1-2. (a) Mumu liaka atu anji musono chakwakalila kujikijila waze ali ni wata? (b) Yika mutumona ha mutwe uno?

MUSONO, atu anji chakwakalila kujikijila waze ali ni wata. Ayo hananyingika ngwo manguvulu ni shimbi jize akusa, kanji-kanji jakukwasa pichi ni waze ali ni ndundo, alioze kujishi kukwasa chinji yiswale. Mbimbiliya yinashindakenya chikuma chino ha kwamba ngwo: “Mutu mapwa ni chiyulo helu lia mukwo ni kumupinjisa.” (Chilu. 8:9) Chikwo nawa, mangana amwe a mayingeleja kakulinga yuma yinji yipi yize yakutwala atu ahone kufuliela muli Zambi. Kashika, nyi tunalongesa umwe mutu Mbimbiliya, twatamba kumukwasa hanga afuliele muli Yehova ni hali waze iye akuzachisa hanga asongwele ululikiso wenyi hano hashi.

² hipwe chocho, hi alongi a Mbimbiliya wika ko atamba kulilongesa kujikijila muli Yehova ni mu ululikiso wenyi. Chipwe mutu yoze wakulingila Yehova ha miaka yinji, neye mahasa kuhona kufuliela ngwo, mutapu uze iye akulingilamo yuma nihindu walita. Ha mashimbu amwe, mutuhasa kupalika mu yuma yize muyeseka ufulielo wetu muli Yehova. Ha mutwe uno, mutumonaho yuma yitatu yize muyihasa kweseka ufulielo wetu: (1) muze tunatange umwe lusango wa mu Mbimbiliya, (2) muze mututambula umwe usongwelo wa mu ululikiso wa Yehova, nawa (3) muze mutukapalika mu yeseko kulutwe lia matangwa.

3. Mumu liaka sango jimwe ja mu Mbimbiliya mujihasa kweseka ufulielo wetu muli Yehova?

 ³ Muze mututanga Mbimbiliya, hanji mutuhasa kukakajana ha yize Yehova alingile hali atu amwe ni ha yiyulo yize akwachile. Chakutalilaho, lusango umwe mu mukanda wa Kwalula kanambe ngwo, Yehova katumine kushiha umwe Ka-Izalele mumu lia kuchaya kunyi ha tangwa lia Sambata. Mu mukanda wamuchiali wa Samuele twakutangamo ngwetu, ha kupalika cha miaka yinji, Mwanangana Ndawichi yalinga utanji ni kushihisa umwe lunga, alioze Yehova yamukonekena. (Kwa. 15:32, 35; 2 Samue. 12:9, 13) Amwe mahasa kulihula ngwo, ‘Mumu liaka Yehova akonekenene Ndawichi yoze walingile utanji ni kushihisa mutu, alioze yatuma kushiha mutu yoze walingile chuma chize chasolokele ngwe hi shili yinene ko?’ Mba tunyingike kanawa chikuma chino, chitangu tutalenu yuma yitatu yize twatamba kwiwuluka muze tunatange Mbimbiliya.

4. Kuchi Uputukilo 18:20, 21 ni Shimbi Yamuchiali 10:17, yinakolesa ufulielo wetu ha yiyulo ya Yehova?

⁴Ha mashimbu amwe Mbimbiliya kuyishi kulumbununa yuma yeswe mu yimako-yimako. Chakutalilaho, tunanyingika ngwetu, Ndawichi kalikonyekene ni mbunge yeswe ha yize alingile. (Samu 51:2-4) Mba yika mutwamba hali lunga yoze wehukile Shimbi ya Sambata? Shina iye kalikonyekene ha yize alingile? Kutala te hanehuka shimbi ja Yehova kunyima? Shina te hanaliange kumutoweza alioze katayijile? Mbimbiliya kuyishi kukumbulula yihula yino. Chipwe chocho, mutuhasa kupwa ni shindakenyo ngwetu, Yehova “keshi uhenge.” (Shimbi 32:4) Iye kakukwata yiyulo kulita ni yize yalingiwa, hi ha yize ko akwo mamba hanji katonde chipwe chuma cheswacho chize muchitwala atu hanga apwe ni nyonga lipi ha yize yalingiwako. (Tanga Uputukilo 18:20, 21; Shimbi Yamuchiali 10:17.) Nyi twalilongesa kanawa hakutwala kuli Yehova ni majila waze akulingilamo yuma, mutujikijila chinji ha yiyulo yenyi. Chipwe ngwe kuli umwe lusango wa mu Mbimbiliya yoze kanda tuchinyingika kanawa, nihindu tunanyingika kanawa Yehova. Kashika tuli ni shindakenyo ngwetu, “kapwa mukwa ululi mu majila jenyi eswe.”—Samu 145:17.

5. Kuchi uhenge wakukwata ha uhashi wetu wa kupatula ni ululi? (Tala nawa mushete, “ Uhenge Wakutukwika Kumona Yuma Ngwe Chize Yehova Akuyimona.”)

 ⁵Mumu lia kupwa yihenge kutuchi kuhasa kupatula yuma ni ululi mashimbu eswe. Zambi katutangile mu chano chenyi, kashika twakuzanga kulingila akwetu yuma yipema. (Uputu. 1:26) Alioze, mumu lia kupwa yihenge, chipwe muze mutunyonga ngwetu tuli ni sango jeswe, nihindu mutuhasa kupatwila atu ni uhenge. Yino ye yalingiwile kuli Yona. Kota unewuluka ngwo, Yona kakazangile chiyulo chize Yehova akwachile cha kukonekena akwa-Ninive. (Yona 3:10–4:1) Alioze, achinyonga ha yize yalingiwileko muze Yehova anakaasolwela keke. Atu kuhiana 120,000 mu Ninive, yalikonyeka chocho yaalamwina! Hachino, iya unakafupiwa kwalumuna nyonga lienyi, shina Yehova nyi Yona?

6. Mumu liaka Yehova kafupiwile kutulumbunwina yize akwachila yimwe yiyulo?

⁶Yehova kafupiwile kulumbunwina atu yize akukwachila yiyulo. Kwamba pundu, ha mashimbu amwe Yehova kechele tuvumbi twenyi hanga asolole manyonga jo ha yiyulo yize akwachile. (Uputu. 18:25; Yona 4:2, 3) Ha mashimbu akwo, te kakulumbununa mumu liaka akwata chimwe chiyulo. (Yona 4:10, 11) Alioze twatamba kunyingika ngwetu, Yehova kafupiwile kutulumbunwina yize akwachila yimwe yiyulo. Amu ali Sakatanga yetu, iye kafupiwile utayizo wetu shimbu kanda achikwata chiyulo hanji muze hachikwata.—Iza. 40:13, 14; 55:9.

7. Yika muyihasa kupwa yikalu kuli yetu, nawa mumu liaka?

⁷ Tukwete shindakenyo ngwetu, Yehova nihindu kakulinga yuma yalita mashimbu eswe. Alioze, muchihasa kupwa chikalu kujikijila hali atu waze iye hanatongola hanga asongwele ululikiso wenyi. Mutuhasa kulihula nyi atu jacho kakukaula lume usongwelo wa Yehova nyi kakulinga yuma kulita ni manyonga jo. Muchihasa kupwa ngwe, yino ye atu amwe anyongene ku mashimbu a kunyima. Tuchinyongenu ha yilweza yize twamona ha  paragrafu 3. Hanji umwe mu usoko wa lunga yoze wehukile shimbi ya Sambata kalihulile ngwenyi, shina Mose kahanjika lume ni Yehova shimbu te kanda achituma kushiha mutu wacho? Hanji umwe sepa lia Uriya Ka-Hete, lunga lia Mbate-shipa kanyongene ngwenyi, Ndawichi kamushihile mumu lia kupwa mwanangana. Kwamba pundu, kutushi kuhasa kwamba ngwetu, twakufuliela muli Yehova nyi kutushi kufuliela atu waze iye atongwele nawa akujikijila.

8. Kuchi ululikiso wa Yehova musono wakukaula Yilinga 16:4, 5, nawa kuchi chikungulwila cha akwa-Kristu chakukalakala musono?

⁸ Musono, Yehova kakusongwela ululikiso wenyi hano hashi kupalikila muli ‘ndungo wamwenemwene, wakanyama.’ (Mateu 24:45) Ndungo wacho, kakukaula chilweza cha chizavu cha tusongo ku sekulu yitangu, ha kufunga atu ja Zambi hashi heswe ni kuhana usongwelo kuli makulwana a mu chikungulwila. (Tanga Yilinga 16:4, 5.) Nawa makulwana kakusa tachi hanga mandumbu mu chikungulwila akaule usongwelo wacho. Nyi twononokena usongwelo uze twakutambula mu ululikiso ni kuli makulwana a mu chikungulwila, mutusolola ngwetu, twakufuliela mu mutapu uze Yehova akulingilamo yuma.

9. Ha mashimbu aka muchihasa kupwa chikalu kukaula usongwelo wa makulwana a mu chikungulwila, nawa mumu liaka?

⁹ Ha mashimbu amwe, muchihasa kupwa chikalu kukaula yiyulo ya makulwana a mu chikungulwila. Chakutalilaho, ha miaka yapalika yikungulwila ni mambonge (circuito) anji kayiluliekanga cheka hanji kuyiteta-teta. Ha mashimbu akwo, mba azachise kanawa Zuwo lia Wanangana, makulwana ketele mandumbu akwo hanga aye ni kukwasa ku yikungulwila  yeka. Muchihasa kupwa chikalu kuli yetu kukatuka mu chikungulwila muze muli masepa ni asoko jetu. Shina Yehova kakuhanjika ni makulwana ni kwalweza ku chikungulwila kuze matuma hita ndumbu? Ka. Chino muchihasa kututwala tuhone kukaula usongwelo uze akutwaha. Alioze Yehova kakujikijila hali makulwana ngwo, makwata yiyulo yalita ni yetu nawa che twatamba kulinga. *

10. Kulita ni A-Hepreu 13:17, mumu liaka twatamba kukwasa yiyulo ya makulwana a mu chikungulwila?

¹⁰ Mumu liaka twatamba kukwasa yiyulo ya makulwana a mu chikungulwila chipwe ngwe yiyulo yacho hi yize ko te tunashimbwila? Mumu nyi twachilinga, mutukwasa chikungulwila hanga chilinunge. (Efwe. 4:2, 3) Muze mandumbu eswe mu chikungulwila akulikehesa ni kukwasa yiyulo ya makulwana, chikungulwila cheswe chakuyuka. (Tanga A-Hepreu 13:17.) Chahiana ulemu, twakusolola ngwetu twakufuliela muli Yehova muze twakukwasa mandumbu waze iye atongwele hanga afunge chikungulwila.—Yili. 20:28.

11. Yika muyihasa kutukwasa kujikijila ha yiyulo ya makulwana a mu chikungulwila?

¹¹ Chuma chimwe chize muchihasa kutukwasa kujikijila ha yiyulo ya makulwana a mu chikungulwila, chili kunyingika ngwo, ayo kakulemba ni kwita spiritu yisandu muze anahengwola yikuma yize yinatale ha chikungulwila. Kakuhengwola nawa kanawa shimbi ja mu Mbimbiliya ni kukaula usongwelo wa mu ululikiso wa Yehova. Ayo kakuzanga chinji kuvwisa Yehova kuwaha ni kulinga yeswayo mahasa hanga afunge tuvumbi twenyi. Makulwana kali atu ashishika nawa kananyingika ngwo, makalumbununa yimwe kuli Zambi ha chize akufunga tuvumbi twenyi. (1 Petu. 5:2, 3) Tuchinyongenu ha chino: Hano hashi twatwama, atu kali akuhandununa mu yikowa, yingeleja ni mu yuma ya mafwefwe. Alioze atu ja Yehova kalinunga, mumu kakuwayila Zambi umuwika wamwenemwene. Kulinunga chacho chakulingiwa mumu Yehova kakwasa ululikiso wenyi!

12. Yika makulwana akulinga mba anyingike ngwo ndumbu yoze walinga shili kalikonyeka ni mbunge yeswe?

¹² Yehova hanahane kuli makulwana chiteli chilemu cha kufunga chikungulwila hanga chipwe chalinanga. Nyi umwe mukwa-Kristu malinga shili yinene, Yehova kakwita kuli makulwana hanga atale ha chikuma cha ndumbu wacho nyi manunga mu chikungulwila nyi ka. Makulwana kakufupa kunyingika nyi ndumbu wacho kalikonyeka ni mbunge yeswe ha yize alinga. Iye mahasa kusoloka ngwe kalikonyeka, alioze shina kanevwila lwaji yuma yize alinga? Shina kanase tachi hanga eche kulinga nawa shili yacho? Nyi iye kalinga shili mumu lia kulikata ni masepa api, shina kanazange lume kwecha kulikata ni atu jacho? Makulwana kakulemba kuli Yehova ni kuhengwola yeswe yize yalingiwako kulita ni Yisoneko, nawa kakuhengwola chize mutu yoze walinga shili anevu ha yize alinga. Hanyima lia kuhengwola yikuma yino yeswe, mba matesa nyi ndumbu wacho mahasa kununga mu chikungulwila. Ha yikuma yikwo, katamba kumusosolola mu chikungulwila.—1 Kori. 5:11-13.

13. Ha yika mutuhasa kulihulumba nyi sepa hanji usoko wetu mamusosolola mu chikungulwila?

¹³ Kuchi ujikijilo wetu hali makulwana a mu chikungulwila muuhasa kupwa mu cheseko? Nyi ndumbu yoze asosolola mu chikungulwila keshi sepa lietu hanji usoko, muchihasa kupwa chashi kutayiza chiyulo cha makulwana. Alioze, mutuhasa kunyonga cheka nyi mutu yoze asosolola kali sepa lietu wamwenemwene. Mutuhasa kunyonga ngwetu, makulwana kahengwile sango jeswe, hanji kulihula ngwetu, shina ayo kasopa lume mulonga wacho ngwe  chize Yehova te mausopa? Yika muyihasa kutukwasa mba tukwase chiyulo cha makulwana?

14. Nyi makulwana makwata chiyulo cha kusosolola umwe sepa hanji usoko, yika muyihasa kutukwasa?

¹⁴ Twiwulukenu ngwetu, kusosolola mutu yili yimwe jila yize Yehova akuzachisa hanga chikungulwila chipwe chalinanga. Nawa muchihasa kukwasa mutu yoze walinga shili. Nyi mutu yoze walinga shili yinene chakuhona kulikonyeka manunga mu chikungulwila, mahasa kutwala akwo hanga no alinge shili. (Ngala. 5:9) Nyi kamusosolwele, iye mahasa kunyonga ngwe yuma yize alinga hi shili ko, nawa ngwo kafupiwile kwalumuna manyonga ni yitanga yenyi hanga ahase kupwa nawa ni utayizo wa Yehova. (Chilu. 8:11) Tuli ni shindakenyo ngwetu, makulwana kananyingika ngwo, kali ni chiteli chinene cha kupatwila ndumbu nyi mamusosolola mu chikungulwila nyi ka. Kananyingika ngwo, chizechene ngwe ngaji a mu Izalele ku shakulu, ayo keshi ‘kulingila upatwilo hali atu alioze hali Yehova.’—2 Sango 19:6, 7.

15. Mumu liaka twatamba kujikijila ha usongwelo wa Yehova musono kuhiana ku mashimbu a kunyima?

¹⁵ Songo lia chifuchi chino linakundama, kashika tunafupiwa chinji kujikijila mu mutapu uze Yehova akulingilamo yuma musono, kuhiana ku mashimbu akunyima. Mumu liaka? Mumu ha mashimbu a luyinda munene, hanji mutukatambula usongwelo uze muukasoloka ngwe ukalu, hanji uze kutushi kahasa kuwononokena. Kwamba pundu, Yehova kechi kahanjika ni yetu meso ni meso. Chinasoloka ngwe iye makazachisa mandumbu waze apwa tusongo hanga atwehe usongwelo. Mashimbu jacho kechi kapwa mashimbu a kuhamika usongwelo uze mutukatambula, ha kulihula ngwe, ‘Shina usongwelo uno uli lume wa Yehova nyi wa mandumbu waze anatusongwela?’ Kutala ha mashimbu jacho, mukajikijila muli Yehova ni ha ululikiso wenyi? Kumbululo linatale ha chize unakaula usongwelo wa Yehova musono. Nyi wakujikijila ha usongwelo uze wakutambula musono ni kuwononokena chakuhona kuhamika, hanji ni ha luyinda munene che mukalinga.—Luka 16:10.

16. Kuchi ujikijilo wetu muli Yehova muuhasa kupwa mu cheseko kulutwe lia matangwa?

¹⁶ Nawa twatamba kunyonga kanawa ha chize mutukamona upatwilo uze Yehova makaneha hano hashi hapi. Tunashimbwila ngwetu, atu anji waze keshi kulingila Yehova, kuchingako asoko jetu, makwata chiyulo cha kumulingila shimbu songo kanda lichiza. Alioze ha Armagedone, kupalikila muli Yesu, Yehova makasakula waze makalamwina ni waze kechi kalamwina. (Mateu 25:31-33; 2 Tesa. 1:7-9) Hi yetu ko mutukasakula yoze makazuka keke ya Yehova ni yoze kechi kayizuka. (Mateu 25:34,  41, 46) Shina mutukafuliela ha upatwilo wa Yehova nyi mutukecha kumulingila mumu lia kuhona kutayiza yiyulo yenyi? Kwamba pundu, tunafupiwa kujikijila chinji muli Yehova haliapwila, mba kulutwe lia matangwa tukahase kujikijila muli iye ni mbunge yeswe.

17. Yuma yika yipema muyikalingiwa mumu lia Yehova kunongesa hano hashi hapi?

¹⁷ Shina hitunanyongo kama chize mutukevwa mu chifuchi chaha muze mutukamona yuma yize muyikeza ku upatwilo wa Yehova ha Armagedone? Uwayilo wa mahuza kuuchi kapwako nawa, akwa-kulinga mingoso ni akwa-mafwefwe waze akumwesa atu lamba, muyikapwa yuma ya kunyima. Misongo, ushinakaji ni kufwisa atu waze twazanga muyikapwa yuma yize hiyinapalika. Satana ni andemoniu jenyi makaasa mu zuwo lia ususu ha kanunu ka miaka. Yuma yeswe yipi yize ayo alingile mumu lia uhulia wo, kuyichi kapwako nawa. (Uso. 20:2, 3) Mutukamona ngwetu, chapemene chinji kufuliela mu mutapu uze Yehova akulingilamo yuma!

18. Kulita ni Kwalula 11:4-6; ni 21:5, yika mutuhasa kulilongesa hali A-Izalele?

¹⁸ Shina mu chifuchi chaha, mutukapalika mu yuma yize muyikeseka ufulielo wetu muli Yehova? Achinyonga ha yize yalingiwile kuli A-Izalele ha amwe mashimbu muze atuhukile mu undungo ku Engitu. Amwe yaputuka kulinyenyeta mumu lia kuhona yuma yize te akulia ku Engitu, chocho yalelesa manaa waze Yehova aahele. (Tanga Kwalula 11:4-6; 21:5.) Shina ni yetu mutukahasa kusolola yitanga ya mutapu au hanyima lia Armagedone? Kutwanyingikine mulimo uze mutukapwa nawo hanga tukalulieke hano hashi, ni mashimbu waze muukambata mba hashi hapwe paraisu. Muchihasa kupwa ngwe, mutukapwa ni milimo yinji ya kulinga, mumu yuma yeswe kuyichi kapwa yingunu ku uputukilo. Shina mutukalinyenyeta ha yuma yize Yehova makatwaha ha mashimbu jacho? Chuma twatamba kunyingika chili chino, nyi twakulemesa yuma yize Yehova akutwaha musono, muchikapwa chashi kuchilinga kulutwe lia matangwa.

19. Yikuma yika yilemu yize twalilongesa ha mutwe uno?

¹⁹ Ha mutwe uno twamonaho ngwetu, Yehova nihindu kakulinga yuma yalita. Twatamba kupwa ni shindakenyo ha chikuma chino. Nawa twamona ngwetu, twatamba kujikijila atu waze Yehova akutongola hanga afunge tuvumbi twenyi. Kanda tuvulama maliji waze Yehova atumine kusoneka kuli profeta wenyi Izaia ngwenyi: “Mu uhwimino ni ufulielo mumukapwa tachi jenu.”—Iza. 30:15.