1. Yika muyihasa kulingiwa kuli yetu nyi mutunenganyana?

MATANGWA eswe twakupinda ni yipikalo yinji, nawa twakulinga yize mutuhasa hanga tuhwise yipikalo yacho. Alioze, hi chashi ko kukumba yipikalo muze tunahongo ku mbunge. Kashika, twatamba kwiwuluka ngwetu, kuhonga ku mbunge muchihasa kutunyongesa ngwe kutushi ni ulemu ni kuhona uwahililo. Mukanda wa Yishima 24:10 unambe ngwo: “Nyi mulezemuka ha tangwa lia lamba, tachi je jikepe.” Ewa, kuhonga ku mbunge muchihasa kutuchiza tachi ja kukumba najo yipikalo ya ku mwono wetu.

2. Yuma yika muyihasa kutuhongesa ku mbunge, nawa yika mutulilongesa ha mutwe uno?

² Kuli yuma yinji yize muyihasa kutuhongesa ku mbunge, yimwe yakusoloka yikwo ka. Yuma yacho yimwe yili uhenge uze twakulinga, ulelu wetu hanji misongo. Yikwo nawa muyihasa kupwa kuhona chiteli chize twakuzanga chinji mu mulimo wa Yehova hanji kwambujola mu ngiza yize atu keshi kutayiza umwenemwene. Ha mutwe uno, mutulilongesaho yuma yimwe yize mutuhasa kulinga muze tunahongo ku mbunge.

3. Yika muyitukwasa kupwa ni nyonga lialita hakutwala ku uhenge uze twakulinga?

³ Chili chashi chinji kupihilila ni yetwene hanji ni uhenge uze twakulinga. Chino muchihasa kutunyongesa ngwe Yehova kechi katutayiza kunjila mu chifuchi chaha mumu lia uhenge wetu. Kashika, nyonga liacho lili ponde yinene. Kuchi twatamba kumona uhenge wetu? Mbimbiliya yakwamba ngwo, kuchizako Yesu Kristu atu eswe “hanavulumuna.” (Roma 3:23) Nihindu Yehova keshi kulihulikila ha uhenge wetu hanji kushimbwila ngwo, twatamba kupwa angunu. Alioze, iye kali Tata  yetu wa zango yoze unazange kutukwasa. Nawa kali chihumikiji. Yehova kakumona tachi jize twakusa hanga tukumbe ulelu wetu ni chize twakulimona, kashika, kanazange kutukwasa.—Roma 7:18, 19.

4-5. Kulita ni 1 Yoano 3:19, 20, yika yakwashile mandumbu jetu ahone kuhonga ku mbunge?

⁴ Tutalenu chilweza cha Debora ni Maria. * Ku wanuke wenyi, Debola kapwile ni kumumwesa lamba linji kuli asoko jenyi, kashika muze akolele yapwa ni nyonga lipi hali mwene. Chapwile chikalu kumuchichimieka kuli akwo. Kashika, yaputuka kulimona ngwe keshi ni ulemu. Chipwe muze apwile ni kulinga tupalia akehe-akehe te kakulimona ngwe kechi keza kalinga yuma kanawa. Maria neye kapwile ni kapinda yomwene. Asoko jenyi kapwile ni kumuvwisa sonyi. Kashika, yaputuka kupinda ni manyonga akulimona ngwe keshi ni ulemu. Chipwe muze te hamupapachisa, nihindu kapwile ni kulimona ngwe katelele kumuvuluka ngwo, Chela cha Yehova!

⁵ Chipwe chocho, mandumbu jacho kakechele kuwayila Yehova. Mumu liaka? Mumu kalembele kuli Yehova ni kumbila yiteli yo hali iye. (Samu 55:22) Ayo yatayiza ngwo, Tata yetu wa mu malilu kananyingika yuma yize twapalikile ni chize manyonga jetu api akukwata ku mwono wetu. Chikwo nawa, Yehova kananyingika kanawa mbunge yetu ni yitanga yipema tukwete yize yetwene kutushi kumona.—Tanga 1 Yoano 3:19, 20.

6. Yika mutuhasa kulinga nyi mutufunyina yuma yipi yize tunazange kwecha?

⁶ Mutuhasa kulikolweza hanga tweche kulinga chimwe chuma chipi, alioze ha mashimbu amwe, mutuhasa kufunyina chuma chacho. Hi chipi ko kwivwa yinyengo muze mutulinga chuma chipi. (2 Kori. 7:10) Alioze, kutwatambile kulilamikiza hanji kunyonga ngwetu: ‘Kutushi ulemu ku meso ja Yehova. Kota iye kechi kutukonekena.’ Nyonga lino hi lipema ko, mumu mulihasa kutukwika kulingila Yehova. Mukanda wa Yishima 24:10 unatwiwulula ngwetu, nyi twahonga tachi jetu mujipwa jikehe. Kashika, ‘tulishimwinenu hamuwika’ ni Yehova ni kwita ukonekeno wenyi. (Iza. 1:18) Nyi Yehova mamona ngwenyi, hiwalikonyeka nawa unase tachi hanga walumune yitanga ye, makukonekena. Chikwo nawa, hanjika ni makulwana a mu chikungulwila. Ni uhumikizo weswe, ayo makukwasa kukolesa nawa ufulielo we.—Tia. 5:14, 15.

7. Mumu liaka kutwatambile kuhonga ku mbunge muze tunapinda ni umwe ulelu?

⁷ Jean-Luc, umwe mukulwana wa mu chikungulwila ku França, yamba hali waze akupinda ni ulelu ngwenyi: “Kuli Yehova  mukwa-ululi, hi yoze ko keshi kuhengesa, alioze kali mutu yoze wakulikonyeka ha shili yenyi ni kwita ukonekeno.” (Roma 7:21-25) Kashika, kanda unyonga ngwe kuushi ulemu mumu lia ulelu we. Iwuluka ngwe, kumeso ja Zambi yetu eswe tuli yihenge, kashika, tunafupiwa chawana cha vumbi lienyi kupalikila mu ukuule.—Efwe. 1:7; 1 Yoa. 4:10.

8. Muze tunahongo ku mbunge, kuli aya mutuhasa kwita ukwaso?

⁸ Mandumbu jetu a ku ufulielo mahasa kututakamisa! Ayo mahasa kutupanjika muze mutufupa kuhanjika ni kututakamisa ni maliji apema. (Yishi. 12:25; 1 Tesa. 5:14) Joy, umwe ndumbu wa pwo ku Nigéria yoze wapinjile chinji ni manyonga api, yamba ngwenyi: “Utakamiso uze mandumbu anguhele wangukwashile kumona ngwami, Yehova kakukumbulula yilemba yami kupalikila muli mandumbu. Chikwo nawa, hinalilongesa chize munguhasa kutakamisa mandumbu waze anahongo ku mbunge.” Twatamba kunyingika ngwetu, ha mashimbu amwe chakupwa chikalu kuli mandumbu jetu kunyingika nyi tunafupiwa utakamiso nyi ka. Kashika, ha mashimbu amwe twatamba kuhanjika ni mandumbu jetu waze ajama ku ufulielo ni kwalweza ukwaso uze tunafupiwa.

9. Kuchi mukanda wa Samu 41:3 ni 94:19 unatutakamisa?

⁹ Eta ukwaso kuli Yehova. Muchihasa kupwa chikalu kupwa ni nyonga lialita muze tunapinda ni umwe musongo ha miaka yinji. Chipwe ngwe haliapwila Yehova keshi kuwuka misongo yetu kupalikila mu yikomokeso, nihindu kakutwaha tachi jize tunafupiwa hanga tunyongonone. (Tanga Samu 41:3; 94:19.) Chakutalilaho, Yehova mahasa kuzachisa mandumbu jetu a ku ufulielo hanga atukwase ni milimo ku zuwo hanji kutulanjila yimwe, chipwe kutulembelako. Mahasa kutwiwulula maliji apema a mu Liji lienyi ngwe, kutalatala cha kupwa ni mujimba ungunu, chakuhona misongo ni miteto mu chifuchi chaha chize chinakundama.—Roma 15:4.

10. Yika yakwashile ndumbu Isang ahone kuhonga ku mbunge mumu lia utonji wenyi?

¹⁰ Ndumbu Isang ku Nigéria, kalemanyine ku ponde, chocho yapwa chitonji. Ndotolo yamulweza ngwenyi, kechi kwenda nawa. Isang yamba ngwenyi: “Nevwile ngwe mbunge yami muyisutuka.” Shina kanungine ni kulinyenga? Ka! Mba yika yamukwashile? Mwene yamba ngwenyi: “Yami ni mukwetu-pwo twakulemba kuli Yehova ni kulilongesa Liji lienyi matangwa eswe. Chikwo nawa, twapwile ni kusakwilila ha yiwape yize twapwile nayo, ngwe kutalatala cha mwono upema uze mutukapwa nawo mu chifuchi chaha.”

11. Kuchi ndumbu Cindy anakawahilila ha mashimbu waze apinjile ni musongo?

¹¹ Ndumbu Cindy ku México, kamuwanyine ni musongo upi uze te muuhasa kumushiha. Kuchi ahashile kukumba kapinda wacho? Muze apwile ni kumuwuka ku shipitali, yaputuka kwambujola matangwa eswe kuli mbuki ni mieji-ni-akwo. Yasoneka ngwenyi: “Chino changukwashile kulihulikila ali akwetu chakuhona kulihulikila ha musongo wami. Muze napwile ni kwambujola kuli mbuki napwile ni kufupa kunyingika chize asoko jo ali, mba mungwahula mumu liaka asakwile mulimo wacho. Kulinga chino changukwashile kusakula yikuma jize muyaakwata ku mbunge. Mbuki anji kapwile ni kwamba ngwo, hi chashi ko kwivwa mweji maahula ngwo, ‘Kuchi nuli?’ Kashika, mbuki anji kapwile ni kungusakwilila chinji mumu lia kulihulumba hali ayo. Akwo yangwaha numeru ya telefone. Kashika, chipwe ha mashimbu akalu, nihindu Yehova  kangukwashile chinji hanga nguwahilile!”—Yishi. 15:15.

12-13. Kuchi mandumbu amwe ayiza akuhasa kwambujola, nawa kuchi akuyuka?

¹² Mandumbu waze ayiza mahasa kuhonga chinji ku mbunge, mumu keshi kuhasa nawa kwambujola ngwe chize apwile ni kulinga. Chipwe chocho, kakusa tachi hanga awane majila akwambulwilamo. Ndumbu Laurel ku Estados Unidos, kamusele mu yimwe makina yize te yakumukwasa kuhwima ha miaka 37! Kapwile ni câncer, yamupasula ha yisuho yinji, nawa yapwa ni musongo wa chikowa. Chipwe chocho, kakechele kwambujola. Iye te kakwambulwila mbuki ni atu waze apwile ni kuya ni kumumeneka. Yika yalingiwileko? Yakwasa atu 17 kunyingika umwenemwene wa mu Mbimbiliya! *

¹³ Richard, umwe mukulwana wa mu chikungulwila ku França, kakuhana nyonga lipema kuli mandumbu waze keshi ni uhashi wa kwenda. Kakwamba ngwenyi: “Chili chipema kusa mikanda yetu homa haze atu mahasa kuyimona. Chino muchikwasa atu ahule mikanda yacho ni kuputuka kuhanjika no. Chino, muchihasa kutakamisa mandumbu jetu chipwe ngwe keshi kwambujola nawa ku zuwo ni zuwo.” Chikwo nawa, mandumbu waze ali ku zuwo hanji ku shipitali mumu lia misongo mahasa kwambujola ha kusonekena atu mikanda ni ku telefone.

14. Chilweza chika chipema Mwanangana Ndawichi ahichikile?

¹⁴ Muchihasa kupwa chikalu kutambula yimwe yiteli mu chikungulwila mumu lia miaka, misongo hanji yuma yikwo. Kashika, mutuhasa kulilongesa yuma yinji ha chilweza cha Mwanangana Ndawichi. Muze amulwezele ngwenyi, kechi kutunga tembele ya Zambi, chipwe ngwe kazangile chinji kulinga mulimo wacho, nihindu yakwasa mutu yoze Zambi asakwile hanga aulinge. Ndawichi kahanyine yuma yinji hanga akwase mulimo wa kutunga tembele. Iye kahichikile chilweza chipema chize twatamba kukaula!—2 Samue. 7:12, 13; 1 Sango 29:1, 3-5.

15. Kuchi ndumbu Hugues akumbile yinyengo?

¹⁵ Hamukunda wa musongo, ndumbu Hugues ku França, yecha kukalakala ngwe mukulwana wa mu chikungulwila, chipwe milimo yikehe-yikehe ku zuwo te keshi kuhasa nawa kuyilinga. Yasoneka ngwenyi: “Ku uputukilo, napwile ni kwivwa yinyengo yinji ni kulivwa ngwe chishi ni ulemu. Hakupalika cha mashimbu, yingunyingika ngwami, kuchishi nawa ni uhashi wa kulinga yuma mu mulimo  wa Yehova ngwe chize napwile ni kulinga. Kashika, yingulihulikila ha uwahililo wami wa kulingila Yehova kulita ni uhashi wami. Yingukwata chiyulo cha kuhona kuhonga. Chizechene ngwe Ngideone ni kulakaji atatu a malunga, chipwe ngwe te hahonga nihindu yanunga, ni yami che ngunazange kulinga!”—Kuyu. 8:4.

16. Yika mutuhasa kulilongesa ha chilweza cha angelo?

¹⁶ Angelo ashishika kali chilweza chipema. Ha mashimbu akuyula cha Mwanangana Ahabe, Yehova yeta kuli angelo ambe chize monga mwanangana wacho. Angelo anji yahana manyonga jo. Alioze, Zambi yatayiza nyonga lia mungelo umuwika. (1 Mia. 22:19-22) Shina angelo akwo kevwile yinyengo hanji kulihula ngwe, ‘Mumu liaka kasakwile nyonga liami’? Mutuhasa kupwa ni shindakenyo ngwetu, ayo kakanyongene chocho. Angelo kakulikehesa, kakuzanga kuhalisa Yehova.—Kuyu. 13:16-18; Uso. 19:10.

17. Yika twatamba kulinga nyi twahonga ku mbunge mumu lia kuhona kupwa ni yiteli yize twakuzanga?

¹⁷ Twiwulukenu ngwetu, chiteli chilemu chize tuli nacho chili kupwa Yela ja Yehova ni kwambujola Wanangana wenyi. Mahasa kutwaha yiteli hanji kutuchizayo, mumu Zambi kechi kutulemesa hamukunda wa yiteli. Alioze, kulikehesa che chakutupwisa atu alemu kumeso ja Yehova ni kuli mandumbu jetu. Kashika, eta kuli Yehova hanga akukwase upwe mukwa-kulikehesa. Pukuna ha yilweza yipema yili mu Mbimbiliya ya atu waze apwile ni kulikehesa. Lihane hanga ulingile mandumbu je kulita ni uhashi we.—Samu 138:6; 1 Petu. 5:5.

18-19. Kuchi muhasa kuwahilila mu mulimo wa kwambujola chipwe ngwe atu mu ngiza yenu keshi kutayiza umwenemwene?

¹⁸ Shina ha mashimbu amwe wakuhonga ku mbunge mumu lia kuhona kuwana atu waze matayiza umwenemwene mu ngiza yenu? Nyi che wakwivwa, yika muhasa kulinga hanga uwahilile? Yuma yize muyikukwasa yili ha mushete unambe ngwo, “ Majila Akupemesenamo Mulimo we wa Kwambujola.” Chili nawa chipema kupwa ni nyonga lialita hakutwala ku mulimo wa kwambujola. Yika chino chinalumbunuka?

¹⁹ Lihulikile ha kwambujola jina lia Zambi ni Wanangana wenyi. Yesu kasolwele ngwenyi, hi eswe ko te mawana jila ya mwono. (Mateu 7:13, 14) Muze tuli mu munda, twakupwa ni chiwape  cha kukalakala ni Yehova, Yesu ni angelo. (Mateu 28:19, 20; 1 Kori. 3:9; Uso. 14:6, 7) Yehova kakukoka atu waze anazange kumulingila. (Yoa. 6:44) Kashika, nyi mutu katayijile sango jetu haliapwila, tangwa lieka mahasa kutayiza.

20. Yika Jeremia 20:8, 9 unatulongesa ha chize mutukumba yinyengo?

²⁰ Mutuhasa kulilongesa yuma yinji hali profeta Jeremia. Iye kapwile ni kwambujola mu ngiza yize atu te keshi kuzanga kumupanjika. Atu kapwile ni kumukekuna “tangwa lieswe.” (Tanga Jeremia 20:8, 9.) Ha mashimbu amwe, kapwile ni kunenganyana chinji ni kuzanga kulitwamina. Alioze kakechele. Mumu liaka? Mumu “Liji lia Yehova” liapwile ngwe kahia mu mbunge ya Jeremia, kashika, kakahashile kukajima! Chino muchihasa kulingiwa kuli yetu nyi twasa Liji lia Zambi mu mbunge ni mu manyonga jetu. Kashika, twatamba kulilongesa Mbimbiliya matangwa eswe ni kupukuna ha yize tunalilongesa. Nyi twalinga chino, mutununga ni kuwahilila mu mulimo wetu wa kwambujola ni kuwana atu anji waze matupanjika.—Jere. 15:16.

21. Yika muyihasa kutukwasa kunyongonona muze tunahongo ku mbunge?

²¹ Debora, yoze twatongolanga yamba ngwenyi: “Kuhonga ku mbunge chili muheto wa Satana.” Alioze, Yehova kali ni ndundo jinji kuhiana Satana ni atu jenyi. Kashika, chuma cheswacho chize muchikuhongesa ku mbunge eta kuli Yehova hanga akukwase. Iye makukwasa kukumba uhenge ni ulelu we. Makukwasa kunyongonona ha musongo uze uli nawo. Makukwasa kupwa ni nyonga lialita hakutwala ku yiteli mu chikungulwila ni mu mulimo wa kwambujola. Chikwo nawa, kunjika yipikalo ye kuli Tata yetu wa mu malilu. Yehova mahasa kukukwasa hanga unyongonone muze unahongo ku mbunge.