1. Yika Yesu alwezele tumbaji twenyi hakutwala ku songo lia hano hashi, nawa utowezo uka aehele?

 HA AMWE mashimbu muze Yesu te kanda achifwa, tumbaji twenyi awana yamuhula ngwenyi: “Chilayi cha kuheta che chika, ni cha kumanunuka cha miaka?” (Mateu 24:3) Tumbaji jacho kota kahulile hakutwala ku yize te muyaakwasa kunyingika shimbu lize te manongesa Yerusaleme ni tembele. Ha kumbululo lize Yesu ahanyine, iye kakahanjikile wika ha kunongesa cha Yerusaleme ni tembele, alioze yahanjika nawa ha “kumanunuka cha miaka,” mashimbu wano tuli. Hakutwala ku tangwa ni ola yize songo muliza, Yesu yamba ngwenyi: “Niumwe kayinyingikine, chipwe angelo, chipwe mwe Mwana ka, ndo Tata, wika.” Hachino, yatoweza tumbaji twenyi eswe hanga anunge ni ‘kulawola.’—Marku 13:32-37.

2. Mumu liaka chapwile chilemu kuli Akwa-Kristu ku sekulu yitangu kununga ni kulawola?

² Akwa-Kristu A-Yunda ku sekulu yitangu, katambile kununga ni kulawola mba te alamwine mwono wo. Yesu kalwezele tumbaji twenyi yuma yize te muyaakwasa kunyingika ngwo, kwasala hakehe hanga Yerusaleme ni tembele ayinongese. Yamba ngwenyi: “Muze munumona Yerusaleme hayijingilika ni yilombo ya maswalale, hohene nukanyingike ngwenu, Kukuwa chayo hichakundama.” Ha shimbu liacho, o te katamba kwononokena utowezo wa Yesu ni ‘kuchinyina ku milundu.’ (Luka 21:20, 21) Waze akawile utowezo wacho yalamwina mwono wo muze Yerusaleme ayinongesele kuli A-Roma.

3. Yika mutuhengwola ha mutwe uno?

 ³ Musono tuli ku songo lia hashi hano hapi. Kashika ni yetu twatamba kununga ni kulawola. Ha mutwe uno, mutuhengwolaho yize muyitukwasa kupwa ni nyonga lialita hakutwala ku yuma yize yinalingiwa hano hashi, chize mutuhasa kukeya hali yetu ene ni chize mutuzachisa mashimbu waze asalako.

4. Mumu liaka twatamba kulihulikila ha yuma yinalingiwa hano hashi yize yinamanununa uprofeto wa mu Mbimbiliya?

⁴ Hi chipi ko kulihulikila ha yuma yinalingiwa hano hashi yize yinamanununa uprofeto wa mu Mbimbiliya. Chakutalilaho, Yesu katulwezele yuma yize te muyitukwasa kunyingika ngwo, songo lia hano hashi linakundama. (Mateu 24:3-14) Postolo Petulu kanatukolweza tulihulikile ha yuma yize yinamanununa uprofeto hanga tununge ni kukolesa ufulielo wetu. (2 Petu. 1:19-21) Mukanda wa kasula wa Mbimbiliya unaputuka ni maliji wano: “Usolwelo wa Yesu Kristu, uze Zambi amuhele mukulweza kuli ndungo jenyi chize chatamba kupwa nikawashi.” (Uso. 1:1) Kashika, chino chakutukwasa kulihulikila ha yuma yize yinalingiwa hashi ni kunyingika chize yinamanununa uprofeto wa mu Mbimbiliya. Chikwo nawa, twakuwahilila chinji kulweza akwetu yuma yacho.

5. Yika twatamba kwehuka, mba yika twatamba kulinga? (Tala nawa yizulie.)

⁵ Muze tunahanjika hakutwala ku uprofeto wa mu Mbimbiliya, twatamba kwehuka kutaka yuma yize kutwanyingikine. Mumu liaka? Mumu nyi twataka yuma, mutuhasa kuhandununa mandumbu mu chikungulwila. Chakutalilaho, mutuhasa kwivwa manguvulu mahanjika ha yize malinga hanga anehe sambukila ni ukulungunga. Shimbu tutake ngwetu yuma yize manguvulu anahanjika muyimanununa uprofeto uli ha 1 A-Tesalonika 5:3, twatamba kutanga ulumbunwiso waha uze uli mu mikanda yetu. Nyi mutuhanjika yuma yize yinakatuka mu mikanda ya mu ululikiso wa Yehova, mutukwasa chikungulwila chilinunge “hamuwika mu kunyonga chimuwika.”—1 Kori. 1:10; 4:6.

6. Malongeso aka mutuhasa kuwana ha 2 Petulu 3:11-13?

⁶ Tanga 2 Petulu 3:11-13. Postolo Petulu kanatukwase hanga tupwe ni nyonga lialita muze tunahengwola uprofeto wa mu Mbimbiliya. Kanatukolweza hanga tununge ni “kupupwisa kuheta cha tangwa lia Zambi.” Mumu liaka? Hi ko ngwo mumu tunazange kunyingika “tangwa ni ola” yize Yehova maneha Armagedone, alioze mumu tunazange kuzachisa kanawa mashimbu waze asalako hanga tupwe “ni kwenda chisandu.” (Mateu 24:36; Luka 12:40) Mu maliji akwo, tunazange kusolola yitanga yipema ni kusa shindakenyo ngwetu, yuma yeswe yize twakulingila Yehova yili mumu twakumuzanga. Mba tufunge nyonga liacho, twatamba kukeya hali yetu ene.

7. Kuchi twakusolola ngwetu tunakeye hali yetu ene? (Luka 21:34)

⁷ Yesu kalwezele tumbaji twenyi ngwenyi, katambile wika kulihulikila ha yuma yize yinalingiwa hano hashi, alioze ni hali ene nawa. Chikuma chino chinasoloka zwalala ha utowezo uze uli ha Luka 21:34. (Tanga.) Yesu kambile ngwenyi: “Keyelenu hali yenwene.” Mutu yoze wakukeya hali mwene  kakunyingika yuma yize muyihasa kupihisa usepa wenyi ni Yehova ni kusa tachi hanga ayehuke. Kulinga chino, muchisolola ngwo kanalifungu mu zango lia Zambi.—Yishi. 22:3; Yunda. 20, 21.

8. Yika postolo Paulu alwezele Akwa-Kristu?

⁸ Postolo Paulu kalwezele Akwa-Kristu hanga akeye hali ene. Chakutalilaho, kalwezele Akwa-Kristu mu Efwesu ngwenyi: “Talenu kanawa ku kwenda chenu. Kanda nwenda ngwe waze keshi mana, alioze endenu ni mana.” (Efwe. 5:15, 16) Satana kanate miheto yinji hanga apihise usepa wetu ni Yehova, kashika twatamba kukaula yiyulo ya mu Mbimbiliya hanga ‘tunyingike upale wa Yehova,’ mba tuhase kwehuka miheto yacho.—Efwe. 5:17.

9. Kuchi mutuhasa kunyingika kanawa upale wa Yehova?

⁹ Mbimbiliya kuyishi kutulweza yuma yeswe yize muyihasa kupihisa usepa wetu ni Yehova. Ha yisuho yimwe twakufupiwa kukwata yiyulo ha yuma yize Mbimbiliya kuyishi kuhanjika zwalala. Mba tukwate yiyulo ya mana, twatamba kunyingika kanawa ‘upale wa Yehova.’ Mutuhasa kuchilinga ha kulilongesa Mbimbiliya ni kupukuna ha yize tunalilongesa. Nyi twanyingika kanawa upale wa Yehova ni kupwa ni “kunyonga cha Kristu,” muchitukwasa kwenda “ni mana,” chipwe muze kukushi shimbi yize yinatusongwela kulinga chimwe chuma. (1 Kori. 2:14-16) Ha mashimbu amwe, chakupwa chashi kunyingika yuma yize twatamba kwehuka, alioze ha mashimbu akwo chakupwa chikalu kuyinyingika.

10. Yuma yika yipi yize twatamba kwehuka?

¹⁰ Yuma yimwe yipi yize twatamba kwehuka yili, kusolola zango lia ulo kuli mutu yoze kutuchi kulimbata nenyi, kuzengewa, kulia ni kuhianyisa, kuhanjika yuma yize muyilemeka akwetu, yiheho ya upupilo, yizulie ya sonyi ni yuma yikwo yalifwa. (Samu 101:3) Mukwa-kole yetu Ndiapu, kakufupa uhashi mashimbu eswe hanga apihise usepa wetu ni Yehova. (1 Petu. 5:8) Nyi kutwakanyamine, Satana mahasa kutumba mu manyonga ni mu mbunge yetu mbuto ya chipululu, kuhona kuhanjika umwenemwene, kole, kulizata ni kutulikila akwetu toto. (Ngala. 5:19-21) Ku uputukilo, mutuhasa kunyonga ngwetu yitanga yacho kuyichi kuneha ponde. Alioze nyi kutwayehukile ni kawashi, muyinunga ni kukola ngwe mutondo wa ulembe, chocho muyitunehena kapinda.—Tia. 1:14, 15.

11. Ponde yika yahengama yize twatamba kwehuka, nawa mumu liaka?

¹¹ Ponde yimwe yahengama yili masepa api. Tutalenu chilweza chino. Tunyongenu ngwe wakukalakala ni mutu yoze keshi kuwayila Yehova. Yena muzanga hanga iye apwe ni nyonga lipema hali Yela ja Yehova, chocho mumusolwela zango ni kumukwasa. Ha mashimbu amwe, munuya ni kulia hamuwika. Yena muchilinga ha yisuho yinji. Muze nuli hamuwika, iye mahanjika yuma ya upangala, ku uputukilo yena muyipangula. Hakehe-hakehe, muputuka kuzanga lusango wacho ni kumumona ngwe hi mupi ko. Tangwa limwe, iye makusanyika hanga nunwe walwa hanyima lia mulimo, mba mutayiza. Hachino, muputuka kunyonga ngwe iye. Kukuchi kupalika mashimbu anji, muputuka kulinga yuma ngwe yize iye akulinga. Yetu twakuzanga kusolola zango ni vumbi kuli atu eswe, alioze twatamba kwiwuluka ngwetu nyi kutwakeyele mutuhasa kupwa ni yitanga ya atu waze twakulikata no. (1 Kori. 15:33) Nyi twakeya hali yetu ene, kutuchi kulikata chinji  ni atu waze keshi kuwayila Yehova. (2 Kori. 6:15) Chino muchitukwasa kumona ponde ni kuyichina.

12. Yika tumbaji twa Yesu atambile kulinga muze te anashimbwila kunongesa cha Yerusaleme ni tembele?

¹² Yesu kakazangile hanga tumbaji twenyi atwame chakuhona kukalakala muze anashimbwila songo lia yuma ya mwakono. Kashika, yaaha mulimo wa kulinga. Yaatuma hanga ambujole sango lipema “mu Yerusaleme, ni mu Yundeya mweswe, ni mu Samaria, ni ndo ku masongo a hashi.” (Yili. 1:6-8) Tumbaji twa Yesu katambwile mulimo unene! Muze akulinga mulimo wacho, o kakuzachisa kanawa mashimbu jo.

13. Mumu liaka twatamba kuzachisa kanawa mashimbu jetu? (A-Kolosu 4:5)

¹³ Tanga A-Kolosu 4:5. Mba tukeye hali yetwene, twatamba kunyonga ha chize twakuzachisa mashimbu jetu. Yuma yize yakulingiwa susumuku muyihasa kukwata hali hita umwe wa kuli yetu. (Chilu. 9:11) Mutuhasa kutokesa mwono wetu susumuku.

14-15. Kuchi mutuhasa kuzachisa kanawa mashimbu jetu? (A-Hepreu 6:11, 12) (Tala nawa chizulie.)

¹⁴ Mutuhasa kuzachisa kanawa mashimbu jetu, ha kulinga upale wa Yehova ni kukolesa usepa wetu ni iye. (Yoa. 14:21) Twatamba  ‘kujikiza, chakuhona kukokoloka ni kulihana chinji mu milimo ya Mwene.’ (1 Kori. 15:58) Nyi twachilinga, muze songo muliza chipwe songo lia mwono wetu hanji lia hano hashi kutuchi kaliseha.—Mateu 24:13; Roma 14:8.

¹⁵ Musono, Yesu machinunga ni kusongwela tumbaji twenyi mu mulimo wa kwambujola Wanangana wa Zambi hashi heswe. Iye kanamanununa chilakenyo chenyi. Kupalikila ha kukunguluka ni mu mikanda yetu, Yesu kakutulongesa chize twatamba kwambujola sango lipema. Kakutwaha nawa yuma yeswe yize tunafupiwa hanga tulinge kanawa mulimo wacho. (Mateu 28:18-20) Twakulinga yize Yesu anashimbwila hali yetu ha kusa tachi hanga twambujole kuli atu ni kwalongesa ni kununga ni kulawola ha kushimbwila muli Yehova ndo haze manehena songo lia hano hashi. Nyi mutukaula chiyulo chize chili ha A-Hepreu 6:11, 12, mutukakaminya kutalatala chetu “ndo kusongo.”—Tanga.

16. Yika twatamba kununga ni kulinga?

¹⁶ Yehova hanatese tangwa ni ola yize manongesa hano hashi ha Satana. Muze tangwa liacho muliza, Yehova makamanuna yilakenyo yenyi yeswe yize yili mu Liji lienyi. Alioze, ha mashimbu amwe muchihasa kusoloka ngwe songo lia hano hashi linashimbula chinji. Chipwe chocho, tangwa lia Yehova mulikeza ‘kulichi kahona.’ (Haba. 2:3) Hachino, twatamba kununga ni ‘kutala kuli Yehova ni kutwaminyina Zambi ya ulamwino wetu.’—Mika 7:7.