimo wetu wa kwambujola.
12-13. Yika mutuhasa kulilongesa ha chilweza cha Mwanangana Ndawichi?
12 Mu Mbimbiliya, twakuwanamo yilweza yinji yipema ya malunga ni mapwo ashishika yize mutuhasa kwimbulula. (Hepre. 6:12) Achinyonga hali Mwanangana Ndawichi, yoze Yehova avulukile ngwenyi “lunga wa kulita ni mbunge yami,” hanji ngwe chize Mbimbiliya yikwo yinambe, “mutu yoze wakunguvwisa chinji kuwaha.” (Yili. 13:22) Alioze, Ndawichi kakapwile mungunu. Iye kavulumwine ha yisuho yimwe. Chipwe chocho, kali chilweza chipema kuli yetu. Mumu liaka? Mumu muze amuhele chiyulo kakafupile kulikalila. Shimbu achilinge, yatayiza chiyulo chize amuhele, chocho yalikonyeka ni mbunge yeswe ha yize alingile. Hachino, Yehova yamukonekena.—Samu 51:3, 4, 10-12.
13 Muze tunalilongesa ha chilweza cha Ndawichi, twatamba kulihula ngwetu: ‘Yika nakulinga muze akungwaha chiyulo? Shina nakutayiza ni kawashi upi uze nalinga, nyi nakufupa kulikalila? Kutala nakuhana mulonga kuli akwetu? Shina nakusa tachi nguchine kufunyina upi uze nalinganga?’ Muhasa kunyonga ha yihula yikwo yalifwa ni yino muze unalilongesa hakutwala kuli tuvumbi twa Yehova ashishika waze anatongola mu Mbimbiliya. Shina ayo kapalikile mu yipikalo ngwe yize yena unapalika? Yitanga yika asolwele yize muhasa kwimbulula? Ha hita chikuma lihule ngwe: ‘Kuchi munguhasa kupwa ngwe kavumbi yono wa Yehova?’
14. Yika mutuhasa kulilongesa kuli mandumbu jetu a ku ufulielo?
14 Mutuhasa nawa kulilongesa ha yilweza ya mandumbu jetu akweze ni tushinakaji. Chakutalilaho, shina muhasa kunyonga hali umwe ndumbu mu chikungulwila chenu yoze unapalika mu yihungumiona, ku shikola, mu usoko hanji uli ni umwe musongo? Yitanga yika yipema ndumbu yono anasolola yize muhasa kwimbulula? Nyi wakaula chilweza chenyi chipema, mulilongesa chize muhasa kunyongonona mu yipikalo. Tunasakwilila chinji ha kupwa ni yilweza ya ufulielo ya mandumbu wano yize mutuhasa kwimbulula!—Hepre. 13:7; Tia. 1:2, 3.
WAHILILA HA KULINGILA YEHOVA
15. Chiyulo chika Paulu ahanyine chize muchihasa kutukwasa kulingila Yehova ni uwahililo?
15 Hita umwe wa kuli yetu katamba kukwasa hanga chikungulwila chipwe ni sambukila ni kulinunga. Mutuhasa kunyonga hali akwa-Kristu a ku sekulu yitangu. Ayo kapwile ni utotombo ni yiteli yalisa. (1 Kori. 12:4, 7-11) Chipwe chocho, chino te kuchishi kwatwala hanga alitese ni akwo hanji kulihandununa. Shimbu achilinge, Paulu yaakolweza alinge yize mahasa hanga ‘akolese mujimba wa Kristu.’ Iye yasonekena A-Efwesu ngwenyi: “Muze chihanda cheswe muchilinga ngwe chinatambe, mujimba weswe muutatuka ni kulitakamisa ku zango.” (Efwe. 4:1-3, 11, 12, 16; MW 1991) Waze akawile chiyulo chino cha Paulu, kapwile ni sambukila ni kulinunga ngwe chize twakumona mu yikungulwila yetu musono.
16. Yika twatamba kununga ni kulinga? (A-Hepreu 6:10)
16 Nunga ni kusa tachi hanga uhone kulitesa ni akwenu. Mba uchilinge, imbulula chilweza cha Yesu ni yitanga yenyi. Imbulula nawa yilweza ya tuvumbi ashishika a ku mashimbu a kunyima ni a musono. Muze unanungu ni kulinga yize muhasa, pwako ni shindakenyo ngwe ‘Zambi hi chihenge ko, akavulame milimo ye.’ (Tanga A-Hepreu 6:10.) Kashika, nunga ni kulingila Yehova ni uwahililo ni kunyingika ngwe, kakuwahilila muze twakulinga yize mutuhasa mu mulimo wenyi.
MWASO 65 Tunungenu Lume!
a Tulieswe mutuhasa kulilongesa yimwe ha yilweza ya akwetu. Alioze twatamba kukeya hanga tuchine kulitesa no. Mutwe uno, muutukwasa tununge ni kuwahilila ni kwehuka muheto wa kulimona ngwe tunahiane akwetu hanji ngwe kutushi ni ulemu muze mutumona yize akwetu akulinga.
b ULUMBUNWISO WA YIZULIE: Umwe ndumbu mukweze muze te akukalakala ku Mbetele. Haliapwila hambata nawa kanakalakala ni mukwo-pwo ngwe pionelu. Muze hapwa ni ana kanaafumbu mu mulimo wa kwambujola. Musono, chipwe ngwe hapwa kashinakaji, nihindu kanalingi yize mahasa ha kwambujola kupalikila mu kusoneka mikanda.
