KU SHAKULU, lunga kapwile ni kuhana yihako kuli asoko ja pwo ha mashimbu a umbachiso. Kapwile ni kuhana yuma ya ndando kumahio ya pwo, ngwe tushitu hanji mbongo. Ha mashimbu amwe, kapwile ni kuyihana ha kukalakalila yisemi ja pwo, ngwe chize Yakomba alingile. Iye katayijile kukalakalila tato ya Rakele ha miaka shimbiali ngwe yihako hanga ambate mwanenyi. (Uputu. 29:17, 18, 20) Mumu liaka apwile ni kuhana yihako kumahio ya pwo?

Mukwa-kuhengwola yisoneko Carol Meyers, yamba ngwenyi: “Yihako kapwile ni kuyihana hanga afwete yisemi ja pwo, mumu te mambata mwano yoze wapwile ni kwalingila milimo, chino chapwile ni ulemu, chipi-chipi kuli [asoko waze apwile ni kulima.]” Yihako kapwile ni kuyihana nawa hanga akolese usepa uze te mupwa hakachi ka asoko ja lunga ni asoko ja pwo. Asoko jacho te mahasa kulikwasa ha mashimbu a lamba. Chikwo nawa, kuhana yihako chapwile ni kusolola ngwo, pwo hamwambisa, nawa ngwo te makatuka mu ufunge wa tato ni kumufunga kuli mukwo-lunga.

Kuhana yihako kumahio ya pwo, te kuchishi kusolola ngwo pwo kali chimwe chikumba chize atamba kulanda hanji kulanjisa. Mukanda umwe unambe ngwo: “Chikuma chino cha kuhana mbongo hanji chuma cheswacho kuli asoko ja pwo, chapwile ni kusolola kuli asoko jacho ngwo, kaaha fweto ya kulanda chimwe chuma.” (Israel Antigo—Sua Vida e Instituições.) Alioze chinasoloka ngwe yihako kapwile ni kuyimona ngwe ukwaso wa kukundulula nawo asoko ja pwo hi ngwe ndando ko ya kulanda nayo pwo.

Musono, mu yifuchi yimwe atu machinunga ni kukaula mianda ya kuhana yihako kumahio ya pwo. Muze yisemi akwa-Kristu akwita yihako hanga ahangise mwano, ayo kakusolola ‘umbovu wo kuli atu eswe’ ha kuhona kwita yuma yinji kuhiana chize te chatamba kupwa. (Fwili. 4:5; 1 Kori. 10:32, 33) Kulinga chino, chakusolola ngwo keshi “akwa kufwila mbongo” hanji akwa-kuzo. (2 Timo. 3:2) Nawa, nyi yisemi akwa-Kristu mahona kwita yuma yinji, lunga yoze unambe kumbata mwano keshi kushimbula chinji ha kumumbata, mumu ngwo yuma yize mahana kanda yichikumbana. Chikwo nawa, lunga yoze unambe kumbata mwano kechi kwecha upionelu, mumu ngwo katamba kukalakala chinji hanga apwe ni mbongo jinji jakuhana kumahio ya pwo.

Mu yifuchi yimwe, yihako kakuyihana hanga akaule shimbi. Nyi chenacho, yisemi akwa-Kristu kakwita yihako hanga ononokene shimbi jacho. Mumu liaka? Mumu Mbimbiliya yinambe ngwo, akwa-Kristu katamba ‘kuzeyela waze ali ni poko ya kuyula’ ni kwononokena shimbi jize kujishi kulimika ni shimbi ja Zambi.—Roma 13:1; Yili. 5:29.