MUTWE WAKULILONGESA 7
Nyingika Chiyulo Chize Makulwana Alinacho mu Chikungulwila
“Kristu nawa iye mutwe wa chikungulwila, iye chilamwina cha mujimba.”—EFWE. 5:23.
MWASO 137 Mapwo Waze Ashishika
CHIKUMA CHILEMU *
1. Mumu liaka usoko wa Yehova walinunga?
TWAKUWAHILILA chinji ha kupwa mu usoko wa Yehova. Mumu liaka usoko wetu walinunga nawa mwapwa sambukila? Tulieswe twakusa tachi hanga tuvumbike atu waze Yehova ehele umwe wata. Kwamba umwenemwene, nyi twanyingika mumu liaka Yehova asele wata muchitukwasa kulinunga.
2. Yihula yika mutukumbulula ha mutwe uno?
2 Ha mutwe uno, mutushimutwinaho hakutwala kuli waze ali ni wata mu chikungulwila, mutukumbulula nawa yihula yino: Mulimo uka mandumbu a mapwo akwete mu chikungulwila? Shina chili chamwenemwene ngwo, hita ndumbu mu chikungulwila kali mwata wa umwe ndumbu wa pwo? Shina chiyulo chize makulwana mu chikungulwila akwete hali mandumbu, chili chizechene mwata wa mu usoko akwete hali mukwo-pwo ni ana jenyi? Chitangu, tushimutwinenu chize twatamba kumona mandumbu a mapwo.
KUCHI TWATAMBA KUMONA MANDUMBU A MAPWO?
3. Yika muyitukwasa mba tulemese chinji mulimo uze mandumbu jetu a mapwo akulinga?
3 Twakulemesa mandumbu a mapwo waze akukalakala chinji hanga akwase asoko jo, ambujole sango lipema ni kukwasa akwo mu chikungulwila. Yetu mutuhasa kulemesa chinji mandumbu jetu a mapwo nyi mutwamona ngwe chize Yehova ni Yesu akwamona. Chikwo nawa, mutulilongesa chize postolo Paulu apwile ni kumona mapwo.
4. Kuchi Mbimbiliya yinasolola ngwo Yehova kakulemesa mapwo ngwe chize akulemesa malunga?
4 Mbimbiliya yinasolola ngwo Yehova kakulemesa mapwo ngwe chize akulemesa malunga. Chakutalilaho, yinasolola ngwo ku sekulu yitangu Yehova kahanyine spiritu yisandu kuli mapwo ni kuli malunga hanga eswe ahase kulinga milimo yakukomwesa, ngwe kuhanjika malimi alisa. (Yili. 2:1-4, 15-18) Mapwo ni malunga wano, kawahishile ni spiritu yisandu hanga akayule ni Kristu mu malilu. (Ngala. 3:26-29) Malunga ni mapwo kali ni kutalatala cha kutwama ni mwono wa mutolo hano hashi. (Uso. 7:9, 10, 13-15) Chikwo nawa, malunga ni mapwo eswe kali ni chiteli cha kwambujola ni kulongesa umwenemwene kuli atu. (Mateu 28:19, 20) Mukanda wa Yilinga, unasolola mulimo uze alingile umwe ndumbu wa pwo avuluka ngwo Prisila. Iye ni mukwo-lunga Akwila kalumbunwine umwenemwene kuli Apolu umwe lunga yoze te walongoloka mu yisoneko.—Yili. 18:24-26.
5. Kuchi Luka 10:38, 39, 42, unasolola ngwo Yesu te kakuvumbika mapwo?
5 Yesu kapwile ni kulemesa mapwo ni kwavumbika. Iye kakembulwile ndako ya A-Fwariseu, waze te akulelesa mapwo ni kulituna kuhanjika no ha mbunga chipwe kwalongesa yisoneko. Shimbu achilinge, iye te kakulongesa mapwo umwenemwene ngwe chizechene te akulinga kuli malunga. * (Tanga Luka 10:38, 39, 42.) Iye nawa kapwile ni kuya hamwe ni mapwo mu mulimo wa kwambujola. (Luka 8:1-3) Chikwo nawa, Yesu kahanyine chiteli kuli mapwo chakulweza apostolo jenyi ngwo kamuhindwisa ku ufwe.—Yoa. 20:16-18.
6. Kuchi postolo Paulu asolwele ngwenyi kakuvumbika mapwo?
6 Postolo Paulu kalwezele Timoteu hanga avumbike mapwo. Paulu kamulwezele hanga amone “makulwana ja mapwo ngwe amama; mapwo a miaka yikehe ngwe mapangi.” (1 Timo. 5:1, 2) Paulu kakwashile Timoteu kupwa mukwa-Kristu wajama, alioze iye kanyingikine ngwenyi naye ya Timoteu ni kako e amukwashile chitangu kunyingika yisoneko “yisandu.” (2 Timo. 1:5; 3:14, 15) Mu mukanda wenyi kuli A-Roma, Paulu yameneka mandumbu a mapwo ha kwatongola ha majina. Paulu kakamwene wika yize mandumbu wano alingile, alioze kasakwilile nawa chinji ha yize ayo alingile mu mulimo wa Zambi.—Roma 16:1-4, 6, 12; Fwili. 4:3.
7. Yihula yika mutushimutwina haliapwila?
7 Ngwe chize twamona ha maparagrafu ali helu, kukushi nihamwe mu Mbimbiliya haze hanasolola ngwo, mandumbu a malunga kali alemu chinji kuhiana mandumbu a mapwo. Mandumbu jetu a mapwo waze akwete zango nawa yihanyi kakukwasa chinji chikungulwila, nawa makulwana kakwajikijila chinji ha ukwaso uze akuhana hanga chikungulwila chipwe ni sambukila hamwe ni kulinunga. Alioze twatamba kukumbulula yihula yino. Mumu liaka ha mashimbu amwe Yehova akwita mandumbu a mapwo hanga azale chitambala? Amu akutongola wika mandumbu a malunga hanga apwe makulwana mu chikungulwila ni tuvumbi, shina chino chinalumbunuka ngwo hita ndumbu kali mwata wa umwe ndumbu wa pwo mu chikungulwila?
SHINA HITA NDUMBU MU CHIKUNGULWILA KALI MWATA WA UMWE NDUMBU WA PWO?
8. Kulita ni A-Efwesu 5:23, shina hita ndumbu mu chikungulwila kali mwata wa umwe ndumbu wa pwo? Lumbununa.
8 Shina hita ndumbu mu chikungulwila kali mwata wa umwe ndumbu wa pwo? Kumbululo lili ngwo, ka! Kristu wika mwe mwata. (Tanga A-Efwesu 5:23.) Mu usoko, lunga kali ni wata hali mukwo-pwo. Mwana wa lunga wa kupapachisa iye hi mutwe wa naye ko. (Efwe. 6:1, 2) Chikwo nawa, mu chikungulwila makulwana kali ni ndambu ya chiyulo hali mandumbu a mapwo ni a malunga. (1 Tesa. 5:12; Hepre. 13:17) Mandumbu a mapwo twamishi waze katwamine nawa ku mazuwo ja yisemi jo, ayo keshi mushi lia wata wa yisemi jo. Chipwe chocho, ayo manunga ni kuvumbika yisemi jo ni makulwana mu chikungulwila. Alioze chizechene ngwe mandumbu eswe, mwata wo kali Yesu.
Mandumbu a mapwo ni a malunga twamishi waze katwamine nawa ku mazuwo ja yisemi jo, kali mushi lia chiyulo cha Yesu (Tala paragrafu 8)
9. Ha mashimbu aka ndumbu wa pwo atamba kuzala chitambala?
9 Kwamba umwenemwene, Yehova kahanyine chiteli cha kulongesa ni kusongwela chikungulwila kuli malunga, iye kakachihanyine kuli mapwo. (1 Timo. 2:12) Mumu liaka? Mumu iye kasele Yesu ngwe mutwe wa lunga hanga alulieke yuma mu chikungulwila chenyi. Nyi ha mashimbu amwe ndumbu wa pwo malinga mulimo uze te watela kuulinga kuli lunga, Yehova kanamwite hanga azale chitambala. * (1 Kori. 11:4-7) Yehova kakwita hanga mandumbu a mapwo azale chitambala hi mumu lia kwalelesa ko, alioze hanga asolole vumbi lio kuli waze iye hanahane umwe wata. Hachino, mutukumbulula chihula chino: Yiteli yika miata a mu usoko ni makulwana a mu chikungulwila alinayo?
CHITELI CHA MIATA A MU USOKO NI CHA MAKULWANA A MU CHIKUNGULWILA
10. Yika muyihasa kutwala mukulwana kusela mandumbu shimbi mu chikungulwila?
10 Makulwana a mu chikungulwila kakuzanga Kristu, nawa kakuzanga “mapanga” waze Yehova ni Yesu aehele kufunga. (Yoa. 21:15-17) Amu mukulwana ali ni chiteli cha kufunga chikungulwila, iye mahasa kulivwa ngwe kali tato ya mandumbu mu chikungulwila. Mahasa kunyonga ngwenyi, amu mwata wa usoko ali ni ulite wa kusela asoko jenyi shimbi hanga aafunge, mukulwana wa mu chikungulwila neye mahasa kusa shimbi hanga afunge mapanga ja Zambi. Chikwo nawa, mandumbu amwe a malunga ni a mapwo mahasa kwita kuli makulwana a mu chikungulwila hanga apwe miata jo a ku ufulielo hakweeta hanga aakwachile yiyulo. Alioze, shina miata a mu usoko ni makulwana a mu chikungulwila kali ni chiteli chimuwika?
Makulwana kakukwasa mandumbu mu chikungulwila akundame kuli Yehova ni kulivwa ngwe kakwazanga. Yehova hanaehe chiteli cha kufunga chikungulwila hanga chipwe chalinanga (Tala maparagrafu 11-12)
11. Kulifwa chika chili ha yiteli ya miata a mu usoko ni ya makulwana a mu chikungulwila?
11 Postolo Paulu kasolwele ngwenyi, hali chimwe kulifwa hakachi ka chiteli cha mwata wa mu usoko ni cha mukulwana a mu chikungulwila. (1 Timo. 3:4, 5) Chakutalilaho, Yehova kanazange hanga asoko ononokene mwata wo wa mu usoko. (Kolo. 3:20) Iye nawa kanazange hanga mandumbu ononokene makulwana a mu chikungulwila. Yehova kanashimbwila miata a mu usoko ni makulwana a mu chikungulwila hanga ase shindakenyo ngwo, waze ali mushi lia chiyulo cho kali kanawa ku ufulielo. Miata a mu usoko ni makulwana a mu chikungulwila, katamba kusa shindakenyo ngwo, waze ali mushi lia chiyulo cho kakulivwa ngwe kakwazanga. Chizechene ngwe miata a mu usoko apema, makulwana a mu chikungulwila kakusa shindakenyo ngwo, waze ali mushi lia chiyulo cho kakutambula ukwaso uze anafupiwa. (Tia. 2:15-17) Yehova kakushimbwila nawa makulwana ni miata a mu usoko hanga akwase akwo kwononokena shimbi jenyi. Iye kanaatoweza ngwenyi, manyonga jo katambile “kuhiana yuma yize yinasonewa.”—1 Kori. 4:6.
Mu usoko Yehova hanahane kuli miata a mu usoko chiteli cha kusongwela asoko jo. Alioze, shimbu kanda achikwata chiyulo, mwata wa mu usoko yoze ukwete zango chitangu kakuhanjika ni mukwo-pwo (Tala paragrafu 13)
12-13. Ngwe chize anasolola ha A-Roma 7:2, kalisa muka uli ha chiteli cha miata a mu usoko ni cha makulwana a mu chikungulwila?
12 Alioze kuli nawa umwe kalisa ha chiteli cha mukulwana wa mu chikungulwila ni cha mwata wa mu usoko. Chakutalilaho, Yehova hanase makulwana ngwe ngaji, nawa hanaehe chiteli cha kusosolola mu chikungulwila mandumbu waze akulinga shili chakuhona kulikonyeka.—1 Kori. 5:11-13.
13 Chikwo nawa, Yehova hanahane kuli miata a mu usoko, chimwe chiteli chize kakahanyine kuli makulwana a mu chikungulwila. Chakutalilaho, iye hanahane kuli mwata wa mu usoko chiteli cha kusela asoko jenyi shimbi ni kusa shindakenyo ngwo, ayo kanakaula kanawa shimbi jacho. (Tanga A-Roma 7:2.) Chikwo nawa, mwata wa mu usoko kali ni ulite wakukwata chiyulo hakutwala ha mashimbu waze ana jenyi atamba kufuna ku zuwo ufuku. Iye nawa kali ni chiteli cha kufumba ana jenyi, nyi kononokene shimbi jacho. (Efwe. 6:1) Chipwe chocho, mwata wa mu usoko yoze ukwete zango kakulianga kuhanjika chitangu ni mukwo-pwo mba ase shimbi ku zuwo, mumu ayo eswe aali kali “musunya umuwika.” *—Mateu 19:6.
VUMBIKA KRISTU MUMU KALI MUTWE WA CHIKUNGULWILA
14. (a) Yika Marku 10:45 unambe yize yinasolola ngwo, chinalite Yehova kusa Yesu mutwe wa chikungulwila? (b) Chiteli chika Chizavu cha Tusongo alinacho? (Tala mushete, “ Chiteli cha Chizavu cha Tusongo.”)
14 Kupalikila mu ukuule, Yehova kalanjile mwono wa hita ndumbu mu chikungulwila ni wa atu eswe. (Tanga Marku 10:45; Yili. 20:28; 1 Kori. 15:21, 22) Chinalite hakusakula Yesu yoze wahanyine mwono wenyi ngwe ukuule hanga apwe mutwe wa chikungulwila. Kashika Yesu kali ni chiyulo cha kusa shimbi hakutwala ku yize atu, asoko ni chikungulwila cheswe atamba kulinga. Nawa kali ni ulite wa kusa shindakenyo ngwenyi, shimbi jacho kanajononokena. (Ngala. 6:2) Alioze Yesu kakulinga yuma yinji hi wika ko kusa shimbi. Iye kakutufunga, nawa kakuzanga hita umwe wa kuli yetu.—Efwe. 5:29.
Yesu kupalikila mu chiyulo cha Yehova, kakusongwela chikungulwila cha akwa-Kristu (Tala paragrafu 14)
15-16. Yika walilongesa ha maliji a ndumbu Marley ni ndumbu Benjamin?
15 Mandumbu jetu a mapwo kakusolola ngwo, kanavumbika Kristu ha kukaula usongwelo wa malunga waze iye asele hanga aafunge. Mandumbu anji a mapwo kakutayiza nyonga lia ndumbu Marley yoze watwama mu Estados Unidos. Iye yamba ngwenyi: “Nakulemesa chinji chihela chami ngwe pwo ni chihela chami ngwe ndumbu wa pwo mu chikungulwila. Nakusa tachi hanga nguvumbike chiteli chize Yehova ahanyine kuli mukwetu-lunga ni chize ahanyine kuli makulwana a mu chikungulwila. Alioze chakupwa chashi kuchilinga, mumu mukwetu-lunga ni mandumbu mu chikungulwila, kakunguvumbika ni kusakwilila ha mulimo uze nakulinga.”
16 Mandumbu a malunga kakusolola ngwo, kananyingika kanawa shimbi ya wata yize Yehova hanase, ha kuvumbika ni kulemesa mandumbu a mapwo. Benjamin, umwe ndumbu yoze watwama mu Inglaterra, yamba ngwenyi: “Nakulilongesa ha makumbululo waze mandumbu a mapwo akuhana ha kukunguluka, ni ha yiyulo yo yipema hakutwala ku kulilongesa ni chize munguhasa kwambujola kanawa. Kuli yami, mulimo uze ayo akulinga uli ulemu chinji.”
17. Mumu liaka twatamba kuvumbika yiteli yize Yehova hanahane kuli akwetu?
17 Muze eswe mu chikungulwila, malunga, mapwo, miata a mu usoko ni makulwana mavumbika chiteli chize Yehova ahanyine kuli akwo, mu chikungulwila mumupwa sambukila. Chahiana ulemu, mutuhalisa Tata yetu wa mu malilu, Yehova.—Samu 150:6.
MWASO 123 Kuzeyela ku Ululikiso wa Zambi
^ kax. 5 Mulimo uka mandumbu a mapwo akwete mu chikungulwila? Shina hita ndumbu mu chikungulwila kali mwata wa umwe ndumbu wa pwo? Kalisa muka uli ha chiyulo cha miata a mu usoko ni cha makulwana a mu chikungulwila? Ha mutwe uno, mutumona chize Mbimbiliya muyitukwasa kuwana makumbululo a yihula yino.
^ kax. 5 Tala paragrafu 6 ha mutwe unambe ngwo, “Kwasa Mandumbu a Mapwo mu Chikungulwila Chenu,” uze uli ha Kaposhi wa Kutalila wa Setembro 2020.
^ kax. 9 Tala mushete, “ Ha Shimbu Lika Ndumbu wa Pwo Atamba Kuzala Chitambala?”
^ kax. 13 Mba unyingike yoze watamba kukwata chiyulo cha chikungulwila chize asoko atamba kuya, tala maparagrafu 17-19 ha mutwe unambe ngwo, “Lemesa Chihela cha Hita Ndumbu mu Chikungulwila cha Yehova,” mu Kaposhi wa Kutalila wa Agosto 2020.
^ kax. 59 Mba unyingike kanawa chikuma chino, tala mukanda “Nunga mu Zango lia Zambi,” mafwo 209-212.
^ kax. 64 Mba unyingike kanawa chiteli cha Chizavu cha Tusongo, tala Kaposhi wa Kutalila wa 15 Julho 2013, ha mafwo 20-25.
