MUTWE WA KULILONGESA 34
Yena Ukwete Chihela mu Chikungulwila cha Yehova!
“Chizechene ngwe mujimba wetu unapu umuwika, ni yihanda yinji uli nayo, yihanda yeswe ya mujimba chipwe yinji yinapu mujimba umuwika; chocho nawa Kristu.”—1 KORI. 12:12.
MWASO 101 Tulinunge ni Kuzachila Hamuwika
CHIKUMA CHILEMU *
1. Kuyuka chika tuli nacho?
TULI ni kuyuka chinene ha kupwa mu ululikiso wa Yehova! Tuli mu ululikiso muze muli atu waze akwete sambukila ni uwahililo. Chihela chika ukwete mu chikungulwila cha Yehova?
2. Chilweza chika postolo Paulu asonekene ha mikanda yenyi?
2 Mutuhasa kulilongesa yuma yinji ha chikuma chino, ha chilweza chize postolo Paulu asonekene ha yimwe mikanda yenyi. Ha mikanda yacho, Paulu katesele chikungulwila ni mujimba wa mutu. Iye yatesa nawa hita mutu mu chikungulwila ni yihanda ya mujimba.—Roma 12:4-8; 1 Kori. 12:12-27; Efwe. 4:16.
3. Yikuma yika yitatu yize mutulilongesa ha mutwe uno?
3 Ha mutwe uno, mutuhengwolaho yikuma yitatu yilemu, yize mutulilongesa ha chilweza cha postolo Paulu. Chitangu, mutulilongesa ngwetu, yetweswe tuli ni chihela * mu ululikiso wa Yehova. Chamuchiali, mutulilongesa yize mutuhasa kulinga nyi muchipwa chikalu kumona chihela chetu mu chikungulwila. Chamuchitatu, mutumona mumu liaka twatamba kulinga mulimo uze Yehova atuhele mu chikungulwila.
YETWESWE TULI NI MULIMO MU CHIKUNGULWILA CHA YEHOVA
4. Yika mukanda wa A-Roma 12:4, 5 unatulongesa?
4 Chikuma chitangu chize mutulilongesa ha chilweza cha Paulu chili ngwo, yetweswe tuli ni mulimo ulemu mu chikungulwila cha Yehova. Paulu yaputuka ni chilweza chenyi hakwamba ngwenyi: “Yetu tuli ni yihanda yinji mu mujimba wetu umuwika, alioze yihanda yeswe kuyishi mulimo umuwika. Chocho yetu, chipwe tuli anji, tunapu mujimba umuwika muli Kristu, ni eswe, mutu ni mutu, chihanda chimwe cha mukwo ni mukwo.” (Roma 12:4, 5) Yika Paulu azangile kushindakenya hano? Ngwo, yetweswe tuli ni milimo yalisa mu chikungulwila, chipwe chocho, hita umwe wa kuli yetu kali mulemu chinji.
Hita mutu kali ni mulimo walisa mu chikungulwila, alioze yetweswe Yehova kakutulemesa chinji (Tala maparagrafu 5-12) *
5. “Yawana” yika Yehova atuhele mu chikungulwila?
5 Muze twakunyonga hali waze ali ni chihela mu chikungulwila, kota twakunyonga wika hali mandumbu waze apwa tusongo. (1 Tesa. 5:12; Hepre. 13:17) Kwamba pundu, kupalikila muli Kristu, Yehova hanahane “yawana kuli atu” mu chikungulwila. (Efwe. 4:8) Hakachi ka “yawana” yacho, hali Chizavu cha Tusongo, yikwashi jo, Komite ya Mutango, tulayi a mambonge, alongeshi a ku mashikola ja Mbimbiliya, makulwana a mu chikungulwila, ni tuvumbi. Mandumbu wano eswe, kaatongwele kupalikila mu spiritu yisandu, nawa kali ni chiteli cha kufunga mapanga ja Yehova ni kutakamisa chikungulwila.—1 Petu. 5:2, 3.
6. Kulita ni 1 A-Tesalonika 2:6-8, tachi jika akusa mandumbu waze akutongola kupalikila mu spiritu yisandu?
6 Yehova kakutongola mandumbu kupalikila mu spiritu yisandu hanga alinge milimo yeka ni yeka. Chizechene ngwe moko, molu ni yihanda yikwo ya mujimba yakukalakala hanga yikwase mujimba weswe, mandumbu wano, kakukalakala chinji hanga akwase chikungulwila. Ayo keshi kufupa lufuma wa ayo ene, alioze kakusa tachi hanga akwase ni kutakamisa mandumbu jo ku ufulielo. (Tanga 1 A-Tesalonika 2:6-8.) Twakusakwila chinji Yehova ha kutwaha mandumbu wano ajama ku ufulielo nawa akukalakala chinji!
7. Yiwape yika akuzuka mandumbu waze ali mu mulimo wa shimbu lieswe?
7 Mu chikungulwila muli nawa mandumbu waze atongwele hanga apwe, mishionaliu, pionelu alipwila, hanji mapionelu a shimbu lieswe. Kwamba pundu, mandumbu a hashi heswe hanasakula kulinga mulimo wa shimbu lieswe ku mwono wo, ha kwambujola chinji ni kutayisa tumbaji. Ha kulinga chino, ayo kakukwasa atu anji hanga apwe tumbaji twa Kristu. Chipwe ngwe mandumbu waze alihanyine mu mulimo wa shimbu lieswe keshi ni yikumba yinji, nihindu Yehova kakwaha yiwape yinji. (Marku 10:29, 30) Twakuzanga chinji mandumbu jacho, nawa twakusakwilila ha kupwa no mu chikungulwila!
8. Mumu liaka akwa-kwambujola eswe ali ni ulemu kuli Yehova?
8 Shina mandumbu waze ali ni yiteli ni waze ali mu mulimo wa shimbu lieswe, e wika ali ni chihela mu chikungulwila? Ka, hi chocho ko! Mumu hita mukwa-kwambujola, kali mulemu chinji kuli Zambi ni mu chikungulwila. (Roma 10:15; 1 Kori. 3:6-9) Twatamba kwiwuluka ngwetu, chuma chilemu mu chikungulwila chili kutayisa tumbaji twa Mwene wetu, Yesu Kristu. (Mateu 28:19, 20; 1 Timo. 2:4) Akwa-kwambujola eswe waze hanapapachisa ni waze kanda achaapapachisa, kakusa tachi hanga ase mulimo wa kwambujola ha chihela chitangu ku mwono wo.—Mateu 24:14.
9. Mumu liaka mandumbu jetu a mapwo ali ni ulemu unji mu chikungulwila?
9 Yehova hanahane mulimo ulemu kuli mandumbu a mapwo mu chikungulwila. Iye kakulemesa mapwo waze hanasomboka, waze hanasema, tuliwa ni twamishi waze akumulingila ni ushishiko. Mu Mbimbiliya muli yilweza yinji yipema ya mapwo waze evwishile Zambi kuwaha. Mapwo jacho, kakwachichimieka chinji ha yilweza yo yipema ya mana, ufulielo, zango, hamu, kuhana, ni milimo yipema yize alingile. (Luka 8:2, 3; Yili. 16:14, 15; Roma 16:3, 6; Fwili. 4:3; Hepre. 11:11, 31, 35) Kwamba pundu, tunasakwilila chinji Yehova ha kutwaha mandumbu a mapwo mu chikungulwila waze akusolola yitanga yipema ngwe yino.
10. Mumu liaka twakulemesa mandumbu waze hashinakajiwa?
10 Twakuyuka nawa chinji hakupwa ni mandumbu waze hashinakajiwa mu yikungulwila yetu. Mandumbu amwe waze hashinakajiwa, kalihanyine mu mulimo wa Yehova ku mwono wo weswe. Akwo, kalilongesa umwenemwene ha miaka yino yene. Mandumbu wano eswe, kota kakupinda ni yipikalo yinji ha mukunda wa ushinakaji. Mumu lia yipikalo yino, muchihasa kupwa chikalu chinji kuli ayo kulinga milimo yimwe mu chikungulwila ni mu mulimo wakwambujola. Chipwe chocho, mandumbu wano hashinakajiwa, kakusa tachi hanga ambujole ni kutakamisa mandumbu akwo ni kwafumba! Kashika, mutuhasa kulilongesa chinji ha yuma yize hanapalika ku mwono wo. Kwamba pundu, mandumbu jetu waze hashinakajiwa kali alemu chinji kuli yetu ni kuli Yehova.—Yishi. 16:31.
11-12. Kuchi wakwivwa ha kumona yilweza yipema ya akweze a mu chikungulwila chenu?
11 Tuchinyongenu nawa hali akweze jetu. Hi chashi ko kuli ayo kukolela mu chifuchi chino anayulu kuli Satana ni malongeso jenyi a mahuza. (1 Yoa. 5:19) Chipwe chocho, twakutakama chinji ha kumona akweze jetu, kanahana makumbululo ha kukunguluka, kwambujola ni kukalila ufulielo wo ni hamu. Chochene, akweze, yenu nuli alemu chinji mu chikungulwila cha Yehova!—Samu 8:2.
12 Alioze, mandumbu amwe keshi kuhasa kutayiza ngwo, kali alemu chinji mu chikungulwila. Mba yika muyihasa kutukwasa hanga tunyingike ngwetu, hita mutu kali ni chihela mu chikungulwila?
NYINGIKA CHIHELA CHE MU CHIKUNGULWILA
13-14. Mumu liaka amwe akunyonga ngwo, keshi ni ulemu mu chikungulwila?
13 Tutalenu longeso liamuchiali lize twawana ha chilweza cha Paulu. Iye kanatoweza ha kapinda yoze atu anji ali nenyi musono, hakunyonga ngwo keshi ni ulemu mu chikungulwila. Paulu yasoneka ngwenyi: “Nyi kulu muliamba ngwenyi, Mumu yami hi nguli kwoko ko, kashika hi nguli chihanda cha ku mujimba ko; kuma hi lia ku mujimba ko, nyi? Nyi kachi twitwi muliamba ngwenyi, Mumu yami hi nguli liso ko, kashika hi nguli lia ku mujimba ko. Kuma hi lia ku mujimba ko, nyi?” (1 Kori. 12:15, 16) Yika Paulu azangile kushindakenya hano?
14 Nyi twapwa ni ndako ya kulitesa ni akwetu, mutumona ngwe kutushi ni ulemu mu chikungulwila. Hanji mu chikungulwila chenu muli mandumbu waze akulongesa kanawa, akululieka kanawa yuma mu chikungulwila, ni kutakamisa kanawa mapanga. Yena muhasa kunyonga ngwe kuushi kuhasa kulinga kanawa yuma ngwe chize ayo akuyilinga. Hi chipi ko kunyonga chocho, mumu chinasolola ngwo wakulikehesa. (Fwili. 2:3) Alioze, watamba kukeya. Nyi wapwa ni ndako ya kulitesa ni mandumbu waze akwete utotombo wa kulinga yimwe milimo mu chikungulwila, muhasa kulivwa ngwe kuushi ni ulemu. Ngwe chize Paulu ambile, hanji muhasa kulivwa ngwe kuushi kulinga nichimwe hanga ukwase chikungulwila. Kuchi muhasa kwehuka manyonga jacho?
15. Kulita ni 1 A-Korindu 12:4-11, yika twatamba kunyingika hakutwala ku yawana yize akutwaha?
15 Tuchinyongenu hachino: Ku sekulu yitangu, Yehova kahanyine kuli amwe akwa-Kristu yawana ya kulinga yikomokeso, alioze yawana yacho yapwile yalisa. (Tanga 1 A-Korindu 12:4-11.) Chipwe ngwe akwa-Kristu jacho katambwile yawana yalisa, nihindu Yehova te kakulemesa hita umwe wa kuli ayo. Musono, kutushi kutambula yawana ya kulinga yikomokeso ni spiritu yisandu. Alioze, chiyulo chacho chinatale ni hali yetu musono. Yetweswe, tuli ni utotombo walisa, chipwe chocho Yehova kakutulemesa chinji.
16. Chiyulo chika cha postolo Paulu chize twatamba kukaula?
16 Shimbu tulitese ni akwetu, twatamba kukaula chiyulo cha Paulu chinambe ngwo: “Mutu ni mutu akeseke chitanga chenyi mwene, chocho makapwa ni kulisamba chenyi ha kutwala kuli iye mwene wika, hi ha kutwala ku yuma ya mbala ko.”—Ngala. 6:4.
17. Yiwape yika mutuhasa kuzuka nyi twakaula chiyulo cha Paulu?
17 Nyi mutukaula chiyulo cha Paulu cha kulihulikila ha yitanga yetu, mutumona ngwetu kuma ni yetu tukwete umwe utotombo. Chakutalilaho, hanji umwe mukulwana wa mu chikungulwila keshi ni utotombo wa kuhanjika kanawa pande, alioze kali ni utotombo wa kutayisa tumbaji. Chikwo nawa, hanji keshi kululieka kanawa yuma mu chikungulwila ngwe chize makulwana akwo akulinga, alioze mahasa kupwa kafunga mupema, mwashi kuhanjika nenyi, nawa mapanga kakulivwa kanawa ha kumwita yiyulo. Hanji kakuzanga kuzumbula ngeji. (Hepre. 13:2, 16) Nyi twalihulikila ha yawana ni utotombo uze tukwete, mutuwahilila chinji. Mutunyingika nawa ngwetu, tuli ni uhashi wakukwasa chinji chikungulwila. Muchitukwasa nawa tuhone kwivwila akwetu chipululu, mumu lia kupwa ni utotombo walisa ni wa yetu.
18. Yika yakutukwasa kwokesa utotombo wetu mu mulimo wa kwambujola?
18 Chipwe ngwe eswe tuli ni chihela mu chikungulwila, nihindu yetweswe twatamba kulinga kanawa mulimo wetu ni kwokesa utotombo wetu. Nawa Yehova kakutukwasa ha chikuma chino. Iye kakutwaha fumbo lipema kupalikila mu ululikiso wenyi. Chakutalilaho, kukunguluka cha hakachi ka poso, chakutukwasa twokese utotombo wetu mu mulimo wa kwambujola. Shina unase tachi hanga ukaule yeswe yize wakulilongesa ha kukunguluka chacho?
19. Yika muyihasa kukukwasa mba uye ku Shikola ya Akwa-Kwambujola Wanangana?
19 Fumbo likwo kakutwahalio kupalikila ku Shikola ya Akwa-Kwambujola Wanangana. Mandumbu ali mu mulimo wa shimbu lieswe waze ali ni miaka 23 ndo 65, mahasa kuya ku shikola yacho. Hanji muhasa kumona ngwe kuushi ni uhashi wa kuya ku shikola yacho. Alioze, shimbu ulihulikile ha yuma yize muyikukwika kuya ku shikola yacho, lihulikile ha yuma yize mulinga hanga uyeko. Kusulaho, linga katalilo yoze makukwasa mba ujame ni kuya ku shikola yacho. Nyi mulikolweza, Yehova makukwasa hanga uyeko.
ZACHISA UTOTOMBO WE HANGA UKWASE CHIKUNGULWILA
20. Yika mutuhasa kulilongesa ha mukanda wa A-Roma 12:6-8?
20 Longeso liamuchitatu twawana ha chilweza cha Paulu, lili ha A-Roma 12:6-8. (Tanga.) Hano, Paulu kanambe nawa ngwenyi, hita mutu mu chikungulwila kali ni utotombo walisa. Alioze hano, iye yashindakenya ngwenyi, twatamba kuzachisa utotombo weswawo tukwete hanga tukwase ni kutakamisa chikungulwila.
21-22. Yika twalilongesa ha chilweza cha Robert ni Felice?
21 Tutalenu chilweza cha ndumbu yoze mutuvuluka ngwo, Robert. Kapwile ni kukalakala ku Mbetele ya mu chifuchi cheka, hakupalika cha mashimbu, yamutuma hanga akalakale ku Mbetele ya mu chifuchi cho. Chipwe ngwe kanyingikine ngwenyi kakalingile upi niumwe mba alumune chiteli chenyi, nihindu ndumbu Robert yamba ngwenyi: “Nyonga lipi lize napwile nalio hali yami mwene ha kulimona ngwe chishi ni ulemu, lianungine ha tukweji anji. Ha mashimbu amwe te nakunyonga kukatuka ku Mbetele.” Yika yamukwashile kupwa nawa ni uwahililo? Umwe mukulwana wa mu chikungulwila yamwiwulula ngwenyi, milimo yize Yehova atuhele kunyima, yakutukwasa mu mulimo uze tuli nayo haliapwila. Robert yanyingika ngwenyi, te katamba kuvulama yuma ya kunyima ni kulihulikila ha chiteli chaha.
22 Ndumbu Felice Episcopo neye kapalikile mu kapinda ngwe yono. Iye ni mukwo-pwo, kayile ku Shikola ya Ngiliate ha mwaka 1956, nawa yakalakala ngwe kalayi wa mbonge mu Bolívia. Ha mwaka 1964 yapwa ni mwana. Felice yamba ngwenyi: “Chapwile chikalu chinji kuli yetu ha kuhichika mulimo wetu. Ngunewuluka ngwami, nalingile mwaka wamuwundu ni kunenganyana. Ni ukwaso wa Yehova, yingwalumuna nyonga liami, chocho yingulihulikila ha chiteli chami chaha ngwe chisemi.” Shina ni yena hiunapalika mu kapinda ngwe wa Robert hanji wa Felice? Unanenganyana mumu kuushi nawa ni yiteli yize wapwile nayo? Nyi chenacho, alumuna nyonga lie, lihulikile ha yize muhasa kulinga haliapwila hanga ulingile Yehova ni mandumbu je. Lihulikile ha yuma ya ku spiritu, nawa kwasa akwenu ni utotombo uze uli nawo. Nyi wachilinga, muwahilila chinji nawa mutakamisa chikungulwila.
23. Ha yika twatamba kulihulikila, nawa yika mutulilongesa ha mutwe uze muusulaho?
23 Yetweswe tuli alemu chinji kuli Yehova. Iye kanazange hanga tununge mu ululikiso wenyi. Nyi twalihulikila ha chize mutuhasa kutakamisa mandumbu jetu, ni kulinga kanawa mulimo uze Yehova anatwehe, mutumona ngwetu, tuli ni chihela mu chikungulwila chenyi! Mba yika mutwamba hali mandumbu akwo mu chikungulwila? Kuchi mutuhasa kusolola ngwetu twakwalemesa? Mutwe uze muusulaho, muushindakenya ha chikuma chino chilemu.
MWASO 24 Tweyenu ku Mulundu wa Yehova
^ kax. 5 Tulieswe twakuwahilila chinji ha kunyingika ngwo, Yehova kakutulemesa. Alioze, ha mashimbu amwe mutuhasa kulihula ngwetu, ‘Chihela chika ngukwete mu chikungulwila?’ Mutwe uno muusolola ngwo, hita ndumbu kali ni mulimo ulemu mu ululikiso wa Yehova.
^ kax. 3 ULUMBUNWISO WA AMWE MALIJI: Chihela chize tukwete mu chikungulwila cha Yehova, chinalumbunuka mulimo uze hita umwe wa kuli yetu ali nayo wakukwasa chikungulwila ni kuchitakamisa. Chipwe ngwe tuli aku minyachi yalisa, pichi hanji yiswale, nihindu mutuhasa kukwasa chikungulwila cha Yehova.
^ kax. 62 ULUMBUNWISO WA YIZULIE: Yizulie yino yitatu, yinasolola yize yakulingiwa muze kukunguluka kanda chichiputuka, muze hichaputuka ni muze hichahwa. Chizulie 1: Mukulwana wa mu chikungulwila kanatambwisa umwe mutu yoze weza ha kukunguluka, umwe mukweze wa lunga kanalulieka yisaji, mukweze wa pwo kanahanjika ni umwe ndumbu wa pwo yoze hashinakajiwa. Chizulie 2: Akweze ni mandumbu waze hashinakajiwa, kanazundula moko hanga akumbulule ha kukunguluka. Chizulie 3: Amwe waze alimbata kanakombo ni kululieka mu Zuwo lia Wanangana. Umwe mama kanakwase mwanenyi kusa mbongo mu mushete wa milambu. Umwe mukweze kanalulieka mikanda ya mu chikungulwila, nawa umwe ndumbu wa lunga kanatakamisa ndumbu yoze hashinakajiwa.
