MUTWE WAKULILONGESA 15
Yika Mutuhasa Kulilongesa ha Yikomokeso ya Yesu?
“Iye wendele ku yihela yeswe ni kulinga yipema ni kuuka waze eswe amwesene lamba.”—YILI. 10:38.
MWASO 13 Kristu, Chilweza Chetu
CHIKUMA CHILEMU a
1. Ha chihela chika Yesu alingilile chikomokeso chenyi chitangu?
ACHESEKENU kunyonga ha chikuma chino. Tuli ha mwaka 29 M.J. ku uputukilo wa mulimo wa Yesu hano hashi. Yesu, naye ni amwe a kuli tumbaji twenyi, yaasanyika ha umbachiso mu yimwe mbonge mu Kena, yize yili ku norte ya Nazare, limbo lize Yesu asemukinyine. Maria kali sepa lia waze analingi undungi. Hachino, makwasa ni kutambula atu waze aneza ha umbachiso wacho. Alioze ha shimbu likehe, mukusoloka umwe kapinda yoze te mavwisa sonyi asoko ni waze analimbata—vinyu muyihwa. b Hanji atu waze ezaho, koka chinji kuhiana waze ayo te anashimbwila. Hachino, Maria kafuji-fuji, maya kuli Yesu ni kwamba ngwenyi: ‘Ayo keshi nawa ni vinyu.’ (Yoa. 2:1-3) Mba, yika Yesu malinga? Iye malinga chuma chakukomwesa ha kwalumuna meya apwe ‘vinyu yipema.’—Yoa. 2:9, 10.
2-3. (a) Yesu kalingile yikomokeso ya mutapu uka? (b) Yika mutumona ha mutwe uno?
2 Chino chapwile chimwe cha ku yikomokeso yize Yesu alingile muze apwile hano hashi. c Iye kazachishile ndundo jize apwile najo hanga alinge yikomokeso ni kukwasa tununu a tununu twa atu. Chakutalilaho, ha shimbu limwe, kupalikila mu chikomokeso, Yesu yalisa malunga 5,000. Ha shimbu likwo, yalisa malunga 4,000. Nyi mutuchinga twanuke ni mapwo, atu jacho mahasa kuhiana 27,000. (Mateu 14:15-21; 15:32-38) Ha yisuho yino yaali, Yesu yauka nawa mieji anji! (Mateu 14:14; 15:30, 31) Achinyongenu uwahililo uze atu wano evwile muze aaukile kuli Yesu ni kwalisa kupalikila mu yikomokeso!
3 Mutuhasa kulilongesa yuma yinji ha yikomokeso yize Yesu alingile. Ha mutwe uno, mutumonaho amwe a ku malongeso jacho waze matakamisa ufulielo wetu. Hanyima, mutumona chize mutuhasa kwimbulula kulikehesa ni keke yize Yesu asolwele muze alingile yikomokeso yino.
YIKA TWALILONGESA HALI YEHOVA NI HALI YESU
4. Kulilongesa yikomokeso ya Yesu muchitukwasa kuwana malongeso hakutwala kuli iya?
4 Yikomokeso ya Yesu yinatulongesa yuma yinji hi wika ko hali iye; ni hali Yehova nawa. Mumu Yehova mwe wahanyine ndundo kuli Yesu mba alinge yikomokeso yacho. Mukanda wa Yilinga 10:38 unambe ngwo: ‘Zambi wawayishile [Yesu] ni spiritu yisandu ni ndundo. Iye wendele ku yihela yeswe ni kulinga yipema ni kuuka waze eswe amwesene lamba kuli Ndiapu, mumu Zambi kapwile hamwe nenyi.’ Twiwulukenu ngwetu, ha yuma yeswe yize Yesu ambile ni yize alingile, kuchingako yikomokeso, iye kembulwile ni ungunu weswe kunyonga cha Yehova ni chize akumwenamo yuma. (Yoa. 14:9) Tutalenu malongeso atatu waze mutuhasa kuwaha ha yikomokeso ya Yesu.
5. Yika yatwalile Yesu mba alinge yikomokeso? (Mateu 20:30-34)
5 Chitangu, Yesu ni Yehova kakutuzanga chinji. Muze Yesu apwile hano hashi, kasolwele chize te akuzanga atu ni kulinga yikomokeso hanga atepulule lamba lize o apwile ni kumona. Ha shimbu limwe, atu aali afwa meso yaliumba kuli Yesu hanga aakwase. (Tanga Mateu 20:30-34.) Yesu yevwila keke malunga jacho, chocho yaauka. Ha versu yino, Liji lia Ngregu lize akulumbununa ngwo, ‘yevwila keke,’ liakusolola keke yinji yize mutu akwivwa. Keke yamutapu au yize yakukatuka ha zango, ye yatwalile Yesu mba alise atu waze apwile ni zala ni kuuka mukwa-mbumba. (Mateu 15:32; Marku 1:41) Mutuhasa kupwa ni shindakenyo ngwetu, Yehova, Zambi ‘mukwa keke’ ni Mwanenyi Yesu, kakutuzanga chinji. Chikwo nawa, o kakupinda muze akutumona mutupalika mu yipikalo. (Luka 1:78; 1 Petu. 5:7) Tuli ni shindakenyo ngwetu, Yehova ni Yesu kanazange chinji kuhwisa lamba lieswe lize liakupinjisa atu hano hashi!
6. Yehova kahanyine ndundo kuli Yesu hanga alinge yika?
6 Chamuchiali, Yehova hanahane ndundo kuli Yesu hanga ahwise lamba lieswe lia atu. Yikomokeso yize Yesu alingile yinasolola ngwo, kali ni ndundo ja kuhwisa lamba lize yetu ukawetu kutuchi kuhasa kulihwisa. Chakutalilaho, iye kali ni ndundo ja kutukuula ku shili ni ku lamba lize liakwizako ngwe, misongo ni kufwa. (Mateu 9:1-6; Roma 5:12, 18, 19) Yikomokeso yize Yesu alingile yinasolola ngwo, iye mahasa kuuka misongo yeka ni yeka ni kuhindwisa afu. (Mateu 4:23; Yoa. 11:43, 44) Iye nawa kali ni ndundo ja kukwika luyinda wa chisemewa ni kukuula atu ku yitanga ya andemoniu. (Marku 4:37-39; Luka 8:2) Twakuwahilila chinji ha kunyingika ngwetu, Yehova hanahane ndundo jino kuli Mwanenyi!
7-8. (a) Shindakenyo ha yika yikomokeso ya Yesu yakutwaha? (b) Yikomokeso yika unafupu kumona mu chifuchi chaha?
7 Chamuchitatu, mutuhasa kupwa ni shindakenyo ngwetu, Wanangana wa Zambi muukaneha yiwape yinji hano hashi. Yikomokeso yize Yesu alingile muze apwile hano hashi, yakusolola yuma yize makalinga ngwe Mwanangana mu Wanangana wa Zambi. Yino muyikahiana yize alingile kunyima. Talenu yiwape yize tunashimbwila mu chiyulo cha Yesu. Mutukapwa ni mijimba yingunu, mumu Yesu makahwisa misongo yeswe ni utoji weka ni weka uze wakunehena atu lamba. (Iza. 33:24; 35:5, 6; Uso. 21:3, 4) Kukushi niumwe yoze makafwa ni zala, chipwe makapalika mu luyinda wa chisemewa. (Iza. 25:6; Marku 4:41) Mutukevwa kuwaha chinji muze mutukatambula asoko ni masepa jetu waze ‘hanafu.’ (Yoa. 5:28, 29) Yikomokeso yika muyikalingiwa mu chifuchi chaha yize unashimbwila ni mbunge ya helu-helu?
8 Yesu kasolwele kulikehesa ni keke muze te akulinga yikomokeso, ni yetu twatamba kwimbulula yitanga yacho. Tutalenu yilweza yaali, ha kuputuka ni lusango wa chiwanyino cha umbachiso mu Kena.
CHILWEZA CHA KULIKEHESA
9. Yika Yesu alingile ha chiwanyino cha umbachiso? (Yoano 2:6-10)
9 Tanga Yoano 2:6-10. Shina Yesu kapwile ni chiteli cha kulinga yimwe muze vinyu yahwile ha chiwanyino cha umbachiso? Ka. Kukwakapwile uprofeto niumwe uze wambile ngwo, Mesaya te malumuna meya apwe vinyu. Alioze, eseka kunyonga chize te muwivwa nyi walwa muuhwa ha chiwanyino cha umbachiso we. Chinasoloka ngwe Yesu kevwilile keke asoko jacho, chipi-chipi waze te analimbate ni kwakwasa hanga ahone kwivwa sonyi. Hachino, ngwe chize twamona ku uputukilo wa longeso lino, iye yalinga chikomokeso. Yalumuna milondo ya meya 390 ni kuyipwisa vinyu yipema. Muchihasa kupwa ngwe Yesu kalingile vinyu yinji hanga yize te muyisalaho ayizachise hanyima hanji kuyilanjisa hanga akwase waze te analimbata. Pundu lume, lunga yono ni mukwo-pwo kawahililile chinji ha ukwaso uze aehele kuli Yesu!
Imbulula Yesu ha kuhona kulizata ha yuma yize wakulinga hanji yize unanyingika (Tala maparagrafu 10-11) e
10. Yikuma yika yilemu yili ha Yoano kapitulu 2? (Tala nawa chizulie.)
10 Talenu yimwe yikuma yilemu yize yili ha Yoano kapitulu 2. Shina nwahasa kumona ngwenu hi Yesu ko wazalishile milondo yacho ni meya? Shimbu afupe kusoloka, iye yeta atu akwo hanga alinge mulimo wacho. (Versu 6, 7) Hanyima lia kwalumuna meya ni kupwa vinyu, Yesu kakanjile vinyu chipwe yikepe hanga ayitwale kuli mukwa-kuyula ulungi. Shimbu achilinge, iye yahana mulimo wacho kuli tuvumbi. (Versu 8) Chikwo nawa, Yesu kakazundwile musenge wa vinyu kwilu kulutwe lia atu eswe ni kwamba ngwenyi, pakenu vinyu ayi nalinga!
11. Yika mutuhasa kulilongesa ha chikomokeso cha Yesu?
11 Yika mutuhasa kulilongesa ha chikomokeso cha Yesu cha kwalumuna meya hanga apwe vinyu? Twawanaho limwe longeso lia kulikehesa. Yesu kakalilambile ha pambo mumu lia chikomokeso chize alingile. Kwamba umwenemwene, ha yuma yeswe apwile ni kulinga iye te keshi kufupa kusoloka. Alioze, te kakulikehesa ni kuhalisa Tato mu yuma yeswe. (Yoa. 5:19, 30; 8:28) Nyi mutwimbulula chilweza cha Yesu ni kununga kulikehesa, kutuchi kulizata ha yeswe yize mutulinga. Kashika, yeswayo mutulinga mu mulimo wa Yehova, kanda tulisamba hali yetwene, alioze tulisambenu mumu lia kulingila Yehova. (Jere. 9:23, 24) Mumu kutuchi kuhasa kulinga chuma nichimwe chakuhona ukwaso wa Yehova.—1 Kori. 1:26-31.
12. Mutapu ukwo uka uze mutuhasa kwimbulwilamo kulikehesa cha Yesu? Hana chilweza.
12 Tutalenu mutapu ukwo uze mutuhasa kwimbulwilamo kulikehesa cha Yesu. Tunyongenu ha chikuma chino: Mukulwana wa mu chikungulwila mapalikisa mashimbu anji ni kukwasa umwe kavumbi mukweze kululieka pande jenyi jitangu ja mbunga. Mumu lia chino, mukweze wacho malinga pande jipema; mandumbu eswe mu chikungulwila mawahilila ha pande jacho. Hanyima lia kukunguluka, umwe ndumbu malweza mukulwana wacho ngwenyi: ‘Musono twevwa pande jipema chinji.’ Mba mukulwana mamba ngwenyi: ‘Chochene lume, napalikisa mashimbu anji ni kumukwasa kululieka pande jacho. Alioze, te muchilita mukulwana kwamba ngwenyi: ‘Chochene lume, ni yami nazanga chinji pande jize alinga. Nyi tuli akwa-kulikehesa, kutuchi kufupiwa kuzuka uhenya ha yuma yipema yize mutulingila akwetu. Twakuwahilila chinji ha kunyingika ngwetu, Yehova kakumona ni kulemesa yuma yize twakulinga. (Tesa nawa ni Mateu 6:2-4; Hepre. 13:16) Chochene, twakuvwisa Yehova kuwaha muze twakwimbulula chilweza cha kulikehesa cha Yesu.—1 Petu. 5:6.
CHILWEZA CHA KEKE
13. Yika Yesu amwene muze ahetele hakamwihi ni mbonge ya Naine? (Luka 7:11-15)
13 Tanga Luka 7:11-15. Muze Yesu apwile ni kwambujola, iye kayile ndo ni ku Naine. Mbonge yino, yapwile ku Ngalileya hakamwihi ni Shuneme kuze profeta Elisha ahindwishile mwana wa umwe pwo ha miaka 900 kunyima. (2 Mia. 4:32-37) Esekenu kunyonga ha chikuma chino: Yesu kanakundama ku chikolo cha mbonge, chocho mamona atu anji kanayi ni kufunda mufu. Chikuma chacho chili chikalu chinji, mumu umwe mama tuliwa kafwisa mwanenyi wa wika. Alioze, mama wacho keshi ukawenyi; kali hamwe ni atu anji a mu mbonge. Yesu mamanyisa atu jacho, chocho malinga chuma chize muchisala ku mbunge ya tuliwa yoze ku miaka yeswe. Iye mahindwisa mwanenyi! Uno uli uhindukilo utangu ha uhindukilo utatu uze Yesu alingile uli mu Evanjelu.
Imbulula Yesu ha kulisa mu chihela cha waze afwisa mutu yoze azanga (Tala maparagrafu 14-16)
14. Yikuma yika yilemu yize twawana mu Luka kapitulu 7? (Tala nawa chizulie.)
14 Talenu yimwe yikuma yilemu ha Luka kapitulu 7. Nwamona chize hanambe? Hanambe ngwo, muze Yesu ‘amwene pwo,’ chocho yamuvwila “keke.” (Versu 13) Muchihasa kupwa ngwe Yesu kamwene mama wacho kanalila muze te anayi ku mafuka ni kufunda mwanenyi. Hachino, Yesu yamuvwila keke, alioze kakevwilile wika pwo wacho keke, iye yalisa mu chihela chenyi. Yahanjika nenyi ni liji lipema ngwenyi: “Kanda ulila.” Hanyima, yalinga yimwe hanga amukwase. Iye yahindwisa mukweze wacho ni ‘kumuhana kuli naye.’—Versu 14, 15.
15. Yika twalilongesa ha chikomokeso chino cha Yesu?
15 Yika mutuhasa kulilongesa ha chikomokeso chino cha Yesu? Twalilongesa ngwetu, twatamba kulisa mu chihela cha akwetu waze afwisa umwe. Chipwe ngwe kutuchi kuhasa kuhindwisa mutu yoze wafwa, alioze chizechene ngwe Yesu, mutuhasa kumona yize akwetu anapalika ni kulisa mu chihela cho. Mutuhasa kulihana hanga twambe hanji kulinga chuma chize muchaakwasa ni kwatakamisa. d (Yishi. 17:17; 2 Kori. 1:3, 4; 1 Petu. 3:8) Chipwe mutwamba maliji akehe hanji kulinga yuma yikehe-yikehe, yino muyihasa kukwasa chinji waze afwisa.
16. Ngwe chize tunamono ha chizulie, yika walilongesa ha chilweza cha mama yoze wafwishile mwanenyi wa pwo?
16 Tuhengwolenu chilweza chino. Ha kupalika cha yimwe miaka, muze te anembi ha kukunguluka, pangi umwe yamona umwe mama kanalili. Mwaso te unahanjika hakutwala ku kutalatala cha uhindukilo. Iye kafwishile mwanenyi wa pwo yoze te uchili mukweze. Chakuhona kushimbula, pangi wacho yaya sali lia mama yoze; yamukwata ha chipaya, yemba nenyi mwaso hamuwika. Mama yono hanyima yamba ngwenyi: “Namwene zango lize mandumbu anakangusolwela.” Iye kanakawahilila chinji ha chize ayile ku kukunguluka. Yanunga ni kwamba ngwenyi: “Ukwaso wetu uli mu Zuwo lia Wanangana.” Mutuhasa kupwa ni shindakenyo ngwetu, Yehova kakumona ni kulemesa chipwe yuma yikehe-yikehe yize twakulinga hanga tulise mu chihela cha akwetu waze ananenganyana mumu lia kufwisa umwe.—Samu 34:18.
MALONGESO WAZE MATAKAMISA UFULIELO WETU
17. Yika twalilongesa ha mutwe uno?
17 Mutuhasa kuwana utakamiso unji nyi mutuhengwola yikomokeso ya Yesu yize yili mu Evanjelu. Yikomokeso yacho yakutulongesa chize Yehova ni Yesu akutuzanga. Yakutusolwela ndundo jize Yesu ali najo ja kuhwisa lamba lieswe lize twakumona. Yakutwaha nawa shindakenyo ngwetu, yilakenyo yeswe ya Yehova kwasala hakehe yimanunuke muze Wanangana wenyi muuputuka kuyula hano hashi. Muze tunalilongesa yikuma yino, muchilita kupukuna ha chize mutuhasa kwimbulula yitanga ya Yesu. Kashika, mutuhasa kulinga katalilo wa longeso lia wika hanji kusa mashimbu ha uwayilo wa mu usoko hanga tulilongese nawa yikomokeso yikwo yize Yesu alingile. Chino muchitukwasa kulilongesa yuma yaha ni kuyilweza kuli mandumbu akwo. Nyi twachilinga, mututakamisa mandumbu anji!—Roma 1:11, 12.
18. Yika mutukalilongesa ha mutwe uze muhataho?
18 Muze te anayi ni kuhwisa mulimo wenyi hano hashi, Yesu yalinga chikomokeso cha kasula cha kuhindwisa mufu. Chino chapwile chikomokeso chenyi chamuchitatu chize chili mu Mbimbiliya. Ha shimbu liacho, iye yahindwisa sepa lienyi yoze te azanga chinji. Uhindukilo uno walisele chinji ni uhindukilo ukwo. Yika mutuhasa kulilongesa ha chikomokeso chino? Kuchi mutuhasa kutakamisa ufulielo wetu ha kutalatala cha uhindukilo? Yino ye mutukalilongesa ha mutwe uze muhataho.
MWASO 20 Watuhele Mwane Yoze Wazanga Chinji
a Iye kaholesele kangonga, kaukile mieji ni kuhindwisa afu. Chochene, chili chipema kulilongesa ha yikomokeso ya Yesu! Sango jino kujishi mu Mbimbiliya hanga jituvwise wika kuwaha, alioze hanga tuwaneho nawa malongeso. Mutushimutwina yimwe ya ku yikomokeso yacho ni kuwana malongeso hali Yehova ni Yesu waze makolesa ufulielo wetu, ni kumona yitanga yize tunafupiwa kupwa nayo.
b Umwe mukwa-kuhengwola Mbimbiliya, yamba ngwenyi: “Kuzumbula ngeji ku chivumbuko, chapwile chiteli chisandu. Chikwo nawa, kusolola nyonga lia kuhana, chipi-chipi ha chiwanyino cha umbachiso te chakufupiwa kuhana yuma yinji.”
c Mikanda ya Evanjelu yakwamba ngwo, Yesu kalingile yikomokeso kuhiana 30. Alioze, tunanyingika ngwetu hanji yikomokeso yokele chinji, mumu Mbimbiliya kanji-kanji kuyishi kuhanjika pundu ha hita chikomokeso chize Yesu alingile. Chakutalilaho, ha shimbu limwe, atu eswe mu mbonge kejile kuli iye, chocho ‘yauka anji waze apwile ni misongo yeka ni yeka.’—Marku 1:32-34.
d Mba uwane yikuma ya yize muhanjika hanji mulinga hanga utakamise mutu yoze wafwisa, tala chikuma, “Console os Enlutados, Assim Como Jesus Fez,” ha Kaposhi wa Kutalila 1 Novembro, 2010.
e ULUMBUNWISO WA CHIZULIE: Muze Yesu anatalila ha mbango, sandungi ni nandungi hamwe ni atu waze asanyikanga ha umbachiso kananu vinyu yipema yize iye alinga.
