1. Yika Ndawichi ambile hakutwala ku kulikehesa cha Yehova?

SHINA mutuhasa kwamba ngwetu, Yehova kali lume mukwa-kulikehesa? Ewa. Ndawichi kambile hakutwala kuli Zambi ngwenyi: ‘Hiwangwaha lukepwe wa ulamwino we, kulikehesa che hichangunangamisa.’ (2 Samue. 22:36; Samu 18:35) Muze Ndawichi asonekene maliji wano, kota kanyongene mashimbu waze Samuele ayile ku zuwo lia tato hanga awayise mwanangana yoze te masulaho mu Izalele. Tato kapwile ni ana nake, Ndawichi mwe te kasula-songo, chipwe chocho Yehova yamusakula hanga asalakane Mwanangana Saulu.—1 Samue. 16:1, 10-13.

2. Yika mutulilongesa ha mutwe uno?

² Kwamba pundu, Ndawichi katayijile yize mukwa-kwimba Samu 113 asonekene hali Yehova ngwenyi: “Yoze wakulikehesa kutala yuma ya mwilu ni hashi, yoze wakukatwisa chiswale mu fufuta. . . Akamuse hakachi ka yilolo.” (Samu 113:6-8) Ha mutwe uno, mutumona chize Yehova asolwele kulikehesa ni yize mutuhasa kulilongesa ha chilweza chenyi. Mba mutumona nawa, yize mutuhasa kulilongesa hakutwala ku kulikehesa ha chilweza cha Mwanangana Saulu, profeta Daniele ni Yesu.

3. Kuchi Yehova akutwama ni yetu, nawa yika yino yinasolola?

³ Mutuhasa kulilongesa yuma yinji ha chize Yehova akutwama ni tuvumbi twenyi chipwe ngwe kali yihenge. Yehova keshi kutayiza wika uwayilo wetu, alioze kakutumona nawa ngwe  masepa jenyi. (Samu 25:14) Chikwo nawa, Yehova katumine Mwanenyi hanga atukuule ku shili, mba tupwe ni usepa upema ni iye. Ha kulinga chino, Yehova yasolola keke ni zango! Chino chinasolola pundu ngwo, iye kali Zambi yoze wakulikehesa.

4. Yika Yehova hanatwehe, nawa mumu liaka?

⁴ Tutalenu chilweza chikwo chize chinasolola ngwo Yehova kakulikehesa. Amu ali Tangi yetu, iye kali ni ulite wakusakula yize twatamba kulinga ku mwono wetu. Chipwe chocho, keshi kuchilinga. Yehova hanatutange mu chifwa chenyi, kashika tuli ni uhashi wakusakula yize mutulinga, chipwe ngwe tuli akehe nawa alelu kumeso jenyi. Iye keshi kutushinjila hanga tumuwayile. Alioze, kanazange hanga tumuwayile mumu lia zango ni kunyingika yiwape yize mutuzuka nyi twamwononokena. (Shimbi 10:12; Iza. 48:17, 18) Chili chiwape chinene kuwayila Zambi yoze wakulikehesa!

5. Kuchi Yehova akutulongesa hanga tupwe akwa-kulikehesa? (Tala chizulie ha chifukilo.)

⁵ Chize Yehova akutwama ni atu chinatulongesa kulikehesa. Mu malilu ni hashi, kukushi mutu yoze uli ni mana kuhiana Yehova. Chipwe chocho, iye kakutayiza yiyulo ya akwo. Chakutalilaho, Yehova kechele Mwanenyi hanga amukwase kutanga yuma yeswe. (Yishi. 8:27-30; Kolo. 1:15, 16) Chipwe ngwe Yehova kali Mukwa-Ndundo-jeswe, nihindu kakuhana yiteli kuli akwo. Iye katongwele Yesu hanga apwe Mwanangana mu Wanangana wenyi, nawa yahana wata kuli atu 144,000 waze makayula ni Yesu. (Luka 12:32) Kwamba pundu, Yehova kafumbile Yesu hanga apwe Mwanangana nawa Sasendote wa Lutwe. (Hepre. 5:8, 9) Iye nawa kafumbile waze makayula ni Yesu. Alioze, Yehova keshi kukaujola hita chuma chize ayo malinga hakutwala ku mulimo wo. Iye kakwajikijila ngwo malinga upale wenyi.—Uso. 5:10.

6-7. Chilweza chika Yehova anatwehe ha kuhana yiteli kuli akwetu?

 ⁶ Nyi Yehova, yoze keshi kufupa niumwe hanga amukwase, kakuhana milimo kuli akwo, mba yika mutwamba hali yetu! Shina uli mwata wa mu usoko nyi uli mukulwana mu chikungulwila? Nyi chenacho, imbulula Yehova, hakuhana yiteli kuli akwenu, nawa kanda waakaujola ha hita chuma malinga. Nyi mwimbulula Yehova, kuuchi kuwahilila wika hakumona chize mulimo unende kanawa, alioze mufumba nawa akwenu ni kwajikijila. (Iza. 41:10) Yika nawa waze ali ni yiteli mahasa kulilongesa kuli Yehova?

⁷ Mbimbiliya yinasolola ngwo, Yehova kakupanjika yiyulo ya angelo. (1 Mia. 22:19-22) Yisemi, kuchi munuhasa kwimbulula chilweza cha Yehova? Nyi muchilita, hula ana je hanga unyingike chize munuhasa kukwata yimwe yiyulo. Nyi makwaha yiyulo yalita, yikaule.

8. Kuchi Yehova asolwele uhomboloji kuli Apalahama ni Sara?

⁸ Kulikehesa cha Yehova chakusoloka ha uhomboloji wenyi. Chakutalilaho, Yehova kakusolola uhomboloji muze tuvumbi twenyi akumuhula ni vumbi lieswe hakutwala ku yimwe yiyulo. Tangwa limwe, Apalahama kahulile Yehova hakutwala ku chiyulo chize akwachile cha kunongesa Sondome ni Ngomora ni kumulweza chize te anevu, hachino Yehova yamupanjika. (Uputu. 18:22-33) Sara kasehele muze evwile chilakenyo cha Yehova ngwo, mamita ku ushinakaji, chipwe chocho Yehova kakevwile uli. (Uputu. 18:10-14) Alioze, yakumbulula Sara ni vumbi.

9. Kuchi yisemi ni makulwana a mu chikungulwila mahasa kwimbulula Yehova?

⁹ Yisemi ni makulwana a mu chikungulwila, yika munuhasa kulilongesa ha chilweza cha Yehova? Achinyonga ha chize muwivwa nyi ana je hanji mandumbu mu chikungulwila mecha kutayiza chiyulo chize wakwata. Shina wakulianga kwakumika, nyi wakufupa kunyingika manyonga jo? Nyi waze ali ni yiteli malikehesa ngwe Yehova, asoko ni mandumbu mu chikungulwila kakuwahilila chinji. Ndo hano, twamona chize mutuhasa kwimbulula kulikehesa cha Yehova. Haliapwila, mutunyingika chize mutupwa akwa-kulikehesa ha kulilongesa yimwe yilweza ya mu Mbimbiliya.

10. Kuchi Yehova akutulongesa?

¹⁰ Yehova “Longeshi” Munene, hanatumu kusoneka mu Mbimbiliya yilweza ya atu akwo hanga yitukwase. (Iza. 30:20, 21) Mu Mbimbiliya, muli yilweza yinji ya atu waze asolwele yitanga yize Zambi akuzanga, ngwe kulikehesa. Alioze muli nawa yilweza ya atu waze kakasolwele yitanga yino, ni kapinda yoze apwile nenyi hakuhona kusolola yitanga yacho. Muze twakuhengwola sango jacho ni kujipukuna twakulilongesa yuma yinji.—Samu 37:37; 1 Kori. 10:11.

11. Yika mutuhasa kulilongesa ha chilweza chipi cha Saulu?

¹¹ Tunyongenu ha yize yalingiwile kuli Mwanangana Saulu. Ku uputukilo, iye kapwile chihomboloji. Te kakunyingika ngwo, kechi kuhasa kulinga yuma yeswe nawa kevwile woma wakutambula yimwe yiteli. (1 Samue. 9:21; 10:20-22) Alioze, hakupalika cha mashimbu Saulu yaputuka kulinangamisa. Iye kaputukile kulinangamisa muze apwile mwanangana. Tangwa limwe, Saulu yahona uhomboloji, chocho yalinga yuma yize te profeta Samuele atamba kulinga. Shimbu alikehese ni kufuliela muli Yehova ngwo mafunga atu jenyi, Saulu yalinga chuma chize te katambile kulinga, yalambula milambu ya kulumba kuli Yehova.  Mba yika yalingiwileko? Yehova yalituna Saulu ni wanangana wenyi. (1 Samue. 13:8-14) Kwamba umwenemwene, twalilongesa ha chilweza cha Saulu ngwetu kutwatambile kulinangamisa hanji kulinga yuma yize kutushi ni ulite wakuyilinga.

12. Kuchi Daniele asolwele ngwo kakulikehesa?

¹² Saulu kahichikile chilweza chipi, alioze, tutalenu chilweza chipema cha profeta Daniele. Ku mwono wenyi weswe, Daniele kapwile kavumbi ka Zambi walikehesa, yoze te wakufupa usongwelo wa Yehova mashimbu eswe. Muze Yehova amukwashile kulumbununa yilota ya Nabukanezore, Daniele, kakalifumanyishine mwene. (Danie. 2:26-28) Yika mutuhasa kulilongesa ha chilweza chenyi? Nyi mandumbu matuchichimieka mumu lia kulinga kanawa pande hanji kwambujola, twatamba kuchichimieka Yehova. Twatamba kulikehesa ni kunyingika ngwo, Yehova mwe watukwasa kulinga yuma yacho. (Fwili. 4:13) Nyi twachilinga, kutuchi kwimbulula wika chilweza cha Daniele, alioze mutwimbulula nawa chilweza chipema cha Yesu. Mu mulali uka?

13. Kulita ni Yoano 5:19, 30 yika twalilongesa hakutwala kuli Yesu?

¹³ Chipwe ngwe Yesu kapwile Mwana mungunu wa Zambi, nihindu kasolwele ngwo, kakujikijila muli Yehova. (Tanga Yoano 5:19, 30.) Iye kanda achinyonga kama kutambula wata wa Tato, nilimwe tangwa. Mukanda wa A-Fwilipu 2:6 unambe ngwo, Yesu ‘kakanyongene ngwenyi, kalita ni Zambi.’ Amu te akulikehesa, iye kanyingikine ngwenyi, kechi kuhasa kulinga yuma yeswe, kashika avumbikile wata wa Tato.

14. Yesu muze amwichile hanga alinge chuma chize te keshi ni ulite wa kuchilinga, yika alingile?

¹⁴ Twiwulukenu chize Yesu akumbulwile Tiangu, Yoano ni naye muze amwichile chiteli chize iye te keshi ni ulite wakwaha cho. Yesu yaakumbulula ngwenyi, Tato mwe uli ni ulite wakusakula yoze matwama ku chindume ni ku chimeso chenyi mu Wanangana wenyi. (Mateu 20:20-23) Yesu te kanyingika haze hasulila tachi yenyi. Iye te kanyingika nawa yize atamba kulinga ni yize katambile kulinga. Iye kapwile mukwa-kulikehesa. Yesu kapwile ni kukaula shimbi jeswe jize amuhele kuli Yehova. (Yoa. 12:49) Kuchi mutuhasa kwimbulula chilweza chipema cha Yesu?

15-16. Kuchi mutuhasa kukaula chiyulo chize chili ha 1 A-Korindu 4:6?

 ¹⁵ Mutuhasa kwimbulula kulikehesa cha Yesu hakukaula chiyulo chize chili ha 1 A-Korindu 4:6, chinambe ngwo: “Kanda nukecha manyonga jenu kuhiana yuma yize yinasonewa.” Kashika, muze umwe mutu matwita chiyulo, kutwatambile kumulweza hanga akaule yiyulo yetu hanji manyonga jetu. Alioze, twatamba kumukwasa hanga akaule yiyulo yize yili mu Mbimbiliya ni mu mikanda yetu. Nyi twachilinga, mutusolola ngwetu kutwanyingikine yuma yeswe. Kulikehesa cha kutukwasa kunyingika ngwetu, ‘yilinga ya ululi’ ya Zambi Mukwa-Ndundo-Jeswe ye yalita.—Uso. 15:3, 4.

¹⁶ Muze twakulikehesa, twakulemesa Yehova. Alioze, kuli nawa yikuma yikwo yize yinasolola ulemu wa kulikehesa. Haliapwila, mutumona chize kulikehesa muchihasa kutukwasa kuwahilila ni kupwa ni usepa upema ni akwetu.

17. Mumu liaka akwa-kulikehesa akuwahilila?

¹⁷ Kupwa akwa-kulikehesa, chakutwaha uwahililo unji. Mumu liaka tunambe chocho? Mumu muze twakunyingika ngwetu kutushi ni uhashi wakulinga yuma yeswe, twakuwahilila ni kusakwilila muze akwetu akutukwasa. Chakutalilaho, twiwulukenu muze Yesu awukile akwa-mbumba kumi. Hali atu jacho, umuwika mwe wafunyine hanga asakwilile Yesu mumu lia kumuwuka. Nyi kakamuwukile kuli Yesu kachi mwene kakahashile kuliwuka! Kulikesa chamukwashile hanga asakwilile ni kufumanyisa Zambi ha kumuwuka.—Luka 17:11-19.

18. Kuchi kulikehesa chakutukwasa kulivwashana ni akwetu? (A-Roma 12:10)

¹⁸ Mutu yoze wakulikehesa chakupwa chashi  kulivwashana ni akwo nawa kakupwa ni masepa apema. Mumu liaka? Mumu atu amutapu au, kakunyingika yitanga yipema ya akwo ni kwajikijila. Atu waze alikehesa kakuwahilila muze akumona akwo malinga kanawa milimo yeswayo akwaha. Keshi kwivwa sonyi ja kuchichimieka akwo hanji kwalemesa.—Tanga A-Roma 12:10.

19. Mumu liaka twatamba kwehuka kulinangamisa?

¹⁹ Alioze, mutu yoze wakulinangamisa kalisa chinji ni mutu yoze walikehesa. Atu amutapu au, keshi kuzanga kuchichimieka akwo, kakuzanga wika aachichimieke ayo. Kakuzanga kulitesa ni akwo ni kulihamika no. Shimbu afumbe akwo ni kwaha yiteli, ayo kakwamba ngwo: “Nyi unazange mulimo wende kanawa ulinge yena mwene.” Chili ngwe kakunyonga ngwo, mba yuma yende kanawa katamba kuyilinga ngwe chize ayo akuzanga. Chikwo nawa, atu waze akulinangamisa kakwete kuzo ni chipululu. (Ngala. 5:26) Chakwapwila chikalu kulinga usepa uze muununga. Nyi mutumona ngwetu tuli ni nyonga lia kulinangamisa, twatamba kwita kuli Yehova hanga atukwase ‘kupwisa chaha kunyonga chetu.’ Hachino, mbuto ya kulinangamisa kuyichi kutanda miji mu mbunge yetu.—Roma 12:2.

20. Mumu liaka twatamba kulikehesa?

²⁰ Tunasakwilila chinji ha kupwa ni chilweza cha Yehova! Twakumona kulikehesa chenyi ha chize akutwama ni tuvumbi twenyi, kashika tunazange kumwimbulula. Nawa tunazange kwimbulula yilweza ya mu Mbimbiliya ya atu waze alikehesele ha kwenda ni Yehova. Nyi twachilinga, mutuhana kuli Yehova ulemu ni uhenya uze atela. (Uso. 4:11) Nawa mutuhasa kwenda ni Tata yetu wa mu malilu ku miaka yeswe, mumu iye kakuzanga atu waze alikehesa.