1-2. Yika twatamba kulinga muze tunashimbwila chifuchi chaha?

 CHILI chipema kunyingika ngwo, Yehova kanalakenya ngwenyi, kwasala hakehe manongesa chifuchi chino ni kuneha chifuchi chaha. (2 Petu. 3:13) Chipwe ngwe kutwanyingikine tangwa lize chifuchi chaha muchiza, alioze kuli yuma yize yinasolola ngwo kuchichi kushimbula chinji.—Mateu 24:32-34, 36; Yili. 1:7.

² Shimbu yino kanda yilingiwa, yetu eswe twatamba kukolesa ufulielo wetu ha chilakenyo cha Yehova cha chifuchi chaha chipwe ngwe twakulingila Yehova ha miaka yinji hanji ha miaka yikehe. Mumu liaka twatamba kuchilinga? Mumu chipwe ngwe tuli ni ufulielo ukolo, nihindu muhasa kuzeya. Kashika Paulu ambile ngwenyi, kuhona ufulielo yili “shili yize yakutulimbalimba.” (Hepre. 12:1) Mba ufulielo wetu uhone kuzeya, twatamba kupukuna mashimbu eswe ha yuma yize yinasolola ngwo, kwasala hakehe chifuchi chaha chize.—Hepre. 11:1.

3. Yika mutulilongesa ha mutwe uno?

³ Ha mutwe uno, mutulilongesaho yuma yitatu yize twatamba kulinga hanga tukolese ufulielo wetu ha chilakenyo cha Yehova cha chifuchi chaha: (1) kupukuna ha ukuule, (2) kunyonga ha ndundo ja Yehova, ni (3) kulihana chinji ku milimo ya ku ufulielo. Hanyima, mutumona chize sango jize Yehova ahanyine kuli Habakuke jakutakamisa ufulielo wetu musono. Alioze chitangu, tutalenu yuma yize twatamba kulinga haliapwila hanga tukolese ufulielo wetu ha chilakenyo cha chifuchi chaha.

 HA YUMA YIZE TWATAMBA KUSOLOLA UFULIELO UKOLO

4. Ha yiyulo ya mutapu uka tunafupiwa kupwa ni ufulielo ukolo?

⁴ Hita tangwa, twakufupiwa kukwata yiyulo, yimwe yikehe-yikehe; yikwo yinene-yinene. Ufulielo ukolo wakutukwasa kukwata yiyulo yipema. Chakutalilaho, twakukwata yiyulo hakutwala ku usepa, yiheho, shikola, ulo, kupwa ni ana ni mulimo wa ku musunya. Muchilita kulihula ngwe: ‘Shina yuma yize nakuzanga kulinga yakusolola pundu ngwo, nakufuliela ngwami, kwasala hakehe Zambi manongesa chifuchi chino ni kuneha chifuchi chaha? Nyi hanji nakulinga yuma yalifwa ni yize akulinga atu waze akwamba ngwo, chili chikalu kutwama ku miaka yeswe?’ (Mateu 6:19, 20; Luka 12:16-21) Nyi mutufuliela ngwetu, chifuchi chaha chinakundama; muchitukwasa kukwata yiyulo yalita.

5-6. Mumu liaka twatamba kupwa ni ufulielo ukolo muze tunapalika mu yipikalo? Hana chilweza.

⁵ Yetu nawa tunafupiwa kupwa ni ufulielo ukolo mba tuhase kukumba yipikalo. Ha mashimbu amwe hanji mutupalika mu yihungumiona, mutukwachika musongo uze kushi kuhwa, hanji chuma chikwo chize muchituchiza uwahililo. Kuuputukilo hanji mutumona ngwetu, mutuhasa kukumba yuma yacho. Alioze, nyi yuma yacho muyinunga ha miaka yinji; yize kanji-kanji yakulingiwa lume, mutufupiwa ufulielo ukolo mba tuhase kunyongonona ni kununga kulingila Yehova ni uwahililo.—Roma 12:12; 1 Petu. 1:6, 7.

⁶ Nyi tunapalika mu yipikalo yize kuyishi kuhwa, mutuhasa kuputuka kunyonga ngwetu, chifuchi chaha chize Yehova anatulakenya kuchichi kwiza. Nyi chino muchilingiwa, shina chinalumbunuka ngwo tunazeye ku ufulielo? Ka, hi chocho ko. Tunyongenu ha chilweza chino. Nyi ngwe vula manunga ni kunoka ha poso jinji, mutuhasa kuputuka kunyonga ngwetu, mwalwa kuuchi kutuhuka nawa. Chipwe chocho, mwalwa nihindu muutuhuka. Chizechene nawa, nyi tunanenganyana chinji, mutuhasa kuputuka kunyonga ngwetu chifuchi chaha kuchichi keza. Alioze nyi mutupwa ni ufulielo ukolo, mutunyingika ngwetu yilakenyo yeswe ya Yehova muyikamanunuka. (Samu 94:3, 14, 15; Hepre. 6:17-19) Nyi twapwa ni shindakenyo yacho, uwayilo wetu kuli Yehova mununga ni kupwa chuma chilemu ku mwono wetu.

7. Nyonga lika lipi lize twatamba kukeya nalio?

⁷ Tunafupiwa kupwa ni ufulielo ukolo mba twambujole sango jipema. Atu anji waze twakwambulwila ‘sango jipema’ ja chifuchi chaha; kuli ayo yuma yacho kuyichi kuhasa kulingiwa. (Mateu 24:14; Eze. 33:32) Alioze, kutwatambile kwecha manyonga ja atu jacho hanga akwate ku mwono wetu. Mba twehuke ponde yacho, twatamba kununga ni kukolesa ufulielo wetu. Mutumona majila atatu waze mutuhasa kuchilingila.

PUKUNENU HA UKUULE

8-9. Mumu liaka kupukuna ha ukuule chakukolesa ufulielo wetu?

⁸ Mutapu umwe wa kukoleselamo ufulielo wetu, uli kupukuna ha ukuule. Ukuule wakutwaha shindakenyo ngwetu, Yehova makamanununa yuma yeswe yize alakenyene. Kupukuna ha chikuma chize Yehova anakatuhela ukuule, ni ha yuma yeswe yize alingile mba atwehewo, muchikolesa ufulielo wetu ha kumanunuka cha chilakenyo cha Yehova chakuneha chifuchi chaha. Mumu liaka tunambe chocho?

⁹ Mba atwehe ukuule, Yehova katumine Mwanenyi wa wika yoze te azanga chinji hanga asemuke hano hashi ngwe mutu mungunu. Muze apwile hano hashi, Yesu kapalikile mu  yuma yinji yikalu. Hanyima, yamumwesa lamba ni kumushiha chipi. Chochene, ndando yize Yehova ahanyine ha ukuule yili yinene chinji! Tata yetu wa zango te kechi kutayiza Mwanenyi amone lamba ni kufwa hanga tupwe wika ni mwono upema ha yimwe miaka. (Yoa. 3:16; 1 Petu. 1:18, 19) Amu afwetele ndando yinene, Yehova masa tachi hanga akatwehe mwono wa mutolo mu chifuchi chaha.

NYONGENU HA NDUNDO JA YEHOVA

10. Kulita ni A-Efwesu 3:20, yika Yehova mahasa kulinga?

¹⁰ Mutapu wamuchiali uze muutukwasa kukolesa ufulielo wetu, uli kunyonga ha ndundo ja Yehova. Iye kali ni ndundo ja kumanununa yuma yeswe yize alakenyene. Atu anji musono kakunyonga ngwe chilakenyo cha mwono wa mutolo mu paraisu kuchichi kuhasa kulingiwa. Alioze kanji-kanji, Yehova kakulakenya yuma yize atu kechi kuhasa kulinga. Mumu liaka? Mumu iye kali Mukwa-Ndundo-Jeswe. (Yombi 42:2; Marku 10:27) Shina mutuhasa kushimbwila ngwetu, Yehova alinge chilakenyo chize hita mutu mahasa kumanununa?—Tanga A-Efwesu 3:20.

11. Chilakenyo chika Yehova amanunwine chize chasolokele kuli atu ngwe kuchichi kulingiwa? Hana chilweza. (Tala mushete, “ Yilakenyo Yize Yamanunukine.”)

¹¹ Tutalenu yuma yize Yehova alakenyene tuvumbi twenyi kunyima yize yasolokele kuli atu ngwe kuyichi kumanunuka. Iye kalwezele Apalahama ni Sara ngwenyi, chipwe ngwe hashinakajiwa nihindu te masema mwana. (Uputu. 17:15-17) Kalwezele nawa Apalahama ngwenyi, te mahana chifuchi cha Kanana kuli munyachi wenyi. Chilakenyo chino chasolokele ngwe kuchichi kumanunuka, mumu A-Izalele waze te a ku munyachi wa Apalahama kapwile mu undungo ku Engitu ha miaka yinji. Alioze chamanunukine. Kulutwe lia miaka, Yehova yamba ngwenyi, umwe pwo kashinakaji yoze te avuluka ngwo Izabele masema. Iye kalakenyene nawa ngwenyi, Maria pwo yoze te kanda achilimona ni lunga, masema mwana wa Zambi hanga amanunune chilakenyo chize Yehova alingile mu munda wa Endene ha miaka yinji kunyima!—Uputu. 3:15.

12. Yika Yoshua 23:14 ni Izaia 55:10, 11 yinasolola ha ndundo jize Yehova akwete?

¹² Nyi twapukuna ha yilakenyo yize Yehova hanamanununa, ufulielo wetu hakutwala ku chifuchi chaha muukola chinji. (Tanga Yoshua 23:14; Izaia 55:10, 11.) Chino muchitukwasa hanga tukwase akwetu anyingike ngwo, chilakenyo cha chifuchi chaha chili chamwenemwene, hi chilota ko. Yehova kambile hakutwala ku malilu aha ni hashi haha ngwenyi: ‘Maliji wano amwenemwene hi ha mahuza ko.’—Uso. 21:1, 5.

LIHANE CHINJI MU MILIMO YA KU UFULIELO

13. Kuchi kukunguluka muchihasa kukolesa ufulielo wetu? Lumbununa.

¹³ Mutapu wamuchitatu uze mutuhasa kukoleselamo ufulielo wetu, uli kulihana chinji ku milimo ya ku ufulielo. Chakutalilaho, tuchinyongenu ha chize twakuyuka ha kukunguluka chetu. Pangi avuluka ngwo Anna, yoze walinga miaka yinji mu milimo yeka ni yeka ya shimbu lieswe, yamba ngwenyi: “Kukunguluka chakungukwasa kupwisa ufulielo wami ngwe ankora. Chipwe ngwe ndumbu yoze unalongesa keshi ni uhashi unji wa kulongesa hanji keshi kulongesa yuma yaha, nihindu nakuwana yimwe yize muyingukwasa kunyingika kanawa Mbimbiliya; chino chakukolesa ufulielo wami.” b Chikwo nawa, ufulielo wetu muhasa kukola ha kwivwa makumbululo waze mandumbu jetu akuhana ha kukunguluka.—Roma 1:11, 12; 10:17.

14. Kuchi mulimo wa kwambujola wakukolesa ufulielo wetu?

 ¹⁴ Kulihana chinji mu mulimo wa kwambujola, necho chakutukwasa kukolesa ufulielo wetu. (Hepre. 10:23) Ndumbu Barbara, yoze wakulingila Yehova ha miaka kuhiana 70, yamba ngwenyi: “Kuli yami mulimo wa kwambujola wakukolesa chinji ufulielo wami. Muze nakuhanjika ni atu hakutwala ku yilakenyo ya Yehova, chino chakungukwasa kukolesa ufulielo wami.”

15. Kuchi longeso lia wika liakukolesa ufulielo wetu? (Tala nawa yizulie.)

¹⁵ Chuma chikwo cha ku spiritu chize chakukolesa ufulielo wetu chili longeso lia wika. Pangi Susan yoze wakuzanga chinji kutesa tangwa lize malilongesa, yamba ngwenyi: “Liayenga yami nakululieka Longeso lia Kaposhi wa Kutalila lia poso yize muyizaho. Liakasoka ni Liamaali nakululieka kukunguluka cha mukachi ka poso. Ha matangwa akwo asalako, nakulinga longeso lia wika.” Amu akulinga longeso lienyi lia wika mashimbu eswe, pangi Susan kakununga ni kukolesa ufulielo wenyi. Pangi Irene, unakalakala ha miaka yinji ku chishina chinene, hananyingika ngwenyi, kulilongesa uprofeto wa mu Mbimbiliya chakukolesa ufulielo wenyi. Mwene yamba ngwenyi: “Nakukomoka chinji ha chize uprofeto wa Yehova wakumanunuka chipwe mu yuma yikehe-yikehe.” c

“YILAKENYO YA YEHOVA MUYIKAMANUNUKA”

16. Mumu liaka mutuhasa kwamba ngwetu, maliji waze Yehova ambile kuli Habakuke kanatale nawa hali yetu musono? (A-Hepreu 10:36, 37)

¹⁶ Tuvumbi twa Yehova amwe kakushimbwila kuhwa cha yuma ya mwakono ha miaka yinji. Kulita ni manyonga ja atu, muchihasa kusoloka ngwe yilakenyo ya Yehova yinashimbula chinji kumanunuka. Alioze, Yehova kananyingika kanawa chize tuvumbi twenyi akwivwa. Kashika alweze profeta Habakuke ngwenyi: “Usolwelo unachitwaminyina mwaka wawo. Kuunatambuka ku songo liawo kuushi mahuza.  Chipwe mumona ngwe unashimbula . . . hindu twaminyina. Muwiza kupwa; kuuchi kahona.” (Haba. 2:3) Shina Yehova kambile maliji wano hanga atakamise wika Habakuke? Nyi maliji wano kanatale nawa hali yetu musono? Kupalikila mu ukwaso wa Zambi, Paulu yatalikisa maliji wano hali Akwa-Kristu waze anashimbwila chifuchi chaha. (Tanga A-Hepreu 10:36, 37.) Kashika, chipwe ngwe ku nyonga lietu muchisoloka ngwe chilakenyo chino chinashimbula chinji; nihindu ‘muchikamanunuka pundu. Kuchichi kahona!’

17. Kuchi umwe pangi akukaula chiyulo chize Yehova ahanyine kuli Habakuke?

¹⁷ Ha kupalika cha miaka, mandumbu anji kakukaula chiyulo cha Yehova chakununga ni kushimbwila. Chakutalilaho, Louise kaputukile kulingila Yehova ha mwaka 1939. Yamba ngwenyi: “Ha mashimbu jacho nanyongene ngwami, Armagedone muyiza shimbu te kanda nguchihwisa shikola yikehe. Alioze yino kuyakalingiwile. Chuma chakungukwasa ha miaka yeswayi, chili kutanga sango mu Mbimbiliya ja atu waze anakashimbwila muli Yehova ha miaka yinji hanga amanunune yilakenyo yenyi ngwe, Noa, Apalahama, Yosefwe ni atu akwo nawa. Yino yeswe yakungukwasa kushimbwila kumanunuka cha yilakenyo ya Zambi.” Chochene, mandumbu waze akulingila Yehova ha miaka yinji kakutayiza ngwo maliji wano kali amwenemwene!

18. Kuchi kutala yitangiwa muchihasa kukolesa ufulielo wetu ha kwiza cha chifuchi chaha?

¹⁸ Tunanyingika ngwetu chifuchi chaha kanda chichiza. Alioze, tuchinyongenu ha yuma yize yatwamako ngwe, tutongonoshi, mitondo, tushitu ni atu. Kukushi niumwe yoze mahasa kwamba ngwenyi, yuma yino hi yamwenemwene ko chipwe ngwe kwapwile mashimbu waze kuyakapwileko. Yuma yacho yiliko mumu Yehova mwe wayitangile. (Uputu. 1:1, 26, 27) Yehova kanalakenya kuneha chifuchi chaha. Makamanununa chilakenyo chino. Muze chilakenyo chino muchikamanunuka, atu makapwa ni mwono ungunu ku miaka yeswe. Ha shimbu lize Yehova hanatese, chifuchi chaha muchikeza ngwe chize twakumona yuma yikwo yize atangile.—Iza. 65:17; Uso. 21:3, 4.

19. Kuchi muhasa kutakamisa ufulielo we?

¹⁹ Muze tunashimbwila chifuchi chaha, tunafupiwa kuzachisa kanawa uhashi weswawo mutupwa nawo hanga tukolese ufulielo wetu. Kashika, sakwilila Yehova ha kutwaha ukuule. Nyonga ha ndundo jize Yehova ali najo. Ni kulihana chinji ku milimo ya ku ufulielo. Nyi wachilinga, mukapwa hamwe ni ‘waze mumu lia ufulielo ni kunyongonona makazuka yilakenyo.’—Hepre. 6:11, 12; Roma 5:5.