“Yela ja Yehova kakasolwele wika zango kuli atu, alioze kalisolwele ni kuli tuwa jami. Tangwa limwe Elaine, yoze te unamane hakamwihi ni temba lia mikanda yahana kulia kuli tuwa jami. Hachino, hita shimbu te twakuheta ha chihela chocho tuwa jami te kakulitachika-tachika ku ngoji hanga aye kuli Yela waze ‘aahele kulia.’

“Hanyima lia amwe tukweji, tuwa jami yazanga kulia cho, ni yami yinguzanga yize twahanjikile no. Alioze, te chishi kuzanga kuhanjika no chinji. Napwile ni miaka 70, nawa te chanyingikine kanawa yize Yela ja Yehova akufuliela. Amu te ngunevwila uli mayingeleja, yinguzanga kulilongesa Mbimbiliya ukawami.

“Ha mashimbu jacho, yingumona Yela ja Yehova ku yihela yeka ni yeka mu mbonge, kanamane ni matemba jo a mikanda. No te kakusolwela atu eswe zango. Mashimbu eswe, ayo kapwile ni kukumbulula yihula yami kulita ni Mbimbiliya, hachino yinguputuka kwajikijila.

“Limwe tangwa, Elaine yanguhula ngwenyi: ‘Shina unanyingika ngwe tushitu kali chawana cha Zambi?’ Yingumukumbulula ngwami, ‘Ewa, ngunachinyingika kanawa!’ Chocho, yangutangila Izaia 11:6-9. Nazangile chinji chikuma chacho chipwe ngwe ha mashimbu jacho te kuchishi kuzanga kutanga mikanda yo.

“Kulutwe, yinguputuka kuzanga yikuma yilemu yize te Elaine ni mukwo-lunga Brent akungulweza hakutwala ku Mbimbiliya ha minutu yikehe. Ayo yangwita ngutange Mbimbiliya kukatuka ha Mateu ndo ha Yilinga hanga ngunyingike chize chinalumbunuka kupwa mukwa-Kristu wamwenemwene. Yinguchilinga. Ha amwe mashimbu, yingutayiza hanga Brent ni Elaine aputuke kungulongesa Mbimbiliya. Naputukile kulilongesa ha mwaka 2016.

“Te nakuzanga chinji kulilongesa Mbimbiliya hita poso ni kukunguluka mu Zuwo lia Wanangana. Ngunakawahilila chinji ha kulilongesa umwenemwene wa mu Mbimbiliya. Ha kupalika cha mwaka umuwika, yangupapachisa chocho yingupwa Chela cha Yehova. Hinapwa ni miaka 79, ngunawahilila chinji ha kuwana uwayilo wamwenemwene. Yehova kanguwahisa chinji ha kunguneha mu usoko wenyi wa hashi heswe.”