1. Nyi ndumbu wa pwo manyonga kuya ku ulo, yihula yika atamba kulihula?

AKWA-KRISTU eswe kali mushi lia chiyulo cha Yesu Kristu yoze uli mwata mungunu. Alioze pwo mukwa-Kristu muze akuya ku ulo, iye kakupwa mushi lia chiyulo cha lunga yoze chihenge. Chino muchihasa kumunehena ukalu. Kashika pwo nyi kananyongo kulimbata ni umwe ndumbu, katamba kulihula ngwenyi: ‘Yuma yika yize yinasolola ngwo ndumbu yono makapwa mwata mupema wa mu usoko? Shina iye kakusa mulimo wa Yehova ha chihela chitangu ku mwono wenyi? Nyi ka, yika yinangwehe shindakenyo ngwami, hanyima lia kulimbata nenyi, makangukwasa kufunga usepa wami ni Yehova? Ndumbu wa pwo yoze unafupu kuya ulo, neye katamba kulihula ngwenyi: ‘Yitanga yika ngulinayo yize muyikatukwasa kupwa ni ulo upema? Shina nguli chihomboloji nawa chihanyi? Shina ngukwete usepa ukolo ni Yehova?’ (Chilu. 4:9, 12) Nyi pwo makwata yiyulo yipema shimbu kanda aya ku ulo, chino muchihasa kumukwasa kupwa ni ulo upema hamwe ni uwahililo.

2. Yika mutulilongesa ha mutwe uno?

² Tununu a tununu twa mapwo akwa-Kristu kali chilweza chipema cha atu waze akwononokena ni kuzeyela malunga jo. Tunaachichimieka chinji! Nawa twakuwahilila chinji ha kukalakalila Yehova hamwe ni mapwo wano ashishika! Ha mutwe uno mutukumbululaho yihula yino yitatu: (1) Yipikalo yika mapwo mahasa kupwa nayo? (2) Mumu liaka pwo akutayiza kwononokena wata wa mukwo-lunga? (3) Yika malunga ni mapwo akwa-Kristu mahasa kulilongesa hakutwala kukuzeyela wata ha chilweza cha Yesu, Abigale, ni Maria pwo lia Yosefwe nawa naye ya Yesu?

3. Mumu liaka waze alimbata akupwa ni yipikalo?

³ Ulo uli chawana chingunu cha Yehova, alioze atu kali yihenge. (1 Yoa. 1:8) Kashika Liji lia Zambi linatoweza waze alimbata ngwo, kumakapwa ni yipikalo yize anavuluka ngwo ‘luyinda ku mwono wo.’ (1 Kori. 7:28) Haliapwila, mutushimutwina yimwe yipikalo yize pwo mahasa kupwa nayo.

4. Mumu liaka pwo mahasa kumona ngwenyi chili uhepuke kuzeyela mukwo-lunga?

⁴ Hanji mumu lia chize amufumbile, ha mashimbu amwe pwo mahasa kulivwa ngwe kuzeyela mukwo-lunga chili chuma cha uhepuke. Marisol yoze watwama mu Estados Unidos yamba ngwenyi: “Kuze nakolele mapwo te kakwamba ngwo, katamba kupwa chimuwika ni malunga ha yuma yeswe. Ngunanyingika ngwami, Yehova kahanyine wata kuli malunga nawa ngwami mapwo katamba kwononoka ni kuvumbika wata wacho. Alioze chakupwa chikalu chinji kuvumbika wata wa mukwetu-lunga, mumu hano hashi atu keshi kuchilinga.”

5. Nyonga lika lipi malunga amwe alinalio hakutwala kuli mapwo?

⁵ Chikwo nawa pwo mahasa kulimbata ni umwe lunga yoze wakunyonga ngwo mapwo hi alemu ko. Ivon umwe ndumbu wa pwo yoze watwama ku America ya ku Sul yamba ngwenyi: “Kuze natwama malunga e akulianga kulia, mba mapwo masulilika. Ana a mapwo e akuteleka ni kululieka mu zuwo, alioze ana a malunga kakushimbwila wika kulia, nawa ayo kakwamba ngwo e ali miata a ku zuwo.” Yingling, umwe ndumbu wa pwo watwama mu Asia yamba ngwenyi: “Kumahetu kakwamba ngwo, mapwo kafupiwile kupwa ni mana chipwe ni utotombo nawa ngwo yiteli yo yili kulinga milimo ya ku zuwo. Ayo keshi ni ulite wa kulweza malunga jo yize ananyongo.” Lunga yoze wakukaula yitanga yino yipi nawa kuyishi kulita ni Mbimbiliya kakumwesa mukwo-pwo lamba, iye keshi kwimbulula Yesu chipwe kuvwisa Yehova kuwaha.—Efwe. 5:28, 29; 1 Petu. 3:7.

6. Yika mapwo anafupiwa kulinga hanga akolese usepa wo ni Yehova?

⁶ Ngwe chize twamona ha mutwe uze wasala, Yehova kanashimbwila hanga malunga akwa-Kristu akwase asoko jo ha yize anafupiwa ku spiritu, ku manyonga ni ku musunya. (1 Timo. 5:8) Alioze mapwo akwa-Kristu waze ali ku malo, katamba kusa mashimbu hita tangwa hanga atange Liji lia Zambi ni kulipukuna nawa ni kulemba kuli Yehova. Chino muchihasa kupwa chikalu chinji kuli ayo. Mapwo kakwete milimo yinji, kashika mahasa kulivwa ngwe keshi ni mashimbu hanji tachi ja kulinga yuma yacho, alioze ayo katamba kusa mashimbu hanga ayilinge. Mumu liaka? Mumu Yehova kanazange hanga hita umwe wa kuli yetu apwe ni usepa ukolo ni iye ni kuufunga.—Yili. 17:27.

7. Yika muyihasa kukwasa pwo kuvumbika ni kwononokena mukwo-lunga?

⁷ Chikwo nawa, muchihasa kupwa chikalu chinji pwo kuzeyela mukwo-lunga yoze chihenge. Alioze muchipwa chashi kuli pwo kwononokena chiteli chize amuhele, nyi manyingika ni kutayiza yize Mbimbiliya yinambe hakutwala kukuzeyela mukwo-lunga.

8. Kulita ni A-Efwesu 5:22-24, mumu liaka pwo mukwa-Kristu akutayiza kuzeyela mukwo-lunga?

⁸ Pwo mukwa-Kristu kakutayiza kwononokena wata wa mukwo-lunga, mumu yino ye Yehova anamwite hanga alinge. (Tanga A-Efwesu 5:22-24.) Iye kakufuliela hali Tato wa mu malilu, mumu kananyingika ngwenyi kakumuzanga nawa nyi mamwita hanga alinge chimwe chuma, chili mumu lia upeme wenyi.—Shimbi 6:24; 1 Yoa. 5:3.

9. Yika yakulingiwako muze ndumbu wa pwo akuvumbika wata wa mukwo-lunga?

 ⁹ Hano hashi hakukolweza mapwo kulengulula shimbi ja Yehova, ni kumona ngwo kuzeyela malunga jo chili chuma cha uhepuke. Kwamba umwenemwene, atu waze akwete manyonga jacho kanyingikine kanawa Zambi yetu wa zango. Yehova keshi keza kahana ana jenyi a mapwo shimbi yize muyaasolola ngwe keshi ulemu. Ndumbu wa pwo yoze wakusa tachi ja kwononokena Yehova ha kuzeyela mukwo-lunga, kakukwasa usoko wenyi hanga upwe ni sambukila. (Samu 119:165) Kulinga chino, chakumuyukisa mwene, mukwo-lunga ni ana jenyi.

10. Yika mutuhasa kulilongesa ha maliji a Carol?

¹⁰ Pwo yoze wakuzeyela mukwo-lunga chihenge, kakusolola ngwenyi kakuzanga ni kuvumbika Yehova yoze wasele shimbi ya wata. Carol yoze watwama mu America ya ku Sul yamba ngwenyi: “Ngunanyingika ngwami mukwetu-lunga mahasa kuhengesa, alioze yize mungulinga mumu lia uhenge wacho, muyisolola nyi chamwenemwene lume nakulemesa usepa wami ni Yehova. Kashika nakusa tachi hanga nguzeyele mukwetu-lunga mumu ngunazange kuvwisa Yehova kuwaha.”

11. Yika yakukwasa ndumbu Aneese kukonekena mukwo-lunga, nawa yika mutuhasa kulilongesa ha maliji jenyi?

¹¹ Muchihasa kupwa chikalu chinji pwo kuvumbika ni kuzeyela mukwo-lunga, nyi mukwo-lunga keshi kulipikala ha yize anevu. Alioze, tala yize umwe ndumbu anavuluka ngwo Aneese akulinga muze chino chakulingiwa. Iye yamba ngwenyi: “Yami nakusa tachi hanga nguchine kutulika toto, nawa nakwiwuluka ngwami yetweswe twakuhengesa. Chikwo nawa, nakulikolweza hanga ngukonekene mukwetu-lunga ni mbunge yeswe ngwe chize Yehova akulinga. Muze nakumukonekena nakupwa ni sambukila ya mu mbunge.” (Samu 86:5) Muze pwo akukonekena mukwo-lunga, chakupwa chashi kumuzeyela.

12. Yilweza yika mutuhasa kuwana mu Mbimbiliya?

¹² Atu amwe mahasa kulivwa ngwe kuzeyela akwo chili kuhona tachi. Alioze nyonga liacho hi liamwenemwene ko. Mu Mbimbiliya muli yilweza ya atu anji yitakame waze te akuzeyela akwo. Tutalenu yize mutuhasa kulilongesa ha chilweza cha Yesu, Abigale ni Maria.

13. Mumu liaka Yesu akuzeyela Yehova? Lumbununa.

 ¹³ Yesu kakuzeyela Yehova , alioze chino kuchalumbunukine ngwo iye keshi mana hanji utotombo. Mutapu uze iye te akulongeselamo, unasolola ngwo kakwete mana anji. (Yoa. 7:45, 46) Yehova te kakulemesa chinji utotombo wa Yesu, kashika akalakalile nenyi muze atangile malilu ni hashi. (Yishi. 8:30; Hepre. 1:2-4) Chize haze Yesu amuhindwishile, Yehova yamwaha ‘yiyulo yeswe mu malilu ni hashi.’ (Mateu 28:18) Chipwe ngwe Yesu kakwete mana anji ni utotombo, nihindu kakufupa usongwelo wa Yehova. Mumu liaka? Mumu iye kakuzanga Tato.—Yoa. 14:31.

14. Yika malunga mahasa kulilongesa (a) ha mutapu uze Yehova akumona mapwo? (b) ha maliji waze ali ha Yishima 31?

¹⁴ Yize lunga mahasa kulilongesa. Yehova kakasele shimbi ya pwo kuzeyela mukwo-lunga, mumu ngwo Iye kakumona ngwe mapwo keshi ni ulemu nyi maatesa ni malunga. Yehova kakulemesa mapwo. Tuli ni shindakenyo ya chikuma chino, mumu iye kasakwile mapwo ni malunga hanga akayule hamuwika ni Yesu. (Ngala. 3:26-29) Yehova kasolwele ngwenyi, kakufuliela muli mwanenyi ha kumwaha wata. Chizechene nawa, malunga waze akwete mana kakusolola ngwo kakufuliela hali mapwo jo hakwaha ndambu ya wata. Hakutwala kuli pwo wamwenemwene, Mbimbiliya yinambe ngwo, iye kakusongwela kanawa milimo ku zuwo lienyi, kakutala munda mba maulanda nawa kananyingika ulemu wa yuma yize akulinga. (Tanga Yishima 31:15, 16, 18.) Lunga katambile kumona mukwo-pwo ngwe ndungo yoze keshi ni liji ku zuwo. Alioze, katamba kumujikijila ni kupanjika mayonga jenyi. (Tanga Yishima 31:11, 26, 27.) Nyi lunga matwama mutapu au ni mukwo-pwo ha kumusolwela vumbi, muchipwa chashi mukwo-pwo kumuzeyela.

15. Yika mapwo mahasa kulilongesa ha chilweza cha Yesu?

¹⁵ Yize mapwo mahasa kulilongesa. Chipwe ngwe Yesu kalingile yuma yinene-yinene, nihindu kakamwene ngwo chili uhepuke kuzeyela wata wa Yehova. (1 Kori. 15:28; Fwili. 2:5, 6) Chizechene nawa, pwo wamwenemwene yoze wakukaula chilweza cha Yesu, keshi kumona ngwo kuzeyela mukwo-lunga chili uhepuke. Shimbu anyonge chocho, iye kakukwasa mukwo-lunga hi wika ko mumu ngwo kakumuzanga, alioze kakuchilinga mumu kakuzanga Yehova ni kumuvumbika.

16. Kulita ni 1 Samuele 25:3, 23-28, yipikalo yika Abigale apalikile? (Tala chizulie ha chifukilo.)

¹⁶ Abigale kalimbachile ni umwe lunga yoze avuluka ngwo Nabale. Iye kapwile mukwa-kuzo, mukwa-kulizata nawa te keshi kusakwilila ha yize akwo akumulingila. Chipwe chocho, Abigale kakafupile jila ya kushihilamo ulo wenyi. Nyi Abigale kazangile kushiha ulo wenyi, iye kachi kechele Ndawichi ni malunga jenyi hanga ashihe mukwo-lunga, alioze iye kakachilingile. Shimbu te achilinge, Abigale yafupa jila yakupulwila mwono wa mukwo-lunga ni wa akwa-zuwo lienyi. Achinyonga hamu lize Abigale apwile nalio ha kumana kulutwe lia tujita 400, nawa ni vumbi lieswe kuhanjika ni Ndawichi hakutwala ku chikuma chacho. Iye kalilamikijile mulonga uze wejile ku yitanga yipi ya mukwo-lunga. (Tanga 1 Samuele 25:3, 23-28.) Ndawichi kanyingikine ngwenyi, Yehova kazachishile pwo yono wa hamu hanga amwehe chiyulo chize te muchimukwika kulinga shili yinene.

17. Yika malunga mahasa kulilongesa ha chilweza cha Ndawichi ni Abigale?

¹⁷ Yize lunga mahasa kulilongesa. Abigale kapwile pwo wa mana. Kashika Ndawichi atayijile chiyulo chenyi. Hachino, iye yehuka kupwa ni mulonga wa kumwanga manyinga. Chizechene nawa, lunga yoze ukwete mana, ni zango lieswe kakupanjika kanawa manyonga a mukwo-pwo muze anakwate yiyulo yilemu. Nyonga lia pwo mulihasa kukwasa mukwo-lunga kwehuka kukwata chiyulo chize kuchalitele.

18. Yika mapwo mahasa kulilongesa ha chilweza cha Abigale?

 ¹⁸ Yize mapwo mahasa kulilongesa. Pwo yoze wakuzanga ni kuvumbika Yehova, kakulinga yuma yize muyihasa kuyukisa usoko wenyi, chipwe ngwe mukwo-lunga keshi kuwayila Yehova hanji kutwama kulita ni shimbi jenyi. Chikwo nawa, iye keshi kufupa majila waze kalitele ni shimbi ja mu Mbimbiliya hanga ashihe ulo wenyi. Shimbu achilinge, iye kakuvumbika ni kuzeyela mukwo-lunga nawa kakusa tachi hanga akwase mukwo-lunga kunyingika Yehova. (1 Petu. 3:1, 2) Alioze chipwe ngwe mukwenu-lunga kazangile kuwayila Yehova, nihindu nyingika ngwe Yehova mawahilila ha tachi jize wakusa hanga wononokene mukwenu-lunga ni kushishika kuli Yehova.

19. Ha mashimbu aka pwo katambile kwononokena mukwo-lunga?

¹⁹ Chipwe chocho, pwo mukwa-Kristu yoze wakuzeyela mukwo-lunga, keshi kumukwasa nyi yono mamwita hanga alinge yuma yize yakulimika ni shimbi ja mu Mbimbiliya. Chakutalilaho, nyi ndumbwetu mamulweza kuli mukwo-lunga yoze keshi kuwayila Yehova hanga alionge, eye ni kulinga yuma yize yakulimika ni shimbi ja mu Mbimbiliya, iye katambile kuchilinga. Akwa-Kristu eswe kuchingako mandumbu jetu a mapwo waze ali ku malo, katamba kwononokena chitangu Yehova Zambi. Nyi umwe ndumbu wa pwo mamwita hanga alinge chuma chize chakulimika ni shimbi ja mu Mbimbiliya, iye katamba kulituna ni kulumbununa ni ushindakenyo weswe mumu liaka katambile kuchilinga, alioze mahanjika ni zango.—Yili. 5:29.

20. Kuchi tunanyingika ngwetu Maria kapwile ni usepa ukolo ni Yehova?

²⁰ Maria kapwile ni usepa ukolo ni Yehova. Chikwo nawa, iye te kanyingika kanawa yisoneko. Muze ahanjikile ni Izabele naye ya Yoano Chipapachisa, Maria katongwele maliji a mu yisoneko ya Hepreu ha yisuho kuhiana 20. (Luka 1:46-55) Chikwo nawa, achinyonga hachino, chipwe ngwe Maria te hanamutenda kulu kuli Yosefwe, nihindu mungelo wa Yehova kakaliangile kusoloka kuli Yosefwe. Chitangu, mungelo kaliangile kuhanjika ni Maria ni kumulweza ngwenyi masema mwana wa Zambi. (Luka 1:26-33) Yehova te kanyingika kanawa Maria,  nawa kapwile ni shindakenyo ngwenyi iye te mazanga ni kufunga kanawa Mwanenyi. Kwamba umwenemwene, Maria kanungine ni kupwa ni usepa upema ni Yehova chipwe muze Yesu afwile ni kumuhindwisa hanga aye mu malilu.—Yili. 1:14.

21. Yika malunga mahasa kulilongesa ha chilweza cha Maria?

²¹ Yize malunga mahasa kulilongesa. Lunga yoze ukwete mana, kakuwahilila chinji muze mukwo-pwo akunyingika kanawa yisoneko. Iye keshi kwivwa uli chipwe kunyonga ngwo mukwo-pwo kanazange kumutambula wata. Mumu kananyingika ngwenyi, nyi mukwo-pwo manyingika kanawa shimbi ja mu Mbimbiliya ni kujikaula, iye mahasa kukwasa usoko. Chipwe ngwe pwo kalilongesele chinji kuhiana mukwo-lunga, nihindu chili chiteli cha lunga kusongwela uwayilo wa mu usoko ni milimo yikwo ya Zambi.—Efwe. 6:4.

22. Yika mapwo mahasa kulilongesa ha chilweza cha Maria?

²² Yize mapwo mahasa kulilongesa. Pwo katamba kuzeyela mukwo-lunga, alioze mwene mwe uli ni chiteli cha kukolesa ufulielo wenyi. (Ngala. 6:5) Kashika mwene katamba kusa mashimbu akulinga longeso lienyi lia wika ni kupukuna. Kulinga chino, muchimukwasa kuzanga ni kuvumbika Yehova, nawa mapwa ni uwahililo ha kuzeyela mukwo-lunga.

23. Kuchi mapwo waze akuzeyela ku wata akuliyukisa ene, asoko jo ni kuyukisa chikungulwila?

²³ Mapwo waze akununga ni kuzeyela malunga jo mumu lia zango lio hali Yehova, kakuwahilila chinji kuhiana waze akwehuka kukaula shimbi ya Yehova hakutwala ku wata. Chikwo nawa, ayo kali chilweza chipema kuli akweze a malunga ni a mapwo. Ayo kakukwasa nawa kuneha sambukila hi wika ko mu usoko, alioze ni mu chikungulwila. (Titu 2:3-5) Musono, tuvumbi anji a Yehova ashishika kali mapwo. (Samu 68:11) Yetweswe, mapwo ni malunga tuli ni chiteli chilemu cha kukwasa chikungulwila hanga mupwe sambukila. Ha mutwe uze muusulaho, muusolola chize hita umwe wa kuli yetu mahasa kuneha sambukila mu chikungulwila.