1-2. Ngwe Angelito, yika hita umwe wa kuli yetu atamba kulinga?

SHINA uli mwana wa Yela ja Yehova? Nyi chocho, unanyingika ngwo usepa we ni Yehova kuwauhingile kuli yisemi je. Chipwe ngwe yisemi jetu kakuwayila Zambi hanji ka, hita umwe wa kuli yetu katamba kukolesa usepa wenyi ni Yehova.

² Tutalenu chilweza cha ndumbu Angelito. Asoko jenyi eswe te Yela ja Yehova. Alioze ku ukweze wenyi, iye kakapwile ni kulivwa ngwe kali ni usepa upema ni Zambi. Mwene yamba ngwenyi: “Yami te nakuwayila wika Yehova mumu lia asoko jami.” Alioze, iye yasa mashimbu hanga atange Mbimbiliya ni kupukuna ha yize te akutanga, nawa yaputuka kulemba chinji. Mba yika yalingiwileko? Angelito yamba nawa ngwenyi: “Nalilongesele ngwami, mba ngukundame kuli Yehova, yami mwene natamba kumunyingika kanawa.” Chilweza cha Angelito chatukwasa tulihule ngwetu: Kulisa chika chili ha kunyingika yimwe hakutwala kuli Yehova ni kumunyingika kanawa? Nawa yika twatamba kulinga mba tumunyingike kanawa?

3. Kulisa chika chili ha kunyingika yimwe hakutwala kuli Yehova ni kumunyingika kanawa?

³ Umwe mahasa kwamba ngwenyi, kanyingika Zambi mumu kananyingika jina lienyi ni yimwe yuma yize ambile hanji alingile. Alioze chakufupiwa yuma yinji mba mutu anyingike kanawa Yehova. Chakufupiwa mashimbu akulilongesa hakutwala kuli iye ni ha yitanga yenyi yipema. Hanyima, mba mutuputuka  kunyingika mumu liaka Yehova ambile nawa alingile yimwe yuma. Yino muyitukwasa kunyingika nyi Yehova matayiza yitanga ni manyonga jetu nyi ka. Muze mutunyingika yize Yehova anazange hanga tulinge, twatamba kulinga kulita ni yize twakulilongesa.

4. Mumu liaka kulilongesa yimwe yilweza ya mu Mbimbiliya muchihasa kutukwasa?

⁴ Atu amwe hanji mahasa kutukekuna mumu tunazange kuwayila Yehova. Yuma muyihasa kupihia muze mutuputuka kuya ku kukunguluka. Alioze nyi twajikijila kuli Yehova, iye kechi katwehuka nilimwe tangwa. Ujikijilo wacho, muupwa chishina cha usepa uze muukanunga ku miaka yeswe. Shina mutuhasa lume kunyingika kanawa Yehova ni kupwa masepa jenyi? Ewa, mutuhasa! Ngwe chize mutulilongesa ha mutwe uno, yilweza ya atu yihenge ngwe, Mose ni Ndawichi, yinasolola umwenemwene wacho. Mutukumbulula yihula yaali: Kuchi malunga wano ashishika anyingikine Yehova? Nawa yika mutuhasa kulilongesa ha yilweza yo?

5. Yika Mose asakwile kulinga?

⁵ Mose kasakwile kuwayila Zambi. Muze apwile ni miaka 40, shimbu te amunyingike ngwe “mwana wa mwana Falau wa pwo,” Mose yasakula kupwa sali lia atu ja Zambi, A-Izalele. (Hepre. 11:24) Iye yalituna kupwa mutu munene mu Engitu. Muze Mose akwashile A-Izalele, iye kanyingikine ngwenyi Falau te kechi kuchizanga. Mumu Falau kapwile mwanangana wa ndundo, yoze A-Engitu te akumona ngwe ka-zambi. Chino chasolwele ngwo Mose kapwile ni ufulielo unji! Iye te kakujikijila muli Yehova. Ujikijilo wacho, wapwile chishina cha usepa wenyi ni Yehova; usepa uze wanungine ku mwono wenyi yeswe.—Yishi. 3:5.

6. Yika twalilongesa ha chilweza cha Mose?

⁶ Yika twalilongesa? Twalilongesa ngwetu, ngwe Mose, tulieswe twatamba kusakula nyi mutuwayila Zambi nyi ka, nawa nyi mutupwa sali lia atu jenyi nyi ka. Kuwayila Yehova chakufupiwa kusa tachi. Nawa atu waze kamunyingikine mahasa kulimika ni yetu. Alioze, nyi mutujikijila kuli Tata yetu wa mu malilu, mutuhasa kupwa ni shindakenyo ngwetu iye matukwasa!

7-8. Yika Mose anungine ni kulilongesa?

⁷ Mose kanungine ni kulilongesa hakutwala ku yitanga ya Yehova ni kulinga upale wenyi. Chakutalilaho, muze Yehova alwezele Mose hanga aye ni kutusula A-Izalele mu undungo ku Engitu, Mose kevwile woma, chocho yalweza Yehova ha yisuho yinji ngwenyi kechi kuhasa kulinga mulimo wacho. Yehova yamusolwela keke, chekwamba yanyingika chize Mose evwile ni kumukwasa. (Kutuhu. 4:10-16) Hachino, Mose yahasa kulinga upale wa Yehova, nawa yambujola sango ja upatwilo kuli Falau, lunga yoze A-Engitu te akumona ngwe ka-zambi. Kulutwe, Mose yamona chize Yehova azachishile ndundo jenyi hanga alamwine A-Izalele ni kwonona Falau ni tujita twenyi ha Kalunga-lwiji Muchila.—Kutuhu. 14:26-31; Samu 136:15.

⁸ Hanyima lia kutusula A-Izalele mu Engitu, o yanunga ni kulinyenyeta. Chipwe chocho, Yehova yaasolwela uhomboloji, nawa Mose yachimona. (Samu 78:40-43) Mose nawa kamwene chize Yehova asolwele kulikehesa, muze iye amwichile hanga alumune chiyulo Chenyi cha kwonona A-Izalele ha kukaula chiyulo cha Mose.—Kutuhu. 32:9-14.

9. Kulita ni A-Hepreu 11:27, kuchi usepa wa Mose ni Yehova wapwile?

⁹ Kukatuka ha mashimbu jacho, usepa wa Mose ni Yehova yiukola chinji, chocho Mose  yapwa ngwe kanamono Tato wa mu malilu. (Tanga A-Hepreu 11:27.) Mbimbiliya yinasolola chize usepa wo wapwile hakwamba ngwo: “Yehova wahanjikile ni Mose meso ni meso ngwe mutu mahanjika ni kasendo kenyi.”—Kutuhu. 33:11.

10. Yika twatamba kulinga mba tunyingike kanawa Yehova?

¹⁰ Yika twalilongesa? Twalilongesa ngwetu, mba tunyingike kanawa Yehova kuchakumbanyine wika kulilongesa hakutwala ku yitanga yenyi. Twatamba nawa kulinga upale wenyi. Upale wa Yehova musono uli ngwo, ‘atu eswe alilamwine, akahete ku chinyingi cha umwenemwene.’ (1 Timo. 2:3, 4) Jila yimwe yize twakulingilamo upale wa Zambi yili kulongesa atu hakutwala kuli iye.

11. Kuchi twakunyingika kanawa Yehova muze twakulongesa akwetu hakutwala kuli iye?

¹¹ Kanji-kanji, twakunyingika kanawa Yehova, muze twakulongesa akwetu hakutwala kuli iye. Chakutalilaho, twakumona zwalala keke ya Yehova hali atu, muze akutusongwela hanga tuwane atu waze anazange kupwa masepa jenyi. (Yoa. 6:44; Yili. 13:48) Twakumona ndundo ja Liji lia Zambi, muze twakumona chize alongi jetu a Mbimbiliya anazula utu ukulu ni kuzala utu waha. (Kolo. 3:9, 10) Nawa twakumona uhomboloji wa Zambi hali atu, mumu iye wakututuma mashimbu eswe hanga twakwase amunyingike ni kwalamwina.—Roma 10:13-15.

12. Kulita ni Kutuhuka 33:13, yika Mose etele, nawa mumu liaka?

¹² Mose te kakulemesa usepa wenyi ni Yehova. Chipwe muze alingile yikomokeso mu jina lia Zambi, nihindu ni vumbi lieswe Mose yeta kuli Yehova hanga amukwase kumunyingika kanawa. (Tanga Kutuhuka 33:13.) Muze Mose etele kuli Yehova hanga amukwase kumunyingika kanawa, iye te kali ni miaka kuhiana 80. Mose kanyingikine ngwenyi, te kuchili yuma yinji yize atamba kulilongesa hakutwala kuli Yehova.

13. Jila yika yize mutuhasa kulemeselamo usepa wetu ni Zambi?

¹³ Yika twalilongesa? Twalilongesa ngwetu, chipwe ngwe twakuwayila Yehova ha miaka yinji hanji ka, kutwatambile kunyonga pundu ngwetu usepa wetu ni iye uli kanawa. Twatamba kulemesa usepa wacho ni kuufunga. Nawa jila yimwe yakuchilingila yili kuhanjika ni Yehova kupalikila mu yilemba.

14. Mumu liaka kulemba chakutukwasa hanga tunyingike kanawa Zambi?

¹⁴ Nyi unazange kupwa ni usepa upema ni umwe mutu, watamba kupwa ni kuhanjika nenyi chinji mba usepa wenu ukole. Kashika, lemba chinji kuli Yehova nawa kanda wivwa woma wa kumulweza chize unevu ku mbunge. (Efwe. 6:18) Krista, umwe pangi yoze watwama mu Turquia yamba ngwenyi: “Hita shimbu nakuhanjika ni Yehova hakutwala ku chize ngunevu, nakumona ngwami iye kakungukwasa, kashika zango ni ujikijilo wami hali iye yakwoka. Muze nakumona chize Yehova akukumbulula yilemba yami, chino chakungukwasa kumona Yehova ngwe Tata kanda Sepa liami.”

15. Yika Yehova ambile hakutwala kuli Ndawichi?

¹⁵ Mwanangana Ndawichi kasemukinyine mu vungu lize te lia kuwayila Yehova Zambi. Alioze, iye kakawayilile Yehova mumu ngwo yisemi jenyi hamwe ni waze te atunga no kapwile ni kumuwayila. Ndawichi mwene mwe walikachile ni Yehova, kashika Yehova te akumuzanga. Yehova mwene kambile ngwenyi, Ndawichi kali “lunga wa kulita ni mbunge yami.” (Yili. 13:22) Kuchi chapwile mba Ndawichi apwe ni usepa ukolo ni Yehova?

16. Yika Ndawichi alilongesele hali Yehova ha kutala ku yitangiwa?

 ¹⁶ Ndawichi kalilongesele hakutwala kuli Yehova kupalikila mu yitangiwa. Muze Ndawichi te uchili mukweze, iye te kakupalikisa mashimbu anji haze ni kufunga mapanga a tato. Kota ha mashimbu jacho, he iye apwile ni kupukuna ha yuma yize Yehova atangile. Chakutalilaho, muze te akutala mwilu ha ufuku, Ndawichi te keshi kumona wika tununu a tununu a tutongonoshi. Alioze te kakumona nawa yitanga ya Yoze watangile tutongonoshi jacho. Kashika asonekene ngwenyi: “Malilu kakwambujola ulemu wa Zambi. Che kuzazuluka cha mwilu chakulweza utotombo wenyi.” (Samu 19:1, 2) Nawa muze Ndawichi apwile ni kunyonga ha chize Yehova atangile atu, chino chamukwashile kumona mana a Zambi. (Samu 139:14) Muze Ndawichi te akupukuna ha yeswe yize Yehova atangile, iye te kakulimona ngwe kali mukehe chinji nyi malitesa ni Yehova.—Samu 139:6.

17. Yika mutuhasa kulilongesa nyi twapukuna ha yitangiwa?

¹⁷ Yika twalilongesa? Twalilongesa ngwetu, twatamba kuzanga yitangiwa ya Zambi. Kanda uwahilila wika ha kupwa mu chifuchi chino chipema chize Yehova atangile. Alioze sako mashimbu hanga umone chize yitangiwa yakukomwesa. Hita tangwa, nyonga yize muhasa kulilongesa hakutwala kuli Yehova ha yitangiwa yize wakumona, ngwe mitondo, tushitu ni atu. Nyi wachilinga, mulilongesa yuma yinji hakutwala kuli Tatenu wa zango. (Roma 1:20) Nawa mumona ngwe, hakupalika cha mashimbu zango lie kuli Yehova mulikola chinji.

18. Kulita ni Samu 18, yika Ndawichi anyingikine?

¹⁸ Ndawichi kanyingikine ngwenyi Yehova te kakumukwasa. Chakutalilaho, muze apulwile mapanga a tato kuli ndumba ni ursu, Ndawichi kanyingikine ngwenyi kahashile kushiha tushitu jacho ni ukwaso wa Yehova. Muze akumbile Ngoliate, Ndawichi kamwene pundu ukwaso wa Yehova ku mwono wenyi. (1 Samue. 17:37) Nawa muze anakalilamwina ku kwoko lia Mwanangana mupi Saulu, Ndawichi kanyingikine ngwenyi, Yehova mwe unakamulamwina. (Samu 18, maliji a ha mutwe) Nyi Ndawichi kapwile mukwa-kulizata, kwamba pundu kachi kanyongene ngwenyi kalinga yuma yacho ku tachi jenyi mwene. Alioze, iye kapwile mukwa-kulikehesa kashika anyingikine ngwenyi Yehova mwe wamukwashile ha yeswe yize alingile.—Samu 138:6.

19. Yika mutuhasa kulilongesa ha chilweza cha Ndawichi?

¹⁹ Yika twalilongesa? Twalilongesa ngwetu, kutwatambile wika kwita kuli Yehova hanga atukwase. Twatamba nawa kusa shindakenyo hanga tunyingike mashimbu waze akutukwasa ni chize iye akutukwasa. Nyi twapwa akwa-kulikehesa ni kunyingika haze hasulila tachi jetu, mutumona zwalala ukwaso wa Yehova ha yuma yize te kutuchi kuhasa kulinga ukawetu. Nawa hita shimbu mutumona ukwaso wa Yehova ku mwono wetu, usepa wetu ni iye muukola chinji. Isaac, umwe ndumbu wa mu Fiji, yoze wakuwayila Yehova ha miaka yinji, hanamono umwenemwene wa maliji wano. Mwene yamba ngwenyi: “Nyi natala kunyima, nakuhasa kumona chize Yehova akungukwasa kukatuka haze naputukile kulilongesa Mbimbiliya ndo ni musono. Hachino, Yehova hanapu mutu wamwenemwene kuli yami.”

20. Yika twalilongesa ha usepa wa Ndawichi ni Yehova?

²⁰ Ndawichi kembulwile yitanga ya Yehova. Yehova katutangile ni uhashi wa kwimbulula yitanga yenyi. (Uputu. 1:26) Nyi twalilongesa  chinji yitanga yenyi, muchipwa chashi kumwimbulula. Ndawichi kanyingikine kanawa Yehova, kashika ahashile kumwimbulula muze te akutwama ni akwo. Tutalenu chimwe chilweza. Ndawichi kalingile shili ha kulinga utanji ni Bate-Shipa ni kushihisa mukwo-lunga. (2 Samue. 11:1-4, 15) Alioze, Yehova yamuvwila keke. Mumu liaka? Mumu Ndawichi neye te kakwivwila akwo keke. Mumu lia kupwa ni usepa ukolo ni Yehova, Ndawichi yapwa umwe wa kuli mianangana waze azangile chinji mu Izalele. Nawa Yehova te kakuzachisa chilweza chenyi kuli mianangana akwo.—1 Mia. 15:11; 2 Mia. 14:1-3.

21. Ngwe chize twamona ha A-Efwesu 4:24; 5:1, yika mutuzuka nyi ‘twembulula Zambi’?

²¹ Yika twalilongesa? Twalilongesa ngwetu, twatamba “kwimbulula Zambi.” Kutwatambile kuchilinga wika mumu lia kuzuka yiwape, alioze muchitukwasa nawa hanga tumunyingike kanawa. Muze mutwimbulula yitanga ya Yehova, acho mutusolola ngwetu tuli ana jenyi.—Tanga A-Efwesu 4:24; 5:1.

22-23. Yika muyilingiwako nyi mutukaula ku mwono wetu yize twakulilongesa hakutwala kuli Yehova?

²² Ngwe chize twamona, Yehova kakutusolwela yitanga yenyi kupalikila mu yitangiwa ni mu Mbimbiliya. Mukanda uno ulemu, uli ni yilweza yinji ya tuvumbi twa Zambi ashishika yize mutuhasa kwimbulula, ngwe cha Mose ni cha Ndawichi. Yehova hanalingi chihanda chenyi. Kashika ni yetu twatamba kulinga chihanda chetu. Twatamba kulawola, kwazulula mbunge ni matwi jetu hanga tulilongese chinji hakutwala kuli Yehova.

²³ Kutuchi keza kalitwamina kulilongesa hakutwala kuli Yehova. (Chilu. 3:11) Chuma chilemu, hi unji ko wa yize twakulilongesa hali iye, alioze chili kukaula ku mwono wetu yize twakulilongesa. Nyi twachilinga, mutwimbulula Tata yetu wa zango Yehova, nawa iye manunga ni kukundama kuli yetu. (Tia. 4:8) Iye kanatulakenya mu Liji lienyi ngwenyi, kechi kehuka waze eswe akusa tachi hanga amunyingike kanawa.