1. Ulemu uka mwono wetu ukwete kumeso ja Yehova?

 ACHINYONGA ngwe umwe sepa lie kakwaha chawana cha zuwo. Zuwo liacho lili ni miaji nawa liakuhita. Chipwe ngwe lili ni miaji, nihindu linafwika tununu a tununu twa ndolare. Kwamba umwenemwene, muzanga zuwo liacho ni kulifunga. Chizechene nawa, Yehova hanatwehe chimwe chawana chilemu—chawana cha mwono. Yehova kakusolola chize akulemesa mwono wetu ha kuhana Mwanenyi ngwe chitapo.—Yoa. 3:16.

2. Kulita ni 2 A-Korindu 7:1, yika Yehova anashimbwila hali hita umwe wa kuli yetu?

² Yehova mwe Chishina cha mwono. (Samu 36:9) Postolo Paulu neye te kakufuliela ha maliji jacho, kashika ambile ngwenyi: “Muli iye tuli ni mwono, muli iye twakwenda.” (Yili. 17:25, 28) Hachino mutuhasa kwamba ngwetu, mwono uli chawana chize Yehova atuhele. Iye kakutuzanga, kashika akutwaha yuma yeswe yize tunafupiwa hanga tununge ni mwono. (Yili. 14:15-17) Alioze ha mashimbu wano, Yehova keshi kulinga yikomokeso hanga afunge mwono wetu. Iye kanashimbwila hanga hita umwe wa kuli yetu ase tachi alifunge ku mujimba ni ku spiritu. (Tanga 2 A-Korindu 7:1.) Mumu liaka twatamba kufunga mwono wetu, nawa kuchi mutuhasa kuchilinga?

3. Yika yakututwala mba tufunge mwono wetu?

³ Chikuma chimwe chize chakututwala mba tufunge mwono wetu, chili ngwo mumu tunazange kulingila kanawa Yehova.  (Marku 12:30) Mukanda wa A-Roma 12:1 unambe ngwo, twatamba ‘kutumbikila mijimba yetu ngwe mulambu wa mwono, usandu, wa kupemena chikolo kuli Zambi.’ Kashika, kutwatambile kulinga chuma nichimwe chize muchitutwala hanga tuyize. Tunanyingika ngwetu chipwe ngwe mutusa tachi hanga tufunge mwono wetu, nihindu mutuyiza. Alioze, twatamba kulinga yize mutuhasa hanga tulifunge ni kusolola kuli Yehova ngwetu, twakulemesa mwono.

4. Yika Ndawichi azangile kulinga?

⁴ Ndawichi kalumbunwine yize yamukwashile kumona mwono ngwo, uli chawana cha Zambi, ha kusoneka ngwenyi: “Chika muuyuka ha kufwa chami? Nyi nafwa, chika muwandaho? Afu mahasa kukuchichimieka, nyi? Mahasa kwambujola utu we wahiana, nyi?” (Samu 30:9) Muchihasa kupwa ngwe, Ndawichi kota kasonekene maliji wano muze te hikwasala hakehe hanga afwe. Chipwe chocho, iye kazangile kununga ni mwono hanga awayile Yehova. Chochene, lino lie nyonga lia yetu eswe.

5. Yika mutuhasa kulinga chipwe ngwe tunayiji hanji twashinakajiwa?

⁵ Muchihasa kupwa ngwo mumu lia yikola hanji ushinakaji, kutuchi kuhasa kukalakala ngwe chize twapwile ni kulinga kunyima. Yino muyihasa kutuvwisa uli hanji kunenganyana. Chipwe chocho, kutwatambile kulitwamina kufunga mwono wetu. Mumu liaka? Mumu chipwe ngwe tunapinji ni umwe musongo hanji ushinakaji, yetu eswe mutuhasa kuwayila Yehova ngwe chize alingile Ndawichi. Kunyingika ngwo tuli alemu kumeso ja Zambi, chakututakamisa chinji chipwe muze tunayiji hanji twashinakajiwa! (Mateu 10:29-31) Chipwe ngwe mutufwa, nihindu Yehova makatuhindwisa. (Yombi 14:14, 15) Yino yeswe yinatukwase kumona ngwetu, muze tuli ni mwono twatamba kusa tachi hanga tuufunge.

6. Yika Yehova anashimbwila hali yetu hakutwala ku yize mutulia ni yize mutunwa?

⁶ Chipwe ngwe Mbimbiliya hi mukanda ko wa uwukiso hanji uze wa kulongesa yize mutu atamba kulia, nihindu yikwete nyonga lia Zambi hakutwala ku yuma yacho. Chakutalilaho, iye kanatulweza hanga ‘tuhume yikola’ yize muyihasa kupihisa mujimba wetu. (Chilu. 11:10) Mbimbiliya yinambe ngwo, kutwatambile kulia ni upulutu chipwe kunwa walwa unji. Yuma yino muyihasa kupihisa mwono wetu hanji kutushiha. (Yishi. 23:20) Yehova kanashimbwila hanga tupwe ni kulihumikiza hakutwala ku yize mutulia ni yize mutunwa.—1 Kori. 6:12; 9:25.

7. Kuchi Yishima 2:11 unatukwase kukwata yiyulo yipema hakutwala ku kufunga mujimba wetu?

⁷ Mutuhasa kukwata yiyulo yize muyisolola ngwo, twakulemesa mwono ha kuzachisa kanawa uhashi wa kunyonga chetu. (Samu 119:99, 100; tanga Yishima 2:11.) Chakutalilaho, mutuhasa kusakula kanawa yize mutulia. Nyi twakuzanga chimwe kulia, alioze kulia chacho chakutuyijisa, muchilita kwecha kuchilia. Twakusolola mana muze twakusa mashimbu hanga tupombe kanawa, tunane-nane mujimba, tulinange ku mujimba ni kululieka zuwo lietu.

8. Kulita ni Mbimbiliya, nyonga lika Yehova ali nalio hakutwala ku kulifunga ku ponde?

⁸ Yehova kahanyine Shimbi kuli A-Izalele hanga ehuke ponde muze anakalakala ni muze ali ku mazuwo jo. (Kutuhu. 21: 28, 29; Shimbi 22:8) Nyi mutu mashiha mukwo ku ponde te kakupalika mu yuma yinji. (Shimbi 19:4, 5) Shimbi te yakwamba ngwo, nyi mutu mavulumuna mwana yoze uli mu jimo lia naye chipwe ngwe kachihalile, neye te katamba kumufunyishina upi wacho. (Kutuhu. 21:22, 23) Mbimbiliya yinasolola zwalala ngwo, Yehova kanazange hanga tulifunge ku ponde.

9. Yika twatamba kulinga mba twehuke ponde? (Tala nawa yizulie.)

⁹ Twakusolola ngwetu, twakulemesa chawana cha mwono ha kulifunga muze tuli ku zuwo ni muze tuli ku mulimo. Chakutalilaho, kutwatambile kusa hatoma yuma yize muyihasa kusa twanuke mu ponde ngwe, poko, yitumbo hanji yuma yikwo yize muyihasa kwalinga upi. Muze tunambila yuma yacho, twatamba kusa shindakenyo ngwetu, twayimbila kusuku ni twanuke. Twatamba kukanyama ha kuzachisa kahia, meya a kahia ni yikwata yize yakukalakala ni kahia ka zembwe. Kutwatambile kwendesa mashinyi hanji mota muze hitwanwa walwa, yitumbo ni muze tunevu tulo, chipwe kuhanjika ku telefone muze tunendesa.

10. Yika twatamba kulinga shimbu kanda kulingiwa luyinda ni muze analingiwa?

¹⁰ Ha yisuho yimwe, chakupwa chikalu kwehuka yuma yipi yize muyilingiwako. Yuma yacho muyihasa kupwa luyinda wa chisemewa, misongo ni jita. Chipwe chocho, muze yuma yino muyilingiwa mutuhasa kulinga yimwe hanga tulifunge, ngwe kwononokena shimbi ja nguvulu ha kuhichika chihela chize muchisa mwono wetu mu ponde ni kukaula usongwelo weswawo matwaha. (Roma 13:1, 5-7) Ha mashimbu amwe, mutuhasa kunyingika ngwetu mukulingiwa umwe luyinda, hachino muchilita kukaula usongwelo weswawo matwaha kuli nguvulu hanga tulilulieke. Chakutalilaho, twatamba kululieka mushete wa kuchina nawo muze mutusa meya, kulia chize kuchishi kupiha ni kawashi ni yitumbo.

11. Yika twatamba kulinga nyi umwe musongo upi muulitanda kuze twatwama?

¹¹ Yika mutuhasa kulinga nyi umwe musongo upi muulitanda kuze twatwama? Twatamba kukaula usongwelo uze nguvulu akuhana ngwe wa kusana ku moko, kulisela tando ni akwetu, kuzala kafuza ni kulisosolola hakachi ka akwetu nyi twakwachika musongo wacho. Nyi twalinga yuma yino yeswe, mutusolola ngwetu twakulemusa chawana cha mwono.

12. Kuchi Yishima 14:15 unatukwase kunyingika sango jize twatamba kutayiza?

¹² Muze kunalingiwa yimwe yize muyisa mwono wetu mu ponde, mutuhasa kwivwa sango ja mahuza kuli masepa, enyembo jetu ni mu jila ya fuji. Shimbu tutayize “maliji eswe” waze mutwivwa, muchilita kukaula usongwelo wamwenemwene wa nguvulu ni wa mandotolo. (Tanga Yishima 14:15.) Chizavu cha Tusongo ni Mambetele a hashi heswe, kakusa tachi hanga ahengwole sango jamwenemwene shimbu kanda achihana usongwelo hakutwala ku kukunguluka ni kwambujola. (Hepre. 13:17) Muze twakukaula usongwelo wacho, twakulifunga ni kufunga akwetu. Chikwo nawa, twakuhana uchela upema ha ululikiso wetu.—1 Petu. 2:12.

13. Kuchi kwononokena shimbi ya Zambi hakutwala ku manyinga chakusolola ngwo twakulemesa mwono?

¹³ Atu anji kananyingika ngwo, Yela ja Yehova kakufuliela ngwo manyinga kapwa asandu. Yetu twakwononokena shimbi ya Yehova ha kuhona kuhana manyinga ni kuhona kwatambula chipwe muze tunayiji. (Yili. 15:28, 29) Alioze, chino kuchalumbunukine ngwo twakuzanga kufwa. Yetu twakulemesa chawana cha mwono chize Zambi hanatwehe. Kashika, twakufupa mandotolo waze mahasa kutuwuka chakuhona kuzachisa manyinga.

14. Kuchi mutuhasa kwehuka kutupasula hanji kulinga uwukiso ukalu chinji?

¹⁴ Nyi twafunga kanawa mwono wetu ha kukaula yuma yize twamona ha mutwe uno, hanji kutuchi kufupiwa kutupasula chipwe kulinga uwukiso ukalu chinji. Nyi mutufunga kanawa mwono wetu, muze matupasula mutuhasa kuhinduka kawashi ku musongo wacho. Chikwo nawa, nyi mutululieka zuwo lietu ni ku chihela cha mulimo wetu ni kwononokena shimbi ja mu tapalo, mutuhasa kwehuka ponde.

15. (a) Mumu liaka twatamba kusoneka mukanda wetu uze wakusolola ngwo, kutushi kutambula manyinga? (Tala nawa chizulie.) (b) Kulita ni chinema, kuchi mutuhasa kusolola ngwetu, kutushi kutambula uwukiso uze wakumbata manyinga?

¹⁵ Yetu twakulemesa mwono, kashika twakulianga kusoneka mukanda wakwamba ngwo, kutushi kutambula manyinga ni  kuumbata kweswako mutuya. b Ha mukanda wacho twakusonekaho nyonga lietu hakutwala ku manyinga ni uwukiso ukwo. Shina mukanda we wakuhona kutambula manyinga uli wa kusoneka? Nyi ngwe unafupu kusoneka waha chilinge ni kawashi. Nyi twalianga kusoneka uwukiso uze kutushi kutambula, kulutwe kutuchi kapwa ni kapinda wa kulumbunwina ndotolo nyonga lietu. Chikwo nawa, muchikwasa mandotolo hanga achine kutwaha uwukiso uze muusa mwono wetu mu ponde. c

16. Yika mutuhasa kulinga nyi ngwe mutuwana kapinda ha kusoneka mukanda wakwamba ngwo, kutushi kutambula manyinga?

¹⁶ Chipwe ngwe tuli akweze, tunalivu kanawa ku mujimba, ha shimbu lieswalio mutuhasa kulemana hanji kuyiza. (Chilu. 9:11) Kashika, mutuhasa kusolola mana ha kusoneka mukanda unasolola ngwo, kutushi kutambula manyinga. Nyi ngwe muwana kapinda wa chize watamba kusoneka mukanda uno, eta ukwaso kuli makulwana a mu chikungulwila. Ayo makukwasa umone chize muhasa kusoneka mukanda wacho, alioze hi ayo ko makukwachila chiyulo cha uwukiso uze watamba  kutambula. Achi chili chiteli cha yena mwene. (Ngala. 6:4, 5) Ayo makukwasa wika kunyingika nyonga lie ni kulisoneka ha mukanda wacho.

17. Kuchi mutuhasa kusolola ngwetu tuli yimbovu hakutwala ku chikuma cha uwukiso?

¹⁷ Yiyulo yinji yize twakukwata hakutwala ku mwono wetu ni uwukiso yakukatuka mu Mbimbiliya. (Yili. 24:16; 1 Timo. 3:9) Muze tunakwate yiyulo ni kuyilweza kuli akwetu, twatamba kwiwuluka A-Fwilipu 4:5 unambe ngwo: “Umbovu wenu ukamoneke kuli atu eswe.” Nyi twapwa yimbovu kutuchi kulihulumba chinji ha mwono wetu, chipwe lume kushinjila akwetu hanga atayize nyonga lietu hakutwala ku uwukiso. Twakuzanga ni kuvumbika mandumbu jetu chipwe muze akukwata yiyulo yalisa ni ya yetu.—Roma 14:10-12.

18. Kuchi mutuhasa kusolola ngwetu twakusakwilila Yehova ha kutwaha chawana cha mwono?

¹⁸ Twakusakwilila Yehova, Chishina cha mwono ha kumulingila ni ha kufunga kanawa chawana chize atuhele. (Uso. 4:11) Ha mashimbu wano, mutupinda ni misongo ni yuma yikwo yipi. Alioze, uno hi mwono ko uze Sakatanga wetu azangile hanga tupwe nawo. Kwasala hakehe, iye matwaha mwono wa mutolo uze kuushi yikola chipwe kufwa. (Uso. 21:4) Shimbu tangwa liacho kanda liheta, mutununga ni kulemesa mwono uze Yehova atuhele ni kumuwayila ni mbunge yeswe!