1. Mumu liaka twakuhana makumbululo ha kukunguluka?

 MUMU LIAKA twakukunguluka? Chikuma chilemu twakulikungulwila chili kuhalisa Yehova. (Samu 26:12; 111:1) Chikuma chikwo chili hanga tulitakamise umwe ni mukwo ha mashimbu wano akalu tuli. (1 Tesa. 5:11) Muze twakuzundula kwoko ni kuhana kumbululo, twakulinga yuma yino yaali.

2. Uhashi uka tukwete wakuhana makumbululo ha kukunguluka?

² Hita poso, tukwete uhashi wakuhana makumbululo ha kukunguluka. Chakutalilaho, kusongo lia poso mutuhasa kuhana makumbululo ha Longeso lia Kaposhi wa Kutalila. Ha kukunguluka cha ha kachi ka poso, mutuhasa kuhana makumbululo ha chikuma, Kuhengwola Yikuma Yilemu ya mu Mbimbiliya, ha Longeso lia Mbimbiliya lia mu Chikungulwila ni ha yihanda yikwo ya kushimutwina ni mbunga.

3. Kapinda muka mutuhasa kupwa nenyi, mba kuchi maliji ali ha A-Hepreu 10:24, 25 anatukwase?

³ Yetu eswe tunazange chinji kuhalisa Yehova ni kukolweza mandumbu jetu. Alioze, hakutwala ku kuhana makumbululo hanji mutuhasa kupwa ni umwe kapinda. Mutuhasa kwivwa woma wakuhana makumbululo, hanji kuzanga kuhana makumbululo anji, alioze kechi kututongola ngwe chize tunazange. Mba kuchi mutuhasa kukumba kapinda yono? Mutuhasa kuwana kumbululo ha mukanda uze Paulu atuminyine A-Hepreu. Muze te anahanjika ha ulemu wa kukunguluka, Paulu yamba ngwenyi, ayo te katamba kulihulikila ha chikuma cha ‘kulitakamisa umwe ni mukwo.’ (Tanga A-Hepreu 10:24, 25.) Kashika nyi twanyingika ngwetu, mandumbu akwo mahasa kuwana utakamiso ha kumbululo lieswalio mutuhana, muchitukwasa tununge ni kuhana makumbululo. Chikwo nawa, chipwe ngwe katutongwele ha yisuho yinji ngwe chize tunazange, mutuhasa kuwahilila ha kunyingika  ngwetu, mandumbu akwo kahasa kuhana makumbululo.—1 Petu. 3:8.

4. Yuma yika yitatu yize mutulilongesa ha mutwe uno?

⁴ Ha mutwe uno, chitangu mutulilongesa chize mutuhasa kulitakamisa umwe ni mukwo mu chikungulwila chikehe, muze atu akehe wika e akuhana makumbululo. Hanyima, mutulilongesa chize mutuhasa kulitakamisa umwe ni mukwo mu chikungulwila chinene, muze atu anji akuzundula moko hanga akumbulule. Mba kusongo, mutulilongesa yize mutuhasa kulinga hanga makumbululo jetu apwe waze matakamisa mandumbu.

5. Kuchi mutuhasa kulikolweza umwe ni mukwo mu chikungulwila chikehe?

⁵ Mu chikungulwila chikehe hanji mu chizavu, kumwatwamine mandumbu anji waze mazundula moko hanga akumbulule. Ha mashimbu amwe, ndumbu yoze unasongwela mafupiwa kushimbwila ndambu mba kusoloke ndumbu yoze mazundula kwoko. Hachino, muze uli ha kukunguluka cha mutapu au muhasa kwivwa uswelele. Mba yika watamba kulinga? Zundula kwoko ha yisuho yinji. Nyi wachilinga, mukolweza akwenu hanga no ahane makumbululo.

6-7. Yuma yika muhasa kulinga hanga uhone kwivwa woma muze unahane kumbululo?

⁶ Mba yika mutwamba nyi wakwivwa woma wakuhana makumbululo? Kuushi ukawe, mandumbu anji che akwivwa. Mba kuchi muhasa kwehuka kwivwa woma muze unahane kumbululo hanga utakamise mandumbu je? Kuchi muhasa kuchilinga?

⁷ Muhasa kuhengwola yikuma yimwe yize yatuhukile mu Kaposhi wa Kutalila. b Chakutalilaho, chikuma chimwe chili kulilulieka kanawa. (Yishi. 21:5) Nyi wanyingika kanawa yuma yize mutulilongesa ha kukunguluka, muchipwa chashi kuhana makumbululo. Chikuma chikwo chili, kuhana makumbululo ehi. (Yishi. 15:23; 17:27) Kuhana kumbululo lihi, muchikukwasa uhone kwivwa woma. Chikwo nawa, mandumbu mevwa kanawa kumbululo lie lihi, lia maliji akehe, kuhiana kumbululo lisuku lize lili ni maliji anji. Nyi wahana kumbululo lihi ha kuzachisa maliji je, musolola ngwo walilulieka kanawa, nawa wevwa yuma yize tunalilongesa.

8. Kuchi Yehova akumona tachi jize twakusa?

⁸ Mba yika mutwamba nyi hiuneseka yimwe ya ku yikuma yino, chipwe chocho wakwivwa woma wakuhana kumbululo? Nyi chenacho, muhasa kupwa ni shindakenyo ngwe, Yehova kakulemesa chinji tachi jize wakusa hanga ulinge yize muhasa. (Luka 21:1-4) Yehova keshi kutwita hanga tulinge yuma yize kutuchi kuhasa. (Fwili. 4:5) Kashika, tesa yize muhasa kulinga ni kulemba kuli Yehova hanga akukwase upwe ni kuhwima mbunge. Hanji kuuputukilo, yuma yize muhasa kutesa yili kuhana makumbululo ehi.

9. Kapinda muka wakusoloka mu chikungulwila chinene?

⁹ Yuma muyihasa kulisa nyi uli mu chikungulwila muze muli mandumbu anji. Muchihasa kupwa ngwe mandumbu anji kakuzundula moko, hachino ndumbu yoze unasongwela keshi kukutongola ha yisuho yinji. Chakutalilaho, pangi Danielle, kakuzanga chinji kuhana makumbululo ha kukunguluka. c Kuli iye, kuhana makumbululo chinalingi chihanda cha uwayilo wenyi kuli Yehova. Chikwo nawa, yili jila yize akutakamishinamo mandumbu jenyi ni kukolesa ufulielo wenyi  ha yize Mbimbiliya yakulongesa. Alioze, muze alukile ku chikungulwila chinene, te keshi kumutongola chinji hanga ahane makumbululo. Ha mashimbu amwe, te keshi kuhasa kuhana kumbululo chipwe limuwika ha kukunguluka cheswe. Iye yamba ngwenyi: “Te nakwivwa uli unji. Chapwile ngwe natokesa chimwe chiteli. Chikwo nawa, ndumbu yoze unasongwela nyi kakutongwele ha yisuho yinji, muhasa kumona ngwe kanachilingi ku tachi.”

10. Yika muyihasa kutukwasa mba tuhane makumbululo ha kukunguluka?

¹⁰ Shina hiunalivu kama ngwe pangi Danielle? Nyi hiunalivu chocho, kota wazangile kwecha kuhana makumbululo hanga ununge wika ni kupanjika kukunguluka. Alioze, kanda ulitwamina kuhana makumbululo. Mba yika watamba kulinga? Chuma watamba kulinga chili, kupwa ni kululieka makumbululo anji ha hita kukunguluka. Nyi kakutongwele kuuputukilo wa longeso, mahasa kukutongola ha mashimbu akwo. Muze unalulieka Longeso lia Kaposhi wa Kutalila, nyonga ha chize hita paragrafu yinakwate ha mutwe wa longeso. Nyi wachilinga, muhasa kukumbulula ha longeso lia kaposhi. Chikwo nawa, muhasa kulilulieka kanawa hanga ukumbulule ha maparagrafu waze anahanjika yuma yize kanji-kanji yapwa yikalu kulumbununa. (1 Kori. 2:10) Mumu liaka? Mumu hanji atu akehe wika e mazundula moko ha maparagrafu jacho. Mba nyi mukaula yikuma yino yeswe, chipwe chocho, kuuchi kuhasa kuhana kumbululo ha kukunguluka cheka ni cheka chize wazundula kwoko? Ha chikuma chino, muhasa kuhanjika ni ndumbu yoze masongwela muze kukunguluka kanda chiputuka ni kumulweza paragrafu yize unazange kukumbulula.

11. Yika mukanda wa A-Fwilipu 2:4, unatukolweza kulinga?

¹¹ Tanga A-Fwilipu 2:4. Paulu kakolwezele Akwa-Kristu hanga ase ha chihela chitangu yize akwo anafupiwa. Kuchi mutuhasa kukaula chiyulo chino muze tuli ha kukunguluka? Mutuhasa kuchikaula ha kwiwuluka ngwetu, akwetu chizechene ngwe yetu, no kanazange kuhana makumbululo.

12. Mutapu ukwo uka uze mutuhasa kutakamishinamo mandumbu jetu ha kukunguluka? (Tala nawa chizulie.)

¹² Achinyonga ha chikuma chino. Nyi unahanjika ni umwe sepa, shina wakuhanjika mashimbu eswe chakuhona kumwecha hanga neye  ahanjike? Ka, kuushi kuchilinga! Wakuzanga hanga neye ahanjike. Chizechene nawa, muze tuli ha kukunguluka, twakuzanga hanga mandumbu anji ahane makumbululo. Kwamba umwenemwene, mutapu upema wa kutakamishinamo mandumbu jetu, uli kwaha uhashi hanga no asolole ufulielo wo hakuhana makumbululo. (1 Kori. 10:24) Tutalenu chize mutuhasa kuchilinga.

13. Yika mutuhasa kulinga hanga mandumbu anji ahane makumbululo?

¹³ Chuma chitangu chize mutuhasa kulinga chili kuhana makumbululo ehi. Nyi twachilinga, mutukwasa mandumbu akwo hanga no ahane makumbululo. Makulwana a mu chikungulwila ni mandumbu akwo waze ajama, mahasa kuhana chilweza chipema ha chikuma chino. Chipwe muze muzanga kuhana kumbululo lihi, kanda ulumbununa yikuma yeswe yize yili ha paragrafu ha chisuho chimuwika. Nyi wakumbulula paragrafu yeswe, mukusala yikuma yikehe yize akwenu makumbulula. Chakutalilaho, ha paragrafu yino hali yikuma yaali; chitangu, kuhana makumbululo ehi, chamuchiali, kwehuka kuhanjika yuma yeswe yize yili ha paragrafu. Kashika, nyi muopwa mutu mutangu yoze matongola ha paragrafu yino hanga ukumbulule, muchilita kukumbulula chikuma chimuwika ha yikuma yino yaali.

14. Yika muyihasa kutukwasa kutesa yisuho yize mutuzundula kwoko? (Tala nawa chizulie.)

¹⁴ Pwako ni nyonga lialita muze unatese yisuho yize muhana makumbululo. Nyi wazundula-zundula chinji kwoko, chino muchihasa kushinjila ndumbu yoze unasongwela hanga atongole wika yena, chipwe ngwe mandumbu akwo kanda achikumbulula. Chikwo nawa, muchihasa kuhongesa mandumbu akwo ni kwecha kuzundula moko.—Chilu. 3:7.

15. (a) Yika kutwatambile kulinga nyi ndumbu yoze unasongwela mahona kututongola? (b) Kuchi mandumbu waze akusongwela yihanda mahasa kulihulumba hali mandumbu eswe? (Tala mushete, “ Nyi Unasongwela Chimwe Chihanda.”)

¹⁵ Nyi mandumbu anji mazundula moko ha  limwe longeso, muchihasa kututwala tuhone kuhana makumbululo ngwe chize tunazange. Ha mashimbu amwe, ndumbu yoze unasongwela hanji kechi kututongola ha yisuho yeswe yize mutuzundula kwoko. Chino muchihasa kutuhongesa, alioze kanda tupihilila mumu lia kuhona kututongola.—Chilu. 7:9.

16. Kuchi mutuhasa kukolweza mandumbu waze ahana makumbululo?

¹⁶ Mba yika mutwamba nyi wahashile kuhana kumbululo ha yisuho yinji ngwe chize unazange? Nyi yino muyilingiwa, muchilita kupanjika kanawa makumbululo ja mandumbu akwo. Muze kukunguluka muchihwa mwachichimieka ha makumbululo jacho. Kuchichimieka mandumbu je muchihasa kwatakamisa kuhiana makumbululo waze te muhana. (Yishi. 10:21) Kuchichimieka akwetu, chili mutapu ukwo wakulikolwezelamo umwe ni mukwo.

17. (a) Kuchi yisemi mahasa kukwasa ana jo hanga ahane makumbululo waze alita? (b) Kulita ni chinema, yuma yika yiwana yize twatamba kulinga muze tunalulieka makumbululo? (Tala nawa maliji mushi lia lifwo.)

¹⁷ Kuchi mutuhasa nawa kulitakamisa muze tuli ha kukunguluka? Nyi uli ni ana, akwase hanga alulieke makumbululo kulita ni miaka yize ali nayo. (Mateu 21:16) Ha mashimbu amwe, ha kukunguluka mahasa kushimutwinaho yikuma yikalu ngwe kupwa ni kapinda  mu usoko ni kupwa ni yitanga yalita. Chipwe chocho, mukuhasa kupwa paragrafu yimuwika hanji jaali jize ana je mahasa kukumbulula. Chikwo nawa, kwasa ana je hanga anyingike ngwo, hi ha shimbu lieswe ko lize mazundula moko maatongola. Nyi wakwasa, muze matongola akwo hanga akumbulule mu chihela cho o kechi kwivwa uli.—1 Timo. 6:18. d

18. Kuchi mutuhasa kwehuka kuhanjika chinji hali yetwene muze tunahane kumbululo? (Yishima 27:2)

¹⁸ Yetu eswe mutuhasa kululieka makumbululo autakamiso, waze mahalisa Yehova ni kukolweza mandumbu jetu. (Yishi. 25:11) Ha mashimbu amwe, mutuhasa kuhana kumbululo lize linakatuka ha chilweza chetu, alioze twatamba kukeya hanga tuhone kuhanjika yuma yinji hali yetwene. (Tanga Yishima 27:2; 2 Kori. 10:18) Shimbu tuchilinge, makumbululo jetu katamba kutala chinji hali Yehova, Liji lienyi ni hali tuvumbi twenyi eswe. (Uso. 4:11) Ewa, nyi chihula cha paragrafu chinatwite hanga tuhane kumbululo lize linakatuka ha chilweza chetu, acho mutuhasa kuhana. Chilweza cha mutapu au mutuchiwana ha paragrafu 19.

19. (a) Yika mutuyuka nyi mutulihulumba hali mandumbu eswe ha kukunguluka? (A-Roma 1:11, 12) (b) Mumu liaka wakuzanga kuhana makumbululo ha kukunguluka?

¹⁹ Tunanyingika ngwetu, kukushi shimbi ya chize mutuhana makumbululo, alioze tulieswe mutuhasa kusa tachi hanga tukolweze mandumbu jetu muze tunahane makumbululo. Mutapu umwe wa kuchilingila, uli kusa tachi hanga tukumbulule chinji muze tuli ha kukunguluka. Ha yikuma yikwo, chinalumbunuka kuwahilila ha uhashi weswao mutupwa nawo wa kukumbulula ni kuwahilila muze akwetu mahana makumbululo. Nyi mutusa kulutwe yize akwetu anafupiwa muze tuli ha kukunguluka, mutuhasa ‘kulitakamisa umwe ni mukwo.’—Tanga A-Roma 1:11, 12.