MUTWE WAKULILONGESA 8
Kanda Wecha Chipululu Chipinjise Sambukila
“Tukaulenu yuma yipema yize yatwala ku sambukila, ni yuma yize mutuhasa kulikolesanayo umwe ni mukwo ni mukwo.”—ROMA 14:19.
MWASO 113 Sambukila Yize Tuli Nayo
CHIKUMA CHILEMU *
1. Yika yalingiwile mu usoko wa Yakomba ha mukunda wa chipululu?
YAKOMBA te kakuzanga ana jenyi eswe, alioze kazangile chinji mwanenyi yoze wapwile ni miaka 17, Yosefwe. Kuchi mba makulwana jenyi evwile? Ayo yaputuka kumuvwila chipululu. Yosefwe kakalingile upi niumwe mba te amuvwile chipululu. Chipwe chocho, ayo yamulanjisa ni kwonga tato ngwo, mwanenyi yoze te azanga chinji kamushiha kuli ngongo mupi. Chipululu chize mandumbu ja Yosefwe evwile che chapihishile sambukila mu usoko wo, chino yichinehena tato lamba linji.—Uputu. 37:3, 4, 27-34.
2. Kulita ni A-Ngalashia 5:19-21, mumu liaka chipululu chili chipi?
2 Mbimbiliya yakusolola ngwo, chipululu * chili mukachi ka “yitanga ya musunya” yize muyihasa kuneha kufwa ni kukinda mutu hanga ahone kunjila mu Wanangana wa Zambi. (Tanga A-Ngalashia 5:19-21.) Chipululu chili chishina cha ndako jikwo jipi, ngwe, ufwatulo, kulitachika, ni kulimanangana.
3. Yika mutulilongesa ha mutwe uno?
3 Chilweza cha mandumbu ja Yosefwe chinasolola chize chipululu muchihasa kupihisa usepa ni sambukila mu usoko. Chipwe ngwe tuchikuhasa kulinga yuma yize ayo alingile, alioze mbunge yetu yili ya uhenge nawa muyihasa kutwonga. (Jere. 17:9) Kashika, ha mashimbu amwe mutuhasa kwivwila akwetu chipulu. Mba yika mutulinga nyi twaputuka kwivwila akwetu chipululu? Mutulilongesa yilweza ya mu Mbimbiliya yize yili utowezo kuli yetu, ni chize mutuhwisa chipululu mu mbunge yetu ni kupwa ni sambukila hakachi ketu.
YIKA MUYIHASA KUNEHA CHIPULULU?
4. Mumu liaka A-Filistea evwilile Izake chipululu?
4 Nyi mutu kali ni upite unji. Izake kapwile ni upite unji, hachino, A-Filistea yaputuka kumuvwila chipululu hamukunda wa upite wenyi. (Uputu. 26:12-14) Ayo nawa yashikila shima lia meya lize Izake te akuswita meya hanga anwise mapanga jenyi. (Uputu. 26:15, 16, 27) Chizechene ngwe A-Filistea, atu amwe kakwivwila chipululu waze ali ni mbongo jinji kuhiana ayo. Atu jacho keshi kuzanga wika kupwa ni yuma ya akwo, alioze kakuzanga nawa kuyitambula.
5. Mumu liaka mangana a mangeleja te akuvwila Yesu chipululu?
5 Nyi mutu kakumuzanga chinji kuli akwo. Yesu te kakumuzanga chinji kuli atu, alioze, tusongo ja mangeleja A-Yunda yaputuka kumuvwila chipululu. (Mateu 7:28, 29) Yesu kamutumine kuli Zambi nawa te kakulongesa umwenemwene kuli atu. Chipwe chocho, mangana wano a mangeleja yaputuka kumwanga sango ja mahuza hakutwala kuli Yesu hanga apihise lufuma wenyi mupema. (Marku 15:10; Yoa. 11:47, 48; 12:12, 13, 19) Yika mutuhasa kulilongesa ha lusango yono? Mu chikungulwila, twakumona mandumbu waze ali ni ndako jipema, nawa kakwazanga chinji kuli atu eswe. Kashika, twatambile kwevwila chipululu, alioze twatamba kulikolweza hanga twimbulule ndako jo jipema.—1Kori. 11:1; 3 Yoa. 11.
6. Kuchi Ndiutrefwe te akusolola ngwo kakuvwila akwo chipululu?
6 Nyi mutu kali ni yiteli mu chikungulwila. Ku sekulu yitangu, Ndiutrefwe te kakuvwila chipululu mandumbu waze te akusongwela yikungulwila ya akwa-Kristu. Iye te kakuzanga “kupwa ni muhela utangu hakachi” ka mandumbu mu chikungulwila. Kashika te akwamba yuma ya saki hanga postolo Yoano ni mandumbu akwo ahone kwavumbika kuli atu. (3 Yoa. 9, 10) Chipwe ngwe niumwe wa kuli yetu kechi kuhasa kulinga yino yuma alingile Ndiutrefwe, alioze, hanji mutuhasa kuvwila chipululu umwe ndumbu yoze ahana chiteli chize yetu te tunazange, chipi-chipi nyi twakunyonga ngwo yetu e tuli ni utotombo wa kulinga mulimo wacho.
Mbunge yetu yili ngwe mavu, yitanga yetu yipema yili ngwe yitemo yipema. Alioze chipululu chili ngwe katanda. Chipululu muchihasa kutukwika kupwa ni yitanga yipema ngwe, zango, keke ni upeme. (Tala paragrafu 7)
7. Yika chipululu muchihasa kulinga hali yetu?
7 Chipululu chili ngwe katanda. Nyi miji ya katanda yatatuka mu mbunge yetu, muchihasa kupwa chikalu kuyitukula. Chipululu chakwoka mu mbunge ya mutu ha mukunda wa ndako jikwo ngwe, ukwa, kuzo ni kulisuta. Nyi mutu kali ni chipululu, muchihasa kupwa chikalu kuli iye kupwa ni ndanko jipema ngwe, zango, keke ni upeme. Kashika nyi twamona ngwetu, chipululu chinaputuka kukola mu mbunge yetu, twatamba kuchitukula kawashi-washi. Yika mutuhasa kulinga hanga tuchize chipululu mu mbunge?
LIKEHESE NAWA WAHILILA NI YIZE ULI NAYO
Kuchi mutuhasa kutukula katanda wa chipululu? Ni ukwaso wa spiritu yisandu ya Zambi, mutuhasa kutukula chipululu mu mbunge hanga tulikehese ni kuwahilila ni yize tuli nayo (Tala maparagrafu 8-9)
8. Yitanga yika yize muyihasa kutukwasa hanga tukumbe chipululu?
8 Kulikehesa ni kuwahilila ni yize tuli nayo, muchihasa kutukwasa kukumba chipululu. Nyi mutuzala too ni yitanga yino yipema, chipululu kuchichi kupwa ni chihela mu mbunge yetu. Mutu yoze wakulikehesa, keshi kulinangamisa chipwe kumona ngwe iye mwe watela kupwa ni yuma yeswe. (Ngala. 6:3, 4) Mutu yoze wakuwahilila ni yize ali nayo, keshi kupwa ni chako cha kulitesa ni akwo. (1 Timo. 6:7, 8) Mutu yoze wakulikehesa ni kuwahilila ni yize ali nayo, muze akumona akwo matambula yiteli kakuwahilila hamwe no.
9. Kulita ni A-Ngalashia 5:16; A-Fwilipu 2:3, 4, kuchi spiritu yisandu muyihasa kutukwasa?
9 Spiritu yisandu ya Zambi, muyihasa kutukwasa kukumba chipululu, kupwa akwa kulikehesa ni kuwahilila ni yize tuli nayo. (Tanga A-Ngalashia 5:16; A-Fwilipu 2:3, 4.) Spiritu yisandu ya Yehova, muyihasa kutukwasa hanga tunyingike manyonga waze ali mu mbunge yetu. Nyi muli manyonga api, Yehova mahasa kutukwasa hanga twachize ni kusalakanyisamo manyonga apema. (Samu 26:2; 51:10) Mose ni Paulu, kakumbile chipululu. Tutalenu yilweza yo.
Umwe mukweze Ka-Izalele kanayi ni kulweza Mose ni Yosua hakutwala kuli malunga aali waze anaprofeteza mu chilombo. Alioze, Mose kanalweze Yosua ngwo chili chipema kuli Yehova kusa spiritu Yenyi hali malunga wano aali. (Tala paragrafu 10)
10. Yika te muyihasa kupwa cheseko kuli Mose? (Tala chizulie ha chifukilo)
10 Mose kapwile ni chiteli chinene hakachi ka atu ja Zambi, alioze kakapwile ni kukinda akwo kupwa nacho. Chakutalilaho, tangwa limwe, Yehova yachiza ndambu ya spiritu yisandu muli Mose yayisa hali amwe makulwana a mu Izalele waze te anajingilika mbalaka ya kukungulukila. Muze kwapalikile mashimbu akehe, Mose yanyingika ngwo, amwe makulwana aali waze kakapwile ku mbalaka no katambwile spiritu yisandu, nawa ngwo te haputuka kuprofeteza. Yika mba Mose alingile muze Yoshua amulwezele hanga akwike makulwana jacho kuprofeteza? Mose kakevwile chipululu hali makulwana jacho mumu lia zango lize Yehova asolwele hali ayo. Shimbu alinge chino, Mose yalikehesa ni kuwahilila ni chiteli chize akwo atambwile. (Kwa. 11:24-29) Yika mutuhasa kulilongesa ha chilweza cha Mose?
Kuchi makulwana a mu yikungulwila mahasa kwimbulula kulikehesa cha Mose? (Tala maparagrafu 11-12) *
11. Kuchi makulwana a mu Chikungulwila mahasa kwimbulula Mose?
11 Nyi uli mukulwana mu Chikungulwila, shina chizavu cha makulwana hanakwichi hanga ulongese umwe ndumbu mulimo uze wakuzanga chinji mu chikungulwila? Chakutalilaho, hanji yena wakuzanga chinji chiteli cha kusongwela longeso lia Kaposhi wa Kutalila poso jeswe. Nyi wakulikehesa ngwe Mose, uchi kulipikala muze makulweza hanga ulongese ndumbu mweka apwe ni kusongwela Kaposhi wa Kutalila. Alioze, muwahilila ha kukwasa ndumbwe.
12. Kuchi akwa-Kristu anji anasolola kulikehesa ni kuwahilila ni yize ali nayo?
12 Tunyongenu ha kapinda mukwo yoze mandumbu waze hashinakajiwa anapalika. Anji a kuli ayo, hanakalakala ngwe tusongo a mu chizavu cha makulwana a mu chikungulwila ha miaka yinji. Alioze, muze akupwa ni miaka 80, kakuhana chiteli chino kuli ndumbu mweka. Tulayi a mambonge no che akulinga, muze akupwa ni miaka 70 kakwecha mulimo wo ni kutayiza chiteli chaha. Nawa ha miaka yapalika, mandumbu anji waze te akukalakala ku Mbetele kaalwezele hanga akatuke ku Mbetele ni kwaha mulimo weka mu yikungulwila. Mandumbu wano ashishika keshi kuvwila chikulikuli mandumbu waze analingi mulimo uze ayo te akulinga.
13. Yika te muyihasa kutwala Paulu hanga evwile chipululu apostolo 12?
13 Postolo Paulu neye kali chilweza chipema cha mutu yoze wapwile ni kuwahilila ni yize ali nayo ni kulikehesa. Paulu te keshi kwecha chipululu chikole mu mbunge yenyi. Chipwe ngwe kakalakalile chinji mu mulimo wa kwambujola, te kakulikehesa, kashika ambile ngwenyi: “Ami nguli mukepe wahiana eswe a kuli apostolo, chatelele akanguvuluke ngwo, Postolo.” (1 Kori. 15:9, 10) Apostolo 12 e apwile ni kwenda ni Yesu muze te akuya ni kwambujola, alioze, Paulu kapwile wika mukwa-Kristu muze Yesu te hafwa kulu ni kumuhindwisa. Chipwe ngwe, hakupalika cha mashimbu kamutongwele hanga apwe “postolo wa mavungu,” nihindu Paulu kakatambwile chiwape cha kupwa mukachi ka apostolo 12. (Roma 11:13; Yili. 1:21-26) Shimbu evwile chipululu apostolo 12 waze apwile ni kwenda ni Yesu, Paulu yawahilila ni chiteli chize apwile nacho.
14. Kuchi kulikehesa ni kuwahilila ni yize tuli nayo muchitukwasa?
14 Chizechene ngwe Paulu, kulikehesa ni kuwahilila ni yize tuli nayo, muchitukwasa hanga tuvumbike atu waze Yehova akuhana yiteli mu chikungulwila. (Yili. 21:20-26) Iye hanatongola malunga hanga asongwele chikungulwila cha akwa-Kristu. Chipwe ngwe kali yihenge, nihindu Yehova hanaasakula hanga apwe “yawana kuli atu.” (Efwe. 4:8, 11) Chili chilemu chinji kuvumbika malunga wano ali ni yiteli ni kukaula usongwelo uze akutwaha. Nyi mutulinga chino, mutukundama kuli Yehova ni kupwa ni sambukila ni mandumbu jetu.
“TUKAULENU YUMA YIPEMA YIZE YATWALA KU SAMBUKILA”
15. Yika twatamba kulinga?
15 Nyi mutupwa ni chipululu, tuchi kupwa ni sambukila hakachi ketu. Kashika, twatamba kutukula chipululu mu mbunge yetu ni kukeya hanga tuchine kukuwa mbuto ya chipululu mu mbunge ya akwetu. Nyi mutulinga chino, muchipwa chashi kwononokena shimbi ya Yehova yakwamba ngwo: “Tukaulenu yuma yipema yize yatwala ku sambukila, ni yuma yize mutuhasa kulikolesanayo umwe ni mukwo ni mukwo.” (Roma 14:19) Yika mba mutulinga hanga tukwase akwetu akumbe chipululu, nawa kuchi mutuhasa kupwa ni sambukila?
16. Kuchi mutuhasa kukwasa akwetu kwehuka chipululu?
16 Yitanga yetu muyihasa kukwata hali akwetu. Hano hashi hakukolweza atu hanga alizate ha yuma yize akwete. (1 Yoa. 2:16) Alioze yitanga yino, yakuneha chipululu. Kashika, muchipema chinji nyi mutwehuka kuhanjika chinji ha yuma yize tukwete, hanji ha yize tunazange kulanda. Nyi mutulinga chocho, mutukinda kukuwa mbuto ya chipululu mu mbunge ya akwetu. Mulali ukwo wa kwehukilamo kukuwa chipululu mu mbunge ya akwetu, uli kulikehesa ha yiteli yize tulinayo mu chikungulwila. Kulisambula chinji ha yize twakulinga mu ululikiso wa Yehova, chakukuwa mbuto ya chipululu mu mbunge ya akwetu. Kashika, chuma twatamba kulinga chili kuzanga akwetu ni kwakolweza ha yuma yipema yize akulinga. Nyi twalinga chino, mutuhasa kwakwasa hanga awahilile ni kuneha sambukila mu chikungulwila.
17. Yika mandumbu ja Yosefwe ahashile kulinga, nawa mumu liaka?
17 Mutuhasa kukumba chipululu! Tunyongenu cheka ha chilweza cha mandumbu ja Yosefwe. Muze amwesene Yosefwe lamba, kwapalikile miaka yinji, mba yaliwana nenyi cheka mu Engitu. Alioze, muze Yosefwe te kanda achilisolola kuli mandumbu jenyi, yeeseka hanga amone nyi te hanalumuna yitanga yo. Muze te anali, Yosefwe yahana kulia chinji kuli mwanakwo Mbenjamine, kuhiana kuli mandumbu jenyi akwo. (Uputu. 43:33, 34) Chipwe chocho, kushi nichimwe chize chinasolola ngwo ayo kevwilile Mbenjamine chipululu. Alioze ayo kasolwele ngwo kakulihulumba hali mwanakwo, ni tato Yakomba. (Uputu. 44:30-34) Mandumbu ja Yosefwe, kachijile chipululu mu mbunge, kashika apwile ni sambukila mu usoko wo. (Uputu. 45:4, 15) Chizechene nawa, nyi twachiza yitanga ya chipululu mu mbunge, mutupwa ni sambukila mu usoko wetu ni mu chikungulwila.
18. Kulita ni Tiangu 3:17, 18, yika muyilingiwa nyi twapwa ni sambukila?
18 Yehova kanazange hanga tukumbe chipululu hakachi ketu hanga tupwe ni sambukila. Twatamba kusa tachi jinji mba tuhase kuchilinga. Ngwe chize twalilongesa ha mutwe uno, ha mashimbu amwe mutuhasa kuvwila akwetu chipululu. (Tia. 4:5) Chikwo nawa, twatwama hashi haze hazala too ni chipululu. Alioze, nyi twalikehesa ni kuwahilila ni yize tuli nayo, nawa twalemesa akwetu, mutwehuka chipululu. Ha chino, mututwama kanawa ni akwetu ni kusolola mihuko ya ululi ni sambukila.—Tanga Tiangu 3:17, 18.
MWASO 130 Pwenu ni Kukonekena Akwenu
^ kax. 5 Mu ululkiso wa Yehova mukwete sambukila. Alioze, nyi mutwivwila akwetu chipululu mutupinjisa sambukila yino. Ha mutwe uno, mutulilongesaho yize muyihasa kuneha chipululu. Mutumona nawa chize mutuhasa kwehuka ndako yino yipi hanga tupwe ni sambukila mukachi ketu.
^ kax. 2 ULUMBUNWISO WA AMWE MALIJI: Ngwe chize akusolola mu Mbimbiliya, chipululu chishi kutwala wika mutu hanga azange yuma yize mukwo ali nayo, alioze, muchihasa nawa kumutwala hanga atambule yuma yacho.
^ kax. 61 ULUMBUNWISO WA YIZULIE: Makulwana a mu chikungulwila kanalikungulula, kanalweze ndumbu yoze wakusongwela Kaposhi wa Kutalila hanga alongese ndumbu mukweze apwe ni kusongwela Kaposhi. Chipwe ngwe ndumbu yono wa mukulwana te kakuzanga chinji kusongwela Kaposhi wa Kutalila, alioze kanatayiza chiyulo cha chizavu cha makulwana hanga alongese ni kukwasa mukulwana mwaha.
