Hanyima lia mwaka 1920 yisemi jami yalilongesa umwenemwene muze te kanda achilimbata. Nasemukine ku uputukilo wa mwaka 1939. Muze te nguchili mukweze, te natwama mu Inglaterra, napwile ni kuya ku kukunguluka ni yisemi jami, hanyima yingulisonekesa ku Shikola ya Milimo ya Zambi. Ngunewuluka tangwa lize nahanjiikile pande jami jitangu, nanyinyine ha chipasa mba yinguhasa kumona kanawa helu lia tribuna. Napwile ni kwivwa woma wa kutala atu ha mbunga, mumu napwile ni miaka yisambano.

Mu munda, tata kanakangusonekena amwe maliji waze te nakuzachisa hanga ngwambujole kuli atu. Ha chisuho chitangu chize nayile ni kwambujola ukawami ku zuwo ni zuwo te nguli ni miaka nake. Nakomokene chinji muze mwenya-zuwo atangile maliji waze tata anakangusonekena ni kutayiza mukanda “Seja Deus Verdadeiro!” Chocho yinguzomboka ni kulweza tata yuma yize yalingiwileko. Kwambujola ni kukunguluka te chakungwaha uwahililo unji, nawa changukwashile kupwa ni zango lia kulingila Yehova mu mulimo wa shimbu lieswe.

Umwenemwene wa mu Mbimbiliya unakaputuka kungukwata chinji ku mbunge, muze tata anakangusonekesa hanga nguputuke kutambula Kaposhi wa Kutalila. Te nakutanga hita kaposhi ha shimbu lizeliene te nakumutambula. Chocho ufulielo wami muli Yehova yiukola, nawa yingukwata chiyulo cha kulihana kuli iye.

Ha mwaka 1950, yami, tata ni mama yituya ku Nova York ku kukunguluka cha mambonge te chinambe ngwo, Aumento da Teocracia. Liamawana, tangwa liamuchitatu lia kakweji wa Agosto, mutwe wapwile ngwo, “Tangwa lia Mamishionaliu.” Ha tangwa liacho ndumbu Carey Barber yoze kulutwe wakalakalile mu Chizavu cha Tusongo, yalinga  pande ja upapachiso. Kusongo lia pande jenyi muze ahulile yihula yaali kuli waze mapapachisa, ami yingukatuka ni kwamba ngwami, “Ewa!” Ha mashimbu jacho napwile ni miaka 11, chipwe chocho nanyingikine ngwami te ngunakwate chiyulo chilemu. Yami te ngunevu woma wakunjila mu meya, mumu te chanyingikine kusana. Tata wa kanuke yangutwala ndo mu meya ni kungulweza ngwenyi, yeswe muyenda kanawa. Kwamba umwenemwene, molu jami kakaliachile hashi. Kanguhanyine kuli umwe ndumbu, ndumbu wacho yanguhana kuli ndumbu mukwo yoze wangupapachishile hi mukwo yangututwisa mu meya. Chize ha tangwa lize lilemu ndo musono, Yehova machinunga ni kululamisa majila jami.

Muze nahwishile shikola yikehe, yinguzanga kupwa pionelu, alioze alongeshi jami yangukolweza hanga nguye ku shikola yinene. Mumu lia kungushinjila, chocho yinguya ku shikola yinene, alioze yingunyingika ngwami te kuchishi kuhasa kumana ngu mu ufulielo a ku ngunalilongesa, kashika yingwecha kulilongesa. Hachino, yinguhanjika ni Yehova hakutwala ku chikuma chacho, chocho yingusonekena alongeshi jami mukanda ni kwalumbunwina ngwami, chishi kununga nawa ni kulilongesa. Yingujikijila muli Yehova, kawashi-washi yinguputuka mulimo wa upionelu.

Ha kakweji wa Julho wa mwaka 1957, yinguya ni kukalakala ngwe pionelu mu mbonge ya Wellingborough. Yingwita kuli mandumbu a ku Mbetele ya Londres hanga anguwanyine umwe pionelu wajama yoze te munguhasa kukalakala nenyi. Ndumbu Bert Vaisey kangulongesele yuma yinji, iye kapwile ni zango linji mu mulimo wa kwambujola, nawa yangukwasa kupwa ni katalilo mupema mu mulimo wami wa kwambujola. Mu chikungulwila chacho mwapwile yami, ndumbu Vaisey ni mandumbu a mapwo asambano tushinakaji. Kulilulieka ni kuhana makumbululo ha kukunguluka cheswe, changukwashile kukolesa ujikijilo wami muli Yehova ni kusolola ufulielo wami.

Hanyima lia amwe mashimbu akehe mu zuwo lia ususu mumu lia kulituna mulimo wa uswalale, yingunyingika Barbara umwe ndumbu wa pwo yoze te wakukalakala ngwe pionelu walipwila. Ha mwaka 1959 yitulimbata, hachino, yitulihana hanga tukalakale kweswako kuze te matutuma. Chitangu, yatutuma ku Lancashire ku noroeste ya Inglaterra. Ha Janeiro ya mwaka wa 1961, yangusanyika hanga nguye ku Shikola ya Mulimo wa Wanangana ku Mbetele ya ku Londres. Muze twahwishile shikola, nakomokene chinji ha kunyingika ngwami, kangusanyika hanga ngupwe ni kumeneka yikungulwila. Ha poso jaali yingutambula fumbo kuli kalayi wa mbonge yoze te wajama mu mbonge ya Birmingham, nawa Barbara te kakuya hamwe ni yami. Hanyima lia fumbo, yatutuma hanga tuye ni kukalakalila ku mbonge ya Lancashire ni Cheshire.

Ha kakweji wa Agosto wa 1962, muze twachijile amwe matangwa akuhwima, yitutambula umwe mukanda kukatuka ku mutango. Mu mukanda wacho mwapwile formulário ya kuya ku Shikola ya Ngiliate. Hanyima lia kulemba, yami ni Barbara yitusoneka formulário ni kuyifunyisa kawashi-washi ku mutango. Hanyima lia tukweji atano, yituya ku  Brooklyn Nova York, hanga tuputuke Shikola ya Ngiliate mu kalasa 38, twalingile tukweji kumi a kulilongesa Mbimbiliya.

Ku Shikola ya Ngiliate, twakalilongesele wika hakutwala ku Liji lia Zambi ni ululikiso wenyi, alioze twalilongesele nawa hakutwala kuli mandumbu jetu a hashi heswe. Ku Shikola twalilongesele yuma yinji kuli akwetu. Nayukile chinji hakulinga yimwe yihanda hita tangwa ni ndumbu Fred Rusk umwe wa kuli alongeshi jetu. Longeso limwe lilemu lize iye anakashindakenya, liapwile ngwo, muze tunahane yiyulo twatamba kupwa ni shindakenyo ngwetu, yinakatuka mu Yisoneko. Amwe a kuli mandumbu ajama waze ahanjikile pande mu kalasa wetu, kapwile ndumbu Nathan Knorr, Frederick Franz, ni ndumbu Karl Klein. Ngwe alongi, twalilongesele yuma yinji ha chilweza cha kulikehesa cha ndumbu A. H. Macmillan. Pande jize ahanjikile, jatukwashile kumona chize Yehova akwashile atu jenyi muze apalikile mu yipikalo, ha mwaka 1914 ni ku uputukilo wa mwaka 1919!

Kusongo lia Shikola, ndumbu Knorr yatulweza yami ni Barbara ngwenyi, katutuma hanga tuye ni kukalakalila ku Burundi mu África. Yituya mu utulikilo wa mikanda ku Mbetele hanga tutale mu Anuário, unji wa akwa-kwambujola waze te ali mu Burundi ha mashimbu jacho. Alioze twakomokene chinji muze twakawanyine ni hamwe haze te hanasolola unji wa akwa-kwambujola waze apwile mu Burundi! Te tunayi mu ngiza muze kumushi akwa-kwambujola. Nawa te tunayi mu África mu chifuchi muze te kutwanyingikine! Tunakasakalala chinji, alioze hanyima lia kulemba yitulihumikiza.

Kuma kuze atutumine yuma yeswe te yinalise chinji, ngwe tungonde, yako ni malimi. Te tunafupiwa kulilongesa Francês. Twapwile nawa ni kapinda wa kuwana kuze te mututwama. Muze kwapalikile matangwa aali, Harry Arnott umwe wa kuli yoze twalilongesele no, yeza kutumeneka muze te anayi ku Zâmbia kuze amutumine. Iye katukwashile kuwana zuwo. Zuwo liacho lie liapwile zuwo litangu lia mamishionaliu. Ha amwe mashimbu, nguvulu yaputuka kulimika ni yetu, mumu te kanyingikine nichimwe hakutwala kuli Yela ja Yehova. Muze te hitwaputuka kwijilila ni kuwahilila ni mulimo wetu, nguvulu yatulweza ngwo kutushi kuhasa kununga chakuhona kusonekesa mulimo wetu. Hachino, yitukatuka mu Burundi ni kuya mu chifuchi chikwo, Uganda.

Kuhona mikanda yize te muyitutayiza kutwama mu Uganda, chinakatusakalalisa, alioze kujikijila  muli Yehova chinakatukwasa chinji. Umwe ndumbu wa mu Canadá yoze wayile ku Uganda ni kukalakala kuze te kunafupiwa ukwaso, yalumbununa mulonga wetu kuli tupokola waze te atala hali yilambala. Chocho ayo yatulweza ngwo, mutuhasa kutwama amwe tukweji mu Uganda, ndo haze mutulingila mikanda. Chino chasolwele pundu ngwo, Yehova te kanatukwasa.

Yuma mu Uganda yalisele chinji ni ya mu Burundi. Mu Uganda mulimo wa Wanangana te hiwapwa kulu wakusonekesa, chipwe ngwe mwapwile wika Yela ja Yehova 28. Mu ngiza yacho, twawanyinemo atu anji waze te akuhanjika limi lia Inglês. Hazehene yitumona ngwetu mba tukwase atu anji kukola ku ufulielo, twatamba kulilongesa limwe limi lio. Hachino, yituputuka kwambulwila mu ngiza ya Kampala, kuze te akuhanjika chinji limi lia Luganda, hachino, yitusakula kulilongesa limi liacho. Kwapalikile miaka yinji mba tunyingike kuhanjika kanawa limi liacho, alioze kunyingika kuhanjika limi lia Luganda, chatukwashile chinji mu mulimo wetu wa kwambujola! Chikwo nawa, yituputuka kunyingika kanawa yize alongi jetu te anafupiwa mba akole ku ufulielo. Muze alongi jetu amwene ngwo tunalihulumba chinji hali ayo, yaputuka kutujikijila ni kutulweza yize anevu hakutwala ku yize te analilongesa.

Te twakuwahilila chinji ha kukwasa atu kulilongesa umwenemwene, alioze tunakawahilila chinji kuhiana muze angutongwele hanga ngukalakale ngwe kalayi wa mambonge. Ni usongwelo wa mutango wa Quênia, yitulinga “wenyi” hanga tuye ni kufupa yihela kuze mapionelu alipwila te mahasa kukalakalila. Alioze ha yisuho yeswayi, kapwile ni kutuzumbula kuli atu waze te kanda achivwa kama niyimwe hakutwala kuli Yela ja Yehova. Ayo te kakututambula ni zango ni kutwaha kulia.

Kulutwe yitulinga nawa wenyi ukwo. Yitulinga wenyi wa matangwa aali kukatuka ku Kampala yituya ndo ku Mombasa, ku Mombasa yitunjila mu ulungu ni kuya ku Seychelles chimwe chihela chize chatwama ku Oceano Índico. Kulutwe, ha mwaka 1965 ni 1972, yami ni Barbara yituputuka kuya ni kumeneka mandumbu a mu Seychelles. Ku uputukilo, mwapwile wika akwa-kwambujola aali waze te atwamamo, kulutwe yikupwa chizavu, hanyima mba yikupwa chikungulwila. Mu “wenyi” ukwo, yangutuma kuya ni kumeneka mandumbu mu Eritreia, Etiópia ni Sudão.

Alioze yuma mu Uganda yalumukine muze chimwe chizavu cha maswalale chaputukile kuyula. Alioze mashimbu akalu waze asulileho kangulongesele ngwami, chili chipema kukaula shimbi ya Zambi yinambe ngwo, “hanenu kuli Sesare yuma ya Sesare.” (Marku 12:17) Yikuheta amwe mashimbu, yilambala eswe mu Uganda yaashinjila hanga alisonekese kuli nguvulu ha chihela chize chili hakamwihi ni kuze atwama. Kawashi-washi yitwononokena shimbi yacho. Ha kupalika cha amwe matangwa muze te tunayi ku Kampala, mapulisha yatumanyisa yami ni mishionaliu mukwo. Yitwivwa ku mbunge leku! Ayo yatulamikiza ngwo tuli ngendeshi, hachino yatutwala ku zuwo lia mapulisha, muze twaheteleko yitulumbununa ngwetu, tuli kwetu mamishionaliu akwa-sambukila. Yitwalweza ngwetu, hitwalisonekesa kulu kuli mapulisha alioze ayo katutayijile. Hachino, yatukwata ni kututwala ku chihela cha mapulisha chize chapwile hakamwihi ni zuwo lia mamishionaliu. Tunakawahilila chinji muze twawanyineko umwe pulisha yoze te unanyingika ngwenyi tunakalisonekesa, chocho yeta hanga atutusule.

 Ha mashimbu jacho twapwile ni kulipikala chinji, mumu te kakutumanyisa-manyisa kuli maswalale, chipi-chipi muze apwile ni kutumanyisa kuli maswalale waze te hazenga. Ha mashimbu eswe te twakulemba ni kupwa ni sambukila ya mu mbunge muze te akutwecha hanga tupalike kanawa. Chaluyinda, ha mwaka 1973, mamishionaliu eswe yalweza hanga atuhuke mu Uganda.

Chocho yatutuma nawa ku Côte d’Ivoire ku Oeste ya África. Chino chapwile kwalumuka chinene kuli yetu, mumu te twatamba kulilongesa yuma yeswe yaha, kuhanjika nawa Francês ni kutwama ni mamishionaliu waze ejile ku yihela yeka ni yeka! Twamwene nawa usongwelo wa Yehova ha chize atu alikehesa nawa a mbunge yipema atayijile kawashi sango lipema. Yami ni mukwetu-pwo twamwene nawa chize kujikijila muli Yehova chalulamishine majila jetu.

Susumuku ndotolo yatulweza ngwenyi Barbara kali ni câncer. Twalingile wenyi unji wa kuya ku Europa hanga mukwetu-mama atambule uwukiso, alioze ha mwaka 1983 yitunyingika ngwetu, kutuchi kufuna nawa mu África. Chino chinakatuvwisa yinyengo yinji!

Muze te tunakalakala ku Mbetele ya Londres musongo wa Barbara yiwoka chinji, chocho yafwa. Asoko a ku Mbetele kangukwashile chinji. Amwe waze alimbata yangukwasa ha chize te munguhasa kupalika mu kapinda wacho ni kununga ni kujikijila muli Yehova. Kulutwe, yingulinyingika ni umwe pangi ku Mbetele yoze wapwile pionelu walipwila, pangi wacho te kakuzanga chinji Yehova, nawa te kajama ku ufulielo. Yami ni Ann twalimbachile ha mwaka 1989, chize haze tunanungu ni kukalakala ku Mbetele ya Londres.

Kukatuka ha mwaka 1995 ndo 2018, nakalakalile ngwe mukwa-kumanyinako chishina chinene ha kumeneka yifuchi 60. Ha hita chifuchi chize twamenekene, twamwene chize Yehova akufunga atu jenyi chipwe ngwe mukulingiwa yeswayo kuli ayo.

Ha mwaka 2017 yituya ni kumeneka África. Ngunakawahilila ha kuya ni Ann ku Burundi ha chisuho chitangu. Muwaali wetu yitukomoka ha kumona atu anji waze anatayiza umwenemwene! Mu tapalo yizeyene napwile ni kwambulwila sango lipema ku zuwo ni zuwo ha mwaka 1964, haliapwila mwe muli Mbetele. Musono, mu chifuchi chacho muli akwa-kwambujola kuhiana 15,500.

Ngunakawahilila chinji muze natambwile katalilo wa yifuchi yize te mungumeneka ha mwaka 2018. Ha katalilo wacho, hapwile chifuchi cha Côte d’Ivoire. Muze twahetele ku Abidjan mbonge yinene ya mu chifuchi chacho, kuli yami chapwile ngwe nafuna ku mahetu. Muze namwene katalilo wa numero ja mandumbu waze te akukalakala ku Mbetele, mu chipatulo muze atusele te tunasulangana ni ndumbu Sossou yoze te ngunanyingika. Newulukile ngwami, iye kakalakalile ngwe kasongo wa mbonge muze napwile mu Abidjan. Kumana te hi iye ko. Au kapwile mwanenyi.

Yehova kakushishika ku liji lienyi. Mu lamba lieswe lize napalikile, nalilongesele ngwami, nyi twajikijila muli Yehova iye malulamisa majila jetu. Haliapwila, ngunazange kununga mu jila yino yize muyingutwala ndo mu chifuchi chaha muze mwono muukapema chinji.—Yishi. 4:18.