MUTWE WAKULILONGESA 33
Wahilila ni Yiteli Yize Uli Nayo mu Mulimo wa Yehova
“Kuzangazanga naye kuchakuyukishile; shinaho kumona ni meso.”—CHILU. 6:9.
MWASO 111 Yuma Yize Yakutuvwisa Kuwaha
CHIKUMA CHILEMU a
1. Yika mandumbu anji analingi hanga alihane chinji mu mulimo wa Yehova?
AMU songo lia hano hashi linayi ni kukundama, tunapu ni milimo yinji mu ululikiso wa Yehova. (Mateu 24:14; Luka 10:2; 1 Petu. 5:2) Yetweswe tunazange kulinga yeswayo mutuhasa mu mulimo wa Yehova. Mandumbu anji kanakalakala chinji mu mulimo wa kwambujola. Amwe kanazange kupwa mapionelu. Akwo kanazange kukalakala ku Mbetele hanji ku mulimo wa kutunga mazuwo. Nawa mandumbu anji kanase tachi hanga apwe tuvumbi ni makulwana mu chikungulwila. (1 Timo. 3:1, 8) Yehova kakuwahilila chinji muze akumona tuvumbi twenyi malihana hanga amulingile kulita ni uhashi wo.—Samu 110:3; Iza. 6:8.
2. Kuchi mutuhasa kulivwa nyi kutwahashile kulinga yimwe yize twatesele ku ufulielo?
2 Alioze ha mashimbu amwe, kutushi kuhasa kulinga milimo yimwe, hanji kupwa ni yiteli yize tunazange mu mulimo wa Yehova. Hachino, mutuhasa kuhonga. Hanji mutuhasa kunenganyana, mumu kutuchi kuhasa kulinga milimo yimwe hamukunda wa miaka yize tuli nayo, hanji yuma yimwe muyihasa kutukwika kupwa ni yiteli yize tunazange. (Yishi. 13:12) Yino ye yalingiwile kuli Melissa. b Iye kazangile chinji kukalakala ku Mbetele hanji kuya ku Shikola ya Akwa-Kwambujola Wanangana. Yamba ngwenyi: “Haliapwila hinapwa kashinakaji, kashika kuchichi kuhasa nawa kulinga milimo yacho. Ha mashimbu amwe, muze nakunyonga ha yino nakunenganyana.”
3. Yitanga yika amwe atamba kupwa nayo shimbu kanda achaaha yimwe yiteli?
3 Akweze mahasa kupwa ni kapinda mweka. Amwe a kuli ayo kali ni mana anji, kakukwata yiyulo ni kawashi nawa kali ni tachi ja kukalakala. Alioze hanji mafupiwa kupwa yihomboloji, kulinga yuma kanawa ni kupwa ni vumbi. Nyi ayo masa tachi hanga apwe ni yitanga yize yinafupiwa kuli akwa-Kristu, yiteli muyilijila yene nawa muyiza ha mashimbu waze keshi ni kuyishimbwila. Tala yize yalingiwile kuli Nick. Muze apwile ni miaka 20, iye kevwile yikola ku mbunge mumu lia kuhona kumutongola ngwe kavumbi. Mwene yamba ngwenyi: “Ami te nakunyonga ngwe napwile ni kulinga yimwe yuma yipi.” Alioze Nick kakahongele, yalinga kanawa milimo yize apwile nayo mu chikungulwila. Musono kanakalakala ngwe mukulwana wa mu Komite ya Mutango.
4. Yika mutwe uno muusolola?
4 Shina unanenganyana mumu kanda uchipwa ni yiteli yize watesele mu mulimo wa Yehova? Nyi chocho, lweza Yehova chize unevu. (Samu 37:5-7) Chikwo nawa, eta yiyulo kuli mandumbu ajama hanga akukwase kumona chize muhasa kulihana chinji mu mulimo wa Yehova. Nawa sako tachi hanga ukaule yiyulo yize makwaha. Nyi wachilinga, muhasa kupwa ni chimwe chiteli hanji kulinga yize watesele mu mulimo wa Yehova. Alioze ngwe chize chalingiwile kuli Melissa, yoze hitwatongola, chiteli chize unazange musono hanji kuushi ni uhashi wa kupwa nacho. Nyi chenacho, kuchi muhasa kununga ni kuwahilila? Mba tukumbulule chihula chino, mutwe uno musolola (1) yize muyihasa kukwaha uwahililo, (2) chize muhasa kuwahilila chinji, ni (3) yize muhasa kutesa ku ufulielo mba uwahilile chinji.
YIZE MUYIHASA KUKWAHA UWAHILILO
5. Ha yika twatamba kulihulikila mba tuwahilile? (Chilumbununyi 6:9)
5 Mukanda wa Chilumbununyi 6:9, unasolola yize muyihasa kutwaha uwahililo. (Tanga.) Mutu yoze wakuwahilila ni yize ‘anamono ni meso’ kakulemesa yize ali nayo, chekwamba, kakuwahilila ni yize analingi ha mashimbu jacho. Chikwo nawa, mutu yoze wakufupa kupwa ni yize anazange chinji, kakufupa yuma yize keshi ni uhashi wa kupwa nayo. Yika twalilongesa hano? Twalilongesa ngwetu, mba tuwahilile twatamba kulihulikila ha yize tuli nayo, ni ha yize mutulinga mu mulimo wa Yehova kulita ni uhashi wetu.
6. Chishima chika cha Yesu mutuhengwola, nawa yika muchitulongesa?
6 Shina chili lume chashi kuwahilila ni yize tuli nayo? Atu anji kakunyonga ngwe hi chashi ko, mumu kakuzanga kupwa ni yuma yaha. Alioze kwamba umwenemwene, chili chashi kuwahilila ni yuma yize tuli nayo. Ngwe chize twamona, kutuchi kutayiza wika yize ‘tunamono ni meso,’ alioze mutuhasa kuwahilila ni yize tuli nayo haliapwila. Mumu liaka tunambe chocho? Mba tukumbulule chihula chino, tuhengwolenu chishima cha talentu chize Yesu atale ha Mateu 25:14-30. Ha chishima chacho, mutumona yize mutulilongesa mba tuwahilile ni yize tuli nayo haliapwila ni kwokesa uwahililo wacho.
CHIZE MUHASA KUWAHILILA CHINJI
7. Lumbununa chishima cha Yesu cha mbongo ja talentu.
7 Ha chishima cha mbongo ja talentu, Yesu yamba ngwenyi, umwe lunga te kanambe kuya wenyi. Shimbu te kanda achiya, iye yasanyika ndungo jenyi, yaaha mbongo hanga alinge najo mingoso. c Iye te kananyingika ngwenyi, ndungo jenyi kakwete utotombo walisa. Chocho yahana mbongo jitano kuli ndungo umwe, mukwo yamwaha jaali, wamuchitatu yamwaha lumbongo umuwika. Ndungo mutangu ni wamuchiali, yalihana chinji ni kukalakalila mwene wo, alioze wamuchitatu kalingile nichimwe ni mbongo jize amuhele.
8. Mumu liaka ndungo mutangu te mahasa kuwahilila?
8 Ndungo mutangu kota kanakawahilila ha kutambula talentu jitano hanga alinge najo mingoso. Mbongo jacho japwile jinji, nawa jasolwele ngwo mwene wenyi te kakumujikijila! Mba yika mutwamba hali ndungo wamuchiali? Iye kachi kanenganyanyine, mumu kakamuhele mbongo jinji ngwe jize ahanyine kuli ndungo mutangu. Mba yika iye alingile?
Yika twalilongesa hali ndungo wamuchiali wa ha chishima cha Yesu? (1) Mwene wenyi kamuhele mbongo jaali ja talentu. (2) Kasele tachi jinji hanga azukile mwene wenyi mbongo jikwo. (3) Yawezela mbongo jikwo helu lia jize amuhele (Tala maparagrafu 9-11)
9. Yika yize Yesu kakambile hali ndungo wamuchiali? (Mateu 25:22, 23)
9 Tanga Mateu 25:22, 23. Yesu kakambile ngwenyi, ndungo wamuchiali kanenganyanyine mumu lia kumwaha wika talentu jaali. Kakambile nawa ngwenyi, ndungo wacho kanakalinyenyeta hakwamba ngwenyi: ‘Iye kangwaha wika talentu jaali, alioze yami ngukwete utotombo unji kuhiana ndungo yoze watambula talentu jitano! Amu mwene wami keshi kungujikijila, kashika munguvumbika mbongo jino jaali mu mavu hanga ngulinge mingoso yami.’
10. Yika ndungo wamuchiali alingile ni talentu jize amuhele?
10 Chizechene ngwe ndungo mutangu, wamuchiali neye kalemesene chinji chiteli chize amuhele kuli mwene wenyi ni kumukalakalila chinji. Chocho, yokesa mbongo helu lia mbongo jize amuhele. Hachino, yamuwahisa ha utotombo ni ha tachi jize asele. Mwene wenyi kakawahililile wika ha yize alingile, alioze yamuwezela nawa yiteli yikwo!
11. Kuchi muhasa kupwa ni uwahililo unji?
11 Nyi mutulinga kanawa mulimo weswawo matwaha mu ululikiso wa Yehova, mutupwa ni uwahililo unji. Kashika, ‘hondangana chinji’ mu mulimo wa kwambujola ni kulinga kanawa milimo yize makwaha mu chikungulwila. (Yili. 18:5; Hepre. 10:24, 25) Lulieka kukunguluka hanga ukahane makumbululo autakamiso. Lemesa yihanda yize wakutambula ha kukunguluka cha hakachi ka poso. Nyi makulwana a mu chikungulwila makwita hanga ulinge umwe mulimo, ulinge ni kawashi nawa pwako mutu yoze majikijila. Kanda unyonga ngwe mulimo uze akwaha kuushi ni ulemu, nawa ngwo kuwafupiwile kusa mashimbu hanga uulinge. Zachisa uhashi weswawo muupwa nawo hanga ululieke utotombo we. (Yishi. 22:29) Nyi mulihana chinji, muujama chinji, nawa chino muchikukwasa hanga uwahilile. (Ngala. 6:4) Chikwo nawa, muchipwa chashi kuwahilila muze akwenu matambula yiteli yize yena wakuzanga.—Roma 12:15; Ngala. 5:26.
12. Yika Melissa ni Nick alingile mba apwe ni uwahililo unji?
12 Shina unewuluka Melissa, yoze wazangile kukalakala ku Mbetele ni kuya ku Shikola ya Akwa-Kwambujola Wanangana? Iye kakahashile kulinga yize atesele, alioze tala yize ambile: “Nakulihana chinji mu mulimo wami wa upionelu, nawa nakusa tachi hanga ngwambujole sango lipema ha kuzachisa majila eka ni eka. Yino yakungwaha uwahililo unji.” Mba yika Nick alingile muze ahonene kumutongola ngwe kavumbi? Mwene yamba ngwenyi: “Ngunakalihulikila ha yiteli yize napwile nayo ya kwambujola ni kuhana makumbululo ha kukunguluka. Chikwo nawa, ngunakasoneka petisau ya kuya ku Mbetele, ha mwaka wasulileho yangusanyika.”
13. Yika muzuka nyi walinga kanawa milimo yize uli nayo haliapwila? (Chilumbununyi 2:24)
13 Nyi walinga kanawa milimo yize uli nayo haliapwila, shina mutambula nawa yiteli yikwo kulutwe? Chino muchihasa kulingiwa ngwe chize chalingiwile kuli Nick. Alioze chipwe ngwe yize unapalika yinalifu ni ya Melissa, nihindu muhasa kuwahilila ha yize unalingi mu mulimo wa Yehova. (Tanga Chilumbununyi 2:24.) Nawa muwahilila chinji kuhiana ha kunyingika ngwo, Mwene wetu, Yesu Kristu, kakuwahilila chinji ha tachi jize wakusa.
YIZE MUHASA KUTESA KU UFULIELO MBA UWAHILILE CHINJI
14. Shina chili chipi kusa tachi hanga tutese yimwe ku ufulielo? Lumbununa.
14 Nyi tunalingi kanawa mulimo wa Yehova musono, shina chinalumbunuka ngwo kutwatambile kusa tachi hanga tulihane chinji mu mulimo wenyi? Ka, hi chocho ko! Mutuhasa kutesa kulinga yimwe ku ufulielo. Yuma yize mututesa, muyitukwasa kulinga kanawa mulimo wa kwambujola ni kulongesa, nawa mutukwasa chinji mandumbu jetu. Alioze mba tumanunune yize twatesele, twatamba kupwa ni mana ni kulikehesa: ha kulihulikila ha kukwasa akwetu, shimbu tulihulikile hali yetwene.—Yishi. 11:2; Yili. 20:35.
15. Yika muhasa kutesa ku ufulielo mba wokese uwahililo we?
15 Yuma yika muhasa kutesa kulinga ku ufulielo? Eta kuli Yehova hanga akukwase kunyingika yize mutesa ku ufulielo ni kuyimanununa kulita ni uhashi we. (Yishi. 16:3; Tia. 1:5) Shina muhasa kupwa pionelu wa shimbu likehe, pionelu wa shimbu lieswe, kukalakala ku Mbetele, hanji kulinga mulimo wa kutunga? Kutala muhasa kulihana chinji mu mulimo wa kwambujola ha kulilongesa limi lieka hanji kuya ni kukwasa mu chifuchi chikwo? Mba unyingike sango jinji ha chikuma chino, tanga kapitulu 10 wa mukanda, Ululikiso Uze Unalingi Upale wa Yehova, hanji kuhanjika ni makulwana a mu chikungulwila chenu. d Muze mununga ni kusa tachi hanga umanunune yize watesele ku ufulielo, mandumbu eswe machimona nawa muwahilila chinji.
16. Yika muhasa kulinga haliapwila nyi kuwahashile kulinga yize watesele ku ufulielo?
16 Mba nyi ha mashimbu wano kuwahashile kulinga yuma yize twatongola helu? Nyi chocho, tesa yuma ya ku ufulielo yize muhasa kulinga kulita ni uhashi we. Tala chize muhasa kuyilinga.
Yuma yika ya ku ufulielo yize muhasa kutesa kulinga? (Tala paragrafu 17) f
17. Kulita ni 1 Timoteu 4:13, 15, yika umwe ndumbu atamba kulinga mba apwe longeshi mupema?
17 Tanga 1 Timoteu 4:13, 15. Nyi uli ndumbu wa lunga yoze hanapapachisa, muhasa kusa tachi hanga upwe ni kulinga kanawa pande ni kulongesa kanawa. Mumu liaka? Mumu nyi walihulikila ha kululieka kutanga, pande ni kulongesa che, mukwasa atu waze akukupanjika. Lilongese ni kukaula yikuma yize yili mu mukanda, Likolweze Kutanga ni Kulongesa. Lilongese chikuma chimuwika ha hita chisuho, nawa eseka kuchizachisa muze uli ku zuwo. Chikwo nawa, ha yihanda yize mulinga, sako tachi hanga ukaule yize walilongesa. Eta chiyulo kuli ndumbu mukwa-kuhana fumbo hanji kuli makulwana akwo “waze akukilikita mu milimo ya kwambujola liji ni kulongesa.” e (1 Timo. 5:17) Nyonga lie kuliatambile kupwa wika kunyingika yiyulo yize anahane mu mukanda wacho, alioze liatamba kupwa nawa kukwasa waze anakupanjika hanga akolese ufulielo wo ni kwakolweza akaule yize unaalongesa. Nyi wachilinga, uwahililo we ni wa ayo muwoka.
Yuma yika ya ku ufulielo yize muhasa kutesa kulinga? (Tala paragrafu 18) g
18. Yika muyihasa kutukwasa kululieka utotombo wetu mu mulimo wa kwambujola?
18 Yetweswe tuli ni chiteli cha kwambujola ni kutayisa tumbaji. (Mateu 28:19, 20; Roma 10:14) Shina unazange kululieka utotombo we mu mulimo uno ulemu? Nyi chocho, lilongese ni kukaula yiyulo yize yili mu mukanda, Kulongesa. Muhasa kuwana yiyulo yikwo yize muyikukwasa ha Mukanda Wakuzachisa ha Kukunguluka cha Mwono ni Mulimo Wetu ni ha yinema ya maliji akuhanjika no, yize akusolola ha kukunguluka cha hakachi ka poso. Kaula yiyulo yacho hanga umone yize muyikukwasa. Nyi wachilinga, muupwa longeshi mupema nawa muwahilila chinji.—2 Timo. 4:5.
Yuma yika ya ku ufulielo yize muhasa kutesa kulinga? (Tala paragrafu 19) h
19. Kuchi muhasa kupwa ni yitanga yize yakuvwisa Yehova kuwaha?
19 Kanda uvulama ngwe, chuma chilemu chize watamba kutesa kulinga chili kupwa ni yitanga yize yakuvwisa Yehova kuwaha. (Ngala. 5:22, 23; Kolo. 3:12; 2 Petu. 1:5-8) Kuchi muhasa kuchilinga? Chakutalilaho, tunyongenu ngwe unazange kukolesa ufulielo we. Nyi chenacho, muchipema chinji kutanga yikuma mu mikanda yetu yize yili ni yiyulo hakutwala ku kukolesa ufulielo. Yinema yinji ya JW Broadcasting® yakwiza ni sango ja mandumbu waze asolwele ufulielo ukolo muze apalikile mu kapinda. Kutala yinema yacho ni kusa tachi hanga wimbulule mandumbu jacho, muchikukwasa chinji ku mwono we.
20. Kuchi mutuhasa kupwa ni uwahililo unji ni kuhona kunenganyana?
20 Kwamba umwenemwene yetweswe tunazange kulihana chinji mu mulimo wa Yehova. Mu chifuchi chaha, mutukamulingila ni ungunu weswe. Alioze ha mashimbu wano, tunafupiwa kuzachisa uhashi weswawo tuli nawo hanga tumulingile. Nyi twachilinga, mutupwa ni uwahililo unji nawa kutuchi kunenganyana. Chahiana ulemu, mutulemesa ni kuhalisa Yehova, Zambi ya uwahililo. (1 Timo. 1:11) Kashika, tuwahililenu ni yiteli yize tuli nayo mu mulimo wa Yehova!
MWASO 82 “Pangu Lienu Likatemuke”
a Twakuzanga Yehova, nawa tunazange kulihana chinji mu mulimo wenyi. Kashika, twakusa tachi hanga tulihane chinji mu mulimo wa kwambujola ni kufupa yiteli mu chikungulwila. Mba yika mutulinga nyi kutwahashile kupwa ni yiteli yacho chipwe ngwe tunase tachi jinji? Yika muyihasa kutukwasa mba tununge mu mulimo wa Yehova chakuhona kutokesa uwahililo? Chishima cha Yesu hakutwala ku mbongo ja talentu muchikumbulula yihula yino.
b Majina amwe kapwa kwalumuna.
c ULUMBUNWISO WA AMWE MALIJI: Talentu yimuwika kapwile ni kuyifweta mukwa-mulimo wangwaza yoze te wakukalakala ha miaka 20.
d Tunakolweza mandumbu a malunga waze hanapapachisa hanga apwe ni yitanga yize yinafupiwa mba aatongole ngwe tuvumbi ni makulwana mu chikungulwila. Mba nunyingike yize nwatamba kulinga hanga nupwe ni yiteli yacho, tangenu kapitulu 5 ni 6 mu mukanda, Ululikiso Uze Unalingi Upale wa Yehova.
e ULUMBUNWISO WA AMWE MALIJI: Mukwa-Kuhana fumbo kali umwe mukulwana wa mu chikungulwila yoze ukwete chiteli cha kukwasa makulwana ni tuvumbi kwaukawo hakutwala ku chize mahanjika pande ni kulongesa, nyi muchifupiwa.
f ULUMBUNWISO WA CHIZULIE: Mba ahase kupwa longeshi mupema, umwe ndumbu kanalilongesa mukanda, Kulongesa.
g ULUMBUNWISO WA CHIZULIE: Umwe pangi yoze watesa kwambujola cha susumuku, kanahane kartau wa kunjila nenyi ha site kuli umwe mwana-pwo.
h ULUMBUNWISO WA CHIZULIE: Pangi mukwo yoze unazange chinji kupwa chihanyi, katwalila umwe pangi kulia chize te keshi ni kushimbwila
