SHINA wakulimona ngwe wa kusakwilila? Tulieswe twatamba kunyonga ha chikuma chino. Mbimbiliya hiyinambe ngwo, ha matangwa jetu atu anji mapwa “akwa kaleleso.” (2 Timo. 3:2) Hanji yena unanyingika amwe waze akunyonga ngwo atu eswe katamba kwalingila yuma hanji kwaha yimwe yuma. Hachino, ayo kakunyonga ngwo kali ni ulite wakwaha yuma yacho, kashika katambile kusakwilila. Shina kunyonga lie muwahilila kutwama ni atu a mutapu au?

Alioze, tuvumbi twa Yehova kakwakolweza hanga apwe “ni kusakwila.” Yetu tunafupiwa ‘kusakwilila ha yuma yeswe.’ (Kolo. 3:15; 1 Tesa. 5:18) Kupwa ni kusakwilila muchitukwasa mu yuma yinji.

Chuma chilemu chize chakututwala mba tusakwilile mashimbu eswe chili ngwo, chino chakutukwasa kupwa ni nyonga lialita hali yetwene. Muze umwe mutu masakwilila, chino muchihasa kusolola ngwo iye kanalivu kanawa, ni mutu yoze iye asakwilila mawahilila. Mumu liaka usakwililo wakwima mihuko yino yaali? Achinyonga hachino: Nyi umwe mutu mazanga kukulingila chimwe chuma, chino chinalumbunuka ngwo iye kakukulemesa nyi ngwami? Iye kakulihulumba hali yena. Kulihulumba chacho chakukuvwisa kuwaha. Tunyingikenu ngwetu, yino ye yalingiwile kuli Rute. Mboaze kanakamusolwela mbunge yipema. Kwamba pundu, Rute kevwile chinji kuwaha ha kunyingika ngwo, kuma kwapwile umwe yoze te wakulihulumba hali iye.—Rute 2:10-13.

Chuma chimwe chize chahiana ulemu chili kusakwilila Zambi. Kwamba pundu, ha mashimbu amwe, wakunyonga ha yuma yinji yipema yize Zambi hanakwehe ni yize ananungu ni kukwaha. (Shimbi 8:17, 18; Yili. 14:17) Alioze, shimbu unyonge kapupushi ha upeme wa Zambi, mumu liaka kuwasele mashimbu hanga upukune ha yiwape hiunazuku hamwe ni atu waze wazanga? Kupukuna ha yize Sakatanga akukwaha, muchokesa usakwililo we kuli iye nawa mupwa ni shindakenyo ngwo Yehova kakukuzanga ni kukufunga.—1 Yoa. 4:9.

Alioze kanda uwahilila wika ha kupukuna ha chize Zambi apwa chihanyi ni yiwape yize iye akukwaha. Sakwilila Yehova mumu lia upeme wenyi. (Samu 100:4, 5) Umwe mukwa-kusoneka yamba ngwenyi: “Kusakwilila akwetu chakutunehena uwahililo.”

Chuma chikwo chize chakututwala hanga tupwe ni kusakwilila chili ngwo, chino chakukolesa usepa wetu. Yetweswe twakuzanga hanga akwetu atulemese. Nyi musakwilila ni mbunge yeswe mutu yoze wa kulingila chimwe, usepa wenu muukola chinji. (Roma 16:3, 4) Kuchizako chino, kanji-kanji atu waze akusakwilila kakukwasa akwo. Ayo kakunyingika muze akwo maalingila yuma yipema, nawa kakupwa ni mbunge yakwafunyishina upeme wacho. Chochene, kukwasa akwetu chakuneha chiseke. Kashika Yesu ambile ngwenyi: “Chinawaha kutambula alioze shinaho kuhana.”—Yili. 20:35.

Robert Emmons, umwe kasongo wa chizavu cha akwa-kuhengwola hakutwala ku usakwililo ku shikola yinene mu Califórnia, yamba ngwenyi: “Mba tupwe ni kusakwilila, tunafupiwa kunyingika ngwetu, tulieswe twakufupiwa ukwaso wa akwetu. Ha mashimbu amwe mutulingila akwetu yimwe, alioze ha mashimbu akwo akwetu matulingila yimwe.” Umwenemwene uli ngwo: mba tununge ni mwono ni kupwa ni uwahililo, tunafupiwa ukwaso wa akwetu ha yuma yinji. Chakutalilaho, ayo mahasa kutwaha kulia hanji yitumbo. (1 Kori. 12:21) Mutu yoze wa kusakwilila kakusolola pundu ngwo, kakulemesa  yize akwo akumulingila. Kashika lihule ngwe: ‘Shina ngukwete chako cha kusakwilila akwetu muze mangulingila yimwe?’

Chuma chikwo chize chakututwala mba tusakwilile chili ngwo, chino chakutukwasa kulihulikila ha yuma yipema hi ha yuma yipi ko. Mu maliji akwo, manyonga jetu kapwa ngwe kanyingo. Kakutukwasa kulihulikila ha yimwe yuma ni kulengulula yikwo. Mutu yoze ukwete chako cha kusakwilila akwo, kakulihulikila ha yuma yipema chakuhona kulihulikila ha yuma yipi. Nyi wapwa ni kusakwilila akwenu, muupwa ni kumona yuma yinji yipema nawa chino muchokesa usakwililo we. Kulihulikila ha yuma yipema, muchikukwasa kukaula chiyulo chino cha Paulu, chinambe ngwo: “Wahililenu muli Mwene matangwa eswe.”—Fwili. 4:4.

Yena munyingika ngwe kusakwilila chakutukwasa hanga tuhone kupwa ni manyonga api. Chakupwa chikalu mutu kusakwilila, ha shimbu lioliene, mevwa nawa chipululu, chikulikuli hanji toto. Hi chocho ko? Chikwo nawa, atu waze akusakwilila keshi kuzanga chinji mbongo hanji yikumba. Ayo keshi kufupa yuma yinji, kakuwahilila ni yize ali nayo.—Fwili. 4:12.

Ngwe mukwa-Kristu, yena unanyingika ngwe Satana kanazange kukumona unanenganyana hamwe ni kulema ku mbunge, mumu lia kapinda wa matangwa wano tuli akusula. Nyi wapwa ni yitanga yipi hamwe ni kulinyenyeta ha yuma yeswe, acho Satana mawahilila chinji. Kupwa ni nyonga lino, muchipihisa mulimo we wa kwambujola. Alioze umwenemwene uli ngwo, kusakwilila chinalite ni mihuko ya ku spiritu ya Zambi ngwe uwahililo ni ufulielo. Chakutalilaho, twakuwahilila ha yuma yeswe yipema yize Zambi akutwaha, nawa twakufuliela ha yuma yeswe yize iye analakenya kutulingila kulutwe lia matangwa.—Ngala. 5:22, 23.

Amu uli umwe wa kuli tuvumbi twa Yehova, kota watayiza yuma yize mutwe uno walumbununa hakutwala ku kusakwilila. Chipwe chocho, hi chashi ko mashimbu eswe kusakwilila ni kupwa ni nyonga lipema. Alioze kanda wecha hanga yino yikuhongese. Yena muhasa kupwa mutu yoze wa kusakwilila chinji. Kuchi chino muchihasa kulingiwa? Hita tangwa sako mashimbu hanga unyonge ha yuma yipema ku mwono we yize muyikutwala hanga usakwilile. Muze mulinga chino muchipwa chashi kusolola usakwililo we. Hachino, yena muwahilila chinji kuhiana waze akulihulikila wika ku yipikalo ya ku mwono. Achinyonga ha yuma yipema yize Zambi hamwe ni atu akwo akukulingila hanga uwahilile ni kukukolweza. Shina muhasa kulinga umwe katalilo ni kusonekaho yuma yaali hanji yitatu yize yalingiwa ha tangwa hanga usakwilile?

Atu waze alilongesele chikuma chino, kakwamba ngwo: “Kupwa ni chako cha kusakwilila muchihasa kwalumuna mutapu uze wongo wetu wakukalakala ni kupwa atu waze akwete nyonga lialita.” Mutu yoze wa kusakwilila, kakwete uwahililo unji. Kashika, nyonga ha yiwape yize uli nayo, yuka ha yuma yipema yize yakulingiwa ku mwono we, nawa pwako ni kusakwilila! Shimbu unyonge ngwo unatela yuma yipema yize yinalingiwa ku mwono we, ‘halisa Yehova mumu iye mupema, nawa ‘sakwilila ha yuma yeswe.’—1 Sango 16:34; 1 Tesa. 5:18.