KULITA ni Shimbi, tutele ni membe kapwile ni kwatayiza hanga aahane ngwe mulambu kuli Yehova. Tujila wano aali, kakwatongola hamuwika mu shimbi yize yakuhanjika hakutwala ku yitapo. Chikwo nawa, nyi mutu keshi ni katele kapwile ni kusalakanyisaho liembe. (Levi 1:14; 12:8; 14:30) Mumu liaka chino chapwile chilemu? Mumu ha mashimbu amwe chapwile chikalu kuwana tutele. Mumu liaka?

Mumu tutele kali tujila waze akwenda chinji, ayo kakupwa mu ngiza jeswe ja Izalele ha mashimbu a kusasaminya chinji. Hita mwaka ha kakweji wa Outubro, tujila jacho kakuya ku sule, ku yifuchi yize yakusasaminya chinji, mba himahiluka mu Izalele muze maheta ha mashimbu akusasaminya. (Mwaso 2:11, 12; Jere. 8:7) Chino chinasolola ngwo, ku shakulu, chapwile chikalu kuli A-Izalele kuhana tutele ngwe mulambu ha mashimbu a chishika.

Alioze membe keshi kwenda chinji, kashika chapwile chashi kwawana mu Izalele ha tukweji eswe ha mwaka. Chikwo nawa, membe kakwapita. (Tala nawa Yoano 2:14, 16.) Kulita ni umwe mukanda, “Atu kapwile ni kupita membe mu yihunda yeswe ya ku Palestina. Hita mutu yoze te wa kupita membe, kapwile ni chikalanga hanji wina ku chikalakala cha zuwo kuze tujila jacho te akupomba.” (Plantas Bíblicas e Animais).—Tala nawa Izaia 60:8.

Yehova kasolwele ngwenyi, kali Zambi ya zango yoze keshi kukalisa yuma ha kutayiza hanga A-Izalele alambule tujila waze te ashi kuwana nawa te akusoloka tukweji eswe ha mwaka.