1. Mutuhasa kulipikala ha yika, kuchi yino muyihasa kutupinjisa?

SHINA hiunalipikala kama ni chimwe chuma? * Kota wakulipikala ni kwivwa yikola ku mbunge ha mukunda wa yuma yize akwenu anakamba hanji anakakulinga. Hanji kulipikala mumu lia yize wambile hanji walingile hali akwenu. Chakutalilaho, kota hiunalingi uhenge uze wakunyonga ngwe Yehova kechi keza kakukonekena. Chikwo nawa, hanji wakunyonga ngwe, amu unapinji ni yipikalo yacho kuushi ufulielo, uli mutu mupi. Shina chenacho lume?

2. Yilweza yika ya mu Mbimbiliya yize yinasolola ngwo kulipikala kuchalumbunukine ngwo kutushi ufulielo?

² Tutalenu yimwe yilweza ya mu Mbimbiliya. Hana, naye ya profeta Samuele, kapwile pwo washishika chinji. Chipwe chocho, kapwile ni kulipikala chinji muze apwile ni kumwihia kuli chihalika chenyi. (1 Samue. 1:7) Postolo Paulu, neye kapwile ni ufulielo ukolo, nihindu te kakulipikala mumu lia “yikungulwila yeswe.” (2 Kori. 11:28) Mwanangana Ndawichi kapwile ni ufulielo ukolo, kashika Yehova te akumuzanga chinji. (Yili. 13:22) Alioze muze Ndawichi alingile shili, yaputuka kunenganyana ni kulipikala chinji. (Samu 38:4) Yehova kalembejekele ni kutakamisa hita umwe wa kuli tuvumbi wano. Tutalenu yize mutulilongesa ha yilweza yo.

3. Mumu liaka mutuhasa kulipikala nyi umwe mutu matwamba yuma yipi?

³ Mutuhasa kulipikala muze akwetu matwamba hanji kutulinga yuma yipi. Chino chakupinjisa chinji, chipi-chipi nyi mutu wacho kali sepa yoze twakujikijila hanji usoko wetu. Hachino, hanji mutuhasa kumona ngwe usepa wetu ni mutu wacho muufwa. Ha mashimbu amwe, mutu mahasa kutwamba yuma ya kalusulusu, yuma yacho muyihasa kutwaha yikola ku mbunge, ngwe kutuwa cha katana! (Yishi. 12:18) Alioze, ha mashimbu akwo mutu mahasa kutwamba yuma yipi hanga atuvwise kupiha. Umwe ndumbu wa pwo yoze wapalikile mu kapinda yono, yamba ngwenyi: “Ha yimwe miaka kunyima, mutu yoze te nakumona ngwe sepa liami, yaputuka kumwanga sango ja mahuza ha internet hakutwala kuli yami. Nevwile yikola yinji ku mbunge, yinguputuka kulipikala. Chakanyingikine mumu liaka iye ambile yuma yamutapwau.” Nyi hiunapalika mu kapinda ngwe yono, muhasa kulilongesa yuma yinji ha chilweza cha Hana.

4. Yipikalo yika Hana apwile nayo?

⁴ Hana kapwile ni yipikalo yinji ku mwono wenyi. Ha miaka yinji iye te keeshi kusema. (1 Samue. 1:2) Ha mashimbu jacho, A-Izalele te kakutayiza ngwo, pwo yoze uli mumba, keshi utayizo wa Yehova. Chino te chakuvwisa Hana ngwe keshi ulemu. (Uputu. 30:1, 2) Chikwo nawa, lunga lia Hana kapwile ni pwo mukwo yoze te wakusema, jina lienyi Penina. Pwo yono, te kakumona Hana ngwe mukwa-kole yenyi, nawa kapwile “ni kumwihia chikolo nikumuvundula.” (1 Samue. 1:6) Chitangu, Hana te keshi kumona chize makumba kapinda yono. Yino yapwile ni kumwaha yinyengo yinji te ‘kakulila, nawa te keshi kulia.’ Hana te ‘kakulila chikolo.’ (1 Samue. 1:7, 10) Yika yatakamishile Hana?

5. Kuchi kulemba chakwashile Hana?

⁵ Hana yalemba kuli Yehova ni mbunge yeswe ni kumulweza yinyengo yeswe te anevu. Muze ahwishile kulemba, yalumbununa kapinda wenyi kuli Eli, Sasendote wa Lutwe. Eli yamulweza ngwenyi: “Uye kanawa, mwe Zambi wa Izalele akwehe chize wamwita.” Yika mba yalingiwile kuli Hana? Hana “yaya kwenyi, yalia, mba kapwile nawa ni chinyengo ku meso.” (1 Samue. 1:17, 18) Kulemba chakwashile Hana kupwa ni sambukila mu mbunge.

6. Yika twalilongesa hali Hana ni ha maliji waze ali ha A-Fwilipu 4:6, 7 hakutwala ku kulemba?

 ⁶ Mutuhasa kupwa ni sambukila mu mbunge nyi twanunga ni kulemba kuli Yehova. Hana kahanjikile ni Tato wa mu malilu ha mashimbu anji. (1 Samue. 1:12) Ni yetu mutuhasa kuhanjika chinji ni Yehova hakutwala ku yipikalo, woma ni ulelu wetu. Yilemba yetu yatambile kupwa yautotombo hanji yingunu. Ha mashimbu amwe, mutuhasa kulila muze tunalweze Yehova yipikalo yetu. Chipwe chocho, Iye keshi kuhonga ha kutwivwa. Alioze, twatamba kulinga yuma yinji hi wika ko kulemba ha kapinda wetu. Twatamba kwiwuluka chiyulo chize chili ha A-Fwilipu 4:6, 7. (Tanga.) Paulu kasolwele pundu ngwo, twatamba kulemba hanga tusakwilile. Tuli ni yitela yinji ya kusakwilila Yehova. Chakutalilaho, mutuhasa kumusakwilila ha mwono uze atuhele, ha yuma yize atangile, zango lienyi lingunu hali yetu ni kutalatala chize akutwaha. Yika nawa mutuhasa kulilongesa hali Hana?

7. Hana ni mukwo-lunga yika te akulinga?

⁷ Chipwe ngwe Hana te kakupalika mu yipikalo yinji, nihindu iye ni mukwo-lunga te kakuya ni kuwayila Yehova, ku Shilo. (1 Samue. 1:1-5) Muze Hana te ali mu tabernakulu, Sasendote wa Lutwe, Eli, yahanjika nenyi ni kumukolweza ngwenyi, Yehova akwehe chize wamwita.—1 Samue. 1:9, 17.

8. Kuchi kuya ku kukunguluka muchihasa kutukwasa? Lumbununa.

⁸ Mutuhasa kupwa nawa ni sambukila nyi twanunga ni kuya ku kukunguluka chetu. Kulemba chitangu chize akuputuka nacho ku kukunguluka chetu, kakwita hanga spiritu yisandu ya Zambi yipwe hali yetu. Sambukila yili chihanda cha muhuko wa spiritu. (Ngala. 5:22) Kashika, chipwe ngwe tunalipikala ni kapinda, twatamba kununga ni kuya ku kukunguluka. Chino, muchitukwasa kuhana kuli Yehova ni mandumbu jetu uhashi wa kutukolweza. Ayo mahasa kutukwasa hanga tupwe ni sambukila mu mbunge. Kulemba ni kuya ku kukunguluka yili jila yize Yehova akutuhelamo ulembejeko. (Hepre. 10:24, 25) Tutalenu longeso likwo lize mutuhasa kuwana ha chilweza cha Hana.

9. Yika yize kuyakalumukine kuli Hana, alioze yika yamukwashile?

⁹ Yuma yize te yakupikalisa Hana, kuyakapalikile ha shimbu lizeliene. Muze Hana akatukile ku tabernakulu ni kufuna ku zuwo, iye yanunga ni kutwama ni Penina hamuwika. Nawa Mbimbiliya kuyishi kulumbununa nyi Penina kalumwine ndako yenyi nyi ka. Kashika, chinasoloka ngwe Hana kanungine ni kupinda ni maliji akalu a chihalika chenyi. Alioze, Hana kanakakumba kapinda wacho ni kupwa ni sambukila mu mbunge. Twiwulukenu ngwentu, muze Hana akunjikile yipikalo yenyi kuli Yehova, te keshi kulipikala nawa. Iye yalihana kuli Yehova hanga amulembejeke ni kumutakamisa. Ha kupalika cha amwe mashimbu, Hana yatambula chiwape cha kusema ana!—1 Samue. 1:19, 20; 2:21.

10. Yika twalilongesa ha chilweza cha Hana?

¹⁰ Mutuhasa kupwa cheka ni sambukila chipwe ngwe kapinda wetu machinunga. Chipwe ngwe mutulemba chinji ni kuya chinji ku kukunguluka, yipikalo yimwe muyihasa kununga. Alioze, chilweza cha Hana chatulongesa ngwo, kushi nichimwe chize muchikinda Yehova kutulembejeka muze tunalipikala. Yehova kechi keza katuvulama nilimwe tangwa. Nyi twanyongonona, Yehova matuwahisa.—Hepre. 11:6.

11. Yitela yika Paulu apwile nayo hanga alipikale?

¹¹ Paulu kapwile ni yitela yinji yize te mahasa kulipikala nayo. Chakutalilaho, hamukunda wa zango lize apwile nalio hali mandumbu mu chikungulwila, Paulu te kakulihulumba chinji muze ayo te akupalika mu kapinda. (2 Kori. 2:4; 11:28) Ha yisuho yinji, muze apwile mu mulimo wenyi wa kwambujola, postolo Paulu kapwile ni kumuhungumiona chinji ni kumusa mu zuwo lia ususu. Nawa kapwile ni kapinda wa “uswale.” (Fwili. 4:12) Twiwulukenu nawa ngwetu, Paulu kalilamwinyinyine katatu keswe muze wato washimbamine, yino yeswe kota yapwile ni kumuvwisa woma ni yipikalo ya kuya nawa cheka mu wenyi ni wato. (2 Kori. 11:23-27) Kuchi Paulu akumbile yipikalo?

12. Yika yakwashile Paulu ahone kulipikala chinji?

¹² Chipwe ngwe te kakulipikala ha kapinda wa mandumbu, nihindu Paulu te keshi kuhwisa kapinda wacho ukawenyi. Paulu te kakulikehesa. Kashika, atumine mandumbu akwo hanga afunge yikungulwila. Chakutalilaho, iye kahanyine yiteli yinji kuli malunga ajama, ngwe Timoteu ni Titu. Chochene, mulimo wa malunga wano, wakwashile kutepulula yipikalo ya Paulu.—Fwili. 2:19, 20; Titu 1:1, 4, 5.

13. Kuchi makulwana a mu chikungulwila mahasa kwimbulula Paulu?

¹³ Eta ukwaso kuli akwenu. Chizechene ngwe Paulu, makulwana a mu chikungulwila anji kakulipikala muze akunyingika ngwo, mandumbu a mu chikungulwila kali ni kapinda. Alioze, mukulwana umuwika kechi kuhasa kukwasa mandumbu eswe mu chikungulwila. Kashika, makulwana a mu chikungulwila katamba kulikehesa. Katamba kutetela mulimo wacho kuli mandumbu akwo ajama ni kufumba kanawa akweze hanga akwase kufunga mapanga ja Zambi.—2 Timo. 2:2.

14. Yika Paulu te keshi kunyonga, nawa yika mutuhasa kulilongesa ha chilweza chenyi?

¹⁴ Ningika ngwe unafupu ulembejeko wa akwenu. Paulu kapwile ni kulikehesa. Kashika te akwita hanga amulembejeke kuli masepa jenyi. Paulu te kananyingika ngwenyi, kanafupu ulembejeko wa akwo, nawa te keshi kunyonga ngwenyi, kwita ulembejeko chili kuhona ufulielo. Mu mukanda uze asonekenene Fwilimu, Paulu yamba ngwenyi: “Uwahililo wunji ni sambukila nguli nayo mumu ha zango lie.” (Fwilim. 7) Paulu kanahanjika nawa  hali mandumbu akwo waze apwile ni kumulembejeka chinji ha mashimbu akalu. (Kolo. 4:7-11) Nyi twalikehesa ni kutayiza ngwetu tunafupu ulembejeko wa akwetu, mandumbu jetu mawahilila chinji ha kutukwasa ha yize tunahono.

15. Yika yakwashile Paulu muze te analipikala?

¹⁵ Jikijila ha Liji lia Zambi. Paulu te kananyingika ngwenyi, Liji lia Zambi mulihasa kumulembejeka. (Roma 15:4) Liji lia Zambi lie te mulimwaha mana hanga ahase kukumba yeseko yeswa te mapalika. (2 Timo. 3:15, 16) Muze te ali mu zuwo lia ususu ku Roma, Paulu yanyingika ngwenyi, kwasala hakehe hanga amushihe. Yika Paulu alingile hakunyingika yino? Yeta hanga Timoteu amunehene kawashi “mikanda.” (2 Timo. 4:6, 7, 9, 13) Mumu liaka? Mumu mikanda yacho kota yapwile ya Yisoneko ya Hepreu, te muyikwasa Paulu hanga alinge longeso lienyi liawika. Ni yetu nawa, nyi twalilongesa matangwa eswe Mbimbiliya, Yehova matulembejeka kupalikila mu Liji lienyi, chipwe muze tunapalika mu yipikalo yinji.

16. Yipikalo yika Ndawichi anakalinehena mwene?

¹⁶ Ndawichi kalingile chuma chipi chinji chize te muchihasa kulemesa mbunge yenyi. Kalilinge utanji ni Bate-Shipa, yatuma kushiha lunga linyi, nawa yasweka shili yacho. (2 Samue. 12:9) Ku uputukilo, Ndawichi yalengulula mbunge yenyi. Alioze, ha kupalika cha mashimbu yiyiputuka kumupinjisa chinji ku ufulielo, ni ku mujimba. (Samu 32:3, 4) Yika yakwashile Ndawichi kukumba yipikalo yize anakalinehena mwene? Yika muyihasa kutukwasa nyi mutulinga shili yinene?

17. Kuchi maliji ali ha Samu 51:1-4, anasolola ngwo Ndawichi kanakalikonyeka mu mbunge?

¹⁷ Lemba hanga wite ukonekeno. Ndawichi mwene yakwata chiyulo cha kulemba kuli Yehova. Yalikonyeka mu yilemba ni kwita ukonekeno wa shili yenyi. (Tanga Samu 51:1-4.) Chino chahuzulwile mbunge yenyi ni kuwahilila cheka nawa! (Samu 32:1, 2, 4, 5) Nyi hiunalingi shili yinene, kanda uyisweka. Alioze, azulula mbunge ye kuli Yehova ni kumulweka shili ye. Nyi wachilinga, kuuchi kulipikala chinji, nawa mbunge ye yichi kulema chinji. Chikwo nawa, nyi chamwenemwene unazange  kuhilwisa usepa we ni Yehova, kuli ni yimwe yikwo unatela kulinga kuhiana kulemba.

18. Yika Ndawichi alingile muze amuhele fumbo?

¹⁸ Tayiza fumbo. Yehova yatuma profeta Natane hanga alweze Ndawichi shili yenyi. Ndawichi kakesekele kulikalila hanji kulengulula upi uze alingile. Iye yatayiza ngwo kavulumwine kuli Yehova ni kuli lunga lia Bate-Shipa. Ndawichi yatayiza fumbo lia Yehova, ha chino, Yehova yamukonekena. (2 Samue. 12:10-14) Nyi hiunalingi shili yinene, yako uhanjike ni makulwana a mu chikungulwila. Yehova kaatongwele hanga atufunge. (Tia. 5:14, 15) Chikwo nawa, likolweze hanga wehuke ndako ya kulikalila. Nyi mutayiza fumbo ni kawashi ni kulinga yize makulweza, kuuchi kushimbula chinji kupwa cheka ni sambukila ni chiseke.

19. Yika twatamba kulinga?

¹⁹ Sako tachi hanga uhone kuhilukila shili yize walinga. Mwanangana Ndawichi kanyingikine ngwenyi, katamba kufupa ukwaso wa Yehova, mba ahone kuhilukila shili yacho. (Samu 51:7, 10, 12) Muze te hamukonekena kuli Yehova, Ndawichi yakwata chiyulo chakwehuka kunyonga yuma yipi. Chino yichimukwasa kupwa cheka ni sambukila mu mbunge.

20. Kuchi mutuhasa kusolola ngwetu, twakusakwilila ha ukonekeno wa Yehova?

²⁰ Mutuhasa kusolola ngwetu, tunasakwilila Yehova ha ukonekeno wenyi, ha kulemba kuli iye, kutayiza fumbo lienyi, kusa tachi hanga tuhone kuhilukila shili yize twalinga. Nyi twalinga chocho, mutupwa cheka ni sambukila ya ku mbunge. James, umwe ndumbu yoze walingile shili yinene, yamba ngwenyi: “Muze nalwezele makulwana shili yize nalingile, yingwivwa ngwe kanguchiza yilemu ha yipaya. Yingupwa cheka ni sambukila ku mbunge.” Chili chiwape chinene kunyingika ngwo, “Yehova katwama hehi ni waze amakuka mbunge, kakulamwina waze ali ni spiritu ya kupihilila”!—Samu 34:18.

21. Kuchi mutuhasa kwecha Yehova hanga atulembejeke?

²¹ Ha matangwa wano akusula, mutuhasa kupwa ni yipikalo yinji. Kashika, muze mupwa ni yipikalo, eta ukwaso kuli Yehova kawashi-washi. Sako tachi hanga ununge ni kulilongesa Mbimbiliya. Lilongese ha chilweza cha Hana, Paulu ni Ndawichi. Eta kuli Tatenu wa mu malilu hanga akukwase unyingike chishina cha yipikalo ye. (Samu 139:23) Kunjika yipikalo ye yeswe kuli Yehova, chipi-chipi muze kuushi ni uhashi wa kuyihwisa. Nyi mulinga chino, muupwa ngwe mukwa-kwimba masamu yoze wambile hakutwala kuli Yehova ngwenyi: “Hakachi ka kulumbama cha manyonga jami muchima, kulembejeka che chakunguwahisa.”—Samu 94:19.