1. Kuchi Mateu asolwele ngwenyi kakufuliela ha chilakenyo cha uhindukilo?

 UMWE mukweze avuluka ngwo Mateu kali ni musongo upi chinji nawa kamupasula ha yisuho yinji. Tangwa limwe, ayo te kanatale programa ya kakweji ya JW Broadcasting^®. Muze te anayi kusongo lia programa yacho, ayo yamona chinema cha mwaso uze te unasolola atu kanatambula akwo waze ahindwisa ku ufwe mu chifuchi chaha. b Hanyima lia Broadcasting yacho, Mateu yatala kuli yisemi jenyi yakwata ku moko ni kwamba ngwenyi: “Tata, Mama, nwamona nyi ngwami? Chipwe ngwe mungufwa, nihindu mungukahinduka cheka. Yenu nukangushimbwila wika; yuma yeswe muyikapema.” Munuhasa kunyonga chize yisemi wano evwile muze anyingikine ngwo, kutalatala cha uhindukilo chili chamwenemwene kuli mwano?

2-3. Mumu liaka kupukuna ha kutalatala cha uhindukilo chili ni ulemu kuli yetu?

² Kunyonga ha chilakenyo cha uhindukilo chili chuma chize yetu eswe twatamba kulinga hita tangwa. (Yoa. 5:28, 29) Mumu liaka? Mumu kutwanyingikine tangwa lize matuwana ni musongo upi hanji tangwa lize mutufwisa mutu yoze twazanga. (Chilu. 9:11; Tia. 4:13, 14) Kutalatala chetu cha uhindukilo muchihasa kutwaha tachi jize tunafupiwa hanga tukumbe kapinda wacho. (1 Tesa. 4:13) Mbimbiliya yakutulweza ngwo, Yehova Tata yetu wa mu malilu katunyingika kanawa ni kutuzanga. (Luka 12:7) Amu anatunyingika kanawa, kashika makatuhindwisa ni utu ni yitanga yize tukwete. Chikwo nawa, kakutuzanga chinji, kashika anatwehe uhashi wa kutwama ku miaka yeswe. Chipwe ngwe mutufwa, iye makatuhindwisa!

³ Ha longeso lino, chitangu mutumonaho ulemu wa kufuliela ha uhindukilo. Hanyima, mutulilongesa umwe lusango wa mu  Mbimbiliya yoze matakamisa ufulielo wetu. Mu lusango wacho, mwe tunawane chisoneko chize chinakwate mutwe uno, chinambe ngwo: ‘Ndumbwe kumahinduka.’ (Yoa. 11:23) Kusongo, mba mutumona yize mutuhasa kulinga hanga kutalatala cha uhindukilo chipwe chamwenemwene ku mwono wetu.

4. Mba tufuliele ha chimwe chilakenyo, shindakenyo yika twatamba kupwa nayo? Hana chilweza.

⁴ Mba tufuliele chimwe chilakenyo, twatamba kupwa ni shindakenyo ngwetu, mutu yoze watulakenyacho kali ni zango, ndundo hanji uhashi wa kuchimanununa. Tutalenu chilweza chino: Tunyongenu ngwetu hanyima lia kakundukundu, zuwo lie mulifupiwa kulilulieka. Hachino, umwe sepa meza ni kukulweza ngwenyi: ‘Mungukukwasa ku milimo ya kululieka zuwo.’ Chino muchisolola ngwo, iye kali ni zango lia kukukwasa. Nyi sepa lie kakutunga mazuwo nawa kali ni yikwata yeswe ya kutunga nayo, acho munyingika ngwo kali nawa ni uhashi hanji utotombo wa kulinga yize alakenya. Chino muchikukwasa kufuliela ha yize akulakenya. Shina mutuhasa kupwa ni shindakenyo yacho ha kutalatala chetu cha uhindukilo? Shina Zambi kanazange, nawa kali ni ndundo ja kumanununa chilakenyo chacho?

5-6. Mumu liaka mutuhasa kupwa ni shindakenyo ngwetu, Yehova kanazange lume kuhindwisa afu?

⁵ Shina Yehova kanazange lume kuhindwisa atu waze hanafu? Ewa, kanazange kuchilinga. Mba atukwase ha chikuma chacho, iye katumine akwa-kusoneka Mbimbiliya anji hanga asoneke hakutwala ku uhindukilo. (Iza. 26:19; Hoze. 13:14; Uso. 20:11-13) Chikwo nawa, Yehova nyi malakenya chimwe chuma; kakuchimanununa. (Yoshu. 23:14) Kwamba pundu, kwasala hakehe Yehova mahindwisa atu anji waze hanafu. Kuchi tunachinyingika?

⁶ Tutalenu yize Yombi asonekene. Iye kapwile ni shindakenyo ngwenyi nyi mafwa, Yehova te mamuvwila usona ni kumuhindwisa cheka ku ufwe. (Yombi 14:14, 15) Ni musono nawa, Yehova kakwivwa usona wa tuvumbi twenyi eswe waze hanafu. Kashika, kanazange chinji kwahindwisa ni kwaha mwono upema mu paraisu. Mba yika mutwamba hali tununu a tununu twa atu waze afwile chakuhona kunyingika Yehova? Atu jacho no, Zambi yetu wa zango kanazange chinji kwahindwisa. (Yili. 24:15) Yehova kanazange kwakwasa hanga apwe masepa jenyi ni kwaha mwono wa mutolo hano hashi. (Yoa. 3:16) Kashika twamona ngwetu, Yehova kanazange lume kuhindwisa afu.

7-8. Mumu liaka mutuhasa kupwa ni shindakenyo ngwetu, Yehova kali ni ndundo ja kuhindwisa afu?

⁷ Shina Yehova kali ni ndundo ja kuhindwisa afu? Ewa, kali najo! Iye kali ‘Mukwa-ndundo jeswe.’ (Uso. 1:8) Kali ni ndundo jinji ja kwonwona mukwa-kole mweswawo, chipwe lume kufwa. (1 Kori. 15:26) Kunyingika chikuma chino chakututakamisa. Tutalenu chilweza cha pangi Emma Arnold. Ha Jita yamuchiali ya hashi heswe, iye ni asoko jenyi kapalikile mu yeseko yinji ya ku ufulielo. Chikwo nawa, kafwishile asoko anji mu yilombo ya Nazista. Mba alembejeke mwanenyi, pangi Emma yamba ngwenyi: “Nyi atu te manunga ni kufwa ku miaka yeswe, kachi mutwamba ngwetu, kufwa chili ni ndundo jinji kuhiana Zambi, hi chocho ko?” Kwamba pundu, kukushi chuma nichimwe chize chili ni ndundo kuhiana Yehova! Zambi yetu mukwa-ndundo jeswe yoze watangile mwono kali ni uhashi wa kufunyisa mwono wa atu waze hanafu.

⁸ Kuli nawa chuma chikwo chize chinatukwase kupwa ni shindakenyo ngwetu, Zambi makahindwisa afu. Chuma chacho chili ngwo, manyonga jenyi keshi kuzala. Mba tunyingike chikuma chacho, iye kakuvuluka hita katongonoshi ha jina lienyi. (Iza. 40:26) Chikwo nawa,  kakwiwuluka atu waze hanafu. (Yombi 14:13; Luka 20:37, 38) Iye mahasa kwiwuluka yitanga ni ndako ja atu waze makahindwisa, yino yinachingi yifwa yo, yize apalikile ku mwono ni yuma yikwo nawa.

9. Mumu liaka wakufuliela ha chilakenyo cha Yehova cha uhindukilo?

⁹ Kwamba pundu, mutuhasa kufuliela ha chilakenyo cha Yehova cha uhindukilo, mumu tunanyingika ngwetu iye kali ni ndundo, nawa kanazange kuchimanununa. Tutalenu chuma chikwo chize chinatukwase kufuliela ha uhindukilo. Chuma chacho chili ngwo, Yehova hanahindwisa afu. Kunyima, iye kahanyine ndundo kuli amwe tuvumbi twenyi, kuchingako Yesu hanga ahindwise afu. Haliapwila, mutulilongesa umwe wa ku uhindukilo uze Yesu alingile uli ha Yoano kapitulu 11.

10. Sango jika Yesu atambwile muze te anambujola sali likwo lia Yordau, mba yika alingile? (Yoano 11:1-3)

¹⁰ Tanga Yoano 11:1-3. Tunyongenu yize yalingiwile mu Mbetaniya ku songo lia mwaka 32 M.J. Yesu kapwile ni masepa apema mu limbo liacho. Masepa jacho kapwile, Lazaru ni mandumbu jenyi aali, Maria ni Marta. (Luka 10:38-42) Alioze Lazaru yayiza, chocho mandumbu jenyi yaputuka kulipikala chinji. Hachino, yatuma sango kuli Yesu, yoze wapwile sali likwo lia Yordau, kuze akwenda matangwa aali mba aheteko. (Yoa. 10:40) Chaluyinda, Lazaru yafwa ha ola yizeyene mukeji ahetesele lusango kuli Yesu. Chipwe ngwe Yesu kanyingikine ngwenyi, sepa lienyi kafwa, nihindu yashimbwila matangwa aali mba aye ku Mbetaniya. Muze aheteleko, te hikwapalika matangwa awana chize haze Lazaru afwile. Mba mumu liaka Yesu anakashimbwila matangwa wano? Mumu kuchizako kukwasa masepa jenyi, iye kazangile kulinga chuma chize te muchihalisa Yehova.—Yoa. 11:4, 6, 11, 17.

11. Longeso lika twawana ha lusango wa Lazaru hakutwala ku usepa?

¹¹ Lusango yono kanatulongesa yimwe hakutwala ku usepa. Tuchinyongenu ha chino: Muze Maria ni Marta atumine lusango kuli Yesu, ayo kakamwichile hanga aye ku Mbetaniya. Kamulwezele wika ngwo, sepa lie kanayiji. (Yoa. 11:3) Chikwo nawa, Yesu kachi kahindwishile Lazaru chipwe kusuku. Alioze, iye yazanga kuya ku Mbetaniya hanga apwe hamwe ni masepa jenyi, Maria ni Marta. Shina uli ni sepa wa mutapu au yoze wakuzanga kukukwasa chipwe ngwe wamwichile? Nyi uli nenyi, unanyingika ngwe muhasa kumufuliela ha ‘mashimbu a lamba.’ (Yishi. 17:17) Chikwo nawa, chizechene ngwe Yesu, ni yetu mutuhasa kupwa sepa wa mutapu au kuli akwetu! Haliapwila, tufunenu ha lusango wa Lazaru hanga tumone yize yalingiwile hanyima.

12. Yika Yesu alakenyene kuli Marta, mba mumu liaka iye te mahasa kufuliela ha chilakenyo chacho? (Yoano 11:23-26)

¹² Tanga Yoano 11:23-26. Marta yanyingika ngwenyi, Yesu te haheta mu Mbetaniya. Chocho, yaya ni kumupatwiza, ni kwamba ngwenyi: “Mwene, nyi kachi nunakapwa kama kuno, kachi ndumbwami kafwile.” (Yoa. 11:21) Tunanyingika ngwetu, Yesu kachi kaukile Lazaru. Alioze iye kazangile kulinga chuma cha kukomwesa.  Yamba ngwenyi: ‘Ndumbwe kumahinduka.’ Iye nawa yahana uhashi ukwo kuli Marta hanga afuliele ha chilakenyo chacho, ha kwamba ngwenyi: “We uhindukilo ni we mwono yami.” Chochene, Yesu katambwile ndundo kuli Zambi ja kuhindwisa afu. Kukuputuka, iye kahindwishile umwe mwana pwo muze te machifwilako ni umwe mwana lunga yoze kota ahindwishile ha tangwa lizeliene afwile. (Luka 7:11-15; 8:49-55) Mba yika mutwamba hali Lazaru yoze te halinga matangwa awana mu fuka, nawa mujimba wenyi te hiwaputuka kupola, shina Yesu te mahasa kumuhindwisa?

13. Kulita ni Yoano 11:32-35, kuchi Yesu evwile muze amwene Maria ni atu akwo malila? (Tala nawa chizulie.)

¹³ Tanga Yoano 11:32-35. Nyonga ngwe he uli, unatale yuma yeswe yize yinalingiwako. Maria, ndumbu mukwo wa Lazaru, maliwana ni Yesu. Iye mafunyina maliji waze-ene a Marta ngwenyi: “Mwene, nyi kachi nunakapwa kama kuno, kachi ndumbwami kafwile.” Maria ni atu akwo waze ali nenyi kananenganyana. Muze Yesu anamono chize o analila, neye mevwa yikola yinji ku mbunge. Ha kumona yikola yize masepa jenyi anevu, Yesu neye maputuka kulila. Iye kananyingika yikola yize atu akwivwa nyi mafwisa mutu yoze azanga. Chochene, kanazange chinji kuchiza yuma yeswe yize yakutulilisa ni yinyengo!

14. Yikola yize Yesu evwile muze amwene Maria malila, yika yinatulongesa hali Yehova?

¹⁴ Yikola yize Yesu evwile muze amwene Maria malila, yinatulongesa ngwo, Yehova kali Zambi yoze wakulisa mu chihela cha atu. Kuchi tunachinyingika? Ngwe chize twamonanga ha mutwe wapalika, Yesu kembulwile yitanga ni kunyonga cha Yehova ni ungunu weswe. (Yoa. 12:45) Kashika muze twakutanga ngwetu, Yesu kevwilile masepa jenyi keke ni kuputuka kulila, mutuhasa kupwa ni shindakenyo ngwetu, yino ye Yehova akwivwa muze akutumona mutulila. (Samu 56:8) Chino chakutukwasa kuzanga kupwa masepa ja Yehova, Zambi yoze wakulisa mu chihela chetu.

15. Kulita ni Yoano 11:41-44, yika yalingiwileko muze Yesu ahetele ku fuka lia Lazaru? (Tala nawa chizulie.)

¹⁵ Tanga Yoano 11:41-44. Yesu yaheta ku fuka lia Lazaru; yeta hanga achize liwe lize liapwileko. Marta yamba ngwenyi, chino kuchichi kulita mumu mujimba wenyi hiwaputuka  kupola. Alioze Yesu yakumbulula ngwenyi: ‘Chakulwezele ngwami, nyi wafuliela mumona uhenya wa Zambi?’ (Yoa. 11:39, 40) Hanyima Yesu yatala mwilu ni kulemba ha mbunga. Iye yazanga kuhalisa Yehova ha yeswe yize te muyilingiwako. Mba Yesu yakololoka ngwenyi: “Lazaru, tuhukamo!” Chocho, Lazaru yatuhuka mu fuka! Yesu yalinga chuma chize chasolokele ngwe chikalu kuchilinga.—Tala nota ya estudo ha Yoano 11:17 mu malimi akwo.

16. Kuchi kapitulu 11 wa Yoano anakolesa ufulielo wetu ha uhindukilo?

¹⁶ Lusango uli ha kapitulu 11 wa Yoano, kanakolesa ufulielo wetu ha kutalatala cha uhindukilo. Mu mutapu uka? Achinyonga ha chilakenyo chize Yesu alingile kuli Marta, ngwenyi: ‘Ndumbwe kumahinduka.’ (Yoa. 11:23) Chizechene ngwe Tato, Yesu neye kali ni ndundo nawa kanazange kumanununa chilakenyo chacho. Mutapu uze Yesu alilile unasolola ngwo, iye kanazange chinji kuhwisa kufwa ni yikola yize chakuneha. Chikwo nawa, ha shimbu lize Lazaru atuhukile mu fuka, Yesu kasolwele pundu ngwenyi, kali ni ndundo ja kuhindwisa afu. Haliapwila, tunyongenu ha utowezo uze Yesu ahanyine kuli Marta, ngwenyi: ‘Chakulwezele ngwami nyi wafuliela mumona uhenya wa Zambi?’ (Yoa. 11:40) Yetu tuli ni yuma yinji yize yinatwehe shindakenyo ngwetu, chilakenyo cha Zambi cha uhindukilo muchikamanunuka. Mba yika twatamba kulinga hanga chilakenyo chacho chipwe chamwenemwene kuli yetu?

17. Yika twatamba kunyonga muze tunatange sango ja mu Mbimbiliya hakutwala ku uhindukilo?

¹⁷ Sako mashimbu hanga utange ni kupukuna ha uhindukilo uze walingiwile kunyima. Mu Mbimbiliya, tunawanemo uhindukilo nake wa atu waze ahindwishile hanga atwame hano hashi. c Sako mashimbu hanga ulilongese kanawa sango jacho. Muze unachilingi, iwuluka ngwe no kapwile atu—malunga, mapwo ni twanuke. Fupa malongeso ha hita lusango. Nyonga ha  chize hita uhindukilo unasolola ngwo, Yehova kali ni ndundo nawa kanazange kuhindwisa atu waze hanafu. Chahiana ulemu, sako mashimbu hanga upukune ni kunyonga ha uhindukilo wahiana weswe—uhindukilo wa Yesu. Twiwulukenu ngwetu, uhindukilo wacho kaumwene kuli atu anji, chikwo nawa wakutukwasa kukolesa ufulielo wetu.—1 Kori. 15:3-6, 20-22.

18. Kuchi muhasa kuyuka ha miaso yetu yize yakuhanjika hakutwala ku uhindukilo?

¹⁸ Panjika “miaso” yetu yize yakuhanjika chinji ha uhindukilo. d (Efwe. 5:19) Miaso yino yakutakamisa ufulielo wetu ha kutalatala chino chilemu, ni kutukwasa kumona uhindukilo ngwetu uli wamwenemwene. Panjika chinji miaso yacho ni kuhengwola maliji a hita mwaso mu uwayilo wenu wa mu usoko. Pachikila miaso yacho mu mbunge ni mu manyonga je. Hachino, nyi mupalika mu yuma yikalu ku mwono hanji mufwisa mutu yoze wazanga, spiritu ya Yehova muyikukwasa kwiwuluka maliji a miaso yacho, ni kukukwasa kupwa ni tachi hamwe ni utakamiso.

19. Yika mutuhasa kunyonga hakutwala ku uhindukilo? (Tala mushete, “ Yika Mukazanga Kwahula?”)

¹⁹ Zachisa kunyonga che. Yehova hanatwehe uhashi ha kulinyonga tuli mu paraisu. Umwe pangi yamba ngwenyi: “Yami nakusa mashimbu hanga ngunyonge, nguli mu paraisu ni kwivwa vumba lia yitemo.” Achinyonga kuwaha chize mukevwa muze mukaliwana ni atu a ku shakulu mu paraisu! Iya mukazanga kuliwana nenyi? Yihula yika mukamuhula? Nyonga nawa ha chize mukevwa muze mukaliwana ni asoko ni masepa je waze hanafu. Nyonga ha chuma chitangu chize mukahanjika no, chize mukakangayika ni chize munukalila hamuwika ni uwahililo.

20. Tunazange kusa tachi ja kulinga yika?

²⁰ Twakusakwilila chinji Yehova ha chilakenyo cha uhindukilo! Tuli ni shindakenyo ngwetu, chilakenyo chino muchikamanunuka pundu, mumu Yehova kali ni ndundo nawa kanazange kuchilinga. Kashika, tusenu tachi hanga tukolese ufulielo wetu ha kutalatala chino chilemu. Nyi twachilinga, mutukundama chinji kuli Yehova, yoze unatulakenya ngwenyi, ‘Mweswawo yoze twazanga makahinduka!’