1. Yika yetu eswe twakuzanga hali asoko jetu?

UMWE pangi yoze avuluka ngwo Mujinga * yamba ngwenyi: “Kukatuka ha tangwa lize nanyingikine umwenemwene, nazangile hanga asoko jami eswe akapwe hamwe ni yami mu Paraisu. Nazangile chinji mukwetu-lunga Koji ni mwanetu hanga no awayile Yehova.” Kutala yena uli ni asoko waze kanyingikine Yehova chipwe kumuzanga? Nyi chenacho, kota wakulivwa ngwe chize alivwile pangi Mujinga hakutwala kuli asoko jenyi.

2. Yihula yika mutushimutwina ha mutwe uno?

² Kutwatambile kushinjila asoko jetu hanga atayize umwenemwene. Alioze mutuhasa kwakolweza hanga alumune nyonga lio ni kutayiza umwenemwene wa Mbimbiliya. (2 Timo. 3:14, 15) Mumu liaka twatamba kwambujola kuli asoko jetu? Mumu liaka twatamba kulisa mu chihela cho? Yika mutuhasa kulinga mba tukwase asoko jetu azange Yehova ngwe chize twakumuzanga? Kuchi mandumbu eswe mu chikungulwila mahasa kukwasa?

3. Kulita ni 2 Petulu 3:9, mumu liaka twatamba kwambujola kuli asoko jetu?

³ Songo lia yuma ya mwakono linakundama. Kashika “waze eswe Zambi hanafunjikila ku mwono wa mutolo” e wika makalamwina. (Yili. 13:48) Twakusa mashimbu ni tachi jetu hanga twambujole kuli atu waze kutwanyingikine. Kashika twakuzanga kwambujola kuli asoko jetu hanga no awayile Yehova. Tata yetu wa zango Yehova, “kazangile niumwe kutoka, alioze eswe alikonyeke.”—Tanga 2 Petulu 3:9.

4. Upi uka twakulinga muze tunambujola kuli asoko jetu?

 ⁴ Tunyingikenu ngwetu, kwatwama mutapu walita wa kwambulwilamo sango lipema ni uze kuwalitele. Chakutalilaho, muze tunambujola kuli mutu yoze kutwanyingikine twakusolola vumbi. Alioze muze mutwambujola kuli asoko jetu, hanji mutuhanjika no chakuhona kulihumikiza.

5. Yika twatamba kwiwuluka shimbu kanda twambujola kuli asoko jetu?

⁵ Anji akuli yetu, muze twakunyonga ha chize twambulwile sango lipema kuli asoko jetu ha chisuho chitangu, twakunenganyana mumu lia chize twachilingile. Postolo Paulu kakolwezele akwa-Kristu ngwenyi: “Liji lienu likapwe matangwa eswe ni vumbi, lia kulungiwa ni mungwa, hanga nukanyingike chize chanutamba kukumbulula kuli mutu ni mutu.” (Kolo. 4:5, 6) Muze tunambujola kuli asoko jetu, twatamba kwiwuluka chiyulo chino, neka shimbu twakwase, mutuhasa kwakinda kupanjika sango lipema.

6-7. Mumu liaka waze alimbata ni yoze keshi kuwayila Yehova atamba kusolola keke? Hana chilweza.

⁶ Solola keke. Kusolola keke chinalumbunuka kulisa mu chihela cha akwetu. Pangi Mujinga yoze hi twavuluka, yamba ngwenyi: “Ku uputukilo, te nakuzanga wika kuhanjika ni mukwetu-lunga hakutwala ku Mbimbiliya. Te kuchishi kuhanjika nenyi nawa yuma yikwo.” Alioze mukwo-lunga Koji, te kanyingikine yuma yinji hakutwala ku Mbimbiliya. Nawa yuma yize te akumulweza kuli mukwo-pwo te kuyishi kumulumbunuka. Hachino, Koji yaputuka kunyonga ngwo mukwo-pwo te kakulihulumba wika ha yuma ya uwayilo wenyi. Chocho, Koji yevwa woma ngwo mukwo-pwo te kanamupiangula mu umwe uwayilo wa mahuza.

⁷ Mujinga yalitayiza mwene ngwenyi, ha  yisuho yimwe te kakupalikisa mashimbu anji ni mandumbu amu chikungulwila. Mashimbu jacho te kakwapalikishila ku kukunguluka, kwambujola ni kuya ku yiwanyino hamwe ni mandumbu. Mujinga yamba ngwenyi: “Ha mashimbu amwe Koji te kakulivwa ukawenyi, mumu muze te akuheta ku zuwo te keshi kuwanako niumwe.” Kwamba pundu, Koji te kakwivwa usona wakupwa hamwe ni mukwo-pwo ni mwanenyi. Iye te keshi kunyingika masepa aha a mukwo-pwo, nawa chapwile ni kusoloka ngwe Mujinga te kakulemesa chinji masepa jenyi amu ufulielo kuhiana mukwo-lunga. Ha mukunda wa chino, Koji yazanga kulilakula ni mukwo-pwo. Shina wamona ulemu wa chize Mujinga te atamba kulisa mu chihela cha mukwo-lunga?

8. Kulita ni 1 Petulu 3:1, 2, yika kanji-kanji yakukwata ku mbunge lia asoko jetu?

⁸ Pwako chilweza chipema. Kanji-kanji yize yakukwata ku mbunge lia asoko jetu, yili yize twakulinga hi wika ko yize twakuhanjika. (Tanga 1 Petulu 3:1, 2.) Yino ye Mujinga amwene ha kupalika cha mashimbu. Iye yamba ngwenyi: “Ami nanyingikine ngwami, Koji te kakutuzanga nawa kakazangile hanga tulilakule. Alioze muze ahanjikile hakutwala ku kulilakula, yingunyingika ngwami natamba kukaula yiyulo ya Yehova hakutwala ku ulo. Shimbu ngununge ni kumwambulwila wika sango lipema, te natamba kusolola yitanga yipema.” Chocho, Mujinga yalitwamina kuhanjika chinji yuma ya Mbimbiliya ni mukwo-lunga, yaputuka kuhanjika nenyi yuma ya ku mwono wo. Kusulaho, Koji yamona yitanga yipema ya mukwo-pwo nawa yamona ngwo mwano te kanalumuna yitanga yenyi. (Yishi. 31:18, 27, 28) Muze amwene chize shimbi ja Mbimbiliya jinakwase usoko wenyi, Koji yaputuka kulilongesa Liji lia Zambi.—1 Kori. 7:12-14, 16.

9. Mumu liaka kutwatambile kuhonga kwambujola kuli asoko jetu?

 ⁹ Kanda uhonga kukwasa asoko je. Yehova hanatwehe chilweza chipema. Mbimbiliya yinambe ngwo: Iye ‘nihindu’ kakuhana atu uhashi wa kutayiza sango lipema ni kutalatala cha mwono wa mutolo. (Jere. 44:4) Nawa postolo Paulo kalwezele Timoteu hanga anyongonone ha kukwasa akwo. Mumu liaka? Mumu ha kulinga chino, iye te malilamwina hamwe ni waze mamwivwa. (1 Timo. 4:16) Twakuzanga asoko jetu, kashika tunazange hanga anyingike umwenemwene wa Mbimbiliya. Tutalenu yize yalingiwile kuli pangi Mujinga. Ha kupalika cha mashimbu, yitanga ni maliji jenyi yakwashile chinji usoko wenyi. Haliapwila kanawahilila mumu kanawayila Yehova hamwe ni mukwo-lunga. Eswe aali kali mapionelu nawa mukwo-lunga kali mukulwana mu chikungulwila.

10. Mumu liaka twatamba kulihumikiza?

¹⁰ Pwako ni kulihumikiza. Muze twakulilongesa umwenemwene, twakwalumuna mwono ni yize twafuliela. Chino muchihasa kupinjisa asoko jetu. Chakutalilaho, yuma yitangu twalumuna yize ayo akumona, yili kuhona kulichinga no ha yiwanyino ya uwayilo wa mahuza ngwe Natale ni yuma ya mafwefwe. Chino muchihasa kuvwisa uli amwe asoko. (Mateu 10:35, 36) Alioze kanda twecha kwakwasa. Nyi twecha kwakwasa hanga anyingike yize twafuliela, acho tunaapatwila ngwo katelele kuzuka mwono wa mutolo. Yehova kakatwehele chiteli cha kupatwila akwetu, alioze kachihanyine wika kuli Yesu. (Yoa. 5:22) Nyi twalihumikiza, hakupalika cha mashimbu asoko jetu mahasa kuzanga kupanjika sango lipema.—Tala mushete, “ Solola Site Yetu Kuli Asoko Je.”

11-13. Yika walilongesa ha yize pangi Alice alingile kuli yisemi jenyi?

¹¹ Pwako chimbovu, alioze kanda wecha asoko je hanga akufunyise kunyima. (Yishi. 15:2) Tutalenu chilweza cha Alice. Yisemi jenyi te keshi kufuliela muli Zambi nawa te kakulihana chinji ku yuma ya mafwefwe. Muze Alice ayile ni kutwama kweka, mba yalilongesa umwenemwene. Iye yanyingika ngwenyi, te muchilita kulweza yisemi jenyi yuma yipema yize apwile ni kulilongesa. Alice yamba ngwenyi: “Nyi mushimbula kulweza asoko ufulielo we waha, muze makachivwa muchihasa kwapinjisa chinji.” Iye te kakusonekena yisemi jenyi mikanda. Ha mikanda yacho, te kakusonekaho yikuma yize yisemi jenyi mazanga, ngwe zango. Mba hi maahula yize akunyonga ha yikuma yacho kulita ni Mbimbiliya. (1 Kori. 13:1-13) Alice te kakusakwilila yisemi jenyi ha yeswe yize te akumulingila ni kwatumina yuma. Muze te akuya ni kumeneka yisemi, iye te kakusa tachi hanga akwase naye ku milimo ya ku zuwo. Ku uputukilo, yisemi jenyi kakawahililile muze Alice aalwezele ngwo, kanalilongesa Mbimbiliya ni Yela ja Yehova.

¹² Muze Alice te akutwama amwe matangwa ni yisemi jenyi, iye te kakununga ni katalilo wenyi wa kutanga Mbimbiliya hita tangwa. Alice yamba ngwenyi: “Chino chakwashile mama amone ulemu wa Mbimbiliya ku mwono wami.” Ha mashimbu jacho, tato ya Alice yazanga kulilongesa yimwe hakutwala ku Mbimbiliya. Mumu kazangile kunyingika yize yalumwine kunyonga cha mwanenyi ni kuwana tupalia mu Mbimbiliya. Alice yamba ngwenyi: “Yingumwaha Mbimbiliya, nawa yingusonekaho amwe maliji azango.” Mba yika yalingiwileko? Shimbu awane tupalia, tato ya Alice yazanga chinji yuma yize te akulilongesa mu Mbimbiliya.

¹³ Twatamba kulalaminya ku yiyulo yetu, alioze twatamba nawa kusolola umbovu chipwe ngwe matuhungumiona. (1 Kori. 4:12b) Chakutalilaho, Alice kanyongonwene mu yihungumiona ya naye. Iye yamba ngwenyi: “Muze angupapachishile, mama yangwamba ngwo  ‘nguli mwana mupi.’” Mba yika Alice alingile? Iye yamba ngwenyi: “Shimbu ngwehuke chikuma chacho, te nakumulumbunwina ni vumbi lieswe ngwo, ngunazange kupwa Chela cha Yehova nawa kuchazangile kwalumuna nyonga liami. Chikwo nawa, yingumulweza ngwami nakumuzanga chinji. Mwaali wetu yitulila. Kusulaho yingumulingila kulia chize akuzanga. Kukatuka haze, mama yaputuka kutayiza ngwo Mbimbiliya yinalumuna utu wami.”

14. Mumu liaka kutwatambile kwecha asoko jetu hanga alumune chiyulo chetu cha kuwayila Yehova?

¹⁴ Mukuhasa kupalika mashimbu anji mba asoko jetu anyingike ngwo, kuwayila Yehova chili ni ulemu ku mwono wetu. Chakutalilaho, muze Alice azangile kupwa pionelu chakuhona kulinga yize yisemi azangile hali iye, naye yaputuka nawa kulila. Chipwe chocho, Alice yanunga ni chiyulo chenyi. Iye yamba ngwenyi: “Nyi wecha asoko je hanga alumune chiyulo che ha chimwe chuma, ayo mafupa hanga uchalumune nawa ha yuma yikwo. Alioze, nyi mulalaminya ku chiyulo che, aku nawa musolola umbovu kuli asoko je, amwe a kuli ayo mahasa kukupanjika.” Yino ye yalingiwile kuli Alice. Haliapwila yisemi jenyi kali mapionelu, tato kali nawa mukulwana mu chikungulwila.

15. Kulita ni Mateu 5:14-16 ni 1 Petulu 2:12, kuchi ‘yitanga yipema’ ya mandumbu jetu muyihasa kukwasa asoko jetu?

¹⁵ Yehova kakuzachisa ‘yitanga yipema’ ya mandumbu jetu mu chikungulwila hanga akoke atu kuli iye. (Tanga Mateu 5:14-16; 1 Petulu 2:12.) Nyi yoze walimbata nenyi hi chela cha Yehova ko, shina hananyingika kama  amwe mandumbu mu chikungulwila chenu? Pangi Mujinga yoze hi twavuluka, te kakusanyika mandumbu ni mapangi ku zuwo lienyi hanga mukwo-lunga alinyingike no. Koji kanewuluka chize umwe ndumbu amukwashile kunyingika kanawa Yela ja Yehova. Yamba ngwenyi: “Tangwa limwe ndumbu wacho yeta ku mulimo wenyi, yeza ku zuwo liami hanga tutale konda. Hachino, yingumona ngwami, ‘Kumana neye kali mutu ngwe yami!’”

16. Mumu liaka twatamba kusanyika asoko jetu eze ku kukunguluka?

¹⁶ Mutapu upema uze mutuhasa kukwashilamo asoko jetu, uli wa kwasanyika ku kukunguluka chetu. (1 Kori. 14:24, 25) Kukunguluka chitangu chize Koji ayile chapwile Chiwanyino cha Kwiwuluka Kufwa cha Yesu. Iye kayileko hanyima lia mulimo, nawa kukunguluka chapwile cha shimbu likehe. Iye yamba ngwenyi: “Yami chakevwile nichimwe ha pande jacho, alioze ngunewuluka atu waze apwileho. Ayo kahanjikile ni yami, yangutambwisa ni kungwaha moyo wa mu moko. Hachino, yingunyingika ngwami, o kali atu apema.” Koji nawa yanyingika ngwo mu chikungulwila mwapwile alunga ni pwo waze te akuzanga chinji Mujinga. Mumu ayo te kakumukwasa kukwata mwana ha kukunguluka ni muze te akuya mu munda. Hachino, muze azangile kunyingika kanawa ufulielo wa mukwo-pwo, Koji yeta ndumbu wacho hanga amulongese Mbimbiliya.

17. Ha yika kutwatambile kulisuma mulonga, alioze mumu liaka kutwatambile kwecha kukwasa asoko jetu?

¹⁷ Twakuzanga kuwayila Yehova hamwe ni asoko jetu eswe. Alioze, chipwe ngwe twakusa tachi hanga twakwase, hi eswe ko akutayiza umwenemwene. Nyi chenacho, kanda ulisuma mulonga, mumu ene e atamba kukwata chiyulo. Kashika, yetu kutwatambile kushinjila niumwe hanga atayize ufulielo wetu. Hakupalika cha mashimbu, hanji asoko jetu mamona chize tunawahilila ha kuwayila Yehova, nawa chino muchaatwala hanga alumune nyonga lio. Kashika alembeleko. Hanjika no ni umbovu weswe. Kanda wecha kwakwasa! (Yili. 20:20) Pwako ni shindakenyo ngwo Yehova mawahisa tachi je. Nawa nyi asoko je mazanga kukupanjika, o makalilamwina!