1. Mumu liaka Yehova atangile mwono?

SHIMBU Yehova te kanda achitanga chuma nichimwe, kapwile ukawenyi. Iye te keshi kulivwa ukawenyi. Mumu kali mungunu mu yuma yeswe. Chipwe chocho, Zambi yazanga hanga akwo apwe ni mwono ni kuwahilila. Mumu lia zango, Yehova yaputuka kutanga yuma.—Samu 36:9; 1 Yoa. 4:19.

2. Muze Yehova te anatange yuma, kuchi Yesu ni angelo evwile?

² Chitangu, Yehova yatanga Mwanenyi, Yesu hanga akalakale hamwe nenyi. Kupalikila muli Yesu, “yuma yeswe yatangiwile” hakachi ka yuma yacho, hali ni angelo anji. (Kolo. 1:16) Yesu kanakawahilila chinji hakukalakala ni Tato. (Yishi. 8:30) Angelo no kanakawahilila chinji. Ayo kamwene chize Yehova ni Chilangaji wenyi mupema, Yesu, atangile malilu ni hashi. Kuchi angelo evwile? Ayo ‘kalikwijile ni chiseke’ ha mashimbu waze te anatange hashi. Kwamba umwenemwene, ayo kanungine ni kuwahilila ndo muze Yehova ahwishile kutanga yuma yeswe. Angelo kota kanakawahilila chinji muze Yehova ni Mwanenyi atangile mutu, chitangiwa chilemu hano hashi nawa chakasula. (Yombi 38:7; Yishi. 8:31) Yitangiwa yeswayi, yasolwele zango ni mana a Yehova.—Samu 104:24; Roma 1:20.

3. Kulita ni 1 A-Korindu 15:21, 22, uhashi uka ukuule wa chitapo cha Yesu wa kuhana kuli atu?

³ Yehova kazangile hanga atu atwame ku miaka yeswe mu paraisu hano hashi. Alioze, Alama ni Eva yavulumuna kumeso ja Tato wa zango, hachino shili ni kufwa yiyiza hali atu eswe. (Roma 5:12) Yika Yehova alingile? Hazehene, iye yamba yize te malinga hanga alamwine atu. (Uputu. 3:15) Iye te mahana Mwanenyi, Yesu ngwe ukuule, hanga alamwine ana ja Alama ni  Eva ku shili ni kufwa. Atu eswe te mapwa ni uhashi wakusakula kulingila Yehova mba azuke mwono wa mutolo.—Yoa. 3:16; Roma 6:23; tanga 1 A-Korindu 15:21, 22.

4. Yihula yika mutushimutwina ha mutwe uno?

⁴ Kuli yihula yimwe yize atu akulihula hakutwala ku chilakenyo cha uhindukilo. Chakutalilaho, kuchi uhindukilo muukapwa? Shina mutukahasa kunyingika asoko ni masepa jetu muze makaahindwisa? Kuchi uhindukilo muukatwaha uwahililo? Yika uhindukilo muuhasa kutulongesa hakutwala ku zango, mana ni uhomboloji wa Yehova? Mutushimutwina hita chihula ha mutwe uno.

5. Mumu liaka mutuhasa kwamba ngwetu, kechi kahindwisa atu eswe ha shimbu limuwika?

⁵ Mu paraisu, Yehova makazachisa Yesu hanga akahindwise tununu a tununu twa atu. Alioze mutuhasa kupwa ni shindakenyo ngwetu, atu eswe waze hanafu kechi kaahindwisa ha shimbu limuwika. Mumu liaka? Mumu nyi mahindwisa atu eswe ha shimbu limuwika, mu chifuchi chaha mumupwa chinji muvundangenye. Alioze, Yehova keshi kuzanga yuma ya chizungo-zungo. Iye kananyingika ngwenyi, yuma yeswe katamba kuyilulieka kanawa mba kupwe sambukila. (1 Kori. 14:33) Muze akalakalile ni Yesu hanga atange malilu ni hashi, Yehova yasolola mana ni uhomboloji, hakehe-hakehe yalulieka hashi shimbu te kanda achitanga atu. Yesu makembulula chilweza cha Tato, muze makakalakala hamwe ni waze makalamwina ha Armagedone hanga alulieke hashi akatambule kanawa atu waze makahindwisa.

6. Kulita ni Yilinga 24:15, aya makapwa hakachi ka waze Yehova makahindwisa?

⁶ Atu waze makalamwina ha Armagedone, makapwa ni mulimo ulemu chinji, kulongesa atu waze makahindwisa hakutwala ku  Wanangana wa Zambi ni chize makakaula shimbi ja Yehova. Mumu liaka? Mumu atu anji waze makahindwisa kali “yihenge.” (Tanga Yilinga 24:15.) “Yihenge” jacho, ndo akase tachi jinji hanga alumune mwono wo, mba akatambule yiwape ya ukuule wa Yesu. Tunyongenu ha mulimo uze mutukapwa nawo ha kulongesa umwenemwene kuli atu anji waze kanyingikine Yehova. Shina hita mutu yoze makahindwisa, makapwa ni longeshi umuwika wa Mbimbiliya ngwe chize twakulinga musono? Kutala atu waze makahindwisa makaasa mu yikungulwila ni kwafumba chize makalongesa akwo? Twatamba kushimbwila hanga tukamone. Tunanyingika wika ngwetu, kusongo lia Kanunu ka Miaka ya Kuyula cha Kristu, “hashi muhakazala ni chinyingi cha Yehova.” (Iza. 11:9) Mutukapwa ni milimo yinji ha mashimbu jacho, chipwe chocho muyikapwa milimo yipema!

7. Mumu liaka atu ja Zambi makasolola keke hakulongesa atu waze makahindwisa?

⁷ Ha Kanunu ka Miaka ya Kuyula cha Kristu, tuvumbi eswe a Yehova hano hashi, makanunga ni kwalumuna yitanga yo hanga amuvwise kuwaha. Kashika, makasolola keke hakulongesa waze makahindwisa, mumu kananyingika ngwo, hi chashi ko kwalumuna ndako jipi ni kukaula shimbi ja Yehova. (1 Petu. 3:8) Kwamba pundu, waze makahindwisa makazanga kupwa hamwe ni atu ja Yehova alikehesa waze makasa tachi hanga azuke “ulamwino.”—Fwili. 2:12.

8. Yuma yika yize yinatwehe shindakenyo ngwetu, mutukahasa kunyingika asoko ni masepa jetu waze makahindwisa?

⁸ Kuli yuma yinji yize yinatwehe shindakenyo ngwetu, mutukahasa kunyingika asoko ni masepa jetu waze makahindwisa. Nyi twanyonga hali atu waze ahindwishile kunyima, chinasoloka ngwe Yehova makahindwisa atu ngwe chizechene apwile shimbu kanda achifwa, chekwamba makaahindwisa ni chifwa, kuhanjika ni kunyonga chizechene apwile nacho. Iwuluka ngwe, Yesu katesele kufwa ni tulo nawa yatesa uhindukilo ngwe kuhindwisa mutu mu tulo. (Mateu 9:18, 24; Yoa. 11:11-13) Mutu yoze uli mu tulo muze akuhinduka keshi kwalumuka. Iye kakuhinduka ni chifwa chizechene ni manyonga waze-ene. Tutalenu ha chilweza cha Lazaru. Muze afwile te hikwapalika matangwa awana, kashika mujimba wenyi te hiwaputuka kupola. Alioze, muze amuhindwishile kuli Yesu, hazehene mandumbu jenyi yamunyingika neye yaanyingika.—Yoa. 11:38-44; 12:1, 2.

9. Mumu liaka atu kechi kaahindwisa ni mujimba ni manyonga angunu?

⁹ Yehova hanalakenya ngwenyi, mu paraisu niumwe makamba ngwenyi: “Ngunayiji” wakuhi. (Iza. 33:24; Roma 6:7) Kashika, waze makahindwisa makaaha mijimba yipema. Alioze kechi kapwilaho angunu, mumu nyi mapwa angunu, hanji asoko ni masepa jo kechi kahasa kwanyingika. Chinasoloka ngwe ha Miaka Kanunu ya Kuyula cha Kristu, atu makapwa angunu hakehe-hakehe. Hakuhwa cha kanunu ka miaka, Yesu makafunyisa Wanangana kuli Tato. Ha mashimbu jacho, Wanangana muukamanununa upale weswe wa Zambi, ni kukwasa atu hanga apwe angunu.—1 Kori. 15:24-28; Uso. 20:1-3.

10. Kuchi mutukevwa muze makahindwisa asoko ni masepa jetu?

¹⁰ Achinyonga uwahililo uze muukapwa nayo muze mukamona asoko ni masepa je maahindwisa ku ufwe. Shina mukalila nyi mukawahilila?  Kutala mukemba mwaso wa kusakwilila nawo Yehova? Chuma watamba kunyingika chili ngwo, uhindukilo muukakolesa zango lie hali Yehova ni Yesu. Mutukatambula chawana chacho, mumu lia zango lize ayo akwete hali yetu.

11. Kulita ni yize Yesu ambile ha Yoano 5:28, 29, yika muyikalingiwa kuli waze makwononokena shimbi ja Zambi?

¹¹ Atu waze makahindwisa, makawahilila chinji ha kuzula hakehe-hakehe utu ukulu ni kuzala utu waha, ni kukaula shimbi ja Zambi ku mwono wo. Waze makalumuna yitanga yo yipi makanunga ni mwono mu Paraisu. Alioze, waze keshi kwononokena shimbi ja Yehova makaanongesa hanga achine kupihisa sambukila mu Paraisu.—Iza. 65:20; tanga Yoano 5:28, 29.

12. Kuchi Yehova makawahisa atu waze makatwama hano hashi?

¹² Muze Wanangana wa Zambi muukayula hashi, tuvumbi eswe a Zambi makatayiza maliji ali ha Yishima 10:22, anambe ngwo: ‘Chiwape cha Yehova kuchakupichisa, nawa kechi kuwezako chinyengo.’ Ni ukwaso wa spiritu yisandu, tuvumbi twa Zambi kumapwa pichi ku ufulielo, chekwamba, makapwa ngwe Kristu ni kupwa angunu. (Yoa. 13:15-17; Efwe. 4:23, 24) Hita tangwa mijimba yo muyikapwa yipema, nawa makapwa atu apema. Ayo makawahilila ku mwono. (Yombi 33:25) Shina kupukuna ha uhindukilo muchihasa kutukwasa haliapwila?

13. Kulita ni Samu 139:1-4, kuchi uhindukilo unasolola ngwo, Yehova kananyingika kanawa hita umwe wa kuli yetu?

¹³ Ngwe chize twamona kuuputukilo, muze Yehova mahindwisa umwe mutu, makamuhindwisa ni chifwa, utu ni manyonga waze-ene apwile no shimbu te kanda achifwa. Tuchinyongenu ha ulumbunwiso wa maliji wano. Yehova kakutuzanga chinji, kashika kananyingika yize twakunyonga, chize twakwivwa, yize twakulinga, nawa kakwiwuluka yuma yacho. Yehova kali ni uhashi wakukuhindwisa ni manyonga, utu ni yitanga ngwe yize wapwile nayo shimbu kanda uchifwa. Mwanangana Ndawichi kanyingikine kanawa ngwenyi, Yehova kakulihulumba hali hita umwe wa kuli yetu. (Tanga Samu 139:1-4.) Yika mutuhasa kulilongesa ha kunyingika ngwetu, Yehova kanatunyingika kanawa?

14. Kuchi twakwivwa ha kunyingika ngwetu, Yehova kanatunyingika kanawa?

¹⁴ Kunyingika ngwetu, Yehova kanatunyingika kanawa, chakutukwasa tuhone kulihulumba. Kuchi chakutukwasa? Twiwulukenu ngwetu, Yehova kakulihulumba chinji hali yetu. Iye kakuzanga chinji yitanga yetu yipema, nawa kananyingika kanawa yuma yize twakupalika ku mwono. Chili chipema kunyingika yuma yino! Kashika, kanda tulivwa ukawetu, Yehova kali ni yetu mashimbu eswe, nawa kanazange kutukwasa.—2 Sango 16:9.

15. Kuchi kutalatala cha uhindukilo chinasolola mana a Yehova?

¹⁵ Kuvwila kufwa woma chapwa muheto unene. Atu waze akusongwela kuli Satana, kakuzachisa woma wa kufwa hanga ashinjile akwo kulinga yuma yipi ni kulituna ufulielo wo. Alioze, yetu kutushi kwivwa woma wa kufwa. Mumu tunanyingika ngwetu, nyi akwa-kole jetu matushiha Yehova makatuhindwisa kulutwe lia matangwa. (Uso. 2:10) Tuli ni shindakenyo ngwetu, ayo kechi kuhasa kutuhandununa kuli Yehova. (Roma 8:35-39) Ha kutwaha kutalatala cha uhindukilo, Yehova kasolwele ngwenyi, kali ni mana anji! Kupalikila mu uhindukilo, Yehova hanatambula uta  wa tachi kuli Satana ni kutwaha hamu hanga tuhase kulikalila ku moko ja Satana.

16. Yihula yika watamba kulihula, nawa kuchi makumbululo je mahasa kukukwasa kunyingika chize ufulielo we muli Yehova uli?

¹⁶ Nyi akwa-kole ja Yehova mafupa kukushiha yika mulinga? Shina mufuliela muli Yehova ni ha chilakenyo chenyi cha kukuhindwisa? Nyi unazange kunyingika chize ufulielo we uli, watamba kulihula ngwe: ‘Shina nakusolola ngwami nakufuliela muli Yehova chipwe ha kukwata yiyulo yikehe-yikehe?’ (Luka 16:10) ‘Kutala mwono wami wakusolola ngwo, nakufuliela ngwami Yehova mangufunga nyi nasa Wanangana wenyi kulutwe?’ (Mateu 6:31-33) Nyi wakumbulula ngwo ewa, chino chinasolola ngwo wakufuliela muli Yehova, nawa hiwalilulieka ha yeseko yize muyiza kulutwe.—Yishi. 3:5, 6.

17. (a) Kuchi uhindukilo unasolola uhomboloji wa Yehova? (b) Kuchi mutuhasa kusolola ngwetu, twakusakwilila ha uhomboloji wa Yehova?

¹⁷ Yehova hanatese tangwa ni ola yakunongesa chifuchi chino chipi cha Satana. (Mateu 24:36) Iye manunga ni kusolola uhomboloji hanga akanehe songo ha shimbu lize mwene hanatese. Chipwe ngwe kanazange chinji kuhindwisa atu waze hanafu, nihindu manunga ni kusolola uhomboloji wenyi. (Yombi 14:14, 15) Iye kanashimbwila hanga ahindwise atu ha mashimbu alita. (Yoa. 5:28) Kwamba umwenemwene, uhomboloji wa Yehova wakutulongesa yuma yinji. Tuchinyongenu hachino: Hamukunda wa uhomboloji wa Yehova, atu anji kanalumuna yitanga yo hanga “alikonyeke,” ni yetu che tunalingi. (2 Petu. 3:9) Yehova kanazange hanga atu anji akapwe ni mwono wa mutolo. Kashika, twatamba kusolola ngwetu tunasakwilila ha uhomboloji wa Yehova. Kuchi mutuhasa kuchilinga? Hakusa tachi tufupe atu waze “hanafunjikila ku mwono wa mutolo” ni kwakwasa hanga azange Yehova ni kumulingila. (Yili. 13:48) Nyi twachilinga, ayo makayuka ha uhomboloji wa Yehova, ngwe chize yetu twayukile.

18. Mumu liaka twatamba kusolwela akwetu uhomboloji?

¹⁸ Yehova kananyingika ngwenyi, mutukapwa angunu ku songo lia kanunu ka miaka. Amu mashimbu jacho kanda achiheta, iye manunga ni kusolola uhomboloji wenyi ni kukonekena shili yetu. Chino muchitukwasa kulihulikila ha yitanga yipema ya akwetu  ni kwasolwela uhomboloji. Tutalenu chilweza cha umwe ndumbu wa pwo. Mukwo-lunga kaputukile kulipikala chinji, chocho yalitwamina kuya ku kukunguluka. Ndumbu wacho yamba ngwenyi: “Chino changwehele yikola yinji ku mbunge, mumu yuma yeswe yize twatesele kulinga mu usoko, yitwecha kuyilinga.” Chipwe chocho, ndumbu yono yanunga ni kusolwela mukwo-lunga uhomboloji. Yafuliela muli Yehova ni kunyongonona. Yembulula Yehova ha kulihulikila ha yitanga yipema ya mukwo-lunga. Iye yamba ngwenyi: “Mukwetu-lunga kali ni yitanga yinji yipema, iye kanase tachi hanga akumbe kapinda wenyi.” Chilweza chino chinasolola ngwo, chili chilemu kusolola uhomboloji mu usoko wetu ni kuli mandumbu jetu mu chikungulwila waze anase tachi akumbe kapinda wo.

19. Twatamba kusa tachi hanga tulinge yika?

¹⁹ Muze Yehova atangile hashi, Yesu ni angelo kawahililile chinji. Makawahilila nawa chinji muze hashi muhakazala too ni atu angunu waze akuzanga Yehova ni kumulingila. Akwa-Kristu akuwayisa waze makayula ni Kristu, makawahilila chinji ha kumona yiwape yize atu ali nayo mumu lia mulimo wo. (Uso. 4:4, 9-11; 5:9, 10) Achinyonga kutwama mu chifuchi muze kumuchi kapwa nawa masoji, misongo, miteto ni kufwa. (Uso. 21:4) Hachino, amu mashimbu jacho kanda achiheta, sako tachi hanga wimbulule zango, mana ni uhomboloji wa Yehova. Nyi wachilinga, kuuchi keza katokesa uwahililo we chipwe muze muupalika mu yipikalo. (Tia. 1:2-4) Chochene, mutuhasa kusakwilila chinji Yehova ha kutulakenya ngwo, “kumukukapwa uhindukilo”!—Yili. 24:15.