1. Yika tuvumbi twa Yehova akulinga mumu lia zango?

MBIMBILIYA yambile kulu ngwo, atu ja Zambi te “malihana mulambu ni upale woene” hanga amulingile, nawa te machilinga ha kukaula usongwelo wa Yesu. (Samu 110:3) Kwamba pundu, uprofeto uno unamanunuka musono. Ha miaka yeswe, tuvumbi twa Yehova kakupalikisa tununu a tununu twa maola mu mulimo wa kwambujola. Ayo kakuchilinga mumu lia zango, nawa ha mashimbu amwe kakuhana yikumba yo hanga akwase mulimo wacho. Chikwo nawa, ayo kakukwasa mandumbu jo a ku ufulielo ha yize anafupiwa ku musunya, ku manyonga ni ku spiritu. Makulwana ni tuvumbi kakusa mashimbu anji alulieke pande jize akulinga ha kukunguluka ni kumeneka mandumbu hanga aatakamise. Yela ja Yehova kakulinga yuma yeswayi, mumu kakuzanga Yehova ni atu.—Mateu 22:37-39.

2. Kulita ni A-Roma 15:1-3, chilweza chika Yesu ahichikile?

² Yesu kahichikile chilweza chipema. Iye kapwile ni kulihulumba chinji hali akwo kuhiana hali iye mwene. Ni yetu tunase tachi hanga tukaule mu ngano jenyi. (Tanga A-Roma 15:1-3.) Nyi twachilinga, mutwivwa yize Yesu ambile ngwenyi: “Chinawaha kutambula alioze shinaho kuhana.”—Yili. 20:35.

3. Yika mutushimutwina ha mutwe uno?

³ Ha mutwe uno, mutushimutwinaho yuma yimwe yize Yesu alingile hanga akwase akwo, ni chize mutuhasa kwimbulula chilweza chenyi. Mutushimutwinaho nawa yize mutuhasa kulinga mba tupwe ni zango lia kukwasa akwetu.

4. Kuchi Yesu asolwele ngwenyi kakulihulumba hali akwo kuhiana hali iye mwene?

⁴Yesu kakwashile akwo chipwe muze te anahongo. Iye kapalikishile ufuku wa muwundu ni kulemba. Kapwile ku umwe mulundu, kota hakamwihi ni Kafwanaume. Esekenu kunyonga chize evwile muze amwene mbunga yinene ya atu kaneza kuli iye. Yaevwila keke, chocho yaputuka kuwuka mieji chipwe ngwe te kanahongo. Kakalingile wika yuma yino. Ha mashimbu jacho, he ahanjikile pande ja lukundwila jize twakuvuluka ngwo, Longeso lia ha Mulundu.—Luka 6:12-20.

5. Kuchi miata a mu usoko mahasa kwimbulula chilweza cha Yesu muze anahongo?

⁵Chize miata a mu usoko mahasa kwimbulula chilweza cha Yesu. Achinyongenu ha chino: Hanyima lia kukalakala chinji ku mulimo wenyi, umwe mwata wa mu usoko maheta ku zuwo kanahongo. Iye manyonga kwecha kulinga Uwayilo wa mu Usoko, alioze malemba kuli Yehova ni kwita tachi hanga ahase kuulinga, chocho Yehova makumbulula yilemba yenyi. Hachino, malinga uwayilo wo wa mu usoko. Chino muchikwasa ana jo kulilongesa chikuma chilemu. Ayo manyingika ngwo, yisemi jo kakusa yuma ya ku ufulielo ha chihela chitangu ku mwono wo.

6. Hana chilweza cha chize Yesu akwashile atu muze te anafupu kupwa ukawenyi.

⁶Yesu te kakukwasa akwo chipwe ha mashimbu waze anafupu kupwa ukawenyi. Shina hiunanyongo kama chize Yesu evwile muze amulwezele ngwo sepa lienyi Yoano Chipapachisa kamushiha? Yesu kota kevwile yinyengo yinji. Mbimbiliya yinambe ngwo: “Ha kuchivwa, [kufwa cha Yoano], Yesu yakatukako akaye mu ulungu ku puya kwa ukawenyi. Muze mbunga hachivwa, yakatuka ku membo, yamukaula hashi.” (Mateu 14:10-13) Mutuhasa kumona mumu liaka Yesu azangile kuya ni kutwama kwa ukawenyi. Atu anji muze akufwisa mutu yoze azanga kakufupa kutwama ukawo. Yesu neye che azangile kulinga, alioze kakahashile. Mbunga yinene ya atu yiyinyingika kuze te anayi, chocho ayo yalianga kuhetako shimbu iye te kanda achiheta. Yika Yesu alingile? Iye yanyonga ha yize atu jacho te anapalika, chocho “yaavwila keke.” Kanyingikine ngwenyi atu jacho te kanatoko ku ufulielo, nawa te  kanafupiwa ukwaso. Hachino, kawashi-washi “yaputuka kualongesa yuma yinji.”—Marku 6:31-34; Luka 9:10, 11.

7-8. Hana chimwe chilweza chize chinasolola ngwo makulwana kakwimbulula Yesu muze mandumbu mu chikungulwila akufupiwa ukwaso.

⁷ Chize makulwana a mu chikungulwila mahasa kwimbulula chilweza cha Yesu. Twakulemesa chinji milimo yeswe yize makulwana akutulingila! Kanji-kanji, mandumbu mu chikungulwila keshi kunyingika milimo yeswe yize ayo akulinga. Chakutalilaho, nyi umwe ndumbu mayiza susumuku, makulwana waze akukwasa ku chipatulo cha shipitali (Comissão de Ligação com Hospitais), kakumukwasa kawashi-washi. Kanji-kanji, yuma yacho yakulingiwa ha muchima ufuku! Makulwana a mu chikungulwila ni asoko jo kakusa yize mandumbu jo anafupiwa ha chihela chitangu kuhiana ya ayo ene. Ayo kakuchilinga mumu lia zango.

⁸ Chikwo nawa, makulwana kakukwasa kutunga Mazuwo a Wanangana ni mazuwo akwo waze akuzachisa mu ululikiso wa Yehova. Nawa kakukalakala mu chipatulo chize chakukwasa mandumbu waze anafupiwa ukwaso. Chakuhona kwamba maola waze akupalikisa hanga alongese ni kutakamisa mandumbu mu yikungulwila. Mandumbu wano eswe hamwe ni asoko jo kanatela kwachichimieka. Tunalembe hanga Yehova anunge ni kuwahisa mandumbu wano! Alioze kwamba pundu, chizechene ngwe yetweswe, makulwana no katamba kupwa ni nyonga lialita. Ayo katambile kupalikisa mashimbu eswe hakulinga milimo ya mu chikungulwila cha kuhona kusa mashimbu akukwasa asoko jo.

9. Kulita ni A-Fwilipu 2:4, 5, nyonga lika akwa-Kristu atamba kupwa nalio?

⁹ Tanga A-Fwilipu 2:4, 5. Yesu kahichikile chilweza chipema cha kusa upale wa akwetu kulutwe kuhiana wa yetwene. Hi makulwana a mu chikungulwila wika ko atamba kwimbulula chilweza chino. Tulieswe mutuhasa kuchilinga. Mbimbiliya yinambe ngwo: Yesu ‘walipwishile ndungo.’ (Fwili. 2:7) Achinyongenu yize mutuhasa kulilongesa ha versu yino. Ndungo hanji kavumbi, te kakufupa uhashi hanga evwise mwene wenyi kuwaha. Hachino, yetu tuli ndungo ja Yehova nawa tuvumbi twa mandumbu jetu. Kashika, tunazange kwimbulula Yesu ha kuvwisa Yehova kuwaha ni kulingila mandumbu jetu. Tutalenu chize mutuhasa kuchilinga.

10. Yihula yika mutuhasa kulihula?

¹⁰Hengwola kunyonga che. Lihule ngwe: ‘Shina nakutayiza kulinga yeswayo muyifupiwa hanga ngukwase mandumbu jami? Chakutalilaho, kuchi mungwivwa nyi mangwita hanga nguye ni kumeneka umwe kashinakaji ku zuwo kuze akufungila tushinakaji, hanji kukwasa umwe pangi kashinakaji hanga aye kukunguluka? Kutala nakulihana hanga ngukwase kukomba ku Zuwo lia Wanangana hanji kuze malingila kukunguluka cha mambonge?’ Muze twakulihana kuli Yehova, twakumulakenya ngwetu mutumulingila ni mbunge yetu yeswe. Jila yimwe yakuchilingila, yili kusa mashimbu ni yikumba yetu hanga tukwase mandumbu jetu. Muze twakuchilinga, Yehova kakuwahilila chinji. Mba yika mutulinga nyi mutunyingika ngwetu, tunafupiwa kululieka yimwe ha chikuma chino?

11. Kuchi kulemba muchihasa kutukwasa kupwa ni zango lia kukwasa akwetu?

¹¹Lemba kuli Yehova ni mbunge yeswe. Kota hiunanyingika ngwe, unafupiwa kululieka nyonga lie lia kusa upale wa akwenu kulutwe kuhiana wa yena mwene. Alioze wakulivwa ngwe kuushi kuhasa kuchilinga. Nyi chenacho, lemba kuli Yehova ni mbunge yeswe. Mulweze umwenemwene. Lweza Yehova chize unevu nawa mwite hanga akwehe zango ni tachi ja “kulinga chize chamupemena.”—Fwili. 2:13.

12. Kuchi akweze waze hanapapachisa mahasa kukwasa ululikiso wa Yehova?

¹² Nyi uli mukweze yoze hanapapachisa, lemba kuli Yehova hanga akukwase kupwa ni zango lia kulinga milimo mu chikungulwila. Mu yifuchi yinji, mu yikungulwila muli makulwana anji kuhiana tuvumbi, nawa anji a kuli tuvumbi jacho keshi nawa akweze. Ululikiso wa Yehova unanungu ni kukola. Kashika, kunafupiwa chinji akweze hanga akwase makulwana kufunga chikungulwila. Nyi mulihana hanga ulinge milimo yeka ni yeka, muwahilila chinji. Mumu liaka? Mumu yino muyivwisa Yehova kuwaha, mandumbu mu chikungulwila makujikijila nawa muwivwa chiseke chize chakwiza ha kukwasa akwenu.

13-14. Yika mutuhasa kulinga mba tukwase mandumbu jetu? (Tala chizulie ha chifukilo.)

¹³Nyingika yize akwenu anafupiwa. Postolo Paulu kalwezele akwa-Kristu A-Hepreu ngwenyi: “Kanda nuvulama kulinga yipema, ni kulianyina; mumu Zambi kakuwahilila chikolo ni yitapo ngwe yino.” (Hepre. 13:16) Chino chapwile chiyulo chipema! Mumu ha amwe mashimbu muze atambwile mukanda wacho, akwa-Kristu mu Yundeya ‘yachinyina ku milundu’ ha kuhichika mazuwo, milimo ni asoko jo waze te hi akwa-Kristu ko. (Mateu 24:16) Ha mashimbu jacho, chapwile chilemu chinji mandumbu kulikwasa umwe ni mukwo. Nyi ayo kapwile ni chako cha kulianyina  ni akwo yuma yize apwile nayo, acho chapwile chashi kuli ayo kwijilila ni mwono waha.

¹⁴ Ha mashimbu amwe, mandumbu keshi kutulweza ngwo kanafupiwa ukwaso. Chakutalilaho, hanji umwe ndumbu kananenganyana mumu lia kufwisa mukwo-pwo. Shina ndumbu wacho kanafupiwa ukwaso wa milimo yimwe ku zuwo ngwe kuteleka hanji kumukwasa kuya kumwe? Hanji iye keshi kutwita ukwaso mumu kazangile kutupinjisa. Alioze masakwilila chinji nyi twamukwasa shimbu kanda achitwita ukwaso wacho. Kutwatambile kunyonga ngwetu, akwetu akwo mamukwasa hanji ngwetu nyi mafupa ukwaso matulweza. Lihule ngwe: ‘Nyi yami mwe nguli mu kapinda wacho, kachi yika te munguzanga hanga akwetu angulingile?’

15. Yika twatamba kulinga nyi tunazange kukwasa akwetu?

¹⁵Pwako mutu mwashi. Kwamba umwenemwene, unanyingika mandumbu mu chikungulwila chenu waze akuzanga chinji kukwasa akwo. Ayo keshi kusolola ngwo kulinga chino chakwapinjisa. Nihindu twakwajikijila ngwetu matukwasa ha shimbu lieswalio. Kwamba pundu, ayo kali yilweza yipema yize tunazange kwimbulula! Alan, umwe mukulwana wa mu chikungulwila uli ni miaka 45, yamba ngwenyi: “Yesu kapwile ni milimo yinji, chipwe chocho, twanuke ni makulwana te kakulivwa kanawa ha kupwa hamwe nenyi ni kumwita ukwaso. Te kakumona ngwo Yesu kanalihulumba hali ayo. Kashika, ngunazange chinji kwimbulula Yesu hanga atu angunyingike ngwo, nguli mutu mwashi, mukwa-zango, nawa nakuzanga kukwasa akwetu.”

16. Kuchi kukaula Samu 119:59, 60, muchitukwasa kwimbulula kanawa chilweza cha Yesu?

¹⁶ Kutwatambile kunenganyana nyi kutwahashile kwimbulula Yesu ni ungunu weswe. (Tia. 3:2) Longi yoze unalilongesa kupwa fuli  kechi kuhasa kwimbulula longeshi yenyi ni ungunu weswe. Chipwe chocho, iye malilongesa ni yuma yize mahengesa nawa masa tachi hanga embulule kanawa longeshi yenyi. Hakupalika cha mashimbu, iye maputuka kulinga kanawa mulimo wenyi. Chizechene nawa, nyi mutukaula yize twakulilongesa mu Mbimbiliya ni kusa tachi hanga tululieke haze tunafupiwa, mutuhasa kwimbulula kanawa Yesu.—Tanga Samu 119:59, 60.

17-18. Yika mutuyuka nyi twasa upale wa akwetu kulutwe kuhiana wa yetwene?

¹⁷ Muze twakulihana hanga tukwase akwetu, no kakuzanga kuchilinga. Tim, umwe mukulwana wa mu chikungulwila, yamba ngwenyi: “Mandumbu amwe akweze kaatongwele ngwe tuvumbi, alioze chikuma chize anakaatongwela chili ngwo, ayo kamwene chize akwo analihane hanga akwase, chocho no yazanga kuchilinga. Akweze wano kakukwasa chinji chikungulwila hamwe ni makulwana.”

¹⁸ Twatwama mu chifuchi muze atu anji keshi kuzanga kukwasa akwo. Alioze tuvumbi twa Yehova kalisa ni atu jacho. Chilweza cha Yesu cha kusa upale wa akwo kulutwe kuhiana wa iye mwene chakutukomwesa. Kashika, tunazange kumwimbulula. Chipwe ngwe kutuchi kuhasa kwimbulula chilweza chenyi ni ungunu, nihindu mutuhasa kukaula “mu ngano jenyi” ni ushishiko weswe. (1 Petu. 2:21) Nyi twasa tachi hanga twimbulule chilweza cha Yesu, mutuwahilila ha kunyingika ngwetu tuli ni utayizo wa Yehova.