Shina muhasa kukumbulula yihula yino twalilongesanga ha Tuposhi a mwaka 2019?

Chilakenyo cha Zambi ngwo: “Nichimwe chikungo kuchichi kawaha nyi hachifula chikalimike ni yena” yika chinalumbunuka? (Iza. 54:17)

Mutuhasa kupwa ni shindakenyo ngwetu, Zambi matufunga ku fuji ya kangonga ngwe “tachi ja yiswi.” (Iza. 25:4, 5) Akwa-kole jetu kechi kahasa kutulinga upi wa mutolo.—w19/01, mafwo 6-7.

Kuchi Zambi asolwele ululi hakutwala kuli A-Kanana ni A-Izalele waze te yihulia?

Zambi kapatwilile waze eswe te akulinga utanji ni kumwesa lamba mapwo ni twanuke. Yehova te kakuwahisa atu jenyi muze te akushishika kuli iye ni kusolola ululi kuli umwe ni mukwo.—w19/02, mafwo 22-23.

Yika twatamba kulinga nyi tuli haze mutu yoze unalembe hi Chela cha Yehova ko?

Mutuhasa kuhola ni vumbi lieswe chakuhona kwamba “amene.” Nawa kutwatambile kulikwata ku moko muze ayo analembe. Nyi muchilita, mutuhasa kulemba yetwene mu mbunge.—w19/03, lifwo 31.

Mumu liaka kupihisa twanuke chili chuma chipi chinji?

Kupihisa twanuke yili shili kuli mutu yoze ayilinga, shili ku chikungulwila, shili kuli manguvulu nawa shili kuli Zambi. Mu yifuchi muze shimbi jinambe ngwo, atu katamba kujimbula kuli nguvulu mutu yoze wapihisa kanuke, makulwana katamba kukaula shimbi jacho.—w19/05, mafwo. 9-10.

Kuchi muhasa kwalumuna hanji kululieka spiritu ya kunyonga che?

Yikuma yilemu yili yino: Kulemba kuli Yehova. Kupukuna ni kulihengwola yena mwene. Kusakula masepa ni mana.—w19/06, lifwo 11.

Kuchi mutuhasa kulilulieka haliapwila hakutwala ku yihungumiona?

Tunafupiwa kukolesa usepa wetu ni Yehova. Kupwa ni shindakenyo ngwo, Yehova kakutuzanga nawa kechi katwehuka. Kutanga Mbimbiliya hita tangwa ni kulemba mashimbu eswe. Kupwa ni shindakenyo ngwo, yilakenyo ya Wanangana wa Zambi muyikamanunuka. Kufungila mu mbunge yisoneko ni miaso ya uhaliso yize twazanga chinji.—w19/07, mafwo 2-4.

Yika mutuhasa kulinga mba tukwase asoko jetu akalilamwine?

Chili chilemu tupwe ni kusolola keke, kwecha yilweza yetu hanga yihane uchela upema ni kupwa yihumikiji nawa yimbovu.—w19/08, mafwo 15-17.

Kulita ni chilakenyo chili ha Mateu 11:28-30, kuchi twakupwa ni uhwimino?

Yetu tukwete tulayi apema, masepa apema nawa tukwete mulimo upema.—w19/09, lifwo 23.

Kuchi Zambi akutwaha nyonga ni tachi jakulinga yimwe? (Fwili. 2:13)

Muze mututanga Mbimbiliya ni kupukuna ha yize tunatange, Zambi mahasa kukalakala muli yetu, ha kutwaha nyonga lia kulinga upale wenyi ni ndundo ja kulinga yimwe. Spiritu yenyi yisandu, muyihasa kululieka uhashi wetu.—w19/10, lifwo 21.

Yuma yika watamba kulinga shimbu kanda ukwata chimwe chiyulo?

Yuma yacho yitano yili yino: Kuhengwola kanawa mikanda yetu, kulemba kuli Yehova hanga akwehe malinjekela, kuhengwola yize wa kulinga, kutesa pundu yize mulinga ni kupwa ni nyonga lialita.—w19/11, mafwo 27-29.

Muze Satana ahanjikile ni Eva, shina kamulwezele nyonga liakwamba ngwo alma kuyishi kufwa?

Kota ka. Satana kakambile ngwenyi, Eva te masoloka ngwe kafwa. Iye kambile ngwenyi, Eva te kechi kufwa. Kukushi nilimwe longeso lia uwayilo wa mahuza lize liasalile ha Sanga Linene lia Meya. Longeso lia alma yize kuyishi kufwa, kota liaputukile hanyima lia Sanga lia Meya, muze Zambi alumbanganyishine atu waze te anatungu Kaposhi wa Mbapele.—w19/12, lifwo 15.