1-2. Mumu liaka nawa kuchi Yehova azulwile jila hanga tupwe mukachi ka usoko wenyi?

YEHOVA kakutusanyika hanga tupwe mukachi ka usoko wenyi uze wakumuwayila. Mu usoko uno, muli atu awahilila waze hanalihane kuli Zambi, ni kufuliela ha chitapo cha ukuule wa Mwanenyi. Tuli ni mwono upema haliapwila, nawa tuli ni kutalatala cha mwono wa mutolo kulutwe lia matangwa mu malilu hanji hano hashi.

² Mumu lia zango, Yehova yalinga chuma chikalu chinji hanga tupwe mukachi ka usoko wenyi uze wakumuwayila. (Yoa. 3:16) Hanatulande “ni ndando.” (1 Kori. 6:20) Ha mukunda wa ukuule, Yehova yapwisa chashi hanga tupwe masepa jenyi. Tuli ni chiwape cha kuvuluka Chitunda wa hashi heswe ngwo, Tata. Ngwe chize twamonanga ha mutwe wapalika, Yehova kali Tata mupema kuhiana yisemi eswe.

3. Yika mutuhasa kulihula? (Tala nawa mushete “ Shina Yehova Kakungumona?”)

³ Hanji mutuhasa kulihula ngwe chize alihulile umwe mukwa-kusoneka Mbimbiliya ngwenyi: “Yika munguhana kuli Yehova ha yiwape yenyi yeswe kuli yami?” (Samu 116:12) Kumbululo lili ngwo, kutushi ni chize mutufwete kuli Tata yetu wa mu malilu. Kashika, chatutela kumuzanga chikolo. Postolo Yoano yasoneka ngwenyi: “Yetu twakuzanga, mumu iye waliangile kutuzanga.” (1 Yoa. 4:19) Kuchi mutuhasa kusolwela Tata yetu wa mu malilu ngwo twakumuzanga?

4. Kulita ni Tiangu 4:8, mumu liaka chatutamba kusa tachi hanga tupwe masepa apema a Yehova?

⁴ Yehova kanazange hanga tupwe masepa jenyi amwenemwene, ni kuhanjika nenyi mashimbu eswe. (Tanga Tiangu 4:8.) Yehova kanatukolweza tunyongonone mu yilemba yetu, mumu kakutwivwa ha shimbu liaswalio. (Roma 12:12) Chipwe ngwe kali ni milimo yinji, nihindu Yehova kali ni mashimbu akupanjika yilemba yetu. Mutuhasa kusolola ngwo twakusakwila chinji Yehova hakupanjika kulemba chetu, muze mututanga Mbimbiliya ni mikanda yetu, nawa ha kukaula kanawa malongeso ku kukunguluka. Kulivwashana chakukwasa ana kupwa masepa ja yisemi jo, ni yetu kuhanjika mashimbu eswe ni Yehova chakutukwasa kupwa masepa jenyi apema.

5. Kuchi mutuhasa kuwahisa yilemba yetu?

⁵ Nyonga ha chize usepa we ni Yehova uli. Yehova kanazange twazulule mbunge jetu kuli iye mu yilemba. (Samu 62:8) Chili chipema kulihula chino: ‘Shina yilemba yami yili ngwe yakwimbulula, nakuyipanjika kuli umwe mutu, mba mungulemba?’ Kwamba pundu, yena wakuzanga chinji Yehova, nawa wakuzanga kukolesa usepa we ni iye. Kashika, watamba kuhanjika nenyi ha yisuho yinji. Mulweze yize yili ku mbunge ye. Mulweze chiseke che ni chinyengo che. Ewuluka ngwe muze mufupa ukwaso, Yehova mapwako hanga akukwase.

6. Yika twatamba kulinga mba tupwe ni usepa upema ni Yehova?

⁶ Nyi tunazange kupwa masepa apema a Tata yetu wa mu malilu, twatamba kupwa ni ndako ya kumusakwila. Tunatayiza yize mukwa-kwimba masamu asonekene ngwenyi: “Yehova Zambi yami, yitanga ya kukomwesa yize wakulinga, yinji. Manyonga je kuli yetu anji. Keshi kuhasa kualumbununa kuli yena. Nyi kachi mungwaambulula ni kuahanjika, ahiana chize mutu mahasa kwalula!” (Samu 40:5) Tushi kusakwilila wika Yehova mu maliji; alioze twakumusakwila ha yeswe yize twakulinga. Chino che chakusolola ngwo twalisa ni akwa-hashi. Musono hano hashi atu keshi kusakwilila Zambi ha yeswe yize akwalingila. Kwamba pundu, chino chili chilayi cha “matangwa a kusula.” (2 Timo. 3:1, 2) Twazangile kupwa ni ndako jino!

7. Yika Yehova anazange hanga tulinge, nawa mumu liaka?

⁷ Chisemi keshi kuzanga hanga ana jenyi alilambe, alioze apwe masepa. Yehova neye kanazange hanga ana jenyi eswe alivwashane. Kashika, chilayi chize chakutusolola ngwo tuli akwa-Kristu amwenemwene chili zango lize tuli nalio hali umwe ni mukwo. (Yoa. 13:35) Twakutayiza yize mukwa-kwimba masamu asonekene ngwenyi: “Cho kuwaha, muze mandumbu matwama hamuwika ni mbunge yimuwika.” (Samu 133:1) Muze mutuzanga mandumbu jetu, mutusolola ngwo twakuzanga Yehova. (1 Yoa. 4:20) Chochene, chili chipema kupwa mukachi ka mandumbu waze ali “ni utu umwe kuli mukwo ni mukwo!”—Efwe. 4:32.

8. Kulita ni 1 Yoano 5:3, chitela chika chitangu tuli nacho cha kwononokena Yehova?

⁸ Yehova kanazange hanga ana ononokene yisemi jo, nawa kanazange hanga ni yetu tumwononokene. (Efwe. 6:1) Twatamba kwononokena Yehova mumu iye mwe Sakatanga, kakutwaha yize tunafupu, nawa mwe uli ni mana anji kuhiana yisemi eswe. Alioze, chitela chitangu twakwononokena Yehova chili zango lize tuli nalio hali iye. (Tanga 1 Yoano 5:3.) Chipwe ngwe kuli yitela yinji  ya mumu liaka twatamba kwononokena Yehova, nihindu iye keshi kutushinjila hanga tumwononokene. Yehova hanatwehe utuswilo wa kusakula chipi ni chipema. Kashika, iye kakuwahilila chinji muze twakusakula hanga tumwononokena ni zango.

9-10. Mumu liaka chili chilemu kunyingika shimbi ja Zambi ni kujikaula?

⁹ Yisemi kakulihulumba ni kufunga ana jo. Kashika yisemi akusa shimbi hanga afunge ana jo. Muze ana akwononokena shimbi jacho, kakusolola ngwo kakujikijila ni kuvumbika yisemi jo. Kwononoka nawa chili chilemu ha usepa wetu ni Tata yetu wa mu malilu. Nyi twamwononokena, mutusolola ngwo twakuzanga Yehova ni kumuvumbika. (Iza. 48:17, 18) Chikwo nawa, waze akulituna Yehova ni shimbi jenyi, kakupwa ni kapinda munji.—Ngala. 6:7, 8.

¹⁰ Kulinga yize Yehova anatwita, chakutufunga ku mujimba, mu manyonga ni ku ufulielo. Yehova kananyingika yize yakutuvwisa kuwaha. Aurora yoze watwama ku Estados Unidos, yamba ngwenyi, “Ngunanyingika ngwami, kwononokena Yehova chakuneha uwahililo ku mwono.” Yino yili yamwenemwene kuli yetu eswe. Unewuluka chize unakayuka ha kukaula shimbi ja Yehova ku mwono we?

11. Kuchi yilemba yakutukwasa?

¹¹ Kulemba chakutukwasa hanga twononoke, chipwe ngwe mutupalika mu cheseko chikalu. Ha mashimbu amwe, chakupwa chikalu  kwononokena Yehova, mumu lia uhenge wetu, alioze twatamba kusa tachi hanga twehuke kulinga shili. Mukwa-kwimba masamu kaliumbile kuli Zambi ngwenyi: “Ungukolese kama ni spiritu ye ya vumbi.” (Samu 51:12) Denise, umwe pionelu wa shimbu lieswe, yamba ngwenyi: “Muze chakupwa chikalu kuli yami kwononokena shimbi ja Yehova, nakulemba ni kumwita tachi hanga ngulinge yuma yize yinalite.” Mutuhasa kupwa ni shindakenyo ngwetu, Yehova kakwivwa yilemba ngwe yino.—Luka 11:9-13.

12. Kulita ni A-Efwesu 5:1, yika twatamba kulinga?

¹² Tanga A-Efwesu 5:1. Tuli “ana a zango” a Yehova, kashika, twatamba kulikolweza hanga tumwimbulule. Twakwimbulula yitanga yenyi ha kupwa ni zango, yimbovu ni akwa-kukonekena akwetu. Muze atu waze kanyingikine Zambi mamona yitanga yetu yipema, muchihasa kwalingisa hanga ni ayo azange kunyingika Zambi. (1 Petu. 2:12) Nawa chili chilemu kuli yisemi akwa-Kristu kwimbulula yitanga ya Yehova. Nyi yisemi mafunga ana ngwe chize Yehova akutufunga, ana no mazanga kupwa masepa ja Tata yetu wa zango.

13. Yika muyitukwasa kupwa ni hamu?

¹³ Mwana yoze wakuzanga chinji tato, kakuhanjika ni atu hakutwala kuli iye. Ni yetu twakuzanga chinji Tata yetu wa mu malilu Yehova, kashika tunazange kukwasa atu anji hanga  amunyingike. Yetu eswe twakwivwa ngwe chize Mwanangana Ndawichi evwile, muze asonekene ngwenyi: “Mbunge yami muyilisamba muli Yehova.” (Samu 34:2) Yika mulinga nyi wakwivwa woma wakuhanjika hakutwala kuli Yehova? Kuchi muhasa kupwa ni hamu? Nyonga ha chize Yehova akuwahilila muze tunahanjika hakutwala kuli iye, ni chize akwenu mayuka muze malilongesa hakutwala kuli Yehova. Iye matwaha hamu lize tunafupu. Yehova kakwashile mandumbu jetu akwa-Kristu ku sekulu yitangu hanga apwe ni hamu, chipwe yetu mahasa kutukwasa.—1 Tesa. 2:2.

14. Mumu liaka chili chilemu kwambujola sango jipema?

¹⁴ Yehova keshi katonde, nawa kakuwahilila muze akutumona tunasolola zango hali akwetu, chipwe ngwe kali a ku munyachi weswawo. (Yili. 10:34, 35) Jila yimwe yakusolwelamo zango kuli akwetu, yili kwambulwila sango jipema. (Mateu 28:19, 20) Uno uli mulimo upema chinji, mumu waze akutayiza sango jipema, mahasa kupwa ni mwono wa mutolo.—1 Timo. 4:16.

15-16. Shindakenyo yika tuli nayo yize yakutwaha uwahililo?

¹⁵ Yehova kali Tata wa zango. Kashika anazange hanga usoko wenyi uwahilile. (Iza. 65:14) Chipwe ngwe twakupinda ni yipikalo yinji, nihindu mutuhasa kuwahilila. Chakutalilaho, tuli ni shindakenyo ngwetu, Tata yetu wa mu malilu kakutuzanga chinji. Tuli ni chinyingi cha Liji lia Zambi, Mbimbiliya. (Jere. 15:16) Tuli mukachi ka usoko upema wa atu waze akuzanga Yehova ni shimbi jenyi, nawa akulizanga umwe ni mukwo.—Samu 106:4, 5.

¹⁶ Chikwo nawa, mutuhasa kununga ni kuwahilila mumu tuli ni shindakenyo ngwetu, kulutwe lia matangwa mwono muupema chinji. Kwasala hakehe Yehova ahwise ungulungulu weswe ni kusa Wanangana wenyi hanga upwise hashi heswe paraisu. Tuli ni kutalatala chipema cha kumona uhindukilo wa asoko jetu waze hanafu. (Yoa. 5:28, 29) Mashimbu jacho makapwa a uwahililo unji! Chuma chize chinahiane yeswe ai, chili kupwa ni shindakenyo ngwetu hikwasala hakehe waze eswe ali mu malilu ni hashi achichimieka Tata yetu wa zango ni kumwaha uhaliso uze anatela.