Ha chikuma chino, chikungulwila chatamba kumona ngwo ulo wenyi utangu wahwa, ni kumona ulo wenyi waha ngwo we anatayiza kulita ni shimbi ja nguvulu. Mba tunyingike kanawa chikuma chino, tutalenu yize Yesu ambile hakutwala ku kulilakula ni kumbata cheka.

Ha Mateu 19:9, Yesu kasolwele chikuma chimuwika chize muchihasa kutwala lunga ni pwo mba alilakule. Iye yamba ngwenyi: “Mweswawo malakula mukwo-pwo shina ha upangala, mba mambata mukwo, malinga utanji.” Maliji wano a Yesu kanatulongesa ngwetu, (1) upangala hanji utanji ye wika Mbimbiliya yinambe ngwo, muyihasa kutwala lunga ni pwo hanga alilakule ni (2) lunga yoze malilakula ni mukwo-pwo chakuhona kukaula shimbi ja mu Mbimbiliya ni kulimbata ni pwo mukwo, acho kanalingi utanji. a

Shina maliji wano a Yesu kanalumbunuka ngwo, lunga yoze walinga utanji ni kulilakula ni mukwo-pwo Mbimbiliya yinamutayiza hanga ambate cheka? Ka hi chocho ko. Nyi lunga malinga utanji, mukwo-pwo yoze kalingile upi niumwe mwe mahasa kusakula nyi makonekena mukwo-lunga nyi ka. Nyi iye kamukonekenene, acho ayo eswe aali kali ni ulite wakumbata cheka hanyima lia kuhwisa yuma yeswe ku nguvulu.

Alioze muchihasa kupwa ngwe, pwo yoze kalingile upi niumwe mazanga kununga ni mukwo-lunga ha kumukonekena. Mba yika muyihasa kulingiwako nyi lunga yoze walinga utanji malituna ukonekeno wa mukwo-pwo ni kufupa majila waze kalitele hanga alilakule? Amu mukwo-pwo kamukonekena ni kuzanga kununga nenyi hamuwika mu ulo wo, kulita ni shimbi ja Zambi iye keshi ni ulite wa kumbata cheka. Nyi lunga mazanga kumbata pwo mweka, muze keshi ni utuswilo wakuchinga, acho kanalingi cheka utanji. Ha chikuma ngwe chino, makulwana a mu chikungulwila mahasa kutunga nawa komite yaha ya kusopesa hanga atale chikuma chacho.—1 Kori. 5:1, 2; 6:9, 10.

Mba nyi lunga mambata cheka chakuhona kukaula shimbi ja Mbimbiliya, kuchi chikungulwila chatamba kumona ulo wenyi utangu ni waha? Kulita ni Mbimbiliya, shina ulo utangu uchili ni utayizo? Kutala pwo yoze kalingile upi niumwe mahasa kukonekena hanji kulituna lunga yoze te alimbata nenyi? Shina chikungulwila muchihasa kumona ulo wenyi waha ngwe ulo wa utanji?

Kunyima twapwile ni kwamba ngwetu, nyi pwo yoze kalingile upi niumwe uchili ni mwono, kasombokele nawa kalingile utanji, acho ulo waha wa lunga yoze apwile nenyi te kakuumona ngwe wa utanji. Alioze, Yesu kakavulukile pwo yoze kalingile upi niumwe muze ahanjikile hakutwala ku kulilakula ni ulo waha. Shimbu amuvuluke, iye yamba ngwenyi, lunga yoze malilakula ni mukwo-pwo chakuhona kukaula shimbi ja mu Mbimbiliya ni kumbata pwo mweka kanalingi utanji. Ha chikuma chino, kulilakula ni ulo waha ye yakuhwisa ulo utangu.

Nyi lunga malilakula ni mukwo-pwo ni kumbata cheka, pwo yoze alakula chakuhona chitela  kechi kufupiwa nawa kukonekena lunga wacho hanji kulitunaye. Hachino, iye keshi kulipikala nawa nyi makonekena mukwo-lunga yoze walumbukanga nyi ka. Chikwo nawa, mutapu uze chikungulwila muchimona ulo waha, kuwatalile nawa ha chize ali pwo yoze alakula, nyi hafwa, hasomboka cheka hanji halinga utaji. b

Ha chilweza twamona helu, lunga mwe walinganga utanji, hachino ayo malilakula. Mba nyi lunga kalingile utanji chipwe chocho malakula mukwo-pwo ni kumbata pwo mweka? Yika mutwamba nyi lunga malakula mukwo-pwo chakuhona kulinga utanji, alioze maulinga hanyima lia kumulakula ni kumbata pwo mweka, chipwe ngwe pwo mutangu kamukonekena? Ha yikuma yino, kulilakula ni kumbata cheka yapwa utanji, chipwe chocho muyihwisa ulo ukulu. Mumu shimbi ja nguvulu mujitayiza ulo wacho waha. Kaposhi wa Kutalila 1 Fevereiro wa 1980, ha lifwo 32 kanalumbununa chikuma chino ngwo: “Iye haliapwila kali mu ulo waha, kashika, katambile kuwecha hanga alifunyine ni pwo mukulu, mumu ulo ukulu wahwanga hamukunda wa kulilakula, utanji ni ulo waha.”

Ulumbunwiso uno waha, kuwalumbunukine ngwo, akwa-Kristu katamba kwecha kumona ulo ngwe usandu, hanji kumona ngwo utanji hi shili yinene ko. Nyi umwe malakula mukwo-pwo chakuhona kukaula shimbi ja mu Mbimbiliya ni kumbata pwo mweka, makulwana a mu chikungulwila mafupiwa kutunga komite ya kusopesa hanga asope mulonga uno wa utanji. (Nyi pwo yoze ambata kali mukwa-Kristu, neye katamba kumutungila komite ya kusopesa mumu kalinga utanji.) Chipwe ngwe ulo waha katambile kuumona ngwe utanji, nihindu lunga wacho katamba kulinga miaka yinji chakuhona kumwaha yiteli mu chikungulwila, hanji ndo haze mandumbu maputuka kumuvumbika cheka ni kuvulama yuma yipi yize alingile. Chikwo nawa, shimbu kanda achimwaha chimwe chiteli, makulwana katamba kunyingika chize ali pwo yoze alakwile hanji chize ali ana waze lunga wacho anakechelela.— Mala. 2:14-16.

Amu kulilakula chakuhona kukaula shimbi ja Zambi ni kumbata cheka yakuneha lamba linji, akwa-Kristu katamba kupwa ni mana hanga embulule Yehova ha kumona ulo ngwo uli usandu.—Chilu. 5:4, 5; Hepre. 13:4.