1. Yika yetu tunanyingika?

 YETU tuvumbi twa Yehova tunanyingika ngwetu, iye kakutuzanga chinji, kashika kanazange hanga tuwahilile. (Roma 8:35-39) Tunanyingika nawa ngwetu, twakuyuka chinji muze twakukaula shimbi ja mu Mbimbiliya. (Iza. 48:17, 18) Mba yika mutulinga nyi mutupalika mu yipikalo yize te kutushi ni kushimbwila?

2. Yipikalo yika mutuhasa kupalika, mba yika mutuhasa kulihula?

² Tuvumbi twa Yehova eswe kakupalika mu yipikalo. Chakutalilaho, umwe mu usoko wetu mahasa kutuvwisa chinyengo. Mutuhasa kupwa ni musongo uze wakutukwika kulingila Yehova ngwe chize twakuzanga. Mutuhasa kupalika mu luyinda wa chisemewa hanji kutuhungumiona mumu lia yize twafuliela. Muze tunapalika mu yuma ngwe yino mutuhasa kulihula ngwetu: ‘Mumu liaka yuma yino yinalingiwa kuli yami? Shina nalinga chuma chipi? Shina yino yinasolola ngwo, chishi nawa ni utayizo wa Yehova?’ Hiunalivu kama chocho? Nyi chenacho, kanda unenganyana. Tuvumbi twa Yehova anji ashishika no che alivwile.—Samu 22:1, 2; Haba. 1:2, 3.

3. Yika twalilongesa ha Samu 34:19?

³ Tanga Samu 34:19. Samu yino yinasolola yikuma yaali yilemu: (1) Akwa-ululi kakupalika mu yipikalo. (2) Yehova kakutukwasa mu yipikalo yize twakupalika. Mba kuchi akuchilinga? Mutapu umwe uli, kutukwasa kupwa ni nyonga lialita ku mwono wetu mu chifuchi chino tuli. Yehova kanalakenya ngwenyi, mutupwa ni uwahililo muze mutumulingila, alioze kambile  ngwenyi kutuchi kupalika mu yipikalo. (Iza. 66:14) Iye kanatukolweza hanga tulihulikile ha yuma ya kulutwe lia matangwa muze mutukapwa ni mwono wa mutolo uze anatulakenya. (2 Kori. 4:16-18) Shimbu yuma yacho kanda yilingiwa, Yehova manunga ni kutukwasa hanga tumulingile hita tangwa chipwe ngwe mutupalika mu yipikalo.—Lungu. 3:22-24.

4. Yika mutulilongesa ha mutwe uno?

⁴ Tutalenu yize mutuhasa kulilongesa hali tuvumbi twa Yehova ashishika a ku mashimbu a kunyima ni a ha mashimbu jetu. Ngwe chize mutumona, yetu eswe mutuhasa kupalika mu yipikalo yize te kutushi ni kushimbwila. Alioze nyi mutufuliela muli Yehova, iye manunga ni kutukwasa. (Samu 55:22) Muze tunahengwola yilweza ya tuvumbi twa Yehova ha mutwe uno, lihule ngwe: ‘Nyi yami mwe napalikile mu yipikalo yacho, kachi yika nalingile? Kuchi yilweza yacho yinakolesa ufulielo wami muli Yehova? Malongeso aka nawanaho waze munguhasa kukaula ku mwono wami?

5. Yipikalo yika Yakomba apalikile mumu lia Lapane? (Tala chizulie ha chifukilo.)

⁵ Tuvumbi twa Yehova a ku mashimbu a kunyima, kapalikile mu yipikalo yize te keshi ni kushimbwila. Tutalenu chilweza cha Yakomba. Tato kamulwezele hanga aye ni kumbata mwana wa Lapane, usoko wo yoze neye wapwile ni kuwayila Yehova; yamulakenya ngwenyi nyi machilinga Yehova mamuwahisa. (Uputu. 28:1-4) Hachino, Yakomba yononokena tato. Yahichika chifuchi cha Kanana yaya ndo kuli Lapane. Lapane kapwile ni ana a mapwo aali, Liya ni Rakele. Yakomba yazanga Rakele, mwanenyi wa kanuke; yatayiza kukalakalila Lapane miaka shimbiali hanga amumbate. (Uputu. 29:18) Alioze yuma kuyakalingiwile ngwe chize Yakomba azangile. Lapane yonga Yakomba ha kwalumuna yuma hanga alimbate ni Liya, mwanenyi wa mukulwana. Ha kupalika cha poso yimuwika, Lapane yalweza Yakomba ngwenyi, mahasa kumbata Rakele, alioze mamwahaye nyi makalakala nawa miaka shimbiali. (Uputu. 29:25-27) Lapane kasolwele nawa yitanga yipi ha mulimo uze amulingilile kuli Yakomba. Iye yalinga Yakomba yuma ya kalimbalimba ha miaka 20!—Uputu. 31:41, 42.

6. Yipikalo yikwo yika Yakomba apalikile?

⁶ Yakomba kapalikile mu yipikalo yikwo nawa. Iye kapwile ni usoko unene, chipwe chocho ana jenyi te keshi kulivwashana. Hachino, ayo yalanjisa mwanako Yosefwe mu undungo. Ana aali a Yakomba, Simeone ni Levi, kalingile yuma yize yapihishile lufuma wa jina lia usoko wo ni lia Yehova. Chikwo nawa, Rakele pwo yoze Yakomba azangile chinji yafwa ha kushita mwanenyi wamuchiali. Kusulaho, mumu lia zala yize yejile mu chifuchi, Yakomba chipwe ngwe kapwile kashinakaji yaya mu chifuchi cha Engitu.—Uputu. 34:30; 35:16-19; 37:28; 45:9-11, 28.

7. Kuchi Yehova asolwele kuli Yakomba ngwenyi, kakumuzanga?

⁷ Chipwe ngwe kapalikile mu yipikalo yeka ni yeka, nihindu Yakomba kakahonene kufuliela muli Yehova ni mu yilakenyo yenyi. Hachino, Yehova yazanga chinji Yakomba. Chakutalilaho, chipwe ngwe Lapane kapwile ni kwonga Yakomba, nihindu Yehova yamuwahisa ni yuma yinji. Yakomba kachichimiekene Yehova muze aliwanyine cheka ni Yosefwe, mwanenyi yoze te akuzanga chinji yoze anyongene ngwe hanafu! Usepa upema uze Yakomba apwile nawo ni Yehova we wamukwashile kukumba yipikalo yino yeswe. (Uputu. 30:43; 32:9, 10; 46:28-30) Ni yetu, nyi twanunga ni kukolesa usepa wetu ni Yehova; mutuhasa kukumba yipikalo yize muyiza susumuku.

8. Yika Mwanangana Ndawichi azangile kulinga?

 ⁸ Mwanangana Ndawichi kakahashile kulinga yuma yeswe yize atesele mu mulimo wa Yehova. Chakutalilaho, kazangile chinji kutungila Zambi tembele. Iye yalweza Natane nyonga liacho. Natane yamukumbulula ngwenyi: ‘Lingenu yeswe yize yili mu mbunge yenu, mumu Zambi hwali hamuwika ni yenu.’ (1 Sango 17:1, 2) Maliji wano kota katakamishine chinji Ndawichi. Hanyima lia kwivwa maliji wano, kota yaputuka kululieka yuma hanga atunge tembele.

9. Yika Ndawichi alingile muze atambwile lusango yoze wamuvwishile chinyengo?

⁹ Alioze ha kupalika cha amwe mashimbu, profeta wa Yehova yamunehena lusango yoze wamuvwishile chinyengo. “Ha ufuku uzewene,” Yehova yalweza Natane ngwenyi, hi Ndawichi ko matunga tembele; umwe wa kuli ana jenyi mwe mayitunga. (1 Sango 17:3, 4, 11, 12) Yika Ndawichi alingile muze atambwile lusango wacho? Iye yalumuna nyonga lienyi ha yize te anazange kulinga. Yaputuka kulihulikila ha kukunga mbongo ni yuma yize mwanenyi Solomone te mafupiwa hanga atunge tembele.—1 Sango 29:1-5.

10. Kuchi Yehova awahishile Ndawichi?

¹⁰ Hanyima lia kulweza Ndawichi ngwenyi hi iye ko matunga tembele, Yehova yalinga nenyi usendo. Iye yalakenya ngwenyi umwe wa ku munyachi wa Ndawichi te mayula ku miaka yeswe. (2 Samue. 7:16) Mu chifuchi chaha, ha Kanunu ka Miaka ya Kuyula cha Yesu, Ndawichi makawahilila chinji muze makanyingika ngwenyi, Mwanangana Yesu kali umwe wa ku chisemuko chenyi! Lusango yono kanatukwase kunyingika ngwetu, chipwe ngwe kutwahashile kulinga yuma yeswe yize tunazange mu mulimo wa Yehova, nihindu iye mahasa kututulikila yiwape yikwo yize kanda tuchinyonga kama.

11. Kuchi Akwa-Krisu ku sekulu yitangu aawahishile chipwe ngwe Wanangana wa Zambi kuwakejile ha shimbu lize o te anaushimbwila? (Yilinga 6:7)

¹¹ Akwa-Kristu ku sekulu yitangu, kapalikile mu yuma yize te keshi ni kushimbwila. Chakutalilaho, ayo kazangile chinji hanga Wanangana wa Zambi wize, alioze kakanyingikine shimbu lize te muwiza. (Yili. 1:6, 7) Mba yika alingile? Kanungine ni kulihana chinji mu mulimo wa kwambujola. Muze alihanyine chinji mu mulimo wa kwambujola, o yahasa kumona ukwaso wa Yehova.—Tanga Yilinga 6:7.

12. Yika Akwa-Kristu ku sekulu yitangu alingile muze apalikile mu zala yinji?

¹² Ha shimbu limwe zala yinji yiyiza hashi heswe. (Yili. 11:28) Akwa-Kristu ha mashimbu jacho no yapalikile mu zala yacho. Achinyonga lamba lize ayo amwene mumu lia zala! Kwamba pundu, miata a mu usoko kapwile ni kulihulumba chinji ha chize mawana kulia hanga alise asoko jo. Achinyonga chize yino yakwachile hali akweze waze te anatese yuma ku mwono wo hanga ambujole chinji. Hanji ayo kanyongene ngwo, katamba kushimbwilako ndambu mba alinge yize atesele. Chipwe ngwe yuma yacho yalisele kuli hita mutu, nihindu Akwa-Kristu ha mashimbu jacho kasele tachi hanga ayuke ni yize apwile nayo. O kanungine ni kwambujola kulita ni uhashi wo, ni kuwahilila chinji ha kulianyina yuma ya ku musunya ni mandumbu jo mu Yundeya.—Yili. 11:29, 30.

13. Yuma yika yipema yize Yehova alingilile Akwa-Kristu ha mashimbu a zala?

¹³ Yiwape yika Akwa-Kristu jacho azukile ha mashimbu a zala? Waze atambwile yuma ya ku musunya kamwene pundu chize Yehova aafungile. (Mateu 6:31-33) Ayo kota kakundamine chinji kuli mandumbu waze aakwashile. Waze ahanyine milambu hanji kukwasa mu majila akwo, kota kevwile uwahililo uze wakwiza ha kukwasa akwetu. (Yili. 20:35) Yehova kawahishile Akwa-Kristu wano mumu lia kutwama  kulita ni chize yuma yapwile ha mashimbu jacho akalu.

14. Yika yalingiwile kuli Mbarnabe ni Paulu, mba yika azukileko? (Yilinga 14:21, 22)

¹⁴ Ku sekulu yitangu, Akwa-Kristu te kakwahungumiona chinji, yino yapwile ni kulingiwa ha mashimbu waze te keshi ni kushimbwila. Talenu yize yalingiwile kuli Paulu ni Mbarnabe muze te anambujola mu Lisetra. Kuuputukilo, atu yaatambula kanawa, chocho yapanjika sango jize te anambujola. Alioze ha amwe mashimbu, akwa-kole yashinjila mbunga, hachino amwe a kuli atu waze chitangu aapanjikile yafupa kushiha Paulu ni mawe. (Yili. 14:19) Chipwe chocho, Mbarnabe ni Paulu yanunga ni kwambujola ku yihela yikwo. Yika azukileko? Ayo yakwasa ‘atu anji kupwa tumbaji’ twa Kristu. Chikwo nawa, maliji ni chilweza cho yatakamishine chinji mandumbu ha mashimbu jo. (Tanga Yilinga 14:21, 22.) Paulu ni Mbarnabe kakechele kwambujola chipwe muze te akwahungumiona; chino chayukishile atu anji. Ni yetu matuwahisa, nyi twanunga ni kulinga mulimo uze Yehova hanatwehe.

15. Yika mutuhasa kulilongesa ha chilweza cha ndumbu Macmillan?

¹⁵ Muze te kanda aheta ha mwaka 1914, tuvumbi twa Yehova te kakushimbwila yuma yimwe hanga yilingiwe. Chakutalilaho, tutalenu chilweza cha ndumbu Macmillan. Ngwe chize te akunyonga mandumbu anji ha mashimbu jacho, neye kanyongene ngwenyi te hikwasala hakehe hanga aye mu malilu. Ha jimwe pande jize alingile ha Setembro 1914, yamba ngwenyi: “Jino kota jili pande jami jakasula jize ngunalingi.” Alioze, kujakapwile pande jenyi jakasula. Ha kupalika cha mashimbu, ndumbu Macmillan yasoneka ngwenyi: “Anji a kuli yetu tunakalipupula kunyonga ngwetu, te hikwasala hakehe hanga tuye mu malilu.” Yawezela ngwenyi: “Chuma te twatamba kulinga chili kulihana chinji mu mulimo wa Mwene.” Ndumbu Macmillan kalihanyine chinji mu mulimo wa Yehova; yanunga ni kwambujola ni zango lieswe. Iye yakolweza mandumbu anji waze asele mu mazuwo a ususu mumu lia kuchina kulinjisa mu yuma ya mafwefwe. Chikwo nawa, chipwe ngwe te hapwa kashinakaji, nihindu te kakuya ku kukunguluka cheswe. Mumu liaka chapemene ndumbu Macmillan kulihana chinji mu mulimo wa Yehova muze te anashimbwila chiwape chenyi chakuya mu malilu? Muze te hikwasala hakehe afwe ha mwaka 1966, iye yasoneka ngwenyi: “Haliapwila ufulielo wami unakolo chinji kuhiana kunyima.” Chino chili chilweza chipema chize yetu eswe twatamba kwimbulula, chipi-chipi nyi yipikalo yize tunapalika yinashimbula chinji kuhiana chize te tunanyongo!—Hepre. 13:7.

16. Kapinda muka wa susumuku yoze ndumbu Herbert ni mukwo-pwo apalikile? (Tiangu 4:14)

¹⁶ Tuvumbi anji a Yehova kali ni misongo yize kakapwile ni kushimbwila. Chakutalilaho, ha sango jenyi, ndumbu Herbert Jennings b yalumbununa chize iye ni mukwo-pwo azangile chinji kununga mu mulimo wa mishionaliu mu Gana. Alioze ha kupalika cha mashimbu, yamuwana ni musongo upi chinji. Ndumbu Jennings yatongola maliji ali ha Tiangu 4:14 ni kulumbununa ngwenyi, kapinda wenyi kali ngwe yuma yize muyilingiwa “‘hamene’ yize kutuchi kuhasa kunyingika.” (Tanga.) Yasoneka ngwenyi: “Twasele tachi hanga tupwe ni nyonga lialita ha yize te tunapalika, chocho yitululieka yuma ni kuhichika Gana hamwe ni masepa jetu; yitufuna ku Canadá hanga [tuliukise].” Yehova kakwashile ndumbu Jennings ni mukwo-pwo hanga anunge ni kumuwayila ni ushishiko weswe chipwe ngwe te kanapalika mu yipikalo yino.

17. Kuchi chilweza cha ndumbu Jennings chakwashile mandumbu akwo?

 ¹⁷ Mutapu uze ndumbu Jennings ahanjikile hali mwene, wakwashile mandumbu anji. Umwe pangi yasoneka ngwenyi: “Lusango yono kangukwachile chinji ku mbunge. . . . Kutanga chize ndumbu Jennings echele chiteli chize apwile nacho hanga aliukise, changukwashile kupwa ni nyonga lialita ha yipikalo yami.” Ndumbu mukwo yasoneka ngwenyi: “Hanyima lia kukalakala miaka kumi ngwe mukulwana wa mu chikungulwila, natambile kwecha chiteli chacho mumu lia musongo wa mahesu-hesu. Musongo uno te wakunguhongesa chinji, kashika chapwile chikalu kutanga sango ja ku mwono wa mandumbu. . . . Alioze kunyongonona cha ndumbu Jennings; changutakamishine chinji.” Yino yinatwiwulula ngwo, nyi mutupalika mu yipikalo ya susumuku, nihindu mutuhasa kutakamisa akwetu. Ha mashimbu amwe yuma kuyishi kulingiwa ku mwono wetu ngwe chize twayitesele, chipwe chocho mutuhasa kupwa chilweza chipema kuli akwetu cha ufulielo ni kunyongonona.—1 Petu. 5:9.

18. Kulita ni chizulie, yika walilongesa ha chilweza cha pangi yoze watwama mu Nigéria?

¹⁸ Yuma yipi ngwe musongo wa COVID-19 yakupinjisa chinji mandumbu jetu. Chakutalilaho, umwe tuliwa mu Nigéria kakapwile ni mbongo jakulanda kulia. Tangwa limwe chimene, mwanenyi wa pwo yamuhula hakutwala ku yize te malia hanyima lia kuteleka kulia cha kasula chize apwile nacho. Ndumbwetu yalweza mwanenyi ngwenyi, ayo te keshi nawa ni mbongo chipwe lume yuma ya kulia, kashika te mafupiwa kwimbulula chilweza cha tuliwa wa ku Zarafata. Ayo yalinga kulia cha kasula chize apwile nacho, chocho yanunga wika ni kufuliela muli Yehova. (1 Mia. 17:8-16) Ha tangwa lizeliene, muze te ananyongo chize mahasa kuwana kulia, mandumbu yatwalila yuma ya kulia, yize yakwashile ha poso jaali. Ndumbwetu yamba ngwenyi, ha tangwa liacho  kamwene chize Yehova apanjikile yilemba yenyi muze te anahanjika ni mwanenyi. Yika twalilongesa ha chilweza chenyi? Twalilongesa ngwetu, nyi twafuliela muli Yehova ni mbunge yeswe, yipikalo ya susumuku yize muyilingiwa ku mwono wetu muyitukwasa kukundama kuli iye.—1 Petu. 5:6, 7.

19. Yipikalo yika Aleksey apalikile?

¹⁹ Yipikalo yikwo ya susumuku yize mandumbu akupalika musono, yili yihungumiona. Chakutalilaho, tutalenu yize yalingiwile kuli ndumbu Aleksey yoze watama mu Rússia. Muze amupapachishile ha mwaka 1994, mandumbu kapwile ni utuswilo mu chifuchi chacho, alioze ha kupalika cha miaka yuma yiyalumuka. Ha mwaka 2020, maswalale yaya ni kuhunana mu zuwo lienyi, chocho yamwanda yuma yinji yize awanyinemo. Ha kupalika cha amwe tukweji, nguvulu yamusuma mulonga ngwo, kali chingalwe. Yuma yapihile chinji, mumu yize amusuminyine mulonga yapwile yinema yize alingile kuli mutu yoze wapwile ni kulionga ngwo, kanalilongesa Mbimbiliya ha mwaka wa muundu. Achinyonga chize Aleksey evwile!

20. Kuchi ndumbu Yershov akolesele usepa wenyi ni Yehova?

²⁰ Shina yipikalo yize ndumbu Yershov apalikile yanehene yuma yipema? Ewa. Usepa wenyi ni Yehova wakola chinji. Mwene yamba ngwenyi: “Yami ni mukwetu-pwo twakulemba hamuwika mashimbu eswe. Ngunanyingika ngwami, te kutuchi kuhasa kukumba yuma yacho chakuhona ukwaso wa Yehova.” Yawezela nawa ngwenyi: “Longeso lia wika lia kungukwasa kukumba kunenganyana. Nakuzanga chinji kupukuna hali tuvumbi twa Yehova a kunyima. Mu Mbimbiliya muli sango jinji jize jakusolola ulemu wa kuhwima mbunge ni kufuliela muli Yehova.”

21. Yika twalilongesa ha mutwe uno?

²¹ Yika twalilongesa ha mutwe uno? Twalilongesa ngwetu, ha mashimbu wano yuma yize kutushi ni kushimbwila muyihasa kulingiwa ku mwono wetu. Chipwe chocho, Yehova nihindu kakukwasa waze akujikijila muli iye. Ngwe chize twamona ha chisoneko chize chinakwate mutwe uno, “mukwa ululi lamba linji akumona, alioze Yehova kakumupulula ku luyinda wenyi mweswe.” (Samu 34:19) Kashika, kanda tununga ni kulihulikila ha yipikalo yetu; tulihulikilenu ha ndundo jize Yehova akwete ja kukwasa atu jenyi. Nyi twachilinga, mutuhasa kwamba yuma ngwe yize Paulu ambile, ngwenyi: “Kunahasa kulinga yuma yeswe muli yoze wakunguhashisa.”—Fwili. 4:13.