1. Yika Yehova akuhana kuli hita kavumbi kenyi washishika?

YEHOVA ha zango lienyi kakuhana mulimo kuli hita ndumbu mu chikungulwila chenyi. Chipwe ngwe tukwete milimo yalisa, nihindu yetweswe tuli alemu nawa twakufupiwa ukwaso wa umwe ni mukwo. Postolo Paulu kanatukwase kunyingika ulemu wa chikuma chino. Mu mutapu uka?

2. Kulita ni A-Efwesu 4:16, mumu liaka twatamba kukalakala hamuwika ni kulilemesa umwe ni mukwo?

² Ha chisoneko hanakatuka mutwe uno, Paulu yamba ngwenyi, niumwe kavumbi ka Yehova katambile kwamba kuli mukwo ngwe: “Chakuzangile.” (1 Kori. 12:21) Mba mu chikungulwila mupwe sambukila, twatamba kulilemesa umwe ni mukwo ni kukalakala hamuwika. (Tanga A-Efwesu 4:16.) Muze twakukalakala hamuwika, mandumbu eswe kakulizanga nawa chikungulwila chakukola.

3. Yika mutulilongesa ha mutwe uno?

³ Kuchi mutuhasa kulemesa mandumbu jetu mu chikungulwila? Ha mutwe uno, mutumona chize makulwana a mu chikungulwila mahasa kulemesa makulwana-ni-akwo. Mba mutumona nawa, chize mutuhasa kusolola ngwetu, twakulemesa mandumbu a malunga ni a mapwo waze twamishi. Hi kusongo, mutulilongesa chize mutuhasa kulemesa mandumbu waze keshi kuhanjika kanawa limi lietu.

4. Chiyulo chika chili ha A-Roma 12:10 chize makulwana atamba kukaula?

⁴ Makulwana eswe mu chikungulwila kakwasakula kupalikila mu spiritu yisandu ya Yehova. Alioze, hita umwe wa kuli ayo kakwete utotombo walisa. (1 Kori. 12:17, 18) Amwe, kaatongola ngwe makulwana haliapwila, kashika kanda achijama chinji ha mulimo wacho. Akwo, keshi ni uhashi unji mumu lia ushinakaji hanji misongo. Chipwe chocho, niumwe mukulwana katambile kulengulula mukulwana-ni-mukwo mu chikungulwila ni kumumona ngwe keshi ulemu. Shimbu anyonge chocho, hita mukulwana mu chikungulwila katamba kukaula chiyulo cha Paulu chili ha A-Roma 12:10.—Tanga.

5. Kuchi makulwana akusolola ngwo, kakulivumbika umwe ni mukwo, nawa mumu liaka atamba kuchilinga?

⁵ Kuchi umwe mukulwana mu chikungulwila mahasa kusolola ngwo kakulemesa makulwana-ni-akwo mu chizavu? Ha kwapanjika kanawa. Chino mahasa kuchilinga kanji-kanji muze ayo analikungulula mu chizavu hanga akwate yiyulo yilemu. Mumu liaka? Tala yize Kaposhi wa Kutalila 1 Outubro wa 1988 anambe: “Makulwana katamba kunyingika ngwo, Kristu kupalikila mu spiritu yisandu, mahasa kusongwela mukulwana mweswawo mu chizavu hanga ahane nyonga lia Mbimbiliya lize mulikwasa kupatula umwe mulonga hanji kukwata chiyulo chilemu. (Yili. 15:6-15) Spiritu yisandu yakukwasa makulwana eswe mu chikungulwila, kashika mukulwana niumwe katambile kwamba ngwo, iye wika mwe uli ni spiritu yisandu.”

6. Kuchi makulwana mahasa kukalakala hamuwika, nawa kuchi chino muchihasa kuyukisa chikungulwila?

⁶ Mukulwana yoze wakulemesa makulwana-ni-akwo, keshi kunyonga ngwenyi, iye mwe watamba kulianga kuhanjika muze anakunguluka ni akwo. Iye keshi kuhanjika chinji kuhiana akwo chipwe kunyonga ngwe, yize iye akwamba ye yalita. Alioze, kakusolola nyonga lienyi ni kulikehesa cheswe. Muze akwo anahanjika, iye kakwapanjika kanawa. Chahiana ulemu, iye kakuzanga kulweza akwo yiyulo ya mu Mbimbiliya ni kukaula usongwelo wa ‘ndungo wamwenemwene wa kanyama.’  (Mateu 24:45-47) Makulwana nyi malisolwela zango ni vumbi muze anakunguluka, spiritu yisandu muyipwa mukachiko nawa muyaakwasa kukwata yiyulo yize muyitakamisa chikungulwila.—Tia. 3:17, 18.

7. Yika Yesu te akunyonga hali twamishi?

⁷ Mu chikungulwila muli asoko ni mandumbu anji waze alimbata. Alioze, muli nawa mandumbu a malunga ni a mapwo waze kanda achimbata. Kuchi twatamba kumona mandumbu waze kanda achimbata? Tutalenu yize Yesu apwile ni kunyonga hakutwala ku utwamishi. Muze apwile hano hashi, Yesu kakambachile. Iye kanungine twamishi, chocho yalihulikila ha mulimo wenyi. Yesu kakambile ngwenyi, akwa-Kristu katamba kumbata hanji kununga twamishi. Alioze yamba ngwenyi, amwe akwa-Kristu te kechi kuzanga kumbata. (Mateu 19:11, 12; tala nota ya estudo ha Mateu 19:12.) Yesu te kakulemesa chinji twamishi. Iye kakamwene twamishi ngwe keshi ulemu hanji ngwetu, kanahono chuma chilemu ku mwono wo.

8. Kulita ni 1 A-Korindu 7:7-9, yika Paulu anakolweza akwa-Kristu hanga ahengwole?

⁸ Ngwe Yesu, postolo Paulu neye kanungine twamishi mu mulimo wenyi wa kwambujola. Paulu kakambile nilimwe tangwa ngwenyi, chili chipi mukwa-Kristu kumbata. Chipwe chocho, Paulu kakolwezele mandumbu hanga ene ahengwole nyi muchilita kununga ni kuwayila Yehova ngwe twamishi. (Tanga 1 A-Korindu 7:7-9.) Chochene, Paulu kakanyongene ngwenyi akwa-Kristu waze twamishi keshi ni ulemu. Kashika asakwile Timoteu, umwe mukweze twamishi hanga alinge milimo yinene-yinene mu mulimo wa Yehova. * (Fwili. 2:19-22) Kwamba umwenemwene, chili chipi chinji kunyonga ngwe umwe ndumbu kanajame mumu hanambate hanji ngwo mumu kanda achimbata.—1 Kori. 7:32-35, 38.

9. Nyonga lika lialita lize twatamba kupwa nalio hakutwala ku kumbata hanji kutwama twamishi?

⁹ Chipwe Yesu hanji Paulu kakalongesele ngwo akwa-Kristu katamba kumbata anji kutwama twamishi. Mba, nyonga lika lialita lize twatamba kupwa nalio ha chikuma cha kumbata hanji kupwa twamishi? Kaposhi wa Kutalila 1 Outubro wa 2012 kahanjikile kanawa chikuma chino ngwo: “Kwamba umwenemwene, yikuma yino yaali [kumbata ni kupwa twamishi] mutuhasa kuyimona ngwe yawana ya kuli Zambi. . . . Yehova keshi kumona utwamishi ngwe chuma cha sonyi hanji cha yinyengo.” Hachino,  twatamba kulemesa chihela chize mandumbu jetu twamishi akwete mu chikungulwila.

10. Nyi twakulemesa mandumbu jetu twamishi, yika kutwatambile kulinga?

¹⁰ Kuchi mutuhasa kusolola ngwetu, twakulemesa manyonga ni mwono wa mandumbu waze twamishi? Twatamba kunyingika ngwetu, mandumbu amwe kali twamishi mumu ene kakwachile chiyulo cha kutwama twamishi. Mandumbu akwo kanazange kumbata, alioze kanda kuchisoloka mutu yoze malimbata nenyi. Eka, kali twamishi mumu hanafwisa waze te alimbata no. Ha chikuma cheswacho, shina muchilita mandumbu mu chikungulwila kuhula-hula umwe ndumbu twamishi mumu liaka keshi kumbata? Chikwo nawa, shina chinalite kufupila mandumbu jetu atu waze malimbata no? Ha mashimbu amwe, ndumbu yoze twamishi mahasa kwita hanga amukwase kuwana mutu yoze malimbata nenyi. Alioze nyi mwene kechile ukwoso wacho, kuchi mevwa muze manyingika ngwenyi akwo kanamufupila mutu yoze malimbata nenyi? (1 Tesa. 4:11; 1 Timo. 5:13) Tutalenu yize mandumbu jetu ashishika twamishi hanambe ha chikuma chino.

11-12. Kuchi mutuhasa kuvwisa chinyengo mandumbu waze twamishi?

¹¹ Umwe kalayi wa mbonge yoze hajama chinji mu mulimo wenyi kambile ngwenyi, kupwa twamishi chakuneha yiwape yinji. Alioze, kakunenganyana muze amwe mandumbu akumuhula ngwo: “Mumu liaka kuushi kumbata?” Umwe ndumbu twamishi yoze wakukalakala ku Mbetele yamba ngwenyi: “Ha mashimbu amwe, nakumona ngwami mandumbu amwe kakunyonga ngwo katamba kuvwila twamishi keke. Chino chakusolola ngwe, kupwa twamishi hi chawana ko, alioze chili wika yilemu.”

¹² Umwe ndumbu wa pwo yoze wakukalakala ku Mbetele yamba ngwenyi: “Amwe mandumbu kakunyonga ngwe twamishi eswe kakufupa-fupa yoze malimbata nenyi, hanji ngwe twamishi kakuya ha yiwanyino hanga afupe mutu yoze malimbata nenyi. Ha mashimbu amwe, Mbetele yangutumine mu mbonge yikwo hanga ngulinge umwe mulimo. Naheteleko ufuku uze mandumbu te akulikungulula. Ndumbu wa pwo yoze wanguzumbwile ku zuwo lienyi yangulweza ngwenyi, mu chikungulwila cho mwapwile mandumbu aali waze apwile ni miaka ngwe ya yami. Iye yangulweza ngwenyi, chisolo kukufupila mutu yoze mulimbata nenyi. Alioze muze twanjilile mu Zuwo lia Wanangana, iye yangutwala kuli mandumbu jacho hanga nguhanjike no. Kwamba pundu, yetweswe atatu twevwile sonyi jinji mumu lia chikuma chacho.”

13. Yilweza yika yakolwezele umwe ndumbu wa pwo yoze twamishi?

¹³ Ndumbu mukwo wa pwo twamishi yoze wakukalakala ku Mbetele yamba ngwenyi: “Ami ngunanyingika mapionelu twamishi waze hakola akwete manyonga alita nawa akulihana mu mulimo wo ni uwahililo weswe. Ayo kakukwasa chinji chikungulwila. Kakwete nyonga lialita hakutwala ku utwamishi. Keshi kulimona ngwe kanahiane akwo mumu lia kupwa twamishi, chipwe kunenganyana ha kuhona kumbata ni kupwa ni usoko.” Muchipema chinji nyi eswe mu chikungulwila malemesa ni kuvumbika mandumbu wano. Nyi malinga chino, mandumbu wano kechi kulivwa ngwe keshi ulemu chipwe kunyonga ngwe kali alemu chinji kuhiana akwo. Chino chakukwasa hita umwe anyingike ngwo, kali ni chihela mu chikungulwila.

14. Kuchi mutuhasa kusolola ngwetu twakuvumbika mandumbu jetu twamishi?

¹⁴ Mandumbu jetu twamishi kanazange hanga mandumbu mu chikungulwila aalemese mumu lia yitanga yo yipema, hi ko mumu lia kupwa twamishi. Kutwatambile kwevwila keke ha kupwa twamishi, alioze twatamba kwalemesa mumu lia ushishiko wo. Nyi twachilinga, mandumbu jetu twamishi kechi kulivwa ngwe  tunaalweze ngwo: ‘Kutwanuzangile.’ (1 Kori. 12:21) Alioze, malivwa ngwe twakwavumbika nawa twakulemesa chihela cho mu chikungulwila.

15. Yika mandumbu amwe akulinga hanga akalakalile chinji Yehova?

¹⁵ Ha miaka yino, mandumbu anji kanazange kulilongesa malimi eka hanga ambujole chinji. Mba achilinge, katamba kwalumuna yimwe ku mwono wo. Ayo katuhukile mu chikungulwila cha limi lize akuhanjika kanawa, ni kuya mu chikungulwila cha limi lieka muze te munafupiwa akwa-kwambujola. (Yili. 16:9) Kulinga chino, chili chiteli cha mutu mwene hanga ahase kukalakalila chinji Yehova. Chipwe ngwe mukupalika mashimbu anji, mba ahanjike kanawa limi liacho, nihindu ayo kakukwasa chinji chikungulwila. Yitanga yo yipema ni yuma yize ananyingika yakutakamisa mandumbu mu chikungulwila. Chochene, mandumbu wano akulihana-ene kali alemu kuli yetu!

16. Yika makulwana atamba kulinga muze anazange kutongola umwe ndumbu hanga apwe mukulwana hanji kavumbi?

¹⁶ Makulwana mu chikungulwila katambile kwecha kutongola ndumbu hanga apwe kavumbi hanji mukulwana, mumu ngwo keshi kuhanjika kanawa limi lize akuzachisa mu chikungulwila. Chuma chize makulwana atamba kulinga chili kuhengwola hanga amone nyi ndumbu wacho, kakukaula shimbi ja Mbimbiliya jize jinatale ha kupwa mukulwana hanji kavumbi, hi ko hakutwala ku kuhanjika kanawa limi lize akuzachisa mu chikungulwila.—1 Timo. 3:1-10, 12, 13; Titu 1:5-9.

17. Yihula yika akulihula asoko waze akuya mu chifuchi cheka?

¹⁷ Asoko amwe akwa-Kristu kayile mu chifuchi cheka mumu lia kuchina yimwe hanji kufupa mulimo. Ha yikuma yino, ana hanji malilongesa ku shikola limi lize akuhanjika chinji mu chifuchi chacho. Chikwo nawa, hanji yisemi malilongesa limi liaha hanga awane mulimo. Mba nyi mu chifuchi chacho muli chikungulwila hanji chizavu mu limi lio? Mu chikungulwila chika ayo atamba kuya? Shina katamba kuya mu chikungulwila cha limi lize akuhanjika mu chifuchi chize ali, nyi mu chikungulwila muze akuhanjika limi lio?

18. Kulita ni A-Ngalashia 6:5, kuchi mutuhasa kuvumbika chiyulo cha mwata wa mu usoko?

¹⁸ Mwata wa mu usoko mwe watamba kusakula chikungulwila chize maya ni asoko jenyi. Amu chino chili chiyulo chenyi, mwata wa mu usoko katamba kumona yuma yize muyikwasa asoko jenyi ku ufulielo. (Tanga A-Ngalashia 6:5.) Twatamba kuvumbika chiyulo cha mwata wa mu usoko. Chiyulo cheswacho mwata wa mu usoko makwata, twatamba kuchitayiza ni kutambula ni zango asoko jacho mu chikungulwila.—Roma 15:7.

19. Yika mwata wa mu usoko atamba kuhengwola mu yilemba?

¹⁹ Ha mashimbu amwe, yisemi mahasa kuya mu chikungulwila cha limi lio lize ana keshi kuhanjika  kanawa. Nyi chikungulwila chili mu mbonge muze akuhanjika limi lia mu chifuchi chacho, muchihasa kupwa chikalu kuli ana kwivwa kanawa malongeso ha kukunguluka ni kukola ku ufulielo. Mumu liaka? Mumu hanji ana kakulilongesa ku shikola limi lize akuhanjika chinji mu chifuchi lize hi lia yisemi ko. Hachino, mwata wa mu usoko katamba kuhengwola chikuma chacho kupalikila mu yilemba, hanga amone yize muyikwasa ana jo kukola ku ufulielo. Ha chikuma ngwe chino, yisemi mahasa kukwasa ana jo kulilongesa kuhanjika kanawa limi lio, hanji kuya mu chikungulwila cha limi lize ana akuhanjika kanawa. Chiyulo cheswacho mwata wa mu usoko makwata, mandumbu a mu chikungulwila muze maya katamba kusa tachi hanga aavumbike ni kwalemesa.

20. Kuchi mutuhasa kusolola ngwetu twakuvumbika mandumbu jetu waze analilongesa limi liaha?

²⁰ Yikuma yeswe twatongola hano, mu yikungulwila yinji mutuwanamo mandumbu waze anase tachi hanga alilongese limi liaha. Muchihasa kupwa chikalu kuli ayo kulumbununa yize ananyonga. Alioze nyi mutwecha kulihulikila ha tupalia waze akulinga muze anahanjika limi lietu, mutuhasa kumona zango lio kuli Yehova ni zango lize akwete ha kumulingila. Nyi mutulihulikila ha yitanga yipema ya mandumbu wano, mutwalemesa ni kwavumbika. Kutuchi kaalweza ngwetu, ‘kutwanuzangile’ mumu ngwo kanyingikine kuhanjika kanawa limi lietu.

21-22. Chiteli chika chilemu chize tukwete?

²¹ Yehova kakutwaha chiteli chilemu cha kupwa ni chihela mu ululikiso wenyi. Tulieswe, malunga hanji mapwo, twamishi hanji waze alimbata, akweze hanji tushinakaji, chipwe ngwe twakuhanjika kanawa limwe limi hanji ka, yetweswe tukwete ulemu kuli Yehova ni kuli mandumbu jetu.—Roma 12:4, 5; Kolo. 3:10, 11.

²² Mutununga ni kusa tachi hanga tukaule malongeso apema waze twalilongesa ha chilweza cha Paulu hakutwala ku mujimba wa mutu. Hachino, mutuhasa kusa shindakenyo ha hita chikuma hanga tusolole ngwetu, twakulemesa chihela chetu ni cha mandumbu akwo mu chikungulwila cha Yehova.