MUTWE WAKULILONGESA 31
Shina Uli ni Mbunge ya Kutwaminyina Muli Yehova?
“Mungutwaminyina Zambi ya ulamwino wami.”—MIKA 7:7.
MWASO 128 Nyongononenu Ndo Kusongo
CHIKUMA CHILEMU a
1-2. Yika mutumona ha mutwe uno?
KUCHI wakwivwa nyi muwita akunehene chuma chize unazange chinji, alioze mahona kukunehenacho ha shimbu lize unachifupu? Shina wakupihilila? Kota wakwivwa yize tunawane ha Yishima 13:12 ngwo: “Kutalatala chize kuchishi kumoneka kuchakuhongesa mbunge.” Mba nyi munyingika ngwo, chuma wetanga kanda chichiheta mumu lia chimwe chikuma chipema? Chino kota muchikukwasa hanga ushimbwile ni uhumikizo.
2 Ha mutwe uno, mutulilongesaho shimbi jimwe ja mu Mbimbiliya jize mujihasa kutukwasa hanga ‘tutwaminyine ni uhumikizo.’ (Mika 7:7) Mutumona nawa yuma yaali yize twatamba kutwaminyina muli Yehova ni uhumikizo hanga alulieke yuma. Kusulaho, mutumona yiwape yize Yehova analakenya kuli waze ali ni mbunge ya kutwaminyina muli iye.
SHIMBI JA MU MBIMBILIYA JIZE JAKUTUKWASA KULIHUMIKIZA
3. Yika mukanda wa Yishima 13:11 unatulongesa?
3 Mukanda wa Yishima 13:11 unatulongesa chize mutuhasa kupwa yihumikiji. Unambe ngwo: ‘Upite wa kutambula kawashi-washi muukatepuluka; alioze yoze makunga hakehe-hakehe kumakaliwezela.’ Yika chisoneko chino chinatulongesa? Chinatulongesa ngwo, mukwa-mana kakulinga yuma ni uhumikizo ha kuyilinga hakehe-hakehe, nawa chino chakumuyukisa.
4. Shimbi yika tunawane mu mukanda wa Yishima 4:18?
4 Mukanda wa Yishima 4:18 unambe ngwo: “Jila ya mukwa ululi yapwa ngwe kutemuka cha kucha; chakuliwezela tachi ndo tangwa ha muchima.” Maliji wano, kanatale ha chize Yehova akukwasa tuvumbi twenyi hanga anyingike upale wenyi—chino chakulingiwa hakehe-hakehe. Alioze versu yino, yakutukwasa nawa kunyingika chize mukwa-Kristu akwalumuna yitanga ku mwono wenyi hanga akundame kuli Yehova. Kukola ku ufulielo kuchishi kulingiwa kawashi-washi, chakumbata mashimbu. Nyi twapwa ni kulilongesa kanawa Mbimbiliya ni kukaula yiyulo yamo ni ya mu ululikiso wa Yehova, hakehe-hakehe mutuputuka kwimbulula yitanga ya Kristu. Chikwo nawa, mutunyingika kanawa Zambi. Tutalenu chishima chimwe chize Yesu atele hanga alumbunune kanawa chikuma chino.
Chizechene mutondo wa kukola hakehe-hakehe, ni mutu yoze unevu sango ja Wanangana neye kakukola ku ufulielo hakehe-hakehe (Tala paragrafu 5)
5. Chishima chika Yesu atele chinasolola ngwo mutu kakukola ku ufulielo hakehe-hakehe?
5 Yesu katele chimwe chishima hanga alumbunune chize sango ja Wanangana ja kukola mu mbunge ya atu waze akuzanga yuma yipema. Iye yamba ngwenyi: “Mbuto muyisoka, nikusuha, [njimi] kanyingikine chize yakutatuka. Mumu hashi kuhakwima mbuto yahohene, hatangu mafwo, kulutwe lia chize mutwe, kulutwe nawa lunona wa too ha mutwe.” (Marku 4:27, 28) Yika Yesu te anambe kwamba hano? Iye te kanalumbununa ngwenyi, chizechene ngwe mutondo wa kukola hakehe-hakehe, ni mutu yoze wakutayiza sango ja Wanangana neye kakukola hakehe-hakehe. Chakutalilaho, muze longi wa Mbimbiliya akuputuka kukundama kuli Yehova, hakehe-hakehe twakumona yize iye analumuna ku mwono wenyi. (Efwe. 4:22-24) Alioze kutwatambile kuvulama ngwetu, Yehova mwe wakutatwisa mbuto yacho.—1 Kori. 3:7.
6-7. Yika twalilongesa ha chize Yehova atangile hashi?
6 Yehova kakulinga yuma yeswe ni uhumikizo. Mba ayilinge, iye kakufupiwa mashimbu eswawo mahasa ha kunyonga chize mahalisa jina lienyi ni kukwasa akwo. Chakutalilaho, tala chize Yehova aluliekele hashi hakehe-hakehe hanga atu atwameho.
7 Ha kulumbununa chize Yehova atangile hashi, Mbimbiliya yinambe ngwo, iye wasele “cheseko chaho,” wakolesele “fundamentu” ni kusa “liwe liaho lia mbango.” (Yombi 38:5, 6) Iye nawa kasele mashimbu hanga ahengwole yuma yize atangile. (Uputu. 1:10, 12) Achinyonga chize angelo evwile muze amwene yuma yeswe yize Yehova atangile! Ayo kanakawahilila chinji. Kashika Mbimbiliya yinambe ngwo, “alikwijile ni chiseke.” (Yombi 38:7) Yika twalilongesa? Twalilongesa ngwetu, kwapalikile tununu a tununu twa miaka mba Yehova ahwise kutanga yuma, yuma yacho yapemene chinji mumu kayitangile hakehe-hakehe. Kashika, muze amanyine ni kuyitala, Yehova yamba ngwenyi “yinapeme chikolo.”—Uputu. 1:31.
8. Yika mutushimutwina haliapwila?
8 Ngwe chize yilweza twashimutwina helu yasolola, shimbi jinji ja mu Liji lia Zambi jakutulongesa ulemu wa kupwa yihumikiji. Haliapwila, tushimutwinenu yikuma yaali haze mutuhasa kusolola mbunge ya kutwaminyina muli Yehova.
HA MASHIMBU AKA MUTUFUPIWA KUTWAMINYINA MULI YEHOVA?
9. Ha chikuma chika mutufupiwa kutwaminyina muli Yehova?
9 Hanji mutufupiwa kutwaminyina muli Yehova hanga akumbulule yilemba yetu. Ha mashimbu amwe, twakulemba kuli Yehova hanga atwehe tachi ja kukumba umwe kapinda hanji atukwase kukumba umwe ulelu. Mutuhasa kunyonga ngwetu, Yehova kanashimbula chinji ha kukumbulula yilemba yetu. Mba mumu liaka Yehova keshi kukumbulula yilemba yetu yeswe ha mashimbu aze ene?
10. Muze tunalembe, mumu liaka mutufupiwa uhumikizo?
10 Muze tunalembe, Yehova kakutupanjika kanawa. (Samu 65:2) Kuli Yehova, yilemba yetu ya ku mbunge yakusolola ngwo, twakumufuliela. (Hepre. 11:6) Muze twakulemba, Yehova kakusa shindakenyo hanga amone nyi yilemba yetu yinakatuka ku mbunge. Iye nawa kakutala nyi tunase tachi tulinge yuma kulita ni yize tweta mu yilemba. (1 Yoa. 3:22) Kashika, muze tunalembe kuli Yehova hanga atukwase kukumba yimwe ndako yipi chipwe umwe ulelu, hanji mutufupiwa uhumikizo ni kusa tachi jinji hanga twalumune yimwe ku mwono wetu. Yesu katukwashile kunyingika ngwo, yilemba yetu yimwe te kechi kuyikumbulula kawashi-washi. Yamba ngwenyi: “Etenu, mba kumanwaha; fupenu, mba kumunuwana; ngongwelenu, mba kumanwazulwila. Mumu mweswe meta, matambula; yoze mafupa, mawana; yoze mangongwela, kumamwazulwila.” (Mateu 7:7, 8) Nyi ‘mutununga ni kulemba’ mutuhasa kupwa ni shindakenyo ngwetu, Tata yetu wa mu malilu matupanjika ni kukumbulula yilemba yetu.—Kolo. 4:2.
Muze tunatwaminyina muli Yehova, twatamba kununga ni kulemba kuli iye ni ufulielo (Tala paragrafu 11) b
11. Nyi twamona ngwetu yilemba yetu keshi kuyikumbulula ni kawashi, kuchi A-Hepreu 4:16 muuhasa kutukwasa?
11 Chipwe ngwe kumbululo lia yilemba yetu mulisoloka ngwe linashimbula, nihindu twatamba kwiwuluka ngwetu, Yehova hanalakenya kukumbulula yilemba yetu ha “mwaka wa chikala.” (Tanga A-Hepreu 4:16.) Kashika, nyi yilemba yetu kayikumbulwile kawashi-washi ngwe chize tunazange, kutwatambile kunyonga ngwetu Yehova kalimbenja. Chakutalilaho, atu anji kakulemba ha miaka yinji hanga Wanangana wa Zambi wize ni kunongesa yuma ya mwakono. Yesu mwene katulwezele hanga tulembe ha chikuma chino. (Mateu 6:10) Alioze chili uhepuke kwecha kufuliela muli Yehova mumu ngwo, songo kuliahetele ha shimbu lize te tunazange! (Haba. 2:3; Mateu 24:44) Chuma chalita kulinga chili kushimbwila muli Yehova ha kulemba ni shindakenyo yeswe ngwo, iye makumbulula yilemba yetu. Songo mulikaheta ha shimbu lialita, mumu Yehova hanatese ‘tangwa ni ola’ yize songo muliheta. Nawa mulikapwa shimbu lialita kuli atu eswe.—Mateu 24:36; 2 Petu. 3:15.
Chilweza chika cha uhumikizo chize Yosefwe anakatuhichikila? Yika twalilongesa ha kulihumikiza cha Yosefwe? (Tala maparagrafu 12-14)
12. Ha yika muchihasa kukaliwa kuli yetu kupwa yihumikiji?
12 Hanji mutufupiwa kutwaminyina muli Yehova hanga alulieke yuma. Hano hashi, kanji-kanji atu kakumwesa lamba mapwo, malunga, atu waze akwete chikowa cheka, munyachi hanji chifuchi cheka. Akwo kakwamwesa lamba mumu lia utonji hanji mahesu-hesu. Yela ja Yehova anji kakwalinga yuma yipi hamukunda wa ufulielo wo uze unakatuka mu Mbimbiliya. Kashika muze mutupalika mu yuma yacho yipi, twatamba kwiwuluka yize Yesu ambile ngwenyi: “Mweswe manyongonona ndo ku songo, kumakamulamwina.” (Mateu 24:13) Mba yika watamba kulinga nyi munyingika ngwo, umwe mu chikungulwila kalinga shili yinene? Muze makulwana a mu chikungulwila manyingika shili yacho, shina mwecha yuma mu moko jo? Kutala mushimbwila ndo muze masopa mulonga wacho kulita ni shimbi ja Yehova? Ha chikuma ngwe chino, makulwana kakukaula yimwe yikuma. Tutalenu yikuma yacho.
13. Yika Yehova anashimbwila hali makulwana nyi umwe ndumbu malinga shili yinene?
13 Muze makulwana akunyingika ngwo, umwe ndumbu kalinga shili yinene, ayo kakulemba ni kwita “mana a kwilu” hanga amone chikuma chacho ngwe chize Yehova anachimono. (Tia. 3:17) Nyonga lio liakupwa nyi muchilita kukwasa chivulumunyi hanga ‘eche jila yenyi yipi.’ (Tia. 5:19, 20) Ayo nawa kakuzanga kulinga yeswayo mahasa hanga afunge chikungulwila ni kutakamisa waze anamono lamba ha shili yacho. (2 Kori. 1:3, 4) Hakutwala ku shili yinene, makulwana katamba chitangu kuhengwola yikuma yeswe yize yinatale ha shili yacho, chino muchihasa kumbata mashimbu. Hachino, ayo kakulemba, nawa ni vumbi lieswe kakuhana yiyulo yinakatuka mu Mbimbiliya ni kufumba mutu yoze walinga shili ‘kulita ni yize alinga.’ (Jere. 30:11) Chipwe ngwe, makulwana keshi kushimbula muze mevwa ngwo umwe ndumbu kalinga shili yinene, nihindu, ayo keshi kulipupula kukwata chiyulo. Muze makulwana akukaula usongwelo wa Yehova ha chikuma ngwe chino, mandumbu eswe mu chikungulwila kakuyuka. Alioze chipwe ngwe makulwana masopa mulonga wacho mu jila yalita, nihindu ndumbu yoze alinga upi wacho, mahasa kununga ni kupihilila. Shina yino ye unapalika? Nyi ye unapalika, kuchi muhasa kuhuzulula yikola yize unevu?
14. Nyi umwe ndumbu makulemeka ku mbunge, chilweza chika cha mu Mbimbiliya chize muchihasa kukukwasa?
14 Shina hanakulingi yuma yipi kuli umwe ndumbu mu chikungulwila? Nyi chenacho, muhasa kuwana yilweza yipema mu Liji lia Zambi yize yakutulongesa chize mutushimbwila muli Yehova hanga alulieke yuma. Chakutalilaho, Yosefwe kamulingile yuma yipi kuli mandumbu jenyi, chipwe chocho kakechele yuma yacho yimupwise mutu mukalu. Shimbu achilinge, iye yanunga ni kusa tachi hanga alingile Yehova, yalihumikiza ni kunyongonona. Hachino, Yehova yamuwahisa. (Uputu. 39:21) Hakupalika cha mashimbu, Yosefwe yahasa kukonekena mandumbu jenyi. (Uputu. 45:5) Chizechene ngwe Yosefwe, ni yetu twakuwana utakamiso muze twakukundama kuli Yehova ni kwecha hanga iye alulieke yuma ha shimbu lialita.—Samu 7:17; 73:28.
15. Yika yakwashile umwe ndumbu wa pwo kulengulula yuma yipi yize amulingile?
15 Kwamba pundu, yuma yeswe yipi yize twakupalika, kuyishi ngwe yize Yosefwe apalikile, alioze yetweswe twakwivwa yikola ku mbunge muze akutulinga yuma yipi. Nyi tuli ni mulonga ni umwe ndumbu, hanji ni mutu yoze keshi kuwayila Yehova, chuma chipema twatamba kulinga chili kukaula shimbi ja mu Mbimbiliya. (Fwili. 2:3, 4) Tutalenu yize yalingiwile kuli umwe ndumbu wa pwo. Iye kevwile ngwo, mukwa-mulimo-ni-mukwo kalwezele akwo yuma yipi hakutwala kuli iye. Shimbu alinge yuma ni kalusu-lusu, iye yanyonga ha chilweza cha Yesu. Muze amutukile, Yesu kakatukanyine. (1 Petu. 2:21, 23) Muze anyongene ha chisoneko chino, ndumbwetu yalengulula yuma yacho. Kulutwe, yanyingika ngwenyi, mukwa-mulimo-ni-mukwo te kali ni musongo upi nawa te kanasakalala. Chocho, ndumbwetu yanyingika ngwenyi mutu wacho kakapwile ni nyonga lia kumulemeka ku mbunge. Hachino, yawahilila ha chize asolwele uhumikizo, nawa yapwa ni sambukila.
16. Nyi unapalika mu yuma yipi, yika muyihasa kukutakamisa? (1 Petulu 3:12)
16 Nyi unamono lamba mumu lia yuma yipi yize akulingile hanji yuma yeswayo, nyingika ngwe Yehova kali hehi ni “waze amakuka mbunge.” (Samu 34:18) Pwako ni shindakenyo ngwe, Yehova kakukuzanga ha kulihumikiza ni kumbila yiteli ye yeswe hali iye. (Samu 55:22) Iye kali Ngaji wa hashi heswe. Kukushi chuma nichimwe chize Yehova keshi kumona. (Tanga 1 Petulu 3:12.) Kashika, nyi mupalika mu umwe kapinda yoze kuuchi kuhasa kuhwisa, chuma chalita kulinga chili kushimbwila muli Yehova hanga alulieke yuma.
WAZE AKUTWAMINYINA MULI YEHOVA MAKAAWAHISA KU MIAKA YESWE
17. Kulita ni Izaia 30:18, yika Yehova anatulakenya?
17 Kwasala hakehe, Tata yetu wa mu malilu matuwahisa kupalikila mu Wanangana wenyi. Mukanda wa Izaia 30:18 unambe ngwo: “Yehova kanashimbula akanulinge vumbi; kashika kanalinangamisa ha kunuvwila keke. Mumu Yehova iye Zambi ya ululi, kawaha waze mamutwaminyina.” Waze manunga ni kutwaminyina muli Yehova, matambula yiwape yinji haliapwila ni mu chifuchi chaha.
18. Yiwape yika tunashimbwila?
18 Muze atu ja Zambi makanjila mu chifuchi chaha, ayo keshi kasakalala chipwe kulipikala ha lamba lize anamono musono. Mumu yuma yeswe yipi hamwe ni yikola muyikahwa. (Uso. 21:4) Kutuchi kalipikala nawa ha yuma yize mutufupiwa ku mwono mumu mukukapwa yuma yinji. (Samu 72:16; Iza. 54:13) Mwono mu chifuchi chaha muukapema chinji kuhiana!
19. Mumu liaka Yehova anatululieka hakehe-hakehe?
19 Ha shimbu lieswalio Yehova matukwasa kukumba yimwe ndako yipi hanji kupwa ni chimwe chitanga cha Ukristu, iye kanatululieka hanga tukatwame mu chifuchi chaha. Kashika kanda tuhonga, chipwe kulitwamina kuwayila Yehova. Mumu yuma yipema kuyineza! Amu tunashimbwila yuma yacho, tunungenu ni kutwaminyina muli Yehova ni uhumikizo weswe hanga amanunune yuma yeswe yize analakenya!
MWASO 118 “Weza Kama ku Ufulielo Wetu”
a Kota hiunevu umwe kavumbi ka Yehova yoze wakumulingila ha miaka yinji mamba ngwenyi, ‘Chakanyongene ngwami chifuchi chino muchinunga ndo ni musono.’ Chipi-chipi ha mashimbu wano akalu tuli, yetweswe tunashimbwila tangwa lize Yehova mahwisa lamba lieswe hano hashi. Alioze tunafupiwa kupwa ni uhumikizo. Ha mutwe uno, mutulilongesaho jimwe shimbi ja mu Mbimbiliya jize mujihasa kutukwasa hanga tutwaminyine muli Yehova ni uhumikizo. Mutumonaho nawa yuma yaali yize twatamba kutwaminyina muli Yehova ni uhumikizo weswe. Kusulaho, mutulilongesa yuma yipema yize Yehova makalingila waze ali ni mbunge ya kutwaminyina muli iye.
b ULUMBUNWISO WA CHIZULIE: Umwe ndumbu wa pwo chize ku wanuke wenyi kakulemba kuli Yehova matangwa eswe. Yisemi jenyi kamulongesele kulemba ku wanuke. Muze hapwa mukweze, yapwa pionelu nawa te kakulemba mashimbu eswe hanga Yehova awahise mulimo wenyi wa kwambujola. Kulutwe, muze mukwo-lunga ayijile, iye yaliumba kuli Yehova hanga amwehe tachi anyongonone mu kapinda wacho. Musono kali tuliwa, nihindu kananungu ni kulemba ni shindakenyo yeswe ngwo, Yehova makumbulula yilemba yenyi ngwe chize akulinga ku mwono wenyi weswe.
