SHINA kuli chimwe chiteli chize wazangile kupwa nacho mu chikungulwila, alioze kuwahashile? Hanji ndumbu mukwo kali ni chiteli chacho. Chino muchihasa kupwa umwe mulimo, hanji chiteli chize wapwile nacho kunyima. Alioze, wechele chiteli chacho mumu lia ushinakaji, misongo, kuhona cha mbongo hanji yimwe yiteli mu usoko. Chikwo nawa, hanji wechele chiteli chize wapwile nacho ha miaka yinji, mumu lia yimwe yize alumwine mu ululikiso wetu. Chipwe ha chikuma cheswacho, yena hanji muhasa kulivwa ngwe kuwahashile kulinga yeswe yize te unazange kulinga mu mulimo wa Zambi. Hachino, muchilita ha mashimbu amwe kunenganyana. Chipwe chocho, kuchi muhasa kwehuka manyonga api ngwe, kulivwa ukawe, ufwatulo hanji toto? Kuchi muhasa kununga ni kuwahilila?

Mutuhasa kulilongesa chize mutufunga uwahililo wetu, ha chilweza cha Yoano Chipapachisa. Yoano kapwile ni yiteli yalipwila mu mulimo wa Yehova. Alioze, mwono wenyi yiwalumuka chakuhona kulinga yeswe yize azangile. Iye kakanyingikine ngwenyi, te mapalikisa mashimbu anji mu zuwo lia ususu, kuhiana waze alingile mu mulimo wa kwambujola. Chipwe chocho, Yoano kanungine ni kuwahilila ku mwono wenyi weswe. Mba yika yamukwashile? Kuchi mutuhasa kununga ni kuwahilila chipwe ngwe mutupihilila hamukunda wa yimwe?

Yoano kaputukile mulimo wenyi wa kwambujola hakutwala kuli Mesaya, ha kakweji wa kusokoloka cha mitondo ha mwaka 29 M.J. Iye yamba ngwenyi: “Likonyekenu; mumu Wanangana wa malilu hiunakundama.” (Mateu 3:2; Luka 1:12-17) Atu anji yatayiza sango jenyi. Chocho, atu aku yihela yeka ni yeka yenda tando jinji hanga apanjike sango ja Yoano. Nawa anji yalikonyeka ku shili yo ni kwapapachisa. Nawa ni hamu lieswe, Yoano yatoweza tusongo a uwayilo wa A-Yunda waze te akuliamba ngwo akwa-ululi ni kwalweza ngwo nyi kalumukine te Zambi maapatwila. (Mateu 3:5-12) Chuma chilemu mu mulimo wa Yoano chalingiwile ha kakweji wa Outubro ha mwaka 29 M.J, muze apapachishile Yesu. Kukatuka haze, Yoano yaputuka kulweza atu hanga apwe tumbaji twa Yesu, Mesaya yoze alakenyene.—Yoa. 1:32-37.

Pundu lume mulimo wa Yoano wapwile ulemu, chocho Yesu yamba ngwenyi: “Hakachi ka  waze akusemuka kuli mapwo, kuhakatukile niumwe munene wahiana Yoano Chipapachisa.” (Mateu 11:11) Mutuhasa kupwa ni shindakenyo ngwetu, Yoano kanakawahilila ni yiwape yize azukile. Ngwe Yoano, mandumbu anji musono kakuzuka yiwape yinji. Chilweza chimwe chili cha ndumbu Terry. Iye ni mukwo-pwo Sandra, kakalakalile mulimo wa shimbu lieswe ha miaka kuhiana 50. Ndumbu Terry yamba ngwenyi: “Napwile ni yiteli yinji yipema. Nakalakalile ngwe pionelu wa shimbu lieswe, pionelu walipwila, Mbetelita, kalayi wa mbonge, kalayi wa mambonge, haliapwila ngunakalakala nawa ngwe pionelu walipwila.” Twakuwahilila chinji muze twakutambula yiteli yimwe mu ululikiso wa Yehova. Alioze, ngwe chize mutulilongesa ha chilweza cha Yoano, tunafupiwa tachi jinji mba tununge ni kuwahilila nyi yimwe muyalumuka ku mwono wetu.

Yoano Chipapachisa kanungine ni kuwahilila, mumu kapwile ni kusakwilila ha chiteli chize amuhele. Tutalenu chilweza chimwe. Muze Yesu te hamupapachisa, tumbaji twa Yoano yaputuka kutepuluka, alioze a Yesu yaputuka kwoka. Hachino, tumbaji twa Yoano yaputuka kulihulumba ni kumulweza ngwo: ‘Yoze washindakenyene; kuma, neye kanapapachisa atu. Nawa eswe kanayaya kuli iye.’ (Yoa. 3:26) Yoano yaakumbulula ngwenyi: ‘Yoze uli ni ndungi, iye mwe sandungi: alioze kasendo ka sandungi, yoze wakumana ni kumwivwa, kakuwahilila chikolo mumu ha liji lia sandungi. Kashika uwahililo wami unazala too.’ (Yoa. 3:29) Yoano kakalitesele Yesu, chipwe kunyonga ngwe yiteli yenyi yatepulukile mumu lia mulimo ulemu wa Yesu. Shimbu anyonge chocho, iye yanunga ni kuwahilila mumu te kakuzanga chiteli chenyi cha kupwa “kasendo ka sandungi.”

Kupwa ni nyonga lialita che chakwashile Yoano hanga anunge ni kuwahilila, chipwe ngwe chiteli chenyi chapwile chikalu. Chakutalilaho, Yoano kapwile Ka-Nazireu chize muze asemukine, kashika te keshi kunwa walwa. (Luka 1:15) Muze Yesu te anahanjika hakutwala ku mwono washi uze Yoano apwile nawo, yamba ngwenyi: “Yoano wejile ni kulitwamina kulia chipwe kunwa.” Alioze, Yesu ni tumbaji twenyi kakaakanjishile nichimwe, o kapwile ni mwono ngwe wa atu eswe. (Mateu 11:18, 19) Chikwo nawa, Yoano te keshi kulinga yikomokeso. Chipwe chocho, iye kanyingikine ngwenyi, tumbaji twenyi waze akawile Yesu hamwe ni tumbaji akwo kaehele ndundo ja kulinga yikomokeso. (Mateu 10:1; Yoa. 10:41) Shimbu Yoano eche yuma yacho hanga yimukwike, ni zango lieswe iye yanunga ni kulinga mulimo uze Yehova amuhele.

Ni yetu nawa, nyi mutuzanga yize tunalingi haliapwila mu mulimo wa Yehova, muchitukwasa hanga tununge ni kuwahilila. Terry, yoze hi twatongola, yamba ngwenyi: “Napwile ni kulihulikila ha hita chiteli chize te akungwaha.” Iye nawa yamba hakutwala ku mwono wenyi, muze apwile mu mulimo wa shimbu lieswe ngwenyi: “Nyi natala kunyima chishi kuliseha, nakwiwuluka wika yuma yipema.”

Chuma chize muchihasa kwokesa uwahililo wetu, chili kupukuna ha yuma yize ya kulemesa chiteli chize tukwete mu mulimo wa Zambi. Yuma yacho, chimwe chili kupwa “akwa milimo-ni-akwo a Zambi.” (1 Kori. 3:9) Ngwe chizechene mutuhasa kufunga kazeya wa ndando yinji hanga ahone kupihia, nyi mutununga ni kupukuna ha ulemu wa kukalakala ni Yehova, uwahililo wetu kuuchi kuhwa. Chino muchitukwasa hanga twehuke kutesa mulimo wetu ni wa akwetu. Muchitukwasa nawa hanga tuchine kunyonga ngwetu, mulimo uze Yehova atwaha kuushi ni ulemu, alioze wa akwetu we uli ni ulemu.—Ngala. 6:4.

Yoano kota kanyingikine ngwenyi mulimo wenyi te kuuchi kumbata mashimbu anji, alioze kakanyingikine ngwenyi, te muuhwa susumuku. (Yoa. 3:30) Ha mwaka 30 M.J., muze te hikwapalika tukweji asambano hanyima lia kupapachisa Yesu, Yoano yamusa mu zuwo lia ususu kuli Mwanangana Heronde. Chipwe chocho, Yoano kasele tachi hanga anunge ni kwambujola. (Marku 6:17-20) Yika yamukwashile mba anunge ni kuwahilila, chipwe ngwe yuma yalumukine ku mwono wenyi? Iye kalihulikilile ku yuma ya ku spiritu.

Muze Yoano te ali mu zuwo lia ususu, te kakutambula lusango wa mulimo wa Yesu. (Mateu 11:2; Luka 7:18) Yoano kapwile ni shindakenyo ngwenyi, Yesu mwe te Mesaya, alioze kota kalihulile chize te Yesu mamanununa uprofweto weswe uze wahanjikile hali Mesaya. Amu te Mesaya mapwa Mwanangana,  shina iye te maputuka kuyula ha shimbu liacho? Shina Yesu te matuhwisa Yoano mu zuwo lia ususu? Amu Yoano azangile kunyingika kanawa yize te Yesu malinga, chocho yatuma tumbaji twenyi hanga amuhule ngwo: “Shina yenu nuli yoze meza nyi? Shina mututalatala mukwo?” (Luka 7:19) Muze o afunyine, kota Yoano kapanjikile kanawa muze te anamulumbunwina mu yimako-yimako yikomokeso yize Yesu alingile, ni lusango yoze Yesu atumine kuli Yoano ngwenyi: “Tupuputa kanalaula meso, yilema kanende, akwa mbumba kanapeme, afwa-matwi kanevu, afu kanahinduka, kuli yiswale kanambujola sango lipema.”—Luka 7:20-22.

Kwamba pundu, lusango yono kota katakamishine chinji Yoano. Iye yapwa nawa ni shindakenyo ngwenyi, Yesu te kanamanununa uprofweto uze unatale hali Mesaya. Chipwe ngwe mulimo wa Yesu te kuchi kuchiza Yoano mu zuwo lia ususu, nihindu Yoano kanyingikine ngwenyi mulimo uze alingile newo wapwile ulemu. Chipwe ngwe te kanapalika mu kapinda, nihindu kapwile ni kuwahilila.

Chizechene ngwe Yoano, nyi mutulihulikila ku yuma ya ku spiritu, mutununga ni kunyongonona ni uwahililo hamwe ni uhumikizo. (Kolo. 1:9-11) Mba tunyongonone, twatamba kutanga Mbimbiliya ni kupukuna ha yize tunatange. Chino muchitukwasa tunyingike ngwetu, tachi jize twakusa mu mulimo wa Zambi hi jamokomoko ko. (1 Kori. 15:58) Sandra yamba ngwenyi: “Kutanga kapitulu umuwika wa Mbimbiliya hita tangwa, chakungukwasa kukundama kuli Yehova. Chino chakungukwasa ngulihulikile hali iye shimbu ngulihulikile hali yami mwene.” Chuma chikwo chize muchihasa kutukwasa chili kulihulikila ha mulimo wa kwambujola uze mandumbu jetu analingi hashi heswe. Chino muchitukwasa tuhone kulihulikila hali yetwene, alioze ha yize Yehova analingi. Sandra yamba nawa ngwenyi: “Programa ya hita kakweji ya JW Broadcasting^® yakutukundamisa ku ululikiso wa Yehova, nawa yakutukwasa tununge ni kuwahilila mu mulimo wetu.”

Yoano kalingile mulimo wenyi ni “spiritu ni tachi ja Eliya.” Chizechene ngwe Eliya, Yoano neye kapwile “mutu wa kulifwa ni yetu.” (Luka 1:17; Tia. 5:17) Nyi mutwimbulula chilweza cha Yoano cha kuwahilila ni kulihulikila ku yuma ya ku spiritu, ni yetu mutuhasa kununga ni kuwahilila mu mulimo wetu wa Wanangana, chipwe ngwe mukulingiwa chuma cheswacho.