1. Mutu yoze te mazanga kuhanjika ni Mwanangana wa Persia yika te atamba kulinga?

NYONGA ngwe, wapwile mu Persia ha miaka 2,500 kunyima. Unazange kuhanjika ni mwanangana. Hachino, muya ku mbonge yize atwama. Alioze, chitangu watamba kupwa ni utayizo wa mwanangana mba uhanjike nenyi. Nyi muya ni kuhanjika ni mwanangana chakuhona utayizo wenyi, mahasa kukushiha!—Este. 4:11.

2. Kuchi Yehova anazange hanga tumumone?

² Tunawahilila chinji kunyingika ngwetu, Yehova keshi ngwe mwanangana yono wa Persia. Yehova kali munene chinji kuhiana mianangana a hano hashi. Chipwe chocho mutuhasa kuhanjika nenyi ha shimbu lieswalio. Chikwo nawa, mwene Yehova kanazange hanga tuhanjike nenyi mashimbu eswe. Chipwe ngwe Yehova kali ni yisanyiko ya kukola woma, ngwe Sakatanga Munene, Mwene, Mukwa-Ndundo-Jeswe, nihindu kanatukolweza hanga tumusanyike ngwo, “Tata.” Chisanyiko chino chili cha zango. (Mateu 6:9) Yehova keshi kuzanga hanga tumumone ngwe mutu yoze uli kusuku chinji, nawa keshi zango, alioze kanazange hanga tumumone ngwetu kali “Tata” mupema yoze uli hakamwihi ni yetu. Cho kuwaha kunyingika chino!

3. Mumu liaka mutuhasa kuvuluka Yehova ngwo, Tata, nawa yika mutulilongesa ha mutwe uno?

³ Mutuhasa kuvuluka Yehova ngwo, “Tata,” mumu iye mwe Chishina cha mwono wetu. (Samu 36:9) Yehova kali Tata yetu, kashika twatamba kumwononokena. Nyi mutulinga yize Yehova akutwita, mutuzuka yiwape yinji. (Hepre. 12:9) Yiwape yacho,  yili mwono wamutolo hano hashi hanji mu malilu. Chipwe haliapwila, twakuzuka yiwape yinji muze twakwononokena Yehova. Ha mutwe uno, mutumona chize Yehova akusolola ngwo, kali Tata wa zango ni chize mutuhasa kupwa ni shindakenyo ngwetu, kechi katwehuka kulutwe lia matangwa. Alioze chitangu tutalenu yikuma yize yinasolola ngwo, Tata yetu wa mu malilu kakutuzanga chinji, nawa kanazange kutukwasa.

4. Mumu liaka chakupwa chikalu kuli atu amwe kumona Yehova ngwe Tato?

⁴ Shina chakupwa chikalu kuli yena kunyonga Zambi ngwe Tatenu? Atu amwe, mahasa kunyonga ngwo keshi ni ulemu kumeso ja Yehova. Kashika, chakupwa chikalu kuli ayo kutayiza ngwo, Zambi Mukwa-Ndundo-Jeswe kakwazanga. Alioze, Tata yetu wa zango keshi kuzanga hanga tunyonge chocho. Iye hanatwehe mwono, nawa kanazange hanga tupwe masepa jenyi. Postolo Paulu kalumbunwine chikuma chino muze te anambujola sango lipema ku Atene, ngwenyi, Yehova “katwamine kusuku ni yetu.” (Yili. 17:24-29) Zambi kanazange hanga hita mutu akundame kuli iye, chizechene ngwe twanuke akuzanga kukundama kuli yisemi jo a zango.

5. Yika twalilongesa ha chilweza cha ndumbu yono wa pwo?

⁵ Muchihasa kupwa chikalu kuli atu amwe kumona Yehova ngwe Tata wa zango, mumu yisemi jo te keshi kwasolwela zango. Tala yize umwe ndumbu wa pwo ambile: “Tata te kakungumwesa lamba linji. Muze naputukile kulilongesa Mbimbiliya, chapwile chikalu kuli yami kunyonga ngwami, chili chashi kukundama kuli Tata wa mu malilu. Alioze, muze nanyingikine kanawa Yehova, nyonga liami yilialumuka.” Shina ni yena che wakwivwa? Nyi che wakwivwa, pwako ni shindakenyo ngwo, ni yena muhasa kumona Yehova ngwe Tata wa zango wahiana yisemi eswe.

6. Kulita ni Mateu 11:27, kuchi Yehova akutukwasa hanga tumumone ngwo kali Tata yetu wa zango?

⁶ Jila yimwe yize Yehova akutukwashilamo hanga tunyingike ngwo, kali Tata yetu wa zango, yili sango ja Yesu ni yitanga yenyi yize yili mu Mbimbiliya. (Tanga Mateu 11:27.) Yesu kembulwile ni ungunu weswe yitanga ya Tato, kashika ambile ngwenyi: “Yoze wangumona, hamona mwe Tata.” (Yoa. 14:9) Yesu kanji-kanji te kakuhanjika ha chize Yehova akufunga atu ngwe umwe Tata wa zango. Mu mikanda yiwana ya Evanjelu, Yesu kavulukile Yehova ngwo, “Tata,” ha yisuho 165. Mumu liaka Yesu ahanjikile chinji hali Yehova? Iye kahanjikile hanga akwase atu anyingike ngwo, Yehova kali Tata wa zango.—Yoa. 17:25, 26.

7. Yika twalilongesa ha chize Yehova te akufunga Yesu?

⁷ Mutuhasa kulilongesa yuma yinji ha chize Yehova te akufunga Mwanenyi Yesu. Shimbu lieswe te kakwivwa yilemba ya Yesu. Iye te keshi kwivwa wika yilemba yenyi, alioze kapwile ni kuyikumbulula. (Yoa. 11:41, 42) Muze Yesu te akupinda ni yipikalo, nihindu te kakupwa ni shindakenyo ngwenyi, Yehova kanamukwasa ni kumuzanga.—Luka 22:42, 43.

8. Kuchi Yehova apwile ni kufunga Yesu?

⁸ Yesu te kananyingika ngwenyi Yehova mwe Chishina cha mwono wenyi, nawa katamba kumujikijila mba anunge ni mwono. Kashika ambile ngwenyi: “Yami nguli ni mwono mumu hali Tata.” (Yoa. 6:57) Yesu kpwile ni kujikijila muli Tato, kashika Yehova amukwashile ha yuma yeswe yize te akufupiwa ku mwono. Kuhiana yeswe, Yehova te kakufunga Yesu ku ufulielo.—Mateu 4:4.

9. Kuchi Yehova asolwele ngwo kali Tata wa zango kuli Yesu?

⁹ Yehova Tata yetu wa zango, te kakuhana shindakenyo kuli Mwanenyi hanga anyingike  ngwo, kakumukwasa. (Mateu 26:53; Yoa. 8:16) Chipwe ngwe kakamupulwile mu kapinda mweswe, nihindu Yehova te kakumukwasa kukumba kapinda wacho. Yesu kapwile ni shindakenyo ngwenyi, upi weswawo te muulingiwa hali iye, uli wa mashimbu akehe. (Hepre. 12:2) Yehova kasolwele ngwo kakuzanga Yesu ha kumupanjika, kumwaha yize te anafupiwa ni kumulongesa. (Yoa. 5:20; 8:28) Haliapwila, tutalenu chize Tata yetu wa mu malilu akutufunga ngwe chize afungile Yesu.

10. Kulita ni Samu 66:19, 20, kuchi Yehova akusolola ngwo kakutuzanga?

¹⁰ Yehova kakupanjika yilemba yetu. (Tanga Samu 66:19, 20.) Yehova keshi kuzanga hanga twivwe woma muze tunahanjika nenyi mu yilemba, alioze kakutwita hanga tulembe chinji kuli iye. (1 Tesa. 5:17) Mutuhasa kukundama kuli Zambi ha shimbu lieswalio ni vumbi, nawa kweswako tuli. Iye kakupanjika yilemba yetu ha shimbu lieswalio. Muze twakunyingika ngwetu, Yehova kakwivwa yilemba yetu, chakutukwasa hanga tukundame kuli iye. Mukwa-kwimba masamu kembile ngwenyi: “Nazanga Yehova mumu hanapanjika liji liami ni kuliumba chami.”—Samu 116:1.

11. Kuchi Yehova akukumbulula yilemba yetu?

¹¹ Tata yetu keshi kwivwa wika yilemba yetu, nawa kakuyikumbulula. Postolo Yoano kanatukolweza ngwenyi: “Cheswacho mutwita aye matwivwa.” (1 Yoa. 5:14, 15) Ha mashimbu amwe, Yehova keshi kukumbulula yilemba yetu ngwe chize tunazange. Alioze, kananyingika yize tunafupu. Kashika ha mashimbu amwe hanji keshi kukumbulula kawashi-washi, alioze ha kupalika cha mashimbu mba makumbulula.2 Kori. 12:7-9

12-13. Kuchi Tata yetu wa mu malilu akutufunga?

¹² Yehova kakutwaha yize tunafupu. Iye kakulinga yize akutuma yisemi hanga alinge hali ana jo. (1 Timo. 5:8) Yehova kakuhana kuli ana jenyi yuma yize akufupa. Kazangile hanga tulipikale ha yize mutulia, mutuzala, ni kuze mututwama. (Mateu 6:32, 33; 7:11) Nawa Tata yetu wa zango, kanatulakenya ngwo, makatufunga kulutwe lia matangwa, makatwaha yuma yeswe yize mutukafupa ha mashimbu jacho.

¹³ Ukwaso ukwo walipwila uze Yehova akutwaha uli wa ku spiritu. Mu Mbimbiliya, Yehova kanatulweze chize apwa, upale wenyi, ulemu wa mwono, ni yize muyilingiwa kulutwe lia matangwa. Kakusolola nawa ngwo, kakulihulumba ni yetu hakutuma yisemi jetu, ni mandumbu eka hanga atukwase kumunyingika. Nawa kakutukwasa ni kutukolweza kupalikila muli makulwana a mu chikungulwila ni mandumbu akwo ajama. Chikwo nawa, Yehova kakutulongesa muze twakuya ku kukunguluka, kuze twakulilongesa hamuwika ni mandumbu jetu. Yino yili jila yize Yehova akusolwelamo ngwo kali Tata yetu wa zango.—Samu 32:8.

14. Mumu liaka Yehova akutufumba, nawa kuchi akuchilinga?

¹⁴ Yehova kakutufumba. Yetu kutushi angunu ngwe Yesu. Kashika, ha mashimbu amwe Tata yetu wa zango kakutufumba hanga atulongese. Mbimbiliya yinambe ngwo: “Yoze Mwene mamuzanga mamulamba ha kufumba.” (Hepre. 12:6, 7) Yehova mahasa kutufumba mu majila anji. Chakutalilaho, iye mahasa kutufumba kupalikila ha yize mututanga mu Mbimbiliya, hanji yize mutwivwa ku kukunguluka. Ha mashimbu amwe, ukwaso uze tunafupu muuhasa kwiza kupalikila muli makulwana a mu chikungulwila. Chipwe ngwe Yehova matufumba mu jila yesweyo, nihindu kakutufumba mumu kakutuzanga.—Jere. 30:11.

15. Kuchi Yehova akutufunga?

¹⁵ Yehova kakutukwasa muze twakupalika mu yeseko. Chizechene ngwe tata wa zango akukwasa mwanenyi muze mapalika mu yipikalo, Tata yetu wa mu malilu neye kakutwaha  tachi hanga tukumbe yeseko. Iye kakutwaha spiritu yenyi yisandu hanga yitufunge ku chuma cheswacho chize muchihasa kupihisa ufulielo wetu. (Luka 11:13) Yehova nawa kakutufunga muze tunazakalala. Chakutalilaho, iye hanatwehe kutalatala chipema. Kutalatala chino cha kulutwe lia matangwa, chakutukwasa hanga tunyongonone mu yipikalo. Nyonga ha chino: Chipwe ngwe mutupalika mu yipikalo yesweyo, Tata yetu wa zango Yehova, makahwisa kapinda mweswe tunapalika musono. Kapinda mweswawo tunapalika, kali wa mashimbu akehe, alioze yiwape yize Yehova makatwaha, muyikapwa ya mutolo.—2 Kori. 4:16-18.

16. Yika yalingiwileko muze Alama ehukile kwononokena Tato wa zango?

¹⁶ Zango lia Yehova hali yetu, linasoloka ha yize alingile muze yisemi jetu atangu avulumwine. Alama yehuka kwononokene Yehova, hachino, iye ni ana jenyi yahandunuka mukachi ka usoko upema wa Yehova. (Roma 5:12; 7:14) Tangwa lizeliene, Yehova yalinga yimwe hanga ahwise mulonga wacho.

17. Yika Yehova alingile ha tangwa lizeliene Alama avulumwine?

¹⁷ Yehova yapatwila Alama, alioze yahana kutalatala kuli ana jenyi. Ha tangwa lizeliene, Yehova yalekenya ngwo, atu waze akumwononokena te mafuna nawa mukachi ka usoko wenyi upema. (Uputu. 3:15; Roma 8:20, 21) Chocho, Yehova yatuma Mwanenyi azanga chiji, Yesu, hanga atufwile. Yehova kasolwele ngwo, kakutuzanga chinji ha kutuma Mwanenyi hanga atufwile.—Yoa. 3:16.

18. Chipwe ngwe hitwehuka Yehova, mumu liaka mutuhasa kupwa ni shindakenyo ngwetu, nihindu iye kali Tata yetu?

¹⁸ Chipwe ngwe tuli yihenge, Yehova nihindu kanazange kutuhilwisa mu usoko wenyi upema, nawa kakutulemesa chinji kashika akutukwasa. Ha mashimbu amwe, mutuhasa kulinga shili ku meso ja Yehova ni kulitwamina kumuwayila,  alioze iye kechi kutwehuka. Chishima cha mwana chimwangi chize Yesu atele, chinasolola chize Yehova akutuzanga. (Luka 15:11-32) Tata wa ha chishima chino, kanungine ni kutalatala ngwenyi, mwanenyi te mahiluka. Muze mwana akwachile chiyulo cha kufuna ku zuwo, tato yamutambula ni chiseke cheswe. Nyi twehuka Yehova, alioze twasa tachi tulikonyeke ni kufuna kuli iye, mutuhasa kupwa ni shindakenyo ngwetu, Tata yetu wa zango matutambula cheka.

19. Kuchi Yehova makahwisa kapinda mweswe yoze Alama anehene?

¹⁹ Tata yetu makahwisa kapinda mweswe yoze Alama anehene. Muze Alama te havulumuna, Yehova yakwata chiyulo cha kusakula atu 144,000, hanga apwe mianangana ni asasendote mu malilu hamuwika ni Mwanenyi. Yesu ni 144,000 makakwasa atu waze akwononoka hanga akapwe angunu hashi haha. Atu jacho nyi makapalika mu cheseko chakasula cha kwononoka, Zambi makaaha mwono wa mutolo. Tata yetu makawahilila chinji ha kumona hashi heswe ha too ni ana angunu. Kwamba umwenemwene, mashimbu jacho makapwa apema chinji!

20. Mu milali yika Yehova akusolola ngwo kakutuzanga? Yika mutulilongesa ha mutwe muusulaho?

²⁰ Pundu lume, Yehova kakusolola mu milali yinji ngwo, kakutuzanga chinji. Iye kali Tata mupema. Kakupanjika yilemba yetu ni kutufunga ku musunya ni ku ufulielo. Yehova kakutulongesa ni kutukwasa. Nawa yiwape yinji anatutulikila. Chili chipema kunyingika ngwo, Tata yetu, Yehova, kakutuzanga chinji ni kutufunga! Kashika, amu tuli ana jenyi, tunazange kumusolwela zango ngwe chize iye akutuzanga. Kuchi mutuhasa kuchilinga? Yino ye mutulilongesa ha mutwe muusulaho.