Yihula ya Waze Akutanga Mikanda Yetu
Mbimbiliya yinambe ngwo, mulonga umwe mahasa kuusa shindakenyo nyi mukusoloka yela aali. (Kwa. 35:30; Shimbi 17:6; 19:15; Mateu 18:16; 1 Timo. 5:19) Alioze kulita ni shimbi, nyi lunga umwe mapomba ku tachi mwana-pwo “mu yambu” yoze hatenda nawa iye mateta, chocho kechi kupwa ni mulonga wa utanji, alioze lunga mapwa nawo. Amu ha chikuma chino te kuheshi kupwa yela akwo, mba mumu liaka pwo te keshi kupwa ni mulonga alioze lunga?
Chikuma chili ha Shimbi Yamuchiali 22:25-27 kuchatalile ha kuhengwola hanga ahise lunga, mumu ha chikuma chino lunga te kakuhia. Shimbi anatongola ha chisoneko chino yinatale ha kusambisa pwo. Kashika tuhengwolenu kanawa chisoneko chacho.
Versu jitangu ja chisoneko chino, jinahanjika hali lunga yoze wapomba umwe mwana-pwo “mu limbo” yoze hatenda. Mumu lia kulinga chino, iye te kakupwa ni mulonga wa utanji, mumu pwo yoze te hatenda kapwile ni kumumona ngwe pwo lia ulo. Mba yika mutwamba hali mwana-pwo? Chisoneko chinambe ngwo, “mwana-pwo katetele, se mu limbo ali.” Nyi iye mateta, kachi atu akwo te mamwivwa hanga amukwase. Alioze, amu mwana-pwo wacho katetele, neye te kakupwa ni mulonga wa utanji.—Shimbi 22:23, 24.
Alioze, Shimbi te yakutala nawa chikuma chino mujila yalisa hakwamba ngwo: ‘Nyi lunga mawana mu yambu mwana-pwo wa kutenda, mba mwe lunga mamukwata ku tachi, mapomba nenyi, lunga yoze apomba nenyi mwe mafwa. Alioze kanda nulinga chuma kuli mwana-pwo, se kumwapwile muli mwana-pwo mulonga wa kutela kufwa. Mumu ngwe mutu makatukila mukwo nikumushiha chocho chapwa chikuma chino; mumu yamuwana mu yambu, mwana-pwo wa kutenda yateta, kukwapwile niumwe mamulamwina.’—Shimbi 22:25-27.
Ha chikuma chino, ngaji te kakufuliela ha yize mwana-pwo mamba. Mu mulali uka? Ayo te kakunyonga ngwo, ‘mwana-pwo wa kutenda katetanga, alioze kukwapwile niumwe yoze te mamulamwina.’ Hachino, iye kalingile utanji. Alioze lunga te kakupwa ni mulonga mumu lia ‘kukwata ku tachi pwo yoze hatenda ni kupomba nenyi’ nawa te kakupwa ni mulonga wa utanji.
Hachino, chipwe ngwe shimbi te yakulihulikila ha kusamba cha pwo, alioze chisoneko chinalite hakwamba ngwo, lunga te kakupwa ni mulonga wa kukwata pwo ku tachi ni wa utanji. Kwamba pundu, ngaji te ‘kakuhengwola kanawa’ chikuma chacho ni kukwata chiyulo chize chinalite ni usongwelo uze Zambi te hanafunyina ha yisuho yinji.—Shimbi 13:14; 17:4; Kutuhu. 20:14.
Kota Muzanga Chinji Yuma Yize Mumona
KAPOSHI WA KUTALILA— WAKULILONGESA
Yihula ya Waze Akutanga Mikanda Yetu-Abril 2022
Yika Mbimbiliya Yakwamba Hakutwala ku Shingo?
KAPOSHI WA KUTALILA— WAKULILONGESA
Yihula ya Waze Akutanga Mikanda Yetu-Abril 2022
Nyi mukwa-Kristu malilakula ni mukwo-pwo chakuhona kukaula shimbi ja Mbimbiliya ni kulimbata ni mutu mweka, kuchi chikungulwila chatamba kumona ulo wenyi utangu ni ulo wenyi waha?
