UFULIELO wakutwaha tachi jinji. Chakutalilaho, chipwe ngwe Satana kanazange kupihisa usepa wetu ni Yehova, nihindu ufulielo wakutukwasa hanga tujime “mivi yeswe ya kuyila ni kahia ka mwe chingulungulu.” (Efwe. 6:16) Nyi tuli ni ufulielo, mutuhasa kukumba yipikalo yize yakusoloka ngwe yikalu chinji. Yesu kalwezele tumbaji twenyi ngwenyi: “Nyi kachi munupwa ni ufulielo ngwe lunona wa musetate, munukamba ku mulundu uno ngwenu, Tutuluka kuno, uye kuze; newo kumuukatutuluka.” (Mateu 17:20.) Amu ufulielo uli ni tachi ja kukolesa usepa wetu ni Yehova, tulihulenu ngwetu: Ufulielo yika? Kuchi manyonga waze ali mu mbunge yetu mahasa kukwata ha ufulielo wetu? Kuchi mutuhasa kukolesa ufulielo wetu? Nawa iya yoze twatamba kufuliela?—Roma 4:3.

Ufulielo unalumbunuka yuma yinji, hi wika ko kutayiza yize Mbimbiliya yakwamba. Mumu ‘Andemoniu no [kakufuliela ngwo Zambi kwali] nikuchikima.’ (Tia. 2:19) Mba ufulielo yika unalumbunuka?

Mbimbiliya yakulumbununa ufulielo mu majila aali. Jila yitangu yinasolola ngwo, “ufulielo che kulisela chinyingi cha yuma yize anayitalatala.” (Hepre. 11:1a) Nyi wapwa ni ufulielo, mutayiza ngwo yilakenyo yeswe ya Yehova yili yamwenemwene nawa muyikamanunuka pundu. Chakutalilaho, Yehova kalwezele A-Izalele ngwenyi: “Nyi munuhasa kushiha usendo wami wa mwalwa, ni usendo wami wa ufuku hanga mwalwa ni ufuku kuuchi kwiza ha ola yayo ya kufunjika, nyi chocho, ni usendo wami ni Ndawichi muutaa kushiha.” (Jere. 33:20, 21) Shina hiunevu kama woma ngwo tangwa limwe kwilu kushi kucha, nawa ngwo kuchi kupwa mwalwa ni ufuku? Nyi kuushi kuhamika ha shimbi ja chisemewa jize jakukwasa hashi hanga halijinge hakamwihi ni tangwa, shina kuuchi kuhasa kufuliela ha yilakenyo ya Sakatanga yoze wasele shimbi jacho? Kwamba pundu muhasa!—Iza. 55:10, 11; Mateu 5:18.

Jila yamuchaali yinasolola ngwo, ufulielo “che kukunuka ha yuma yize kuyishi kumoneka.” Mbimbiliya yinambe ngwo: Ufulielo uli “kukunuka” hanji kusa shindakenyo ha yuma yize kutushi kuhasa kuyimona ni meso, alioze kuyili. (Hepre. 11:1b) Mu mutapu uka? Achinyonga umwe kanuke makuhula ngwenyi: ‘Kuchi unanyingika ngwo fuji kuyili?’ Chipwe ngwe kanda uchimona fuji, yena hanji mukwasa kanuke wacho hanga anyonge ha yuma yize yakusolola ngwo fuji kuyili, ngwe kuhwima, ni chize yakunyikisa mafwo a mitondo ni yuma yikwo nawa. Muze kanuke wacho mapwa ni shindakenyo, iye matayiza ngwo fuji kuyili, chipwe ngwe keshi kuyimona. Chizechene nawa, ufulielo wakwiza ha kupwa ni shindakenyo ha yuma yize yakusolola ngwo Zambi kwali.—Roma 1:20.

Amu ufulielo wakwiza ha mukunda wa yuma yize tunanyingika, mba mutu apwe ni ufulielo, chitangu katamba kupwa ni “chinyingi cha umwenemwene.” (1 Timo. 2:4) Alioze hi yino wika ko. Postolo Paulu ngwenyi: “Mutu mafuliela mu mbunge.” (Roma 10:10) Mutu katambile wika kutayiza umwenemwene,  alioze katamba nawa kuulemesa. Chino che muchimukwasa mba apwe ni ufulielo, chekwamba, kutwama kulita ni umwenemwene. (Tia. 2:20) Mutu yoze keshi kuzanga umwenemwene, keshi kutayiza yuma yize yakusolola pundu ngwo Zambi kwali, nawa kakufupa kaliongelo hanga alinge yuma yipi. (2 Petu. 3:3, 4; Yunda. 18) Kashika, ku mashimbu a kunyima atu amwe waze amwene yikomokeso kakafulielele. (Kwa. 14:11; Yoa. 12:37) Spiritu yisandu ya Zambi, yakuhana wika ufulielo kuli atu waze akuzanga umwenemwene.—Ngala. 5:22; 2 Tesa. 2:10, 11.

Mwanangana Ndawichi kali umwe wa kuli atu waze apwile ni ufulielo ukolo. (Hepre. 11:32, 33) Chipwe chocho, mu usoko wa Ndawichi atu amwe kakapwile ni ufulielo ukolo. Chakutalilaho, ha limwe shimbu yayo Eliape kasolwele ngwo, te keshi ni ufulielo muze akumikine Ndawichi ha mukunda wa Ngoliate. (1 Samue. 17:26-28) Ufulielo keshi kusemuka nawo, chipwe kuuhinga kuli yisemi. Hachino, ufulielo wa Ndawichi wakolele mumu lia usepa wenyi ni Zambi.

Mu Samu 27, Ndawichi kanasolola yize yamukwashile mba apwe ni ufulielo ukolo. (Versu 1) Ndawichi te kakupukuna ha yuma yize apalikile ku mwono wenyi, ni chize Yehova amukwashile ha kukumba akwa-kole jenyi. (Maversu 2, 3) Te kakuzanga chinji uwayilo wa Yehova. (Versu 4) Ndawichi te kakuwayila Zambi mu tabernakulu hamwe ni tuvumbi akwo a Zambi. (Versu 6) Iye te kakufupa ukwaso kuli Yehova kupalikila mu yilemba. (Maversu 7, 8) Ndawichi kazangile hanga Zambi amulongese majila jenyi. (Versu 11) Amu te akulemesa chinji ufulielo, Ndawichi yahula ngwenyi: “Kulihi te mungupwa nyi kuchishi ufulielo?”—Versu 13; NW.

Yena muhasa kupwa ni ufulielo ngwe wa Ndawichi, nyi mwimbulula yuma yize iye atongola mu Samu 27. Amu ufulielo wakwiza ku chinyingi cha umwenemwene, nyi walilongesa chinji Liji lia Zambi ni mikanda yize yakulumbununa Mbimbiliya, mupwa ni muhuko uno wa spiritu ya Zambi. (Samu 1:2, 3) Muze unalilongesa, sako mashimbu hanga upukune. Kupukuna muchokesa usakwililo we kuli Yehova. Muze usakwililo we kuli Yehova muwoka, muchipwa chashi kupwa ni ufulielo, mba ufulielo muukutwala hanga umuwayile ha kuya ku kukunguluka ni kwambujola kutalatala che kuli akwenu. (Hepre. 10:23-25) Chikwo nawa, musolola ufulielo we muze mununga ni ‘kulemba matangwa eswe chakuhona kulitwamina.’ (Luka 18:1-8) Kashika, kulemba kuli Yehova ‘chakuhona kulitwamina,’ muchikukwasa kupwa ni shindakenyo ngwo, ‘iye kakukufunga.’ (1 Tesa. 5:17; 1 Petu. 5:7) Ufulielo wa kututwala ku yitanga, nawa yitanga yetu yakukolesa ufulielo wetu.—Tia. 2:22.

Ha ufuku shimbu te kanda achifwa, Yesu yalweza tumbaji twenyi ngwenyi: “Nwafuliela Zambi, fulielenu yami nawa.” (Yoa. 14:1) Kashika, kutwatambile wika kufuliela muli Yehova, alioze ni muli Yesu nawa. Kuchi muhasa kufuliela muli Yesu? Tutalenu majila atatu.

Jila yitangu, tayiza ukuule ngwe chawana chize Zambi hanakwehe. Postolo Paulu kambile ngwenyi: Mwono “nguli nawo mu ufulielo wa kuli mwe Mwana Zambi, yoze wanguzangile, yoze waliechele hali yami.” (Ngala. 2:20.) Nyi wafuliela muli Yesu, musolola ngwo ukuule kaufwetele mumu lia yena, we Zambi akuzachisa hanga akonekene shili ye, we wakukwaha kutalatala cha mwono wa mutolo, nawa we wakusolola ngwo Zambi kakukuzanga. (Roma 8:32, 38, 39; Efwe. 1:7) Nyi mutayiza ngwo ukuule muhasa kukukwasa, muopwa ni nyonga lialita hali yena mwene.—2 Tesa. 2:16, 17.

Jila yamuchiali, lemba kuli Yehova mashimbu eswe. Chitapo cha ukuule wa Yesu chakutukwasa kukundama kuli Zambi. Mumu lia ukuule, mutuhasa kulemba kuli Yehova ni ushindakenyo “hanga tukawane keke, ni vumbi liakutukwasa ha mwaka wa chikala.” (Hepre. 4:15, 16; 10:19-22) Kulemba chakutukwasa hanga twehuke kulinga shili.—Luka 22:40.

Jila yamuchitatu, ononokena Yesu. Postolo Yoano kasonekene ngwenyi: “Yoze mafuliela mwe Mwana, mwono wa mutolo ali nawo. Yoze keshi kwononoka kuli mwe Mwana, kechi kamona mwono, alioze utenu wa Zambi kuwatwama hali iye.” (Yoa. 3:36) Hano, Yoano kanasolola ngwo kuhona ufulielo chili kuhona kwononoka. Kashika, musolola ngwenyi unafuliela muli Yesu ha kumwononokena. Yena mwononokena Yesu ha kukaula “shimbi ya Kristu,” chekwamba yuma yeswe yize iye alongesele ni yize atumine. (Ngala. 6:2) Muhasa nawa kwononokena Yesu ha kukaula usongwelo uze iye akuhana kupalikila muli ‘ndungo wamwenemwene, wakanyama.’ (Mateu 24:45) Kwononokena Yesu, muchikukwasa hanga ukumbe yipikalo yize muyisoloka ku mwono we.—Luka 6:47, 48.

Limwe tangwa umwe lunga yakololoka kuli Yesu ngwenyi: “Ngunafuliela; kwasenu kama chize chinahono ku ufulielo wami.” (Marku 9:24) Lunga wacho kapwile ni ndambu ya ufulielo, alioze ni kulikehesa cheswe yamona ngwenyi te kanafupiwa ufulielo ukolo. Chizechene ngwe lunga wacho, tulieswe tangwa limwe mutwiza kafupiwa ufulielo ukolo. Kashika, mutuhasa kukolesa ufulielo wetu haliapwila. Ngwe chize twamona, tulieswe mutuhasa kukolesa ufulielo wetu ha kutanga ni kupukuna ha Liji lia Zambi. Kulinga chino, mutwokesa usakwililo wetu kuli Yehova. Chikwo nawa, ufulielo wetu muukola nyi mutuwayila Yehova hamwe ni mandumbu jetu, mutwambujola kutalatala chetu kuli akwetu ni kulemba chakuhona kulitwamina. Hachino, nyi twakolesa ufulielo wetu, mutukatambula fweto lipema chinji. Liji lia Zambi linambe ngwo: “Akwetu a zango, jikijilenu ha ufulielo wenu usandu wahiana . . . lifungenu mu zango lia Zambi.”—Yunda. 20, 21.