1. Yika akwa-Kristu atamba kulinga mba azuke fweto mu kuzomboka cho?

AKWA-KRISTU kali mu chimwe kuzomboka cha mwono. Chipwe ngwe twaputuka kuzomboka haliapwila hanji twaputukile kulu, nihindu twatamba kununga ndo kusongo. Chiyulo chize postolo Paulu ahanyine kuli akwa-Kristu mu Fwilipu, muchihasa kutukwasa hanga tuzomboke ndo kusongo. Akwa-Kristu amwe ku sekulu yitangu, muze atambwile mukanda wa Paulu te kakuwayila Yehova ha miaka yinji. Ayo kapwile ni kuzomboka kanawa, alioze Paulu yaewulula ulemu wa kununga ni kunyongonona mu kuzomboka cho. Iye kazangile hanga o anunge ni kukaula chilweza chenyi cha kulihulikila ha fweto.—Fwili. 3:14.

2. Mumu liaka chiyulo cha Paulu kuli A-Fwilipu chejile ha shimbu yalita?

² Chiyulo cha Paulu kuli A-Fwilipu chejile ha shimbu yalita. Chikungulwila cha Fwilipu chapalikile mu yihungumiona chize ku uputukilo. Ha mwaka 50 M.J, Paulu ni Saila yakaula chiyulo cha Zambi cha ‘kuzauka ku Masendonya.’ Hachino, o yaya ndo mu Fwilipu hanga ambujole sango lipema. (Yili. 16:9) Muze aheteleko, yawana umwe pwo avuluka ngwo Lidia, yoze te Yehova “hazulula mbunge yenyi kupanjika” sango lipema. (Yili. 16:14) Hakupalika cha amwe mashimbu, yamupapachisa hamwe ni akwa-zuwo lienyi. Alioze, susumuku Ndiapu yaputuka kwakokela yihungumiona. Malunga mu mbonge yacho, yakwata Paulu ni Saila yaambulumwina kuli akwa-kuyula ni kwaliongela ngwo kananehe milonga mu chihunda. Hachino, Paulu ni Saila yaalikita ni kwasa mu zuwo lia ususu. Kusulaho yaalweza hanga atuhuke mu mbonge. (Yili. 16:16-40) Shina o kalitwaminyine? Ka! Mba yika mandumbu amu chikungulwila chize chaha alingile?  Ayo kahanyine chilweza chipema, mumu no kanyongonwene! Kwamba pundu, chilweza chipema cha Paulu ni Saila chaakolwezele.

3. Yika Paulu anyingikine, nawa yihula yika mutushimutwina?

³ Paulu kasele tachi hanga anunge ni kunyongonona. (2 Kori. 4:16) Alioze, kanyingikine ngwenyi, mba azuke mu kuzomboka chenyi cha mwono, katamba kulihulikila ha fweto. Yika mutuhasa kulilongesa ha chilweza cha Paulu? Shina musono kuli yilweza ya mandumbu ashishika, yize muyitukwasa tunyongonone chipwe ngwe mutupwa ni yipikalo yeswayo? Kuchi kutalatala chetu muchihasa kutukolweza hanga tuhone kukokoloka?

4. Kuchi Paulu anungine ni kulinga mulimo wa Yehova chipwe muze mwono wenyi walumukine?

⁴ Tunyongenu ha yize te Paulu analingi muze asonekene mukanda wenyi kuli A-Fwilipu. Iye kapwile mu zuwo lia ususu ku Roma. Kakapwile ni kutuhuka hanga aye ni kwambujola. Chipwe chocho, iye kanungine ni kwambujola kuli waze te akumumeneka ni kusonekena yikungulwila ya kusuku mikanda. Chizechene nawa musono, akwa-Kristu anji waze keshi kuhasa kukatuka ha zuwo, kakusa tachi hanga ambujole sango lipema kuli waze akuya ni kwameneka. Ayo nawa kakusoneka mikanda ya utakamiso hanga ayitume kuli atu waze keshi kuhasa kuliwana no.

5. Kulita ni maliji ali ha A-Fwilipu 3:12-14, yika yakwashile Paulu mba alihulikile ha fweto yenyi?

⁵ Paulu kakechele yuma yipema ni yuma yipi yize alingile hanga yimulalwise mu mulimo wa Yehova. Kashika ambile ngwenyi, ‘kakuvulama yuma yize yili kunyima’ hanga ahase kuzoza ‘moko ku yuma yize yili kulutwe.’ (Tanga A-Fwilipu 3:12-14.) Yika yize te muyihasa kulalwisa Paulu? Chitangu, shimbu te kanda achipwa mukwa-Kristu, Paulu kafumbukile mu vungu lia A-Yunda. Alioze, te kakumona yuma yacho ngwe “yiswaswa.” (Fwili. 3:3-8) Chamuchiali, chipwe ngwe kahungumionene akwa-Kristu, nihindu kakechele nyonga liacho limukinde kuwayila Yehova. Chamuchitatu, kakanyongene ngwenyi yuma yeswe yipema yize alingile mu mulimo wa Yehova, te yinakumbana ni kwecha kukilikita chinji. Paulu kamanunwine kanawa mulimo wa kwambujola, chipwe ngwe kapalikile mu yeseko yinji ngwe, kumusa mu zuwo lia ususu, kumulamba, kumwasa mawe, kushimbama cha ulungu, kuhona kulia ni pwila. (2 Kori. 11:23-27) Chipwe ngwe kapalikile mu yeseko yeswayi, nihindu kanyingikine ngwenyi katamba kununga ni kuwayila Yehova. Kashika, ni yetu che twatamba kulinga.

6. Yuma yika ya “kunyima” yize twatamba kuvulama?

⁶ Kuchi mutuhasa kwimbulula chilweza cha Paulu ha ‘kuvulama yuma yize yili kunyima’? Amwe akuli yetu hanji tunafupiwa kukumba manyonga a kulihisa mumu lia shili yize twalingile. Nyi chocho, linga katalilo wa longeso lia wika hakutwala ha ukuule wa chitapo cha Kristu. Nyi twalilongesa, twapukuna ni kulemba hakutwala ha chikuma chacho, mutuhasa kukumba manyonga a kulihisa chakuhona chitela. Chikwo nawa, mutuhasa kwecha kulihisa ha shili yize Yehova hanatukonekena kulu. Tutalenu nawa longeso likwo lize mutuhasa kuwana ha chilweza cha Paulu. Amwe kechele mulimo uze te mwapwisa pichi hanga alihane mu mulimo wa Yehova. Nyi che twalingile, shina mutuhasa kuvulama yuma yize twahichikile chakuhona kwivwa usona wa yize te mutuyukako? (Kwa. 11:4-6; Chilu. 7:10) ‘Yuma yize yili kunyima’ muyihasa nawa kupwa yuma yize twalingile mu mulimo wa Yehova hanji yipikalo yize twakumbile. Kwamba pundu, muze mutupukuna  ha chize Yehova atukwashile kunyima, muchitukwasa kukundama kuli Iye. Alioze, kutwatambile kunyonga ngwetu, kwahwa mumu hitwalingila Yehova yuma yinji.—1 Kori. 15:58.

7. Kulita ni 1 A-Korindu 9:24-27, yika twatamba kulinga mba tuzuke fweto mu kuzomboka chetu cha mwono? Lumbununa.

⁷ Paulu kanyingikine kanawa maliji ambile Yesu ngwenyi: “Litachikenu.” (Luka 13:23, 24) Paulu kanyingikine ngwenyi, chizechene ngwe Kristu, neye te katamba kulitachika ndo kusongo. Kashika atesele mwono wetu wa Ukristu ni chimwe kuzomboka. (Tanga 1 A-Korindu 9:24-27.) Mutu yoze uli mu chimwe kuzomboka kakulihulikila ku fweto yenyi nawa keshi kwecha nichimwe chimulalwise. Chakutalilaho, musono akwa-kuzomboka mahasa kuzombokela mu yihela muze muli yuma yeka ni yeka yize muyihasa kwalalwisa. Kuchi wanyonga, shina mutu yoze uli mu kuzomboka chacho mahasa kumana hanga atale yuma yacho? Nyi kanazange kuzuka fweto, kechi kuchilinga! Mu kuzomboka chetu cha mwono, ni yetu twatamba kwehuka yuma yize muyitulalwisa. Nyi twanunga kulihulikila ha fweto lietu ni kulingila Yehova ni zango lieswe ngwe chize alingile Paulu, ni yetu mutukazuka fweto!

8. Yuma yika yitatu yize mutuhengwola?

⁸ Haliapwila mutuhengwola yuma yitatu yize muyihasa kutukokolola. Yuma yacho yili yino: kuhona kumanunuka cha yuma yize te twakushimbwila, ushinakaji ni yipikalo yize kuyishi kuhwa. Mutuyuka ha kulilongesa chize akwetu akumbile yuma yacho.—Fwili. 3:17.

9. Kuchi kuhona kumanunuka cha yuma yize twakushimbwila muchihasa kukwata ha mwono wetu?

⁹ Kuhona kumanunuka cha yuma yize te twakushimbwila. Kwamba pundu, twakushimbwila yuma yipema yize Yehova hanalakenya. Muze profeta Habakuke, alwezele Yehova hanga ahwise ungulungulu mu Yunda, Yehova yamulweza ngwenyi nunga ni ‘kutwaminyina.’ (Haba. 2:3) Kashika, nyi muchisoloka ngwe yuma yize tunashimbwila kuyamanunukine, chino muchihasa kukokolola zango lietu. Nawa  mutuhasa kuhonga. (Yishi. 13:12) Yino ye yalingiwile kuli amwe mandumbu ha mwaka 1914. Ha mwaka wacho, akwa-Kristu anji akuwayisa te kanashimbwila kuya mu malilu. Kuchi tuvumbi wano ashishika alingile, muze yuma yacho yahonene kumanunuka?

10. Yika alunga ni pwo wano alingile muze yize apwile ni kushimbwila kuyamanunukine?

¹⁰ Tutalenu chilweza cha akwa-Kristu aali ashishika waze apalikile mu kapinda wacho. Ndumbu Royal Spatz kamupapachishile ha mwaka 1908 muze te ali ni miaka 20. Iye kapwile ni shindakenyo ngwo kwasala hakehe atambule fweto yenyi. Hachino, ha mwaka 1911, muze etele ulo kuli pangi Pearl, iye yamulweza ngwenyi: “Yena unanyingika yize muyilingiwa ha mwaka 1914. Nyi mutulimbata, twatamba kuchilinga kawashi-washi!” Shina alunga ni pwo wano kechele kuzomboka cho cha mwono, mumu kakatambwile fweto lio ha mwaka 1914? Ka, mumu ayo kalihulikilile ha kulingila Yehova ni ushishiko weswe, hi ko ha kuya mu malilu. Ayo kasele tachi hanga anunge ni kuzomboka. Hachino, Royal ni Pearl, yanunga ni kushishika ndo haze ahwishile mulimo wo hano hashi. Kwamba pundu, yena unashimbwila tangwa lize Yehova makachiza luchoko ha jina lienyi ni kumanununa yilakenyo yenyi yeswe. Pwako ni shindakenyo ngwo yuma yacho muyikamanunuka ha shimbu lize Yehova hanatese. Amu yino kanda yilingiwa, mutuhasa kununga ni kulingila Zambi yetu, chakuhona kwecha yuma yize kuyamanunukine yituhongese.

11-12. Mumu liaka mutuhasa kununga ni kulingila Yehova chipwe ngwe mujimba muhonga? Hana chilweza.

¹¹ Ushinakaji. Kulisa ni mukwa-kuzomboka yoze wa kufupiwa tachi jinji mu mujimba, yena kuwafupiwile tachi jacho mba ununge ni kukola ku ufulielo. Kwamba pundu, mandumbu anji waze keshi nawa ni tachi mumu lia ushinakaji, nihindu kananungu ni kulingila Yehova ni mbunge yeswe. (2 Kori. 4:16) Chakutalilaho, muze Ndumbu Arthur Secord * apwile ni miaka 88, te hakalakala ku Mbetele ha miaka 55. Ha mashimbu jacho mujimba te wazeya. Limwe tangwa, pangi yoze te unamuwuka yeza hanga amukwase. Yamutala ni zango lieswe, yamwamba ngwenyi: “Ndumbu Arthur, wakalakala chinji mu mulimo wa Yehova.” Alioze, ndumbu Arthur, kakapwile ni kulihulikila ha yize alingile kunyima. Iye yamutala ni kusehejela ni kwamba ngwenyi: “Chochene, wamba umwenemwene. Alioze, yahiana ulemu hi yize ko twalingile kunyima. Chuma chilemu haliapwila chili kununga ni kushishika.”

¹² Hanji wakuwayila Yehova ha miaka yinji, haliapwila mujimba hiwahonga kuushi kuhasa nawa kulinga yize te wakulinga. Nyi chenacho,  kanda uhonga. Muhasa kupwa ni shindakenyo ngwo Yehova kakusakwilila ha mulimo uze wamulingilile ni ushishiko weswe. (Hepre. 6:10) Nawa tunyingikenu ngwetu, hi wika ko yize mutulingila Yehova ye muyisolola ngwo twakumuzanga. Alioze, twakusolola ngwetu, twakuzanga Yehova muze mutupwa ni nyonga lialita ha yize yeswe mutuhasa kumulingila. (Kolo. 3:23) Yehova kananyingika haze hasulila tachi jetu, kashika keshi kutushimbwila hanga tulinge yize kutuchi kuhasa.—Marku 12:43, 44.

13. Kuchi chilweza cha Anatoly ni Lidiya muchitukwasa tununge ni kuwayila Yehova chipwe ngwe tuli mu yipikalo yinji?

¹³ Yipikalo yize kuyishi kuhwa. Tuvumbi twa Yehova amwe kakupalika mu yihungumiona ni mu yipikalo ha miaka yinji. Chakutalilaho, Anatoly Melnik * kapwile wika ni miaka 12 muze tato amusele mu zuwo lia ususu ni kumutuma ku Sibéria kusuku ni asoko jenyi mu Moldova haze hali 7,000 km. Hakupalika cha mwaka, Anatoly, naye, ni akako no yaatuma ku Sibéria ni kwasa mu zuwo lia ususu. Hakupalika cha mashimbu, o yanunga ni kulikungulula mu mbonge yikwo kuze te kukwete chishika chinji, alioze te katamba kwenda ha 30 km. Kulutwe, Ndumbu Melnik yalinga miaka yitatu mu zuwo lia ususu, kusuku ni mukwo-pwo Lidiya ni mwana no wa pwo yoze te uli ni mwaka. Chipwe ngwe kamwene lamba ha miaka yinji, nihindu Anatoly ni asoko jenyi yanunga ni kuwayila Yehova ni ushishiko. Haliapwila Anatoly kali ni miaka 82, kanakalakala mu Komite ya ku Mutango mu Ásia Central. Ngwe Anatoly ni Lidiya, mutuhasa kulinga yize mutuhasa mu mulimo wa Yehova ni kununga ni kunyongonona ngwe chize twalingile kunyima.—Ngala. 6:9.

14. Yika Paulu atambile kulinga mba azuke fweto yenyi?

¹⁴ Paulu kapwile ni shindakenyo ngwenyi mamanununa kuzomboka chenyi ni kuzuka fweto. Amu te ali mukwa-Kristu wakuwayisa, iye kalihulikilile ha “kwononona cha kutambika cha kwilu cha Zambi.” Alioze, mba azuke fweto yacho, iye kanyingikine ngwenyi katamba kununga ni “kuzomboka ndo kusongo.” (Fwili. 3:14; MW 1991.) Paulu kazachishile chilweza chipema hanga akwase A-Fwilipu anunge ni kulihulikila ha fweto yo.

15. Kuchi Paulu azachishile chisemuko cha A-Roma hanga akolweze akwa-Kristu mu Fwilipu anunge ni “kuzomboka”?

¹⁵ Paulu kewulwile A-Fwilipu ngwo chifuchi cho chili mu malilu. (Fwili. 3:20) Mumu liaka  ayo te atamba kwiwuluka chikuma chino? Ha matangwa jacho, atu te kakuzanga kupwa ni chisemuko cha A-Roma, mumu chino te chakwayukisa chinji. * Alioze, akwa-Kristu akuwayisa kapwile amu chisemuko cha unguvulu upema, uze te mwayukisa kuhiana. Kutesa chisemuko cha unguvulu wa mu malilu, chisemuko cha A-Roma te chikwete ulemu ukehe. Hachino, Paulu yakolweza A-Fwilipu hanga ‘kwenda cho chikapwe ngwe chinalite ni sango lipema lia Kristu.’ (Fwili. 1:27) Musono, akwa-Kristu akuwayisa kakuhana chilweza chipema ha kulihulikila ha fweto yo ya mwono wa mutolo mu malilu.

16. Chipwe ngwe tukwete kutalatala cha kuya mu malilu hanji kutwama hano hashi, kulita ni A-Fwilipu 4:6, 7, yika twatamba kulinga?

¹⁶ Chipwe ngwe tukwete kutalatala cha kuya mu malilu hanji kutwama mu paraisu hano hashi, tulieswe twatamba kununga ni kulihulikila ha fweto yetu. Chipwe ngwe mutupalika mu yuma yeswayo, kutwatambile wika kunyonga ha yuma ya kunyima, nawa kutwatambile kwecha nichimwe chitukwike kuwayila Yehova. (Fwili. 3:16) Kota twakushimbwila kumanunuka cha yilakenyo ya Yehova ha miaka yinji, hanji twashinakajiwa nawa mujimba hiwazeya. Hanji twakupalika mu yihungumiona ni mu yipikalo ha miaka yinji. Chipwe chocho, ‘kanda tulipikala ha chuma nichimwe.’ Alioze, ha yuma yeswe tulembenu ni kuliumba kuli Zambi, iye matwaha sambukila yize yahiana kunyonga chetu.—Tanga A-Fwilipu 4:6, 7.

17. Yika mutushimutwina ha mutwe uze muusulaho?

¹⁷ Ngwe mukwa-kuzomboka yoze wa kusa tachi ahete ndo kusongo, ni yetu tunungenu ni kulihulikila ha fweto yetu hanga tumanunune kuzomboka chetu cha mwono. Yehova kanatulakenya yuma yinji yipema kulutwe lia matangwa. Hachino, tunungenu ni kusa tachi ha kulinga yize mutuhasa kulita ni uhashi wetu. Yika twatamba kulinga mba tununge ni kuzomboka mu jila yalita nawa mu mutapu walita? Mutwe uze musulaho, muutukwasa kunyingika yize twatamba kusa kulutwe ku mwono wetu ni chize mutuhasa kusa “shindakenyo ha yuma yahiana” ulemu.—Fwili. 1:9, 10.