Ka, mu Mbimbiliya chipwe mu mikanda yize yakuhanjika hali akwa-Kristu, kumushi kusolola ngwo upapachiso wacho walingiwileko.

Mbimbiliya jinji jakulumbununa versu jacho mu milali yalisa, kashika amwe akunyonga ngwo, akwa-Kristu amwe kapwile ni kwapapachisa mumu hali waze hanafu. Chakutalilaho, Mbimbiliya Nova Versão Internacional, yinambe ngwo: “Haliapwila, nyi kukushi uhindukilo, yika makalinga waze hanaapapachisa muli afu?”

Alioze, tutalenu yize ambile akwa-mana aali hakutwala ku Mbimbiliya. Dr. Gregory Lockwood yamba ngwenyi, nyonga lia kupapachisa atu “mumu lia waze hanafu,” lili “nyonga lize kulishi mu Mbimbiliya.” Gordon D. Fee longeshi wa shikola yinene yasoneka ngwenyi: “Mu Mbimbiliya yeswe, kumushi ni yimwe versu yinatayiza upapachiso wacho. Mukanda wa Usendo Waha kuushi kuhanjika hakutwala ku chikuma chacho. Nawa kukushi chuma nichimwe chize chinasolola ngwo, akwa-Kristu ku sekulu yitangu chipwe mayingeleja waze asolokele kulutwe kapwile ni kukaula ndako yacho.”

Mbimbiliya yinambe ngwo, tumbaji a Yesu kaehele mulimo wa ‘kutayisa tumbaji a ku mavungu eswe, nikuapapachisa . . . nikualongesa kufunga yuma yize yeswe ahele shimbi’ kuli Yesu. (Mateu 28:19, 20) Shimbu mutu kanda achimupapachisa apwe kambaji, katamba kulilongesa, kufuliela ni kwononokena Yehova ni Mwanenyi Yesu. Mutu yoze hanafu keshi ni uhashi wakulinga yuma yacho chipwe kumulingilayo kuli akwa-Kristu waze achili ni mwono.—Chilu. 9:5, 10; Yoa. 4:1; 1 Kori. 1:14-16.

Mba, yika Paulu ambile kwamba?

A-Korindu amwe kapwile ni kwamba ngwo, kukushi uhindukilo wa afu. (1 Kori. 15:12) Paulu yasolola ngwo, nyonga lio lili lia mahuza ha kwaleza ngwenyi, “[nakumona kufwa] tangwa ha tangwa.” Muze ahanjikile maliji wano Paulu te uchili ni mwono. Chipwe ngwe kapwile ni kupalika mu ponde yeka ni yeka, nihindu kapwile ni kufuliela ngwenyi, nyi mafwa, mamuhindwisa ni mujimba wa spiritu, ngwe chize ahindwishile Yesu.—1 Kori. 15:30-32, 42-44.

A-Korindu te katamba kunyingika ngwo, kupwa mukwa-Kristu wakuwayisa chinalumbunuka kupalika mu yipikalo matangwa eswe ni kufwa shimbu kanda aahindwisa. Kutupapachisa “muli Kristu Yesu,” chinalumbunuka nawa kutupapachisa mu “kufwa chenyi.” (Roma 6:3) Chino chinasolola ngwo, chizechene ngwe Yesu, akwa-Kristu akuwayisa mapalika mu yeseko ni kufwa mba aahindwise hanga aye mu malilu.

Muze te hikwapalika miaka yaali chize muze Yesu amupapachishile mu meya, iye yalweza apostolo jenyi aali ngwenyi: “Kumakanupapachisa ni upapachiso uze mangupapachisa nawo.” (Marku 10:38, 39) Hano Yesu te keshi kuhanjika ha upapachiso wa mu meya. Alioze te kanambe ngwenyi, kushishika chenyi kuli Zambi te muchimutwala ku kufwa. Paulu yasoneka ngwenyi, akwa-Kristu akuwayisa te mamona ‘lamba hamwe Kristu, hanga akapwe ni uhenya hamwe nenyi.’ (Roma 8:16, 17; 2 Kori. 4:17) Chino chinalumbunuka ngwo, akwa-Kristu akuwayisa te mafwa mba aahindwise ni kuya mu malilu.

Kashika, maliji a Paulu mahasa kupwa ni ulumbunwiso uno: ‘Yika makalinga waze anapapachisa hanga afwe? Nyi uhindukilo wa afu kuuchi kapwako, mba mumu liaka anaapapachisa ni nyonga liacho?’